Matié 2
2
Peenúní muótíótio máyɔɔ́k kí iyoosino ku Yésus
1Pémepíén Yésuse Pɛ́tílɛhɛm é Yúté, á kisikɛl kí efuŋ Elóot, peenúní muótiótio kuólin á nipálɛ́n ní ɔɔ́nyí mányaám Yelúsalɛm 2poówun ɛ́ɛ́: «Naánɛ́ efuŋ u Pɛyúútɛn pɛ́ɛ́nyɛ́kɛ́t epíén nyɛɛ́? Tumɛ́ɛ́n yoótiótio yɛ́ɛ́yɛ́ á nipálɛ́n ní ɔɔ́nyí, kúúkɔ́ túmónyoól é kuesikúmésí wɔ.» 3Niɔy nikáánɛ́ níepueŋitenyi efuŋ Elóote táásɛ ne Yelúsalɛm kitikit. 4Elóote weelumenyi pɔkɔ́n pá pafunɔ́fɔn ne pemenyí pikotí pɔ́ kitɔŋ é kumenyi naánɛ́ pɛ́mɛɛ́síkɛ́ɛ́nɛ́n kupíén Kilíise. 5Póokondinyi wɔ́ ɛ́ɛ́: «Pɛtɛlɛhɛm é Yuté, á kiákí ɛ́ɛ́ púúpú eŋémímekélíe má Támbák mɔɔ́ŋ ɛ́ɛ́: 6Támbák ɛ́ɛ́pí ɛ́ɛ́ aaŋúɛ pɛ́tílɛhɛmɛ, kúúsí kú Yúta, é kémuémue atipá itɔŋ tɔ́ŋ ɛ́ kikɛtɛ́kɛtɛ́ɛ kí pitɔŋ pí Yúta, ɛ́ kuɛlɛ ɛ́ɛ́ efuŋ weényéndesié nikúli niámɛ Isilayɛ́ɛlɛ ányáámɛn kuawɔ.» 7Elóote waapílikɛn peenúní muótíótio kí insunsue ɛ́ɛ́ pɛ́sɛɛkunin wɔ́ peseé kisikɛl ekí yoótíótio siásuunɔk, 8watɔ́m kɔk pɔ́ Pɛ́tilɛhɛm, wɔ́ kɔ́ɔ́p ɛ́ɛ́: «Ánuupɔ́ kuówún peseé ne peseé kɔɔ́mɔ kiendine nyɛɛ́; nukɛɛl númɛ́ɛ́n kɛ́ɛ núasindíán ɛ́ɛ́ naamɛ kákáámɛ yéésukín kí tunuu.» 9Efuŋ manana kuɔyɔ anakáánɛ́, pɔ́ɔ́kɔ́l iŋilí; yoótíótio pɛ́mɛɛ́nɛ́n á nipálɛ́n ní ɔɔ́nyí yáasuŋɔn kuám aná ímeényétélímít kɔɔ́mɔ aká kiendine maápá. 10Pɛ́ɛ́nɛn yoótíótio, pɔ́ɔ́p kiándákáand kí anyamɔ́. 11Pépíken á kiansi pɛ́ɛ́n kiendine no yóótí wɛɛyɛ́ Malía, péesukin wɔ́ tunuu, péékúmesi wɔ́; Péefuun imbalá síɔ́p, péeki wɔ́ pipíáká, kóol, pulɔ́, míili. 12É kélém akáánɛ́ Támbákɛ́ɛ weesitíínyí pɔ́ kí ilimí ɛ́ɛ́ pótiondín yi Elóot, péepítúnúkin ó kuond kɔ́ɔ́p ɔ́ kitɔŋ kí iŋilí ilotí.
Kupínɔ ɔ́ kitɔŋ kí Esipit
13É kélém kú kupálɔk kúɔ́p, Éŋele u Támbák waámɛn Yúsipɛ kí ilimí, wɔ́ kɛ́ɛ́yɛ́ ɛ́ɛ́: «Atúkɛn, kɔ́l kiendine no yóótí, pínɔ́ nɔɔpɔ́ Esípit; lɔpɔ́ kɔ́ɔk kuám aká iŋaányíkutián, á kiákí ɛ́ɛ́ Elóot áákamba kuɔ́n kiendine.» 14Yúsipɛ waatukɛn, ne putúk wɔɔkɔ́l kiendine no yóótí, wɔɔpínɔ nɔɔpɔ́ Esípit. 15Wɔɔlɔp kɔ́ɔk kuám é nikú ní Elóot ɛ́ɛ́ epú Ɔkɔ́n mɔɔ́yɛ́t é níít ní eŋémímekélíe wɛɛyɛ́ píwóónyi: yaápílíkɛ́n muɔ́nɔ áámɛ ɛ́ɛ́ wáám Esípit.
Nuɔ́nɔnɔ nú paán Pɛ́tílɛhɛm
16Elóot ɛ́ɛ́nɛn ɛ́ɛ́ peenúní muótíótio máyaánitɛ́n wɔ, tiɛ́sí nɛ ɛtɔ, waatɔ́m ɛ́ɛ́ pɔ́ɔ́nɔ Pɛ́tílɛhɛm nɔ ɔ́ pitɔŋ píɛ́yɛ́ piim, piendine kitikit pípianɛ́ tuɔŋ túandɛ́ kuatál á kisikɛl ekí peenúní muótíótio maátíán wɔ. 17Akáánɛ́ kɔk nukál nú eŋémímekelíé Selemí, núópíwóónyi, núɔyɔnɛ́ɛ ɛ́ɛ́:
18Ekelú wáasuumɔk Láma,
oŋónyi nɛ ɛmbíyɛ́kɛ́l:
Alásɛ́lɛ upaŋanɛ́ paán pɛ́ɛ́yɛ́
tɛ ekindí,
á kiákí ɛ́ɛ́ pátikápá.
Kuosiondó kú inɛmbɛ Esípit
19É kélém kú nikú ní Elóot, Éŋele u Ɔkɔ́n waámɛn Yúsipɛ kí ilimí ɔ́ kitɔŋ kí Esípit, 20wɔ́ kɛ́ɛ́yɛ́ ɛ́ɛ́: «Atúkɛn, kɔ́l kiendine no yóótí, pítúnúkín ɔ́ kitɔŋ kí Isilayɛ́ɛl, á kiákí ɛ́ɛ́ epé páányámbá kuɔ́n kiendine ámaná ekuén.» 21Yúsipɛ waatukɛn, wɔɔkɔ́l kiendine no yóótí weepítúnukin ɔ́ kitɔŋ kí Ísilayɛ́ɛl. 22Maná, wɔɔ́pɔn ɛ́ɛ́ Alikiláwuse unyɛɛ́ efuŋ u Yúte ɔ́ ninyɔ́lí ní síí wɛɛyɛ́ Elóote, weetíin kuond kɔ́ɔk; Támbákɛ́ɛ waasitíán wɔ́ kí ilimí ɛ́ɛ́ úyɔɔk ɔ́ kitɔŋ kí Kalilée 23wóond ɔ́ kuɔnyɔ́mbitɔ́n á pálɛ́k kisiɛ́n ɛ́ɛ́ Násalɛt ɛ́ɛ́ nukál enú peémímekélíe má Támbák mɔɔ́yɛ́t píwóónyi, núɔ́yɔ ɛ́ɛ́: Páányípílan wɔ́ ɛ́ɛ́ mɔnɔ́ Náásalɛt.
Chwazi Kounye ya:
Matié 2: yav
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2026, CABTAL