Ichedendik 17
17
Ẹkọhka ch'Ibinọkpaabyi ọnang Abram
1K'ogbe kw'uwa Abram node icho arọbh anna okwuma osowanẹ kw'ẹrọbh k'atam, Ọvaar Ibinọkpaabyi oyin okebh-ẹ nya, oben-ẹ bẹ́, “Kaam nde Ibinọkpaabyi kw'Ẹfa maphyir, tor ẹtọkọ chaam, abir asi ẹmmaana ch'etor-otor. 2Kaam m'nsi k'ose kw'uwa ikk'ncheka nnang-ọ bẹ́, kwuna iva p'iva pọ m'asaabh mawuriji.”
3Abram ọbhaang idik njo nya o, otto okwubha ititika ny'izek. Ibinọkpaabyi obir oben-ẹ bẹ́, 4“Ma wọ ode odik kw'ikaam ikk'ncheka mmaan-ọ bẹ́, kọ m'ade otte kw'nkọma k'ẹkaan. 5Kọ ọdọk Abram màkpena, kọ m'akpena Abraham#17.5 Abraham oyinẹ bẹ́, Otte kw'anọng saabhada., okurọ bẹ́, kaam nsọ-ọ otte kw'nkọma saabhada. 6Kaam m'nsọ-ọ abhon iva p'nna obhika ade. Nkọma k'ẹkaan, ọmaana avaarnọng piden m'afona k'ikọ. 7Kaam m'nsi echekẹ nda ch'ikaam nyen mmaan-ọ ettima ttattampe. M'ede ch'ikaam ọttara kọ, m'ebir ede ch'iva p'iva pọ k'ogbe kw'ikọ ikk'apa. Kaam m'nde Ibinọkpaabyi kwọ, m'mbira nde Ibinọkpaabyi kw'iva p'iva pọ k'epemaanitor 8Kaam m'ntọka izek nja maphyir s'Kenaan s'aning ma mach'okikennọng, nnang kọ ọttara efona chọ, mayena ttattampe. Kaam m'nde Ibinọkpaabyi kw'efonamma chọ.”
9Ibinọkpaabyi obir oben Abraham bẹ́, “Ṉ́nòde kọ ọttara efona chọ, mm'akpobha idik s'echekẹ ndo chaam, ttattampe. 10Ma wọ ode echekẹ ch'nchekẹ mmaana kọ ọttara iva p'iva, ch'mm'akpobha: mm'abhirẹ ojinọng kpenamkpen kw'oning ọmaana bọnga ọnọm. 11Ẹnọmbhirẹ ndo ch'bọnga mm'asi m'ẹkọhka anọng bẹ́, kaam ọttara bọnga, nkk'echekẹ ọsa. 12Tọma m'ogbe nwa china ororo, ojinọngnwa kpenamkpen kw'ọmmaan k'abọnga k'ottem, ópyirẹ iwu ochenọnttaan, mm'abhir-ẹ ọnọm. Tte ajinọng maphyir p'ammaan mabhirẹ inọm, ammaana, ọttara abira. Ozeng k'abira mbo p'mamaanẹ ny'abọnga k'ottem, ọttara mbo p'bọnga madebh-odebh, màbhirẹ bẹ ọnọm maphyir. 13Zaabẹ́ ode nnwa kw'mabhonọ ny'ọsọhm, obir ode kw'matim akpuka adebh o, mm'abhir-ẹ ọnọm. Echekẹ chaam ch'ẹnọmbhirẹ m'ede ch'ttattampe. 14Ojinọng kpenamkpen kw'ina ọnọm obhirẹ, mm'abhaangẹ z'ikpakaana s'anọng pẹ, okurọ bẹ́, kk'echekẹ chaam obhuma.”
15Ibinọkpaabyi obir oben Abraham bẹ́, “Ṉ́nòde Sarai, kw'ode kwanọng kwọ, tọma ma china ororo, ọdọk Sarai mòkpena, kẹ min'okpena bẹ́, Sara#17.15 Sara oyinẹ bẹ́, nnwa kw'ọvaarnọng.. 16Kaam m'ndẹ-ẹ, mbir nnang-ọ ojinọng kw'ofon ny'ẹbhọr chẹ. Kaam m'ndẹ-ẹ ọfha okwu ode ọkka kw'nkọma s'isaabh-ọsaabh. Avaar p'abaabh nkọma m'abir afona ny'ikẹ.”
17Abraham otto okwubha ititika ny'izek; z'ettem, ọmma asa, oben bẹ́, “Ọnọng kw'ode icho arọbh achen mach'ikaam ma, m'osi yen pira obir obhon nnwa? Sara kw'obir ode icho arọbh anna okwuma ijobh ọdọk, m'osi yen pira ọmaan nnwa?”
18Nya o, Abraham oben Ibinọkpaabyi bẹ́, “Wúra acher bẹ́, Ishimayẹl ọtọka ẹda chọ kẹ!”
19Ibinọkpaabyi ọpọhn-ẹ bẹ́, “Ma e. Kwanọng kwọ Sara, m'ọmaan-ọ ojinọngnwa kw'im'akpẹ-ẹ Isaak#17.19 Isaak oyinẹ bẹ́, Ọmma asa.. Kaam m'nsi echekẹ ch'ttattampe mmaan-ẹ, ch'im'ebir ede ch'iva p'iva pẹ k'ogbe kw'ikẹ ikk'ọpa. 20Ṉ́nòde odik kw'Ishimayẹl, kaam kk'ọ mmaanga. Kaam m'ndẹ-ẹ, nnang-ẹ iva k'ọsaabh. Iva p'iva pẹ mm'abir asaabh mawuriji. M'obhon avaar ijobh kkamfa, m'mbir nsi iva p'iva pẹ made ẹkọma chiden. 21Okenaka, echekẹ chaam m'ebe ọmaana Isaak kw'Sara m'ọmaan, icho ogbese nwa.”
22Ibinọkpaabyi ọgbaak odik nwo maphyir nya o, ofona orik Abraham nya.
23Ny'ewu ndo madanẹ-danẹ, Abraham ọtọka Ishimayẹl kw'ode ojinọngnwa kwẹ, ọttara ajinọng maphyir p'ammaan ny'ikẹ k'ẹsọhmmọr, ọttara mbo p'odebh-odebh, obhirẹ bẹ ọnọm, k'ose kw'Ibinọkpaabyi otek-ẹ. 24Wa Abraham ode icho arọbh anna okwuma osowanẹ kw'ẹrọbh k'atam k'ogbe kw'obhirẹ ọnọm. 25Ishimayẹl, nnwa kw'Abraham, wa ode icho ijobh kkanttaan k'ogbe kw'mabhir-ẹ ọnọm. 26Ny'ewu ndo madanẹ dọ ch'Abraham ọmaana Ishimayẹl, mabhirẹ ọnọm. 27Ojinọng kpenamkpen kw'oning ny'Abraham k'ẹsọhmmọr, ámmáaná, ọttara ayok p'madebh bẹ z'okikennọng, wa mabir abhirẹ inọm.
Chwazi Kounye ya:
Ichedendik 17: mfn-x-ad
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
©️2025 West Africa Christian Mission