Málúkus 1
1
Nitúmín ní insɔ́m yi indámb
(Mat 3.1-6; 11.12; Lúk 3.1-6; 15.18)
1Índɛ́ anɛ insɔ́m yi indámb iyoosonée Yésus Kilíise#1.1 Kílístuse: anakáanɛ́ punyɛ́ ɛ́ɛ́ Osótí, Oŋokí., Muɔ́nɔ́ u Támbák, túmenée. 2Ɔmfiɔ́ŋ ú Ísayí, eŋémímekelíe má Támbák, ɔ́ɔ́kɔɔyɔ ɛ́ɛ́: «Iŋúɛ Támbákɛ́ɛ, yoófookosi oŋoyí insɔ́m waamɛ, úkutɛ́fɛn iŋilí yaawɔ.» 3Únyi ekelú ú mɔɔnd úpékené ɔ́ kiɔ́sɔ́kɔlíɔ wɔ́ɔ́yɔ ɛ́ɛ́: «Ɛ́nutɛ́fɛ́n Ɔkɔ́n iŋilí yɛɛyɛ́, énutényíkényényí piáŋ píɛ́yɛ́!» 4Kɔ́ɔkɔ́ Isáaŋɛ, Etuúsí, moól ɔ́ kiɔ́sɔ́kɔlíɔ, upílan pɛɛnd kí induén. Wɔɔyɔn pɔ́ ɛ́ɛ́: «Ónuólon. Nusendi kusɔ́t ínútuenen, akáánɛ́ Támbák núyapɛn á pifal píánɔ́.» 5Pɛɛnd peem pɔ́ kitɔŋ kí Yúta ne epé pamaápá Yelúsalɛm yuukan ku Isáaŋ, papípalan pifal ke eŋis yɛ pɛɛnd peem; é kélém kúɛ́yɛ́ Isáaŋ tuenen pɔ́ ká asáá kisiɛ́n ɛ́ɛ́ Sulutɛ́ŋ. 6Isáaŋ mapá apiákán indífɔnɔ́ i piɔyɔ́ pi pulúk papílanɛ́ ɛ́ɛ́ samó, na kiamaám kí kiyɔ á nitál. Unyáan na pitandá no puókí. 7Woól úkémé ɛ́ɛ́: «Mɔɔnd ɔ́ɔ́kɔɔŋɔn káámɛ, waákimbíányinan pukaaka. Indipá yeeken kɛ́ɛ́yɛ́ kí ikéŋénye é kusulun iŋolí si pipɔ́kɔ́t píɛ́yɛ́. 8Iŋúɛ iménútuénén no moomb, wɔ́ ukenútuenen ne Emfúnukufúúmɛ.»
Isáaŋ métuú Yésuse
(Mat 3.13-17; Lúk 3.21-22)
9Ɛ́ mɛɛ́tɛ metúk, Yésuse wonyoólín Násalɛt, palɛ́k u kitɔŋ kí Kalilée. Isáaŋɛ weetu wɔ́ é Sulutɛ́ŋ. 10Waáman ó moombo, wɛɛ́n mɛnɛ́mɛnɛ́ɛ wɛɛ́, Emfúnukufúúmɛ selinen wɔ́ ɛlɛɛ́ nukɔlɔɔ́mbɔ. 11Ekelú woólin mɛnɛ́mɛnɛ́ɛ, útɛ́tɛ́lɛ, wɔ́ɔyɔ ɛ́ɛ́: «Anyɛ muɔ́nɔ́ áámɛ u ɔtɛ́m, anyamɔ́ wáámɛ kitikit nyɛ kááwɔ.»
Sáátan ɔ́ɔ́kɔɔ́pitɔn Yésuse ɔ́ kiɔ́sɔ́kɔlíɔ
(Mat 4.1-11; Lúk 4.1-13)
12Kipál timaná, Emfúnukufúúmɛ wɔɔkɔ́l wɔ waayɔɔk nɛɛyɛ́ ɔ́ kiɔ́sɔ́kɔlíɔ. 13Wɛɛl kɔ́ɔk metúk etín áandɛ́. É metúk makáánɛ́ Sáátan ɔ́ɔ́pitɔn wɔ usɔ́tɔn ɛ́ kikɛtɛ́kɛtɛ́ɛ kí manyam, Peéŋele#1.13 Peéŋele kunyɛ́ anɛ Pɛɛ́ŋɛlɛs. kɛnɛkɛn nɛɛyɛ́.
Yésus ɔ́ɔ́kɔɔyɔ́ insɔ́m yi indámb Kalilée
(Mat 4.12-17; Lúk 4.14-15)
14Pɛmɛɛlɛ́ paákan Isáaŋɛ á kiansi kí imbíne, Yésuse waayɔɔk Kalilée. Woól úkémé insɔ́m yi indámb yoólinoné ku Támbák. 15Wɔɔyɔn pɛɛnd ɛ́ɛ́: «Kisikɛl mɛ́ɛsikɛn: Pufuŋ pú Támbák kanyɛ kɔ́ɔk. Ɔ́nupíkɔtɔ́ meelíe máánɔ́ mɔ́ kilɔk, núátap insɔ́m yi indámb.»
Yésus mápilikɛn polókí muɔpɔ́ péni
(Mat 4.18-22; Lúk 5.1-3,10-11)
16Epué puɔ́s, Yésus ɛ́ɛndɛ á kiŋɛndɛŋɛnd kí asaá ú Kalilée. Wɛɛ́n polókí muɔpɔ́ páandɛ́, Símune na andimán wɛɛyɛ́ Endelée, póombon puolí puɔ́pɔ́ ká asaá. 17Yésus ɛ́ɛ́pí kɔ́ɔ́p ɛ́ɛ́: «Ɔ́nuɔŋɔ́ káámɛ, inúéyi polókí pɛɛnd.» 18Akáánɛ́ nɔ niɔ́kɔ́tɔ́n pááyap puolí puɔ́pɔ, pɔ́ɔŋ kɛ́ɛ́yɛ́. 19Yésuse waasuŋɔn. Wɛɛ́n Sáakɛ na andimán wɛɛyɛ́ Isáaŋ, paán pe Sépeté. Pámapá kɔ́ɔ́p ó kitóóŋ pɛ́ɛ́yɛn moolí mɔ́ɔ́p. 20Waapílikɛn pɔ. Pɔ́ɔŋ kɛ́ɛ́yɛ́, pááyap síí wɔɔpɔ́ Sépeté ó kitóóŋ ne peelímoólí pɛ́ɛ́yɛ́.
Numíánsina nú Yésus Kafalanawúum
(Lúk 4.31-37)
21Pááyɔɔk á palɛ́k kisiɛ́n ɛ́ɛ́ Kafalanawúum. Puɔ́sɛ́ pú Sápat, Yésuse weepíkin á kiansi kí Pɛyúútɛn kí imbísókólí, woond ó kuónyonyi. 22Pɛɛnd símile iŋonyítónyí yɛɛyɛ́, á kiáki ɛ́ɛ́ itimapá ɛlɛɛ́ i pemenyí pikotí. Kuónyonyi kuɛ́yɛ́ mapá kú sɔ́k ewú peményeekí wɔ́ pukaaka pú kuónyonyi pɛɛnd. 23Mɔɔnd omotí, kilɔk kí kiliínditíe maápá kipueŋenyi wɔ mééne akáánɛ́, waánsɛt. Wɔ ɛ́ɛ́: 24«Yésuse u Násalɛt, kiákɛ́ otúnyókolonyée? Oól ɛ́ kuɛsitúsɛ́lɔn á? Yeékumenyen peseéképese: anyɛ Kifúúmak kiólinoné ku Támbák.» 25Yésuse waakálitɛn kilɔk kí kiliínditíe kiɛ́tɛ ni imɛny, wɔ á kí ɛ́ɛ́: «Lúŋ, ám ɔ́ nuɔ́l nú mɔɔnd ewe!» 26Kilɔk kí kiliínditíe kíáyúkɛt mɔɔnd mɔkɔ́nɔ́kɔ́kɔn, kíám no nukokóo. 27Púɛl pɛɛnd peem pɛ́mɛɛ́n puónyi pukáánɛ puwaá. Pópíówon pɔ́ nɔ pɔ: «Epué kiákí? Iŋónyítónyí yiikɔsi yí woónyonye ni imɛny. Tɛ pilɔk pí piliínditíe waákálan pɛ́ɛ piɔ́pinɔn wɔ!» 28Nuúmu nú Yésus núasak kitɔŋ kí Kalilée kitikit.
Yésus mééŋuki Isɔmɔ yééŋiní í Símun
(Mat 8.14-15; Lúk 4.38-39)
29Pɛmɛɛlɛ́ pááman á kiansi kí imbísókóli, na Sáak ni Isáaŋ pényeetílikin Yésuse á nuyá nú Símun ne Endelée. 30Isɔmɔ yééŋiní í Símun ipɛ́t á kiansi nɔ ɔsɔl. Páámána, pátían Yésuse. 31Wepísíítin wɔ, wɛɛtikɛn wɔ́ kɔ́ ɔmbɔk, weetukenyi wɔ, weéŋuk nɔ niɔ́kɔ́tɔ́n. Woond ɛ́ kukɛnɛkɛn nɔɔpɔ́.
32Ɔ́ɔ́ny wéelumbée, póond ó kuólinon Yésuse nɛ pɛɛnd puólíkóoli, na pá kunúma nɔ pɔ́ pilɔk pí piliínditíe. 33Palɛ́k kitikit weesipítulé é nipíkínín. 34Pɛɛnd puólíkóoli pámaápítáyán á piluŋɛɛ́ á piluŋɛ, weéŋukesi pɔ. Ukúúŋa pilɔk pí piliínditíe kutek, ulúŋesi pí ɛ́ɛ́ pítikála, á kiákí ɛ́ɛ́ pímemenyén wɔ peseéképese.
Yésus máátɔ́k Kafalanawúum
(Mat 4.23; Lúk 4.42-44)
35Kuépéli, Ne emfúnupálɛ Yésuse waám ó kuopísókólónyi ɔ́ kiɔ́sɔ́kɔlíɔ. 36Ne Símun nɔ pɔkuɔ́pɔ́ póond á kuamba wɔ. 37Pɛɛ́nɛn wɔ́, pɔ́ kɛ́ɛ́yɛ́ ɛ́ɛ́: «Pɛɛnd peem áakuamba.» 38Wɔ kɔ́ɔpɔ́ ɛ́ɛ́: «Ɛnyɛɛ́ tusuŋɔn, tuyɔɔk á tuyá tunyɛɛ́ akɛ ɔ mɔkɔsɛ́ ɛ́ɛ́ yéékémén pɔ́ insɔ́m yiindámb. púúpɔ́ inyɛ́ɛ á pú akɛ.» 39Wɔɔpɔŋ Kalilée kitikit. Woól úkémé insɔ́m yiindámb á piansi piɔ́pɔ́ pí imbísókólí, ukúúŋa pilɔk pí piliínditíe.
Yésus mééŋúkí ekúnúkun
(Mat 8.1-4; Lúk 5.12-16)
40Ekúnúkun omotí weepísíítin Yésuse. Wesukin wɔ́ tunúú e kúúsí, upíyɛ́kɛlɛn wɔ. Wɔ́ kɛ́ɛ́yɛ́ ɛ́ɛ́: «Índɛ ɔɔ́kɔyɔ, insukɔn.» 41Yésuse wɛɛ́n wɔ́ ɔsɔk. Waakaanɔn ɔmbɔk weekíik wɔ. Wɔ́ kɛ́ɛ́yɛ́ ɛ́ɛ́: «Yɔɔ́kɔɔyɔ nɔ, éŋuk.» 42Kɔ́ɔk nɔ kɔ́ɔk iŋún yasákɛn; mɔɔnd kanyɛ asukúná. 43Yésuse weekúúki wɔ́ kɔ́ɔk umámaná akála kɛ́ɛ́yɛ́ ekelú atíndínán ɛ́ɛ́: 44«Pitɔ́likɛn peseéképese: ɔtiɔyítɛ́n mɔɔnd puandá. Keepitíínyi ku afunúfɔn, ééki kifunɔ́ kí ɔsukɔ́ Moyíis mɛɛ́tɛ́k é kutíínyi ké eŋis yé peem ɛ́ɛ́ iŋún yaawɔ mámaná.» 45Mɔɔnd túme kéléme, woond é kusélemendenyi niɔy aná Yésus ményitúkún wɔ. Púákány ne Yésus ɛ́ɛ́ wáand epítíínyi á palɛ́k. Woond ó kusol apáápa ɔ́ piɔ́sɔ́kɔlíɔ kááyɛ́ na palɛ́k. Pɛɛnd pamaámba kuɛ́nɛn wɔ ólinon piáyɛ́ piim.
Chwazi Kounye ya:
Málúkus 1: yav
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2026, CABTAL
Málúkus 1
1
Nitúmín ní insɔ́m yi indámb
(Mat 3.1-6; 11.12; Lúk 3.1-6; 15.18)
1Índɛ́ anɛ insɔ́m yi indámb iyoosonée Yésus Kilíise#1.1 Kílístuse: anakáanɛ́ punyɛ́ ɛ́ɛ́ Osótí, Oŋokí., Muɔ́nɔ́ u Támbák, túmenée. 2Ɔmfiɔ́ŋ ú Ísayí, eŋémímekelíe má Támbák, ɔ́ɔ́kɔɔyɔ ɛ́ɛ́: «Iŋúɛ Támbákɛ́ɛ, yoófookosi oŋoyí insɔ́m waamɛ, úkutɛ́fɛn iŋilí yaawɔ.» 3Únyi ekelú ú mɔɔnd úpékené ɔ́ kiɔ́sɔ́kɔlíɔ wɔ́ɔ́yɔ ɛ́ɛ́: «Ɛ́nutɛ́fɛ́n Ɔkɔ́n iŋilí yɛɛyɛ́, énutényíkényényí piáŋ píɛ́yɛ́!» 4Kɔ́ɔkɔ́ Isáaŋɛ, Etuúsí, moól ɔ́ kiɔ́sɔ́kɔlíɔ, upílan pɛɛnd kí induén. Wɔɔyɔn pɔ́ ɛ́ɛ́: «Ónuólon. Nusendi kusɔ́t ínútuenen, akáánɛ́ Támbák núyapɛn á pifal píánɔ́.» 5Pɛɛnd peem pɔ́ kitɔŋ kí Yúta ne epé pamaápá Yelúsalɛm yuukan ku Isáaŋ, papípalan pifal ke eŋis yɛ pɛɛnd peem; é kélém kúɛ́yɛ́ Isáaŋ tuenen pɔ́ ká asáá kisiɛ́n ɛ́ɛ́ Sulutɛ́ŋ. 6Isáaŋ mapá apiákán indífɔnɔ́ i piɔyɔ́ pi pulúk papílanɛ́ ɛ́ɛ́ samó, na kiamaám kí kiyɔ á nitál. Unyáan na pitandá no puókí. 7Woól úkémé ɛ́ɛ́: «Mɔɔnd ɔ́ɔ́kɔɔŋɔn káámɛ, waákimbíányinan pukaaka. Indipá yeeken kɛ́ɛ́yɛ́ kí ikéŋénye é kusulun iŋolí si pipɔ́kɔ́t píɛ́yɛ́. 8Iŋúɛ iménútuénén no moomb, wɔ́ ukenútuenen ne Emfúnukufúúmɛ.»
Isáaŋ métuú Yésuse
(Mat 3.13-17; Lúk 3.21-22)
9Ɛ́ mɛɛ́tɛ metúk, Yésuse wonyoólín Násalɛt, palɛ́k u kitɔŋ kí Kalilée. Isáaŋɛ weetu wɔ́ é Sulutɛ́ŋ. 10Waáman ó moombo, wɛɛ́n mɛnɛ́mɛnɛ́ɛ wɛɛ́, Emfúnukufúúmɛ selinen wɔ́ ɛlɛɛ́ nukɔlɔɔ́mbɔ. 11Ekelú woólin mɛnɛ́mɛnɛ́ɛ, útɛ́tɛ́lɛ, wɔ́ɔyɔ ɛ́ɛ́: «Anyɛ muɔ́nɔ́ áámɛ u ɔtɛ́m, anyamɔ́ wáámɛ kitikit nyɛ kááwɔ.»
Sáátan ɔ́ɔ́kɔɔ́pitɔn Yésuse ɔ́ kiɔ́sɔ́kɔlíɔ
(Mat 4.1-11; Lúk 4.1-13)
12Kipál timaná, Emfúnukufúúmɛ wɔɔkɔ́l wɔ waayɔɔk nɛɛyɛ́ ɔ́ kiɔ́sɔ́kɔlíɔ. 13Wɛɛl kɔ́ɔk metúk etín áandɛ́. É metúk makáánɛ́ Sáátan ɔ́ɔ́pitɔn wɔ usɔ́tɔn ɛ́ kikɛtɛ́kɛtɛ́ɛ kí manyam, Peéŋele#1.13 Peéŋele kunyɛ́ anɛ Pɛɛ́ŋɛlɛs. kɛnɛkɛn nɛɛyɛ́.
Yésus ɔ́ɔ́kɔɔyɔ́ insɔ́m yi indámb Kalilée
(Mat 4.12-17; Lúk 4.14-15)
14Pɛmɛɛlɛ́ paákan Isáaŋɛ á kiansi kí imbíne, Yésuse waayɔɔk Kalilée. Woól úkémé insɔ́m yi indámb yoólinoné ku Támbák. 15Wɔɔyɔn pɛɛnd ɛ́ɛ́: «Kisikɛl mɛ́ɛsikɛn: Pufuŋ pú Támbák kanyɛ kɔ́ɔk. Ɔ́nupíkɔtɔ́ meelíe máánɔ́ mɔ́ kilɔk, núátap insɔ́m yi indámb.»
Yésus mápilikɛn polókí muɔpɔ́ péni
(Mat 4.18-22; Lúk 5.1-3,10-11)
16Epué puɔ́s, Yésus ɛ́ɛndɛ á kiŋɛndɛŋɛnd kí asaá ú Kalilée. Wɛɛ́n polókí muɔpɔ́ páandɛ́, Símune na andimán wɛɛyɛ́ Endelée, póombon puolí puɔ́pɔ́ ká asaá. 17Yésus ɛ́ɛ́pí kɔ́ɔ́p ɛ́ɛ́: «Ɔ́nuɔŋɔ́ káámɛ, inúéyi polókí pɛɛnd.» 18Akáánɛ́ nɔ niɔ́kɔ́tɔ́n pááyap puolí puɔ́pɔ, pɔ́ɔŋ kɛ́ɛ́yɛ́. 19Yésuse waasuŋɔn. Wɛɛ́n Sáakɛ na andimán wɛɛyɛ́ Isáaŋ, paán pe Sépeté. Pámapá kɔ́ɔ́p ó kitóóŋ pɛ́ɛ́yɛn moolí mɔ́ɔ́p. 20Waapílikɛn pɔ. Pɔ́ɔŋ kɛ́ɛ́yɛ́, pááyap síí wɔɔpɔ́ Sépeté ó kitóóŋ ne peelímoólí pɛ́ɛ́yɛ́.
Numíánsina nú Yésus Kafalanawúum
(Lúk 4.31-37)
21Pááyɔɔk á palɛ́k kisiɛ́n ɛ́ɛ́ Kafalanawúum. Puɔ́sɛ́ pú Sápat, Yésuse weepíkin á kiansi kí Pɛyúútɛn kí imbísókólí, woond ó kuónyonyi. 22Pɛɛnd símile iŋonyítónyí yɛɛyɛ́, á kiáki ɛ́ɛ́ itimapá ɛlɛɛ́ i pemenyí pikotí. Kuónyonyi kuɛ́yɛ́ mapá kú sɔ́k ewú peményeekí wɔ́ pukaaka pú kuónyonyi pɛɛnd. 23Mɔɔnd omotí, kilɔk kí kiliínditíe maápá kipueŋenyi wɔ mééne akáánɛ́, waánsɛt. Wɔ ɛ́ɛ́: 24«Yésuse u Násalɛt, kiákɛ́ otúnyókolonyée? Oól ɛ́ kuɛsitúsɛ́lɔn á? Yeékumenyen peseéképese: anyɛ Kifúúmak kiólinoné ku Támbák.» 25Yésuse waakálitɛn kilɔk kí kiliínditíe kiɛ́tɛ ni imɛny, wɔ á kí ɛ́ɛ́: «Lúŋ, ám ɔ́ nuɔ́l nú mɔɔnd ewe!» 26Kilɔk kí kiliínditíe kíáyúkɛt mɔɔnd mɔkɔ́nɔ́kɔ́kɔn, kíám no nukokóo. 27Púɛl pɛɛnd peem pɛ́mɛɛ́n puónyi pukáánɛ puwaá. Pópíówon pɔ́ nɔ pɔ: «Epué kiákí? Iŋónyítónyí yiikɔsi yí woónyonye ni imɛny. Tɛ pilɔk pí piliínditíe waákálan pɛ́ɛ piɔ́pinɔn wɔ!» 28Nuúmu nú Yésus núasak kitɔŋ kí Kalilée kitikit.
Yésus mééŋuki Isɔmɔ yééŋiní í Símun
(Mat 8.14-15; Lúk 4.38-39)
29Pɛmɛɛlɛ́ pááman á kiansi kí imbísókóli, na Sáak ni Isáaŋ pényeetílikin Yésuse á nuyá nú Símun ne Endelée. 30Isɔmɔ yééŋiní í Símun ipɛ́t á kiansi nɔ ɔsɔl. Páámána, pátían Yésuse. 31Wepísíítin wɔ, wɛɛtikɛn wɔ́ kɔ́ ɔmbɔk, weetukenyi wɔ, weéŋuk nɔ niɔ́kɔ́tɔ́n. Woond ɛ́ kukɛnɛkɛn nɔɔpɔ́.
32Ɔ́ɔ́ny wéelumbée, póond ó kuólinon Yésuse nɛ pɛɛnd puólíkóoli, na pá kunúma nɔ pɔ́ pilɔk pí piliínditíe. 33Palɛ́k kitikit weesipítulé é nipíkínín. 34Pɛɛnd puólíkóoli pámaápítáyán á piluŋɛɛ́ á piluŋɛ, weéŋukesi pɔ. Ukúúŋa pilɔk pí piliínditíe kutek, ulúŋesi pí ɛ́ɛ́ pítikála, á kiákí ɛ́ɛ́ pímemenyén wɔ peseéképese.
Yésus máátɔ́k Kafalanawúum
(Mat 4.23; Lúk 4.42-44)
35Kuépéli, Ne emfúnupálɛ Yésuse waám ó kuopísókólónyi ɔ́ kiɔ́sɔ́kɔlíɔ. 36Ne Símun nɔ pɔkuɔ́pɔ́ póond á kuamba wɔ. 37Pɛɛ́nɛn wɔ́, pɔ́ kɛ́ɛ́yɛ́ ɛ́ɛ́: «Pɛɛnd peem áakuamba.» 38Wɔ kɔ́ɔpɔ́ ɛ́ɛ́: «Ɛnyɛɛ́ tusuŋɔn, tuyɔɔk á tuyá tunyɛɛ́ akɛ ɔ mɔkɔsɛ́ ɛ́ɛ́ yéékémén pɔ́ insɔ́m yiindámb. púúpɔ́ inyɛ́ɛ á pú akɛ.» 39Wɔɔpɔŋ Kalilée kitikit. Woól úkémé insɔ́m yiindámb á piansi piɔ́pɔ́ pí imbísókólí, ukúúŋa pilɔk pí piliínditíe.
Yésus mééŋúkí ekúnúkun
(Mat 8.1-4; Lúk 5.12-16)
40Ekúnúkun omotí weepísíítin Yésuse. Wesukin wɔ́ tunúú e kúúsí, upíyɛ́kɛlɛn wɔ. Wɔ́ kɛ́ɛ́yɛ́ ɛ́ɛ́: «Índɛ ɔɔ́kɔyɔ, insukɔn.» 41Yésuse wɛɛ́n wɔ́ ɔsɔk. Waakaanɔn ɔmbɔk weekíik wɔ. Wɔ́ kɛ́ɛ́yɛ́ ɛ́ɛ́: «Yɔɔ́kɔɔyɔ nɔ, éŋuk.» 42Kɔ́ɔk nɔ kɔ́ɔk iŋún yasákɛn; mɔɔnd kanyɛ asukúná. 43Yésuse weekúúki wɔ́ kɔ́ɔk umámaná akála kɛ́ɛ́yɛ́ ekelú atíndínán ɛ́ɛ́: 44«Pitɔ́likɛn peseéképese: ɔtiɔyítɛ́n mɔɔnd puandá. Keepitíínyi ku afunúfɔn, ééki kifunɔ́ kí ɔsukɔ́ Moyíis mɛɛ́tɛ́k é kutíínyi ké eŋis yé peem ɛ́ɛ́ iŋún yaawɔ mámaná.» 45Mɔɔnd túme kéléme, woond é kusélemendenyi niɔy aná Yésus ményitúkún wɔ. Púákány ne Yésus ɛ́ɛ́ wáand epítíínyi á palɛ́k. Woond ó kusol apáápa ɔ́ piɔ́sɔ́kɔlíɔ kááyɛ́ na palɛ́k. Pɛɛnd pamaámba kuɛ́nɛn wɔ ólinon piáyɛ́ piim.
Chwazi Kounye ya:
:
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2026, CABTAL