Matié 23
23
Yésus mɛpɛnɛ́ kuɛl kú Pafalisiɛ́ŋ ne Pemenyípikoti
(Mál 12.38-40; Lúk 20.45-47; 11.39-52)
1Yésus mɔɔyɔn imbúl sí pɛɛnd no popióny pɛ́ɛ́yɛ́ ɛ́ɛ́: 2«Pemenyípikoti na Pafalisiɛ́ŋ pɔ pɛ́sɛɛkunɛninɛ́ pɛɛnd pikotí pí Moyíis: 3ɛ́nuɛlɛ́ nuónd nunɛkɛn epú pɔ́núɔ́yɔnɛ́ɛ, maná nutiɔŋɔ́n kɔ́ɔ́p é melínyélínyée. Á kiákí ɛ́ɛ́ epú pɔ́ɔ́yɔnɛ́ pátipá pɛ́ɛ́lɛ pɔ́ɔ. 4Paatukan pinúm pí pinuá á pinam pí pɛɛnd ɛ́ pɛ́sɛmbɛn, ɔ́ kɔɔ́mɔ aká pɔ́muɛ́t pátiányípá páámba kukíit tɛ ni inɛɛ́. 5Nunámá nuɔ́p núkuɛl nyɛɛ́ pépitíínyenyi ɛ́ pɛɛnd, pápituŋa pinúm pí imbalá pɔ́ŋɔ́nɛ́ pikotí páákan kɔk, kí imbɔk na tupɔl. Pákaanuna mɔnyɔŋɔl mɔ́ɔ́p mí indífɔnɔ́. 6Pɔ́ɔ́kɔyɔ ɔnyɔ́l yó pusíó ɔ́ mɔtɔ́mb nɔ ɔnyɔ́l yó pusíó á piansi pí imbísokoli. 7Pɔ́ɔ́pílɔ́ŋɔ ɛ́ɛ́ pépíkélikeli pɔ́ ké elumen yɛ́ pɛɛnd. Pɔ́ɔ́pílɔ́ŋɔ ɛ́ɛ́ pɛɛnd kúmesi pɔ́ pápílan pɔ́ ɛ́ɛ́: Oŋónyóonyi. 8Káánɔ ó pusíó nutiambɛ́t ɛ́ɛ́ pánúpílan ɛ́ɛ́ Oŋónyóonyi, á kiákí ɛ́ɛ́ nuápian Oŋónyóonyi omoómí, panɔ́ nunyɛɛ́ paandimán. 9Nutipílíkɛ́n mɔɔnd akɛ e kúúsí ɛ́ɛ́: Taatɛ́ɛ, á kiáki ɛ́ɛ́ nuápian Síí táŋ omoómí unyɛ́ mɛnɛ́mɛnɛ́ɛ. 10Nutiambɛ́t andíkɛ́k ɛ́ɛ́ pánúpilan ɛ́ɛ́: emenyi wɔɔkɔ́n á kiákí ɛ́ɛ́ nuápian ewú umenyene puum, Kilíise. 11Káánɔ́ ké embul ewú unyɛɛ́ ɔkɔ́n ányípá eŋelípuóli waanɔ́. 12Ewú kitikit weényípíméketesíé, áányípá eselésí. Ewú kɔk weényípíselesíé áányípá emékétésí. 13Muyú naanɔ́ panɔ́ Pafalisiɛ́ŋ, Pemenyípikotí, pepinembí epe, nuéfuuken iŋilí ɛ́ɛ́ pɛɛnd tipíkín é Pufuŋ pú mɛnɛ́mɛnɛ́ɛ, panɔ́ muɛ́t nutipíkín á pɔ, núond nutiátápánɛ́n pɛɛnd epé pɔ́pílɔ́ŋɔnɛ́! [ 14#23.14 Tuyosin Malúukus 12.40. ] 15Muyú kɔk naanɔ́ panɔ́ Pafalisiɛ́ŋ, Pemenyípikotí, pepinembí epe, nuásapan isaá, núpɔŋ pitɔŋ kitikit á kukúŋɔn opíónyí omoómí; aká númányipípándíkán wɔ, nuépúmbesi wɔ nuéyi wɔ́ ewú wɛɛsikɛnɛnɛ́ ni inséésítényí ké etényí ú yiik í teeníík, káandɛ́ kunútápɔk! 16Púnyɛ muyú naanɔ́, panɔ́ pepútepute nuendesíé pɔsɔ́k, panɔ́ nuɛlɛnɛ́ɛ ɛ́ɛ́: Índɛ asiapília kitamb, púnyi sɛ́kísɛ́kí; maná índɛ asiapília kóol u kitamb, owónyi epú asiápília. 17Pepútepute pákatɛ iŋanúnínɛ́ɛ, púnín putápukanɛ́ sɔ́k, kóol ééy kúnyaánɛ kitamb? Tíkɛ kitamb kíɛ́lɛnɛ́ kóol ɔ́pinɔn Támbákɛ́ɛ? 18Nuákand kuɔyɔ ɛ́ɛ́ índɛ asiapília niwuukɛ́n nupoo, púnyi sɛ́kísɛ́kí, maná índɛ asiapília nupɔ núnyɛɛ́ nutálan á nɛ́ɛ, aápianɛ́ ɛ́ɛ́lɛ epú asiápília. 19Pepútepute epe, punín pupiányinanɛ́ sɔ́k, nupoo ééy kúnyaánɛ niwuukɛ́n nupoo? Tikɛ niwuukɛ́n nupoo níɛlɛnɛ́ ɛ́ nupoo ɔ́pinɔn Támbákɛ́ɛ? 20Ɛ́ kuɛ́n kɔk, ewú upílianɛ́ niwuukɛ́n: ápílian niwuukɛ́n ne epú púnyɛɛ́ putálán á nɛ́ɛ; 21ewú upílianɛ́ kitamb áápílian kitamb ne ewú ulɔpɔnɛ́ kɔ́ɔk nɛkɛtɛ́ɛ. 22Ewú upílianɛ́ kímɛnɛ́mɛnɛ́ɛ áápílian índáŋa i Támbák ne ewú unyɛɛ́ ɔpɔkimɔ́t á yɛ́ɛ. 23Ɔsɔ́k naanɔ́ pemenyípikotí na pafalisiɛ́ŋ, pɛɛnd pɛ́ nunɛ́m epe, nuékeekenyi puátɛ waanɔ́ á kitamb ɔ́ tukɔlɛ́n#23.23 Pianyi panambanɛ na piɛ, ɛlɛɛ́ pisie, inumbe, iŋuyikuyi. túánɔ: nufénen epú púnyɛɛ́ imfí ó kikotí: indɛ́ndɛ́nɛ, niɛ́nɔsúkɛ na nulátát: púúpɔ́ nuɛsikɛnɛnɛ́ kuɛl katɛ kuyɛɛnɛt pukáánɛ́. 24Pepútepute pééndesié pɔsɔ́k, nuɛ́kɛɛtikɛn tupóóŋ kí isɛkɛs ɛ́ɛ́ nutiminɛ́, maná numina kɔk samó unyɛɛ́ kinɔ́m kí pulúk! 25Muyú naanɔ́ pemenyípikoti na Pafalisiɛ́ŋ, pɛɛnd pɛ́ nunɛ́m epe, nuásuka ekue kɔ́ ɔɔ́nd ikɔ́pɔ ne kipútek kíánɔ́, kɔ́ɔk ɛ́ɛ́ okunó nɛkɛtɛ́ɛ waanɔ́ nyɛ owónón nɔ ɔndundɔ́ nɔ pilɔk pi imbítáákítɛ́n. 26Epútepute u Falisiɛ́ŋ ewe! ɛlɛ́ kusukɛt nɛkɛtɛ́ɛ u ikɔ́pɔ yááwɔ, akáánɛ ɔɔ́nd u ikɔ́pɔ yááwɔ pá asukúnán. 27Muyú naanɔ́, panɔ́ pemenyípikotí na Pafalisiɛ́ŋ, pɛɛnd pɛ́ nunɛ́m epe, nunyɛ ɛlɛɛ́ pipɛ́l pinyɛɛ́ piwéénén imfɛ́m ekue kɔ́ ɔɔ́nd, píyoosinon kupɔ́t ekue kɔ́ ɔɔ́nd, maná okúnó nɛkɛtɛ́ɛ kúnyɛ kuwónón no pikóókó pí píku, na maandá mɔ́ kilɔk á tunamá á tunamɛ́ɛ. 28Nuétíínyenyi pɛɛnd ekue kɔ́ ɔɔ́nd ɛ́ɛ́ nunyɛ indɛ́ndɛ́nɛ, kɔ́ɔk ɛ́ɛ́ okúnó nɛkɛtɛ́ɛ waanɔ́ nunyɛ powónón nɛ kupínɛmb nɔ pilɔk pí maandá. 29Muyú naanɔ́ panɔ́ pe menyipikotí na Pafalisiɛ́ŋ, pɛɛnd pɛ nunɛ́m epe, nuáwáaka pinɔ́k pí pipɛ́l pí peémimekélíé má Támbák, nulɛŋɛ pipɛ́l pí epé pɛnyɛɛ́ indɛ́ndɛ́nɛ, 30nuond nupíɔ́yɔn ɛ́ɛ́: kúsɔ́tɔ kupá ɛ́ɛ́ tumapá é kipénéŋ kí pesí páásɔ́, tutisíákɛ́n pɔ́ ó kuoto manɔ́ŋ mé peémimekélíé má Támbák. 31Akáánɛ́ nuétíínyenyi panɔ́ muɛ́t ɛ́ɛ́, nunyɛ paán pé epé pɔ́mɔɔ́nɔ́ peémimekelíé pá Támbák! 32Akáánɛ́ nuáyákúna epú pɔtiɔ́ meétúm! 33Inyɔk esie, nikúli ní imfɛ́ny enie, tiɛkiɛ́ nunyɛɛ́ kupínɔ ɛ́ɛ́ pótinúómbín é yiik í teeníík? 34Tɛ ɔ́ɔ́pɔn, yáányínútúmɛ́n peémimekélié má Támbák, pemenyípikoti, pesiŋísiŋ. Nuɔ́nyɔ́ɔ́n pómotí, nuákan pɔ́ á kifand, nuényísésenyi pólotí káánɔ́ á piansi pí imbísókólí, nuónyóol nukúúŋa pɔ́ á pálíkɛ́ á pálíkɛ́ɛ, 35pukáánɛ kitikit ɛ́ɛ́nyípíɛl ɛ́ɛ́ manɔ́ŋ mɛ́ píndɛ́ndɛ́nɛ, kuetúm ká Ápɛl, wundɛ́ndɛ́nɛ, kuám á Sakalías, muɔ́nɔ́ u Palakí, ewú numɔɔ́n ɛ́ kikɛtɛ́kɛtɛ́ɛ kí kitamb kíɛ́yɛ́ na niwuukɛ́n. 36Kémuémue, yɔɔ́núɔ́yɔn púu, pukáánɛ́ kitikit áányíkɔɔn ipakɛ́ eye.
Ɛmbíyɛ́kɛ́l ó pusíó pú Yelúsalɛm
(Lúk 13.34-35)
37«Yelúsalɛm, Yelúsalɛm, aŋúɛ ɔ́ɔ́nɔnɛ́ peémimekélíé má Támbák, nuɔnɔ́ epé pámaákutúmɛn na atányi, pisikɛl kutek imɔpílɔ́ŋɛt ɛ́ɛ́ iŋúsikan paán pááwɔ nunamá enú iŋɔɔ́ kúsanɛ́ paán pɛ́ɛ́yɛ́ kɛ́ɛ́yɛ́ á pipapɔ́, tɛ ɛ́ɛ́ nupílɔ́ŋitɛ! 38Kúúkɔ́: kiansi kíánɔ́ ɔ́ɔ́nyínúlɔpɛ́n weémbélékét. 39Á kiákí ɛ́ɛ́ yɔɔ́núɔ́yɔn puɔ, kutál nínúan, nutiányandá kuŋɛn, kuám aká nuɔ́nyɔ́ɔyitɛ ɛ́ɛ́: Peseé ne ewú woóloné ɛ́ kisiɛ́n kí Ɔkɔ́n!»
Chwazi Kounye ya:
Matié 23: yav
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2026, CABTAL