Matta 5
5
Giz ma tə Yesu tə a talaŋ wuzum
(Markus 3:13; Luka 6:12-13, 20)
1Əŋ Yesu mə lim hedi iyi mbeh səku i kəndaha, ɓa, a tap əŋ wuzum, nja, a nja i nja. Gula ŋga iyi i kərəɗaha əŋ kelek ŋga. 2A mar ley zlap, ɓa, a sərəkta, a zla:
Pir ma tə Bizlaf
(Luka 6:20-23)
3«Nja səntaŋ aka əŋ hedi iyi i mə wulək əŋ nəf tata, tata məstakwaŋ iyi,
məŋgəvday Bay tə wuzlaf mbə əŋ tata.
4Nja səntaŋ aka əŋ hedi mə huhur iyi,
məŋgəvday Bizlaf a dakaŋta nəf za.
5Nja səntaŋ aka əŋ hedi mə waŋ talaŋ iyi, məŋgəvday i lim hayak za mənaŋ zəm ge.
6Nja səntaŋ aka əŋ hedi mətis mə jata iyi, yim mə jata iyi i mə mba i ɗal məsəkəŋ səntaŋ mə ŋgəmaŋ əŋ Bizlaf,
məŋgəvday Bizlaf a vəlaŋta məsəkəŋ tata mə pələk za.
7Nja səntaŋ aka əŋ hedi mə səŋ nje həhər a hedi iyi,
məŋgəvday Bizlaf a səŋgaŋta nje həhər za bahayim.
8Nja səntaŋ aka əŋ hedi nəf sə kweɗek iyi, məŋgəvday i lim Bizlaf za.
9Nja səntaŋ aka əŋ hedi mə zlaraŋta ndəra əŋ hedi iyi, məŋgəvday i ɗafaŋta ma za wuziyi tə Bizlaf iyi.
10Nja səntaŋ aka əŋ hedi iyi, i mə təlaŋta ma məŋgəvday i kəɗal məsəkəŋ səntaŋ mə ŋgəmaŋ əŋ Bizlaf, məŋgəvday Bay tə wuzlaf mbə əŋ tata.
11Nja səntaŋ aka əŋ heni, əŋgah hedi iyi i kəraheni, i kəzləŋgaheni takwaŋ, i kəzlap ma madawar iyi par par a talaŋ təheni məŋgəvday sa. 12Hi səsəm, hi ja varay tə səsəm təheni, məŋgəvday Bizlaf a mineheni muwurɓay tə kəzəɗ təheni za mbeh səku a wuzlaf. Məŋgəvday mənaŋ mba bahayim, i kəzləŋgaŋta takwaŋ za əŋ hedi mə giz ma abə miya tə Bizlaf titʉz iyi.»
Neweŋ abə lay mawaɗ
(Markus 9:50; 4:21; Luka 14:34-35; 8:16; 11:33)
13«Heni neweŋ tə əŋ məŋhayak. Əŋgah neweŋ ta kəkuɗəp ndərəm ŋga za seh, nakwa iyi nda i ziŋgeŋ ndərəm ŋga ta baha seh, viŋgey? Neweŋ ta ləlaw səku ba, sey i kʉyu a palah, hedi iyi i dak ŋgas a ɗek.»
14«Heni mənaŋ lay mawaɗ tə əŋ məŋhayak. Wuta səndawl maləm tə a talaŋ wuzum seh, a ɓah halla. 15I kəbas lalam ley ɗiyu a gədaŋ bekwete səku. Ama i ɗiyu a lay kə ɗiy lalam, a namba a waɗaŋta lay əŋ hedi tə əŋ biŋ iyi ta fuk. 16Mənaŋ mba bahayim, sey waɗ təheni mə waɗ a ma tə hedi iyi, amba i gər kəzəɗ təheni səntaŋ, ɓa, i həmən Baba təheni tə wuzlaf.»
Yesu a kəsərək hedi iyi a talaŋ ma majaw tə Musa
17«Hi mba i wulək sa kəndaha ley pəl ma majaw tə Musa abə sərək tə hedi mə giz ma abə miya tə Bizlaf seh halla. Sa kəndaha ley vəvayu seh halla, ama sa ndaha seh, ley təɗaha səntaŋ tə ma ta. 18Sa kəzlapaheni məndiwiŋ, əŋgah lay tə wuzlaf abə tə teyek mbə aka seh, kwa kukus tə ma majaw ntaɗ sə kʉsit tə Musa a kənda i vəvay halla, ha əŋ məsəkəŋ iyi ta fuk i mə ɗal. 19Məŋgəvday a ɗek, hedi mə yak ley kuw ma matak sə kʉsit tə əŋ kukus, aka səku a kəsərək hedi dakayta iyi ley ɗal mənaŋ mbiŋ mə ɗal mba seh, a nda i mbaɗ əŋ hedi mekedek əŋ Bay tə wuzlaf. Ama hedi mə məlu, mə sərək hedi dakayta iyi ley məlu bahayim, a nda i mbaɗ əŋ hedi səndawl əŋ Bay tə wuzlaf#5:19 Bay tə wuzlaf, aka səku, Bay tə Bizlaf.. 20Məndiwiŋ, sa kəzlapaheni, əŋgah heni kəmbaɗ əŋ hedi sə delele iyi pay day a metir tə ma majaw iyi abə Farisa iyi halla seh, heni lim ley təɗ əŋ Bay tə wuzlaf seh halla səlak.»
Sərək a talaŋ zəm nəf
(Markus 11:25; Luka 12:57-59)
21«Heni kəzlim, i mə zlapaŋta əŋ dide tə dide takwa iyi, i zla: “Hwa mba i ja hedi səku. Hedi mə ja hedi seh, i deɓza za a ma tə hedi mə mbəzl ma iyi.” 22Ama sa seh, sa kəzlapaheni: Hedi mə zəm nəf abə zliŋgeŋ seh, tiɗe ley deɓʉ a ma tə hedi mə mbəzl ma iyi. Hedi mə zlapaŋ əŋ zliŋgeŋ: Hwa hedi mə tak burŋguzl seh, tiɗe ley deɓʉ a ma tə hedi səndawl mə ɗal yawa kə mbəzl ma iyi. Hedi mə zlapaŋ əŋ zliŋgeŋ: Hwa mulula seh, tiɗe ley deɓʉ əŋ kahaw mə cukwaɗ səku səlak. 23Məŋgəvday a ɗek, əŋgah hwa kəndaha za a lay kə məsaw məsəkəŋ abə məsəkəŋ təkwa ley vəl əŋ Bizlaf seh, a namba, hwa kəsəŋ kenek za, zliŋgeh a kəzəm nəf abə hwa, 24əŋ mbamba seh, yak məsəkəŋ təkwa kə vəl əŋ Bizlaf a lay kə məsaw məsəkəŋ ta, nda i zlaraha ndəra abə zliŋgeh ndagwa. Abə dawaŋ ta, hwa ziŋgehe, ley vəl məsəkəŋ təkwa əŋ Bizlaf.»
25«Əŋgah məsəgər təkwa a kəmba i deɓeh əŋ lay kə mbəzl ma, əŋ heni kənda a kataf ndagwa, pələk kataf viyu ley zlar ndəra abə hedi ta, məŋgəvday a mba i deɓeh əŋ ndəra hedi mə mbəzl ma səku, hedi mə mbəzl ma bahayim, a vəlah əŋ ndəra sewje iyi, sewje iyi i nahah əŋ daŋgay. 26Sa kəzlapah məndiwiŋ: Hwa təɗaha a namba halla, sey hwa mə mineŋ duwa ŋga ta za fuk.»
Sərək a talaŋ ɓət wucum sifteleh a palah
(Matta 18:8-9; Markus 9:43, 47-48)
27«Heni kəzlim za, i mə zlapaŋta əŋ dide tə dide takwa iyi, i zla: “Hi mba i ɓət wucum sifteleh a palah səku.” 28Ama sa seh, sa kəzlapaheni: Kwa viyey mə gər wala tə hedi abə ceɗem əŋ nəf ŋga seh, mbamba seh, kəɓət wucum sifteleh a palah cuza abə mbiŋ. 29Əŋgah nje təkwa tə zəma a kəmba i ndəvah əŋ hem seh, kʉslekʉ, kapu guduk abə hwa. Gelɓe hwa mə kuɗəp nje ntaɗ a talaŋ wucum təkwa fuk mə nda i təɗ əŋ kahaw mə cukwaɗ səku səlak. 30Əŋgah ndəra təkwa tə zəma a kəmba i ndəvah əŋ hem, rəslu, kapu guduk abə hwa. Gelɓe hwa mə kuɗəp ndəra ntaɗ a talaŋ wucum təkwa fuk mə nda i təɗ əŋ kahaw mə cukwaɗ səku səlak.»
Sərək a talaŋ hedi mə gam wala ŋga
(Matta 19:7-9; Markus 10:4-5, 10-12; Luka 16:18)
31«A kəzlap a lay par baha, a zla: “Hedi mə gam wala ŋga seh, sey a vəlaŋ ɗerewel ley səŋ kəgamza za.” 32Ama sa seh, sa kəzlapaheni: kwa hedi vitikey mə gam wala ŋga, kəlimʉ a kəɗal barlaw halla seh, kəmbaɗza za əŋ wala mə ɓət wucum sifteleh a palah. Hedi mə ɓət wala magamaha ta bahayim, kəɓət wucum sifteleh za a palah.»
Sərək a talaŋ meɗ
33«Baha, heni kəzlim za, i mə zlapaŋta əŋ dide tə dide takwa iyi, i zla: “Hwa mba i meɗ a talaŋ bərəsl ma səku, ama məsəkəŋ hwa mə meɗ ley ɗal a ma tə Bay Bayta Bizlaf, sey hwa ɗalu.” 34Ama sa seh, sa kəzlapaheni: Hi mba i meɗ səku səlak, kwa abə lay tə wuzlaf, hi mba i meɗ səku, məŋgəvday, ar lay kə nja tə bay tə Bizlaf, 35kwa abə lay tə teyek, hi mba i meɗ səku, məŋgəvday ar lay kə dak ŋgas tə Bizlaf, kwa abə Urusalima bahayim, hi mba i meɗ səku, məŋgəvday ar berne tə Bay səndawl. 36Hi mba i meɗ kwa abə talaŋ təheni səku bahayim, məŋgəvday heni gula i mbaɗ bujuguɗ tə a talaŋ təheni ntaɗ əŋ sə kweɗek, aka səku əŋ sə dəgənak səku. 37Əŋgah ley zlap ayaw seh, hi zlap “ayaw”, əŋgah ley zlap mənaŋ mba səku seh, hi zlap “mənaŋ mba səku”, məŋgəvday ley zlap day mba seh, zlap ta, a ndaha a ndəra Iblisa.»
Sərək a talaŋ ley ziŋ məsəkəŋ madawar əŋ hedi
(Luka 6:29-30)
38«Heni kəzlim za, i mə zlapaŋta əŋ dide tə dide takwa iyi, i zla: “Nje abə nje, ndiŋ abə ndiŋ.” 39Ama sa seh, sa kəzlapaheni: Hi mba i ziŋgeŋ məsəkəŋ madawar əŋ hedi mə ɗalaheni məsəkəŋ madawar səku. Əŋgah hedi kətawah za əŋ bəra zləm tə zəma, buwaŋ bəra zləm tə gula baha. 40Əŋgah hedi a kəmba i deɓeh əŋ mədigiɗ bay ley lah rukut təkwa mekedek seh, yaku mə ɓət rukut təkwa səndawl baha. 41Əŋgah hedi a takah wula ley nda abə ŋgas kilewmetir ntaɗ, nda abə mbiŋ kilewmetir bək. 42Əŋgah hedi a ɗəpah məsəkəŋ, vəlaŋgu. Əŋgah hedi a ɗəpah duwa, hwa mba i buwaŋ dawaŋ səku.»
Hi mba məsəgər təheni iyi
(Luka 6:27-28, 32-36)
43«Heni kəzlim za, i kəzlap, i zla: “Mba məslige#5:43 Mba məslige təkwa seh, mənaŋ zlap ta, mba hedi mənaŋ hwa. təkwa, hwa mba i mba məsəgər təkwa səku.” 44Ama sa seh, sa kəzlapaheni: Hi mba məsəgər təheni iyi, hi ɗalaŋ mbuh əŋ Bizlaf məŋgəvday hedi mə təlaheni ma iyi. 45Mənaŋ wa, hi mbaɗ za əŋ wuziyi tə Baba təheni tə wuzlaf. Məŋgəvday a kəwaɗ pis ŋga a talaŋ hedi sə lem iyi abə hedi səntaŋ iyi fuk, a kəzah vaŋ a talaŋ hedi sə delele iyi abə hedi sə delele səku iyi. 46Məŋgəvday əŋgah heni mba hedi mə mbalaheni iyi dap, hi wulək seh, hi nda i lim muwurɓay tə kəzəɗ seh, vitikey? Kwa hedi mə cakal budu iyi seh, i kəɗal mənaŋ mba səku vaw? 47Əŋgah heni kəɗalaŋta mbele əŋ zliŋgeh təheni iyi dap seh, heni mə ɗal məsəkəŋ ley har hedi iyi seh, vitikey? Kwa hedi mə səŋ Bizlaf iyi səku seh, i kəɗal mənaŋ mba səku vaw? 48Heni seh, hi mbaɗ əŋ hedi səntaŋ iyi, mənaŋ Baba təheni səntaŋ tə wuzlaf hedi səntaŋ.»
Chwazi Kounye ya:
Matta 5: xmd
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte