Lu-ka 9
9
Jmơt baar du jơt jơng kươt maanh han
(Ma-thi-ơ 10:5-15; 14:1-12; Mak 6:7-29)
1Brah Jê-sus khuôl jmơt baar jơt jơng pơrgum kươi, ươn dang kmheng u ch'bap kmheng jah prơh chaak u tơmbah pơrtanh. 2Pang maanh bu han tơmbơh chhuôr nggoor Brah Ưn ri u tơmbah bnih tanh. 3Pang maanh bu: “Tơt han troong khơơm liêu ơơn ơơm, khơơm liêu tong jra, thong, nom, prak kaih; kot khơơm liêu baar ơk ao ryoq. 4Bơl 'bei mưt nhi êch, phrui gôq nhi nei aan tơt jơl han. 5Kơtôk êch bơl bu 'bưn wơơt bơl 'bei nei tơt han sot rlach poh nei phrui tơrpôih steh a jơng bơn bei di baak ndraanh ta wal kươi bu.”#Lu 10:4-11; Kênh 13:51. 6Bei nei, bơl jơt jơng sot han, rlach pal poh bri, tơmbơh chhuôr Baak Sroong Klanh jôm ktôk u tơmbah pơrtanh.
Baak ring n'hông snđach Hê-rôt ri
7Khal au, Hê-rôt laa snđach pơching ttang mor teq u pal kaar ja lôh tơt nei rhơq rpơq đat, đươm bnih au nei mor: “Jang a ktôk chhưt ja rêh kươi;” 8bơl tôw nei lah: “Ê-li ja lôh sot;” nha bnih nday nha leet mor: “Mbu knông bơl grnưt noor klap khal hư ja rêh kươi.”#Mat 16:14; Mak 8:28; Lu 9:19. 9Hê-rôt mor: “Hei ja paang kôw Jang hơơi, bei nei bnih au laa 'bơơn baah hei kươt iat ja lơh pal kaar bei nei?” Snđach wơng troong jah a mơp Brah Jê-sus.
Brah tơ krik nom
(Ma-thi-ơ 14:13-21; Mak 6:30-44; Jang 6:1-14)
10Bơl jơt jơng plơq siq tơmbơh teq u Brah Jê-sus jôm kaar bu ja lơh. Pang liêu bơl jơt jơng han êêng, tơt di ktôk chôôl laa Bêt-sai-đa. 11Tơt phung raih gưt hơơi, nei han tênh Pang. Brah Jê-sus wơơt bu, chhuôr teq u nggoor Brah Ưn ri aan bu, u tơmbah aan bơl 'bơơn kươt tơmbah. 12Plah nar êch dơơh mau, jmơt baar du jơt jơng lôh mor teq u Pang: “Dan aan phung raih siq jah bu han tơt pal poh bri u ktôk poh rlum baah drơm u wơng griêng sa, đươm bơl bơn nha gôq a ktôk rhông rhaang.” 13Dôh Pang lah: “Nơơm bơl 'bei phrui aan bu sôông.” Bơl jơt jơng ơh: “Mơq 'bưn han pook griêng sa aan leq phung raih au nei bơl hei dơơn geh pram ơơk nom u baar ơơk pi ka ei.” 14Đươm geh tơmlai pram ban du bnih klau, mơ Pang lah n'hai bơl jơrnơ: “Phrui maanh bu gôq tênh phung, di phung pram jơt du.” 15Bơl jơrnơ lơh tênh baak nei u maanh jôm bnih gôq u teh. 16Brah Jê-sus pơih pram ơơk nom u baar ơk pi ka, nggơơr mat u trôôk, or ja nei pak nom, ndơơp aan bơl jơrnơ jah tacheq aan phung raih. 17Jôm bnih kot sa bơm hơơm. Bu sech kươi kươt jmơt baar sah bêêng pal bôh nom ngroh.
Tơmbơh baak chôôl Phi-e-rơ ri
(Ma-thi-ơ 16:13-19; Mak 8:27-29)
18Jơl Brah Jê-sus plah r'bon dan êêng, bơl jơrnơ pơrgum rlum Pang. Pang ôp bu: “Phung raih chôôl Hei laa 'bơơn?” 19Bu ơh: “Bnih au mor laa Jang Bap-tit, bnih nday mor laa Ê-li; bnih nday nha mor laa di mbu knông bơl grnưt noor klap khal hư rêh kươi.”#Mat 14:1-2; Mak 6:14-15; Lu 9:7-8. 20Pang leet ôp bu nha: “Nha bơl 'bei nei chôôl Hei laa 'bơơn?” Phi-e-rơ ơh: “Yau laa Yaang Krist Brah Ưn ri.”#Ja 6:68-69. 21Brah Jê-sus pơrkaam u maanh teq u bơl jơrnơ khơơm mor baak au teq u 'bơơn ơơm.
Brah tơmbơh noor baak chhưt n'hai baak rêh kươi Pang ri
(Ma-thi-ơ 16:20-28; Mak 8:30 – 9:1)
22Brah Jê-sus lah: “Koon Bnih phrui dol ơk ntil ji rngiêl, phrui dol bơl raanh ttơơm, bơl yau thwaai ndap ttơơm u bơl yau gưt jhai teq lơơi, phrui dol lưm, tơt nar pei kươt rêh kươi.” 23Pang lah n'hai jôm bnih: “Mơq 'bơơn êch tênh Hei, phrui dhot teq nơơm bơn na, jôm nar tung chhư rglaang nơơm baah tênh Hei.#Mat 10:38; Lu 14:27. 24Đươm 'bơơn êch đoh sm'boh rêh nơơm nei a kươi saap, nha 'bơơn đươm Hei baah saap sm'boh rêh nei a kươi đoh sm'boh rêh nơơm bu.#Mat 10:39; Lu 17:33; Ja 12:25. 25Mơq bnih êch kươt leq swich teh dôh nơơm bơn na dol saap luôch paich phrui dol phaat riat nei geh thlay ơơn? 26Đươm mơq 'bơơn prêêng mat teq u Hei u baak Hei nei Koon Bnih a kươi kot prêêng mat teq u bnih nei tơt Pang gôq lôh knông chring chraang nơơm ri, Bươp ri u bơl lênh brah jrah ri. 27A ngan, Hei lah bơl 'bei, geh di mbu baar du nha ta yoong a au a kươi 'bưn chhưt noor tơt sau nggoor Brah Ưn.”
Brah tơ krik gui
(Ma-thi-ơ 17:1-8; Mak 9:2-8)
28Tơmlai phaam nar di kươi ja lah pal baak au, Brah Jê-sus liêu Phi-e-rơ, Jang u Ja-kơ han n'hai Pang hao bnơm jah r'bon dan.#II Phi 1:17-18. 29Plah nha r'bon dan, muh mat Pang gơl êêng, ao Pang but book u aang rwaah. 30U tôw, geh baar du ta mor teq u Pang, nei laa Môi-se u Ê-li. 31Bu lôh sot knông chring chraang u mor teq u baak chhưt Pang ri, laa kaar Pang êch dơơh lơh dip plak tu poh Jê-ru-sa-lem. 32Phi-e-rơ u bơl gnasaal bu êch bêch đat đuôt, tơt tlơk kah, bu sau chring chraang Brah Jê-sus ri n'hai baar du ta yoong n'hai Pang. 33Plah baar du nei lơơi rlach Brah Jê-sus, Phi-e-rơ mor teq u Pang laah: “Ơi Yau, bơl bơn gôq a au kah đat, dan aan bơl hei kơl dơk pei ơơk naam: di mlơm aan Yau, di mlơm aan Môi-se u di mlơm aan Ê-li.” Bu mor dôh khah 'bưn gưt nơơm mor ơơn. 34Phi-e-rơ nha mor, geh di nduq lôh rlum kơndơp bu; bơl jơrnơ n'hông lôh mưt klung nduq. 35Ja nei geh baak a knông nduq lah laah: “Au laa Koon Hei, Bnih Hei ja sach, phrui iat baak Bnih nei.”#Mat 3:17; 12:18; Mak 1:11; Lu 3:22. 36Tơt baak nei u dưt hơơi, nei dơơn nha nh'ơơm mbu êêng Brah Jê-sus nei ei. Knông pal nar nei, bơl jơrnơ ơt rngơt, 'bưn chhuôr aan 'bơơn teq u baak kaar nơơm bu ja ndraanh sau.
Brah tơmbah drêên klau dol chaak rup
(Ma-thi-ơ 17:14-18; Mak 9:14-27)
37Nar a ôi, tơt Brah n'hai jơrnơ pôl jưr a bnơm, geh phung raih ơk lôh a mơp Pang. 38Tôw, geh di mbu knông phung ơk khuôl ttih laah: “Ơi Yau, dan Yau gmaak koon klau hei, đươm au laa koon dôl hei ri. 39Tơt dol chaak rup, drêên a drot bu troh khuôl. Chaak lonh len drêên lôh sơmbuh wiêm, lơh chhak but k'ung lêêk u huôch đat bu dol lơơi rlach drêên. 40Hei ja dan bơl jơrnơ Yau prơh chaak nei, dôh bu prơh 'bưn kươt.” 41Brah Jê-sus ơh: “Ơi klap 'bưn jơ u a rơk tôw! Hei a kươi gôq n'hai bơl 'bei, dol ơt ơl bơl 'bei aan tơt khal êch nha? Phrui liêu koon klau 'bei lôh đau!” 42Tơt koon drêên mhei lôh dơơh, chaak mrah kơndang bu u teh, lonh len bu. Dôh Brah Jê-sus têh gmhaar wêêng 'bưn jrah u tơmbah koon drêên nei, ja nei ndơơp kươi aan bươp bu.
Brah Jê-sus leet tơmbơh noor teq u baak chhưt n'hai baak rêh kươi Pang ri
(Ma-thi-ơ 17:22,23; Mak 9:30-32)
43Jôm bnih kot êêng aang teq u dang kmheng prêh nhjur Brah Ưn ri. Plah knông jôm bnih nha êêng aang teq u jôm kaar Brah Jê-sus ja lơh, nei Pang lah n'hai bơl jơrnơ: 44“Bơl 'bei phrui iat srlah pal baak au: Koon Bnih a kươi dol ndơơp teq u knông ti bu nday.” 45Dôh bơl jơrnơ 'bưn gưt baak nei. Teq u bu, baak nei nha dol km'ang tak lơh aan bu 'bưn wak wơơt kươt dôh bu nha n'hông, 'bưn baanh ôp Pang.
Baak prêh thlay ngan
(Ma-thi-ơ 18:1-5; Mak 9:33-40)
46Bơl jơrnơ ta rmhanh tơrnang nơơm, mơq 'bơơn klung nak bu laa bnih prêh thlay đat.#Lu 22:24. 47Brah Jê-sus gưt gơrninh knông chưt bu mơ Pang liêu di mbu koon drêên teq a gêêng nơơm bu 48u lah n'hai bu: “Bnih êch đươm saak Hei baah wơơt koon drêên au nei laa wơơt Hei, nha 'bơơn wơơt Hei nei laa wơơt Yaang ja maanh Hei. Đươm bnih êch dêq đat knông bơl 'bei nei laa bnih prêh thlay huôih leq.”#Mat 10:40; Lu 10:16; Ja 13:20. 49Jang ơh laah: “Ơi Yau, bơl hei ja sau geh bnih tơmoh chhak Yau baah prơh chaak, bơl hei ja pơrkhang đươm bnih nei 'bưn tênh n'hai bơl bơn.” 50Dôh Brah Jê-sus lah n'hai bu: “Khơơm pơrkhang pơrkhaang, đươm 'bơơn 'bưn wal teq u bơl 'bei nei laa chôh n'hai bơl 'bei.”
Brah Jê-sus han hao Jê-ru-sa-lem
(9:51 – 19:28)
Brah Jê-sus ktôk Sa-ma-ri
51Dơơh tơt nar Brah Jê-sus kươt wơơt hao trôôk, Pang rwach han tơt poh Jê-ru-sa-lem. 52Pang maanh bơl ndraanh han noor nơơm bu. Bu han teq u di poh dêq bơl Sa-ma-ri jah riêp nhi drơm aan Pang. 53Dôh bơl Sa-ma-ri 'bưn wơơt Pang, đươm Pang han wih r'bong poh Jê-ru-sa-lem. 54Ja-kơ u Jang laa jơrnơ Pang ri sau bei nei, mor: “Brah ơi, Brah geh êch bơl hei tak lơh ôinh jưr a trôôk jah chhu luôch bu#9:54 chhu luôch bu: Knông m'baak plơơp 'bian ti laa chhu luôch bu bei Ê-li ja lơh. pan?” 55Dôh Brah Jê-sus wih kươi têh gmhaar baar du; [u mor: “Bơl koon 'bưn gưt wêêng ap chhôk nôôl bơn;”]#9:55 Knông m'baak plơơp 'bian ti laa bu n'hai mor: “Bơl 'bei 'bưn gưt wêêng êch nôôl nơơm.” Koon Bnih ja lôh 'bưn geh jah lưm luôch baak rêh dôh jah đoh kwaai. 56ja nei Pang pôl bơl bơl jơrnơ han rlach poh dêq nday.
Ntil phrui geh jah tênh Brah
(Ma-thi-ơ 8:19-22)
57Nha plah han troong, di mbu mor teq u Brah Jê-sus: “Yau han đêch, hei a kươi tênh u nei.” 58Brah Jê-sus ơh: “Yan khaar geh rung, chum trôôk geh chhôm, dôh Koon Bnih 'bưn geh ktôk jah kơơl bôôk.” 59Pang lah teq u di mbu bnih nday: “Phrui han tênh Hei.” Dôh bnih nei ơh: “Smbah Brah, dan aan ch'bap hei siq jah rôôp bươp hei noor.” 60Dôh Brah Jê-sus lah: “Phrui teq bơl chhưt rôôp bơl chhưt bu ri; nha 'bei, phrui han u tơmbơh chhuôr nggoor Brah Ưn ri.” 61Di mbu bnih nday mor: “Brah ơi, hei a kươi tênh Brah, dôh dan aan ch'bap hei siq lơơi bnih nhi noor.” 62Brah Jê-sus ơh: “'Bơơn ja kan kuôk hơơi baah mơq a mak kươi nei 'bưn dip glap n'hai nggoor Brah Ưn.”
Chwazi Kounye ya:
Lu-ka 9: SBL2024
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2024 Bible Society Vietnam. All rights reserved.
Lu-ka 9
9
Jmơt baar du jơt jơng kươt maanh han
(Ma-thi-ơ 10:5-15; 14:1-12; Mak 6:7-29)
1Brah Jê-sus khuôl jmơt baar jơt jơng pơrgum kươi, ươn dang kmheng u ch'bap kmheng jah prơh chaak u tơmbah pơrtanh. 2Pang maanh bu han tơmbơh chhuôr nggoor Brah Ưn ri u tơmbah bnih tanh. 3Pang maanh bu: “Tơt han troong khơơm liêu ơơn ơơm, khơơm liêu tong jra, thong, nom, prak kaih; kot khơơm liêu baar ơk ao ryoq. 4Bơl 'bei mưt nhi êch, phrui gôq nhi nei aan tơt jơl han. 5Kơtôk êch bơl bu 'bưn wơơt bơl 'bei nei tơt han sot rlach poh nei phrui tơrpôih steh a jơng bơn bei di baak ndraanh ta wal kươi bu.”#Lu 10:4-11; Kênh 13:51. 6Bei nei, bơl jơt jơng sot han, rlach pal poh bri, tơmbơh chhuôr Baak Sroong Klanh jôm ktôk u tơmbah pơrtanh.
Baak ring n'hông snđach Hê-rôt ri
7Khal au, Hê-rôt laa snđach pơching ttang mor teq u pal kaar ja lôh tơt nei rhơq rpơq đat, đươm bnih au nei mor: “Jang a ktôk chhưt ja rêh kươi;” 8bơl tôw nei lah: “Ê-li ja lôh sot;” nha bnih nday nha leet mor: “Mbu knông bơl grnưt noor klap khal hư ja rêh kươi.”#Mat 16:14; Mak 8:28; Lu 9:19. 9Hê-rôt mor: “Hei ja paang kôw Jang hơơi, bei nei bnih au laa 'bơơn baah hei kươt iat ja lơh pal kaar bei nei?” Snđach wơng troong jah a mơp Brah Jê-sus.
Brah tơ krik nom
(Ma-thi-ơ 14:13-21; Mak 6:30-44; Jang 6:1-14)
10Bơl jơt jơng plơq siq tơmbơh teq u Brah Jê-sus jôm kaar bu ja lơh. Pang liêu bơl jơt jơng han êêng, tơt di ktôk chôôl laa Bêt-sai-đa. 11Tơt phung raih gưt hơơi, nei han tênh Pang. Brah Jê-sus wơơt bu, chhuôr teq u nggoor Brah Ưn ri aan bu, u tơmbah aan bơl 'bơơn kươt tơmbah. 12Plah nar êch dơơh mau, jmơt baar du jơt jơng lôh mor teq u Pang: “Dan aan phung raih siq jah bu han tơt pal poh bri u ktôk poh rlum baah drơm u wơng griêng sa, đươm bơl bơn nha gôq a ktôk rhông rhaang.” 13Dôh Pang lah: “Nơơm bơl 'bei phrui aan bu sôông.” Bơl jơt jơng ơh: “Mơq 'bưn han pook griêng sa aan leq phung raih au nei bơl hei dơơn geh pram ơơk nom u baar ơơk pi ka ei.” 14Đươm geh tơmlai pram ban du bnih klau, mơ Pang lah n'hai bơl jơrnơ: “Phrui maanh bu gôq tênh phung, di phung pram jơt du.” 15Bơl jơrnơ lơh tênh baak nei u maanh jôm bnih gôq u teh. 16Brah Jê-sus pơih pram ơơk nom u baar ơk pi ka, nggơơr mat u trôôk, or ja nei pak nom, ndơơp aan bơl jơrnơ jah tacheq aan phung raih. 17Jôm bnih kot sa bơm hơơm. Bu sech kươi kươt jmơt baar sah bêêng pal bôh nom ngroh.
Tơmbơh baak chôôl Phi-e-rơ ri
(Ma-thi-ơ 16:13-19; Mak 8:27-29)
18Jơl Brah Jê-sus plah r'bon dan êêng, bơl jơrnơ pơrgum rlum Pang. Pang ôp bu: “Phung raih chôôl Hei laa 'bơơn?” 19Bu ơh: “Bnih au mor laa Jang Bap-tit, bnih nday mor laa Ê-li; bnih nday nha mor laa di mbu knông bơl grnưt noor klap khal hư rêh kươi.”#Mat 14:1-2; Mak 6:14-15; Lu 9:7-8. 20Pang leet ôp bu nha: “Nha bơl 'bei nei chôôl Hei laa 'bơơn?” Phi-e-rơ ơh: “Yau laa Yaang Krist Brah Ưn ri.”#Ja 6:68-69. 21Brah Jê-sus pơrkaam u maanh teq u bơl jơrnơ khơơm mor baak au teq u 'bơơn ơơm.
Brah tơmbơh noor baak chhưt n'hai baak rêh kươi Pang ri
(Ma-thi-ơ 16:20-28; Mak 8:30 – 9:1)
22Brah Jê-sus lah: “Koon Bnih phrui dol ơk ntil ji rngiêl, phrui dol bơl raanh ttơơm, bơl yau thwaai ndap ttơơm u bơl yau gưt jhai teq lơơi, phrui dol lưm, tơt nar pei kươt rêh kươi.” 23Pang lah n'hai jôm bnih: “Mơq 'bơơn êch tênh Hei, phrui dhot teq nơơm bơn na, jôm nar tung chhư rglaang nơơm baah tênh Hei.#Mat 10:38; Lu 14:27. 24Đươm 'bơơn êch đoh sm'boh rêh nơơm nei a kươi saap, nha 'bơơn đươm Hei baah saap sm'boh rêh nei a kươi đoh sm'boh rêh nơơm bu.#Mat 10:39; Lu 17:33; Ja 12:25. 25Mơq bnih êch kươt leq swich teh dôh nơơm bơn na dol saap luôch paich phrui dol phaat riat nei geh thlay ơơn? 26Đươm mơq 'bơơn prêêng mat teq u Hei u baak Hei nei Koon Bnih a kươi kot prêêng mat teq u bnih nei tơt Pang gôq lôh knông chring chraang nơơm ri, Bươp ri u bơl lênh brah jrah ri. 27A ngan, Hei lah bơl 'bei, geh di mbu baar du nha ta yoong a au a kươi 'bưn chhưt noor tơt sau nggoor Brah Ưn.”
Brah tơ krik gui
(Ma-thi-ơ 17:1-8; Mak 9:2-8)
28Tơmlai phaam nar di kươi ja lah pal baak au, Brah Jê-sus liêu Phi-e-rơ, Jang u Ja-kơ han n'hai Pang hao bnơm jah r'bon dan.#II Phi 1:17-18. 29Plah nha r'bon dan, muh mat Pang gơl êêng, ao Pang but book u aang rwaah. 30U tôw, geh baar du ta mor teq u Pang, nei laa Môi-se u Ê-li. 31Bu lôh sot knông chring chraang u mor teq u baak chhưt Pang ri, laa kaar Pang êch dơơh lơh dip plak tu poh Jê-ru-sa-lem. 32Phi-e-rơ u bơl gnasaal bu êch bêch đat đuôt, tơt tlơk kah, bu sau chring chraang Brah Jê-sus ri n'hai baar du ta yoong n'hai Pang. 33Plah baar du nei lơơi rlach Brah Jê-sus, Phi-e-rơ mor teq u Pang laah: “Ơi Yau, bơl bơn gôq a au kah đat, dan aan bơl hei kơl dơk pei ơơk naam: di mlơm aan Yau, di mlơm aan Môi-se u di mlơm aan Ê-li.” Bu mor dôh khah 'bưn gưt nơơm mor ơơn. 34Phi-e-rơ nha mor, geh di nduq lôh rlum kơndơp bu; bơl jơrnơ n'hông lôh mưt klung nduq. 35Ja nei geh baak a knông nduq lah laah: “Au laa Koon Hei, Bnih Hei ja sach, phrui iat baak Bnih nei.”#Mat 3:17; 12:18; Mak 1:11; Lu 3:22. 36Tơt baak nei u dưt hơơi, nei dơơn nha nh'ơơm mbu êêng Brah Jê-sus nei ei. Knông pal nar nei, bơl jơrnơ ơt rngơt, 'bưn chhuôr aan 'bơơn teq u baak kaar nơơm bu ja ndraanh sau.
Brah tơmbah drêên klau dol chaak rup
(Ma-thi-ơ 17:14-18; Mak 9:14-27)
37Nar a ôi, tơt Brah n'hai jơrnơ pôl jưr a bnơm, geh phung raih ơk lôh a mơp Pang. 38Tôw, geh di mbu knông phung ơk khuôl ttih laah: “Ơi Yau, dan Yau gmaak koon klau hei, đươm au laa koon dôl hei ri. 39Tơt dol chaak rup, drêên a drot bu troh khuôl. Chaak lonh len drêên lôh sơmbuh wiêm, lơh chhak but k'ung lêêk u huôch đat bu dol lơơi rlach drêên. 40Hei ja dan bơl jơrnơ Yau prơh chaak nei, dôh bu prơh 'bưn kươt.” 41Brah Jê-sus ơh: “Ơi klap 'bưn jơ u a rơk tôw! Hei a kươi gôq n'hai bơl 'bei, dol ơt ơl bơl 'bei aan tơt khal êch nha? Phrui liêu koon klau 'bei lôh đau!” 42Tơt koon drêên mhei lôh dơơh, chaak mrah kơndang bu u teh, lonh len bu. Dôh Brah Jê-sus têh gmhaar wêêng 'bưn jrah u tơmbah koon drêên nei, ja nei ndơơp kươi aan bươp bu.
Brah Jê-sus leet tơmbơh noor teq u baak chhưt n'hai baak rêh kươi Pang ri
(Ma-thi-ơ 17:22,23; Mak 9:30-32)
43Jôm bnih kot êêng aang teq u dang kmheng prêh nhjur Brah Ưn ri. Plah knông jôm bnih nha êêng aang teq u jôm kaar Brah Jê-sus ja lơh, nei Pang lah n'hai bơl jơrnơ: 44“Bơl 'bei phrui iat srlah pal baak au: Koon Bnih a kươi dol ndơơp teq u knông ti bu nday.” 45Dôh bơl jơrnơ 'bưn gưt baak nei. Teq u bu, baak nei nha dol km'ang tak lơh aan bu 'bưn wak wơơt kươt dôh bu nha n'hông, 'bưn baanh ôp Pang.
Baak prêh thlay ngan
(Ma-thi-ơ 18:1-5; Mak 9:33-40)
46Bơl jơrnơ ta rmhanh tơrnang nơơm, mơq 'bơơn klung nak bu laa bnih prêh thlay đat.#Lu 22:24. 47Brah Jê-sus gưt gơrninh knông chưt bu mơ Pang liêu di mbu koon drêên teq a gêêng nơơm bu 48u lah n'hai bu: “Bnih êch đươm saak Hei baah wơơt koon drêên au nei laa wơơt Hei, nha 'bơơn wơơt Hei nei laa wơơt Yaang ja maanh Hei. Đươm bnih êch dêq đat knông bơl 'bei nei laa bnih prêh thlay huôih leq.”#Mat 10:40; Lu 10:16; Ja 13:20. 49Jang ơh laah: “Ơi Yau, bơl hei ja sau geh bnih tơmoh chhak Yau baah prơh chaak, bơl hei ja pơrkhang đươm bnih nei 'bưn tênh n'hai bơl bơn.” 50Dôh Brah Jê-sus lah n'hai bu: “Khơơm pơrkhang pơrkhaang, đươm 'bơơn 'bưn wal teq u bơl 'bei nei laa chôh n'hai bơl 'bei.”
Brah Jê-sus han hao Jê-ru-sa-lem
(9:51 – 19:28)
Brah Jê-sus ktôk Sa-ma-ri
51Dơơh tơt nar Brah Jê-sus kươt wơơt hao trôôk, Pang rwach han tơt poh Jê-ru-sa-lem. 52Pang maanh bơl ndraanh han noor nơơm bu. Bu han teq u di poh dêq bơl Sa-ma-ri jah riêp nhi drơm aan Pang. 53Dôh bơl Sa-ma-ri 'bưn wơơt Pang, đươm Pang han wih r'bong poh Jê-ru-sa-lem. 54Ja-kơ u Jang laa jơrnơ Pang ri sau bei nei, mor: “Brah ơi, Brah geh êch bơl hei tak lơh ôinh jưr a trôôk jah chhu luôch bu#9:54 chhu luôch bu: Knông m'baak plơơp 'bian ti laa chhu luôch bu bei Ê-li ja lơh. pan?” 55Dôh Brah Jê-sus wih kươi têh gmhaar baar du; [u mor: “Bơl koon 'bưn gưt wêêng ap chhôk nôôl bơn;”]#9:55 Knông m'baak plơơp 'bian ti laa bu n'hai mor: “Bơl 'bei 'bưn gưt wêêng êch nôôl nơơm.” Koon Bnih ja lôh 'bưn geh jah lưm luôch baak rêh dôh jah đoh kwaai. 56ja nei Pang pôl bơl bơl jơrnơ han rlach poh dêq nday.
Ntil phrui geh jah tênh Brah
(Ma-thi-ơ 8:19-22)
57Nha plah han troong, di mbu mor teq u Brah Jê-sus: “Yau han đêch, hei a kươi tênh u nei.” 58Brah Jê-sus ơh: “Yan khaar geh rung, chum trôôk geh chhôm, dôh Koon Bnih 'bưn geh ktôk jah kơơl bôôk.” 59Pang lah teq u di mbu bnih nday: “Phrui han tênh Hei.” Dôh bnih nei ơh: “Smbah Brah, dan aan ch'bap hei siq jah rôôp bươp hei noor.” 60Dôh Brah Jê-sus lah: “Phrui teq bơl chhưt rôôp bơl chhưt bu ri; nha 'bei, phrui han u tơmbơh chhuôr nggoor Brah Ưn ri.” 61Di mbu bnih nday mor: “Brah ơi, hei a kươi tênh Brah, dôh dan aan ch'bap hei siq lơơi bnih nhi noor.” 62Brah Jê-sus ơh: “'Bơơn ja kan kuôk hơơi baah mơq a mak kươi nei 'bưn dip glap n'hai nggoor Brah Ưn.”
Chwazi Kounye ya:
:
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2024 Bible Society Vietnam. All rights reserved.