माथ 25
25
गेलगोटेन तितरि कुड़िकोवाक् फेन
1उनरे सेरमा राज दो गेल तितरि कुड़िको लेकाक्आ, ओने ओनको आकोवाक् दिउहेवानते जाँवाँय दाक्रामको ओडोक चालावेन।#लुक १२:३५ 2ओनको मोदरे मोंड़ेंगोटेन दो लिलहि आर मोंड़ेंगोटेन दो बुदानको ताहेंकाना। 3लिलहिको दो एनते दिउहे माको इदि तोरावानगे मेनखान सुनुम दो बाको इदितोरालाक्आ, 4मेनखान बुदानको दो आकोवाक् दिउहे सालाक् चुका़क्रे सुनुम होंको इदितोरावाना। 5आदो जाँवाँये बिला़मेनते जोतोगे दुदड़ुमकेत्कोवा आरको जा़पित्केदा।
6खान ताला ञिंदा जोखेच् गुहा़र हेच् गोत्एना, “हा़नि जाँवाँये दारा काना, ‘मा ओडोक हिजुक्पे दारामे ला़गित्।’ 7उनरे ओनको जोतो तितरि कुड़ि बेरेत्एनते आकोवाक् दिउहेको जुतकेदा। 8आदो लिलहिको दो बुदानकोको मेतात्कोवा, ‘देन आपेयाक् सुनुम हा़टिञालेपे एनते आलेयाक् दिउहेको दो इड़िँजोक् काना।’ 9मेनखान बुदानको दोको रोड़ रुवा़ड़केदा, ‘ओहोवा, आले आर आपे ला़गित् दो ओहो चोङ कुला़उलेन, बोरोङ आ़खरिञको ठेन सेनकाते किरिञ आ़गुजोङपे।’ 10आदो किरिञको सेन आकान ताहेंकानरेगे जाँवाँय दोए सेटेरेना, आर सापड़ावको दो उनि साँवते बापला ओड़ाक्तेको बोलोयेना आर सिलपिञको सिञकेदा।”
11“तायोमते ओनको सारेच् तितरि कुड़ि होंको हेच्एना, आरको मेनकेदा, ‘ए प्रोभु, ए प्रोभु दे सिलपिञ झिच्आलेमे।’#लुक १३:२५ 12मेनखान उनि दोए रोड़ रुवा़ड़ात्कोवा, ‘सा़रिगेञ मेतापेकाना बा़ञ ओरोमेत्पेया।’”
13आदो जागवार आकाय बाड़े ताहेनपे, एनते दिनतेत् दो बापे बाडाया आर धुड़ितेत् हों बाङ, मानवा होपोन दो तिन ओकतेये हिजुक्आ।
पेया गुतिको रेयाक् फेन
(लु १९:११-२७)
14“एनते सेरमा रेयाक् राज दो मित्टेन होड़ लेका, ओकोय एटाक् दिसा़मते चालाक् जोखेच् आच्रेन गुतिको होहो जारवाकाते ताहेंकानतायाक् ए जिमा़ ओटोवाक्को।#लुक १९:११-२७ 15मित् होड़ दो मोंड़ें हाजार सोना रेयाक् सिकि टाकाय एमादेया, मित् होड़ दो बार हाजार सिकि, आर मित् होड़ दो मित् हाजार सिकि, मिमित् होड़ आपान आ़पिन दाड़े लेका। आदो एटाक् दिसा़मतेये चालावेना। 16आदो मोंड़ें हाजार सिकि टाकाय ञामलेत्इच् दोए सेनहोत् एना, आर फेर बेपारकाते आर मोंड़ें हाजार सिकिये लाबकेदा। 17ओनकागे बार हाजार सिकिय ञामलेत्इच् हों आर बार हाजार सिकिय लाबकेदा। 18मेनखान मित् हाजार सिकिय ञामलेत्इच् दो सेनकाते ओत ए ला घाडलाक्केदा आर आच्रेन किसा़ँड़ रेयाक् टाकाय तोपा ओकोकादा।”
19“आ़डि दिन तायोमते ओनको गुतिरेन किसा़ँड़े हेच् एना, आर ओनको तुलुच्ए लेखा जोखाकेदा। 20आदो मोंड़ें हाजार सोना रेयाक् सिकिय ञामलेत्इच् दो हेच्सोरेनते आर मोंड़ें हाजार सिकि आ़गुदाराकातेये मेनकेदा, ‘ए प्रोभु, मोंड़ें हाजार सिकियेम जिमा़आदिञ ताहेंकाना, नोक्ओंय आरहों मोंड़ें हाजार सिकिञ लाब आकादा।’ 21उनिरेन किसा़ँड़े मेतादेया, ‘बेस आकादाम, ए भागे आर पा़तिया़र गुति, थोड़ावाक्रे पा़तिया़रेम ताहेंकाना, आ़डिओकोच्आक्को चेतानरेञ दोहोकामा, देला आमरेन किसा़ँड़ाक् रा़सका़रे सेलेदोक्मे।’ 22बार हाजार सिकि ञामलेत्इच् हों हेच्सोरेनतेये मेनकेदा, ‘ए प्रोभु, बार हाजार सिकिम जिमा़वादिञ ताहेंकाना, नोक्ओंय आर हों बार हाजार सिकिञ लाब आकादा’ 23उनिरेन किसा़ँड़े मेतादेया, ‘बेस आकादाम, ए भागे आर पा़तिया़र गोलाम, थोड़ावाक्रे पा़तिया़रेम ताहेंकाना, आ़डि ओकोच्आक्को चेतानरेञ दोहोकामा आर आमरेन किसा़ँड़ रेयाक् रा़सका़रे सेलेदोक्मे।’ 24आदो मित् हाजार गोटेन सिकिय ञामलेत्इच् हों हेच्सोरेनतेये मेनकेदा, ‘ए प्रोभु, बाडाय आकात्मे ताहेंकानाञ आँट होड़ कानाम, बाम एरलेत् ठेन खोनेम इर एदा आर बाम छिटिया़उलेत् ठेनाक् खोनेम सामटावेदा। 25आदोञ बोतोरेना आर आमाक् सिकि दो ओतरेञ तोपा ओकोकादा, नोक्ओंय ने ताम।’ 26मेनखान किसा़ँड़तेत्ए रोड़ रुवा़ड़ादेया, ‘ए बा़ड़िच् आर आसाङपोडा गुति, बाडायकान ताहेंकानाम बा़ञ एरलेत् ठेनाक् इञ इर एदा आर बा़ञ छिटिया़उलेत् ठेनाक् इञ सामटाव एदा? 27एनडेखान इञाक् सिकि दो माँहाँजोनको ठेन बा़इसा़उकाक् लेक ताहेंकानतामा, आर हेच्काते इञ दो इञाक् सिकि रेयाक् सुद सालाक् इञ ञामकेया होनाङ।’ 28ओनाते मा उनि ठेन खोन ओना मित् सिकि हों रेच्काते ओकोय ठेन गेल हाजार सिकि मेनाक्आ उनि बाडे़ एमायपे। 29एनते मेनाक्ताय मिमित् होड़ दोए एम ओचोक्आ आर सारेड़ोक्ताया, मेनखान बा़नुक्ताय होड़ दो जाहानाक्गे मेनाक्ताय, ओना हों उनि ठेन खोन रेजोगोक्आ।#माथाय १३:१२; मा़रकुस ४:२५; लुक ८:१८ 30आर उनि ओकोडा गुति दो बाहरे ञुतरे ओडोक गिडिकायपे, ओंडे दो राक्जोङ आर तोगोच् डाटा होयोक्आ।”#माथाय ८:१२; २२:१३; लुक १३:२८
सेस बिक्चा़र
31मेनखान मानवा होपोन आच्रेन सानाम दुतको साँवते आयाक् ठोनोकरेये हेच्लेनरे, उनि दो आयाक् ठोनोक रेयाक् सिङघा़सोनरेये डुड़ुप्आ।#माथाय १६:२७; १९:२८ 32आर उनि सामाङरे सानाम जा़तरेनकोको जारवा ओचोक्आ, आर होड़ खोन होड़े बेगारकोवा गुपियिच् मेरोम खोन भिडिकोय बेगारको लेका। 33भिडिको दो आच् एतोम सेच्रेये दोहोकोवा आर मेरोमको दो कोञें सेच्रे। 34उनरे राज दो आच् एतोम सेच्रेने मेताकोवा, देला हिजुक्पे आपे आ़पुञे भोर आकावात्पेको, धा़रति रेयाक् सिरजोन खोन तेयार आकावात्पे राजोसटि आ़इदा़रिजोङपे। 35एनते रेङगेच्लेदिञा, आर जोमपे एमादिञा, तेताङलेदिञा आरपे ञु ओचोलेदिञा, उपरिया़ञ ताहेंकाना आरपे गोरास साँवहालेदिञा, 36लाङगाट इञ ताहेंकाना आरपे किचरिच् लेदिञा, रुवा़लेना़ञ आरपे हिरिलेदिञा, हाजोतरेञ ताहेंकाना आर इञ ठेनपे सेनलेना। 37उनरे भागेको दोको रोड़ रुवा़ड़ा, ए प्रोभु, तिस बाङ रेङगेच्एत्मे ञेलतेले जोम ओचोलेत्मे, से तेताङेत्मे ञेलतेले ञु ओचोलेत्मे? 38आर तिस बाङ उपरिया़ ञेललेत्मेतेले गोरास साँवहालेत्मे, से लाङगाट ञेललेत्मेतेले किचरिच्लेत्मे? 39आर तिस बाङ रुवा़क् से हाजोतरे ञेलते आम ठेनले सेनलेन? 40आदो राजे रोड़ रुवा़ड़ाकोवा, सा़रिगेञ मेतापेकाना, तिना़क् नोको इञरेन हुडिञ उता़र बोयहाको मोदरे मित् होड़पे नोनकावादे, उना़क् इञगेपे ओनकावादिञा।
41ओनाकाते ओनको कोञें सेच्रेनकोय मेताकोवा, “मेन आपे सारापानको, दो इञ ठेन खोन चालाक्पे सायतान आर उनिरेन दुतको ला़गित् तेयाराकान जायजुग सेङगेलरे। 42एनते रेङगेच्लेदिञा आर जोमाक् बापे एमादिञा, तेताङलेदिञा आर बापे ञु ओचोलेदिञा, 43उपरिया़ञ ताहेंकाना आर बापे गोरास साँवहालेदिञा, लाङगाट इञ ताहेंकाना आर बापे किचरिच्लेदिञा, रुवा़ हासो आर हाजोतरेञ ताहेंकाना आर बापे हिरिलेदिञा।” 44उनरे ओनको होंको रोड़ रुवा़ड़ाया, “ए प्रोभु, तिस बाङ रेङगेच्एत्मे कान से तेताङेत्मेकान, से उपरिया़ से लाङगाट, से रुवा़क् से हाजोतरे ञेलकाते बाले साप्सोरात्मे? 45उनरेये रोड़ रुवा़ड़ाकोवा, सा़रिगेञ मेतापेकाना, तिना़क्गे नोको इञरेन हुडिञ उता़रको मोदरे मित् होड़ बापे नोनकावादे, उना़क्गे इञ हों बापे ओनकावादिञा। 46खानगे नोको दो जायजुग सा़जा़इतेको चालाक्आ, मेनखान भागेको दो जायजुग जियोनतेको बोलोक्आ।” #दानिएल १२:२
Chwazi Kounye ya:
माथ 25: NTSPt25
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The New Testament Books in Santhali Language © The Word for the World International and Santhali Translation Project, Nepal, 2025