Апостолхнень тевсна 22
22
1«Ялгат и ломаньтналонь аляньке! Кулхцондода, мезе мон азан тейнть эсь прязень аф муворукс няфтеманкса». 2Мзярда сят кулезь, сон корхтай евреень кяльса, синь нинге сяда сетьмость. 3«Мон евреян, – поладозе Павел, – шачень Киликиянь Тарс ошса, и тонафнень тяса Иерусалимса Гамалиилонь ширеса. Мон тонафтфолень аляньконь коенц кемоста ванфтоманцты. Тяфта, палы седихть мон покодень Шкайти, кода тяни тинь. 4Мон панцине и макссине куломас тя од тонафтомать мельге сембе молихнень, мон сотнекшнине и ёряйне пякстамгудс алянек-аванек, 5монь валнень кемокстасазь озксвятиень оцюнясь и оцюнянь марнек пуромкссь. Синь кядьстост мон сявонь сёрмат Дамаск ошень еврейхненди, и молень тоза тостонь кемайхнень кунцемост и цинзерса сотнефста вятемост синь Иерусалиму наказамас.
6Но мзярда мон улень ки лангса и малаткшнень Дамаску, шиньгучкать малава апак учент монь менельста валдоптомань сельмонь пиди валда. 7Мон прань модать лангс и кулень вайгяль, кона корхтась тейне: "Савл, Савл, мес тон панят Эсон?" 8"Кият Тон, Азор?" – кизефтине мон. "Мон Назаретонь Иисуссь, конань тон панцесак", – мярьгсь Сон тейне. 9Ки лангонь ялгане няезь валдть и синь сявозень пелькс, но тейне корхтай вайгяльть ашезь куле. 10"Азор, мезе тейне тиемс?" – кизефтине мон. "Стяк и архт Дамаск ошу! – мярьгсь Азорсь. – Тоса азсазь семботь, мезе тейть эряви тиемс". 11Пиди валдть эзда мон сокоргодонь, сяс ялгане кядьбеда вятемазь Дамаску.
12И вов сась тейне фкя аля, лемоц Анания; сон пяк кемоста ванфтозе койть и пяк пара лувксса ульсь Дамасконь сембе еврейхнень инголе. 13Сон арась ваксозон и корхтай: "Савл ялгай, мрдаза тонь сельмовийце". Эстокиге сельмоне панжевсть и мон няине сонь. 14Анания мярьгсь тейне: "Аляньконь Шкайсна инголькиге кочканзе тонь вага мес: содалить Сонь мяленц, няелить Видексшинь Тиить и кулелить Сонь вайгяленц, 15сяс мес тон улят Сонь колганза азондыкс сембе ломаттнень инголе и пачфтьсак тейст сянь, мезе тон няеть и кулеть. 16Сяс тяк тарксе пингть! Стяк, Иисус Азорть лемонц тердезь кстиндафтт пря и штайть эсь пежетнень".
17Мзярда мон мрдань Иерусалиму и озондонь Шкаень кудса, тейне кучфоль няйфкс. 18Мон няине Азорть. Сон мярьгсь тейне: "Эряздоне тук Иерусалимста и тик тянь тяникиге, сяс мес синь аф путсазь седиезост тонь азондомацень Монь колган". 19"Азор! – мярьгонь мон. – Синь вдь содасазь, кода мон якань синагогаста синагогас, пякснине пякстамгудс и пикссине Тейть кемайхнень. 20А мзярда пяярсь вероц Тонь колгат няфтить-азондыть Стефанонь, мон улень шавихнень ширеса, ащень тоса и ваныне шавихнень щамснон". 21Эста Азорсь мярьгсь тейне: "Архт! Мон кучте тонь ичкози, лия тналонь ломаттненди"».
22Павелонь кулхцондозь тя пингс, но ня валда меле кармасть пешкодома: «Саты, машфтома сон! Аф кадома сон шиса!» 23Синь юватькшнесть, яфиесть щамса и васоньгурмозьса ёрясть кожфти пуль. 24Эста тёжянень ушманонь оцюнясь мярьгсь вятемда Павелонь ушманкуду и тоса пикссемда сонь шнаса, тяфта ёрась виденцяфтомс, мезенкса ломаттне тяшкава кяжиста юватькшнесть лангозонза.
Павел мянди наказамада
25Мзярда сонь сотнезь шнаньгарксса, Павел кизефтезе ваксстонза ащи сядонь оцюнять: «Кали мярьгондеви тейть койть коряс пикссемс Римонь ломанть, тяка лангс судфтома и тевонь апак содак?» 26Тянь кулемста сядонь оцюнясь мольсь тёжянень оцюняти и мярьгсь: «Месендят? Тя алясь Римонь ломань!» 27Эста тёжянень оцюнясь нежедсь Павелонди и кизефтезе: «Азк тейне, тон афкукс Римонь ломанят?» «Афкукс», – корхтай Павел. 28«Тейне Римонь ломанькс араманкса савсь пандомс оцю ярмак», – азозе тёжянень оцюнясь. «А мон шачень Римонь ломанькс», – мярьгсь Павел. 29Эста сят, кит анокласть сонь кизефнемонза, эстокиге потазевсть эздонза, тёжянень оцюнясь сонцьке эводсь, мзярда содазе – цинзерса пинкстафсь Римонь ломань.
Павел Оцю пуромксть инголе
30Омбоце шиня тёжянень оцюнясь валхфтозень Павелонь кядьста-пильгста цинзерхнень и тертьфтезень озксвятиень оцюнятнень и марнек Оцю пуромксть, а сяльде лихтезе Павелонь и ладязе инголест. Сон ёрась сяда лац содамс, мезьса муворгофнесазь еврейхне Павелонь.
Chwazi Kounye ya:
Апостолхнень тевсна 22: ОС16
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Библиянь ётафтома институтсь, 2016