ДжакӀуэ 5
5
Етхуанэ Ӏыхьэ
1Япэ щӀыкӀэ гупсыси, итӀанэ псалъэ. Тхьэм и пащхьэм псалъэ быдэр щыптынми уемыпӀэщӀэкӀ. Ар уафэм щыӀэщ, уэ щӀыгум утетщ – умыпсэлъакъуэ.
2ПщӀыхьэпӀэр гуныкъуэгъуэ куэдым къыхокӀ,
акъылыншэм и макъри псалъэ лейм еӀэт.
3Тхьэм и пащхьэ нузыр щыпщӀамэ, умыгъэгувэу зэрыбгъэзэщӀэнум хущӀэкъу. Акъылыншэр Тхьэм и жагъуэщ: тхьэлъанэ пщӀакъэ, зэрыбгъэзэщӀэнум хуепӀэщӀэкӀ. 4Нузырыр умыгъэзэщӀэнумэ, умыщӀыххэмэ нэхъыфӀщ. 5Уи бзэм ухуэмысакъмэ, псэкӀуэдщӀапӀэ уихуэнущ. «Псалъэу стар щыуагъэ мыгъуэт» жыпӀэу абы иужь тхьэпщхэм къаӀуэхуа лӀыкӀуэми#5:5 Тхьэпщхэм къаӀуэхуа лӀыкӀуэми – Пасэрей Ӏэрытххэм «лӀыкӀуэ» псалъэм и закъуэщ къыщыкӀуэр. «МелыӀыч» жиӀэу къыбгурыӀуи хъунущ. жумыӀэж. Апхуэдэ псалъэкӀэ Тхьэм и нейр зыщыбгъахуэу пщӀамрэ блэжьамрэ щхьэ хэбгъэкӀуэдэн хуей? 6ПщӀыхьэпӀэ куэдым пэж хэлъкъым, псалъэ лейми пщӀэ иӀэкъым, ауэ Тхьэм фӀэлӀыкӀ!
Мылъкур пщӀэ зимыӀэщ
7Зы унафэщӀым зы унафэщӀыр и тетрэ, абыхэм Ӏэщхьэтет нэхъ иныр къазэрыщхьэщытыжыр пщӀэуэ, щӀыпӀэ гуэрым тхьэмыщкӀэр зэрыщыдакъузэр, хьэкум пэж зэрыщамыщӀэр, захуагъэ зэрыщызэрамыхьэр умыгъэщӀагъуэ. 8ЩӀым хъугъуэфӀыгъуэу къыщӀэкӀыр зыӀэщӀалъхьащи, пащтыхьрэ пэт, губгъуэм кърах лэжьыгъэм хъер къыхех#5:8 Пасэрей Ӏэрытхым къыщыкӀуэ псалъэхэм къарыкӀыр гурыӀуэгъуэ дыдэкъым..
9Дыжьын зыфӀэфӀыр
дыжьын щыщӀэ зэпытщ,
мылъкур фӀыуэ зылъагъури
абыкӀэ къигъэхъаржэм ирикъукъым.
Зы къэмынэу пщӀэншэщ!
10Мылъкум хэхъуэху,
пщӀэншэрышхэхэри нэхъыбэ мэхъу:
еплъмэ зэрилъагъум щыфӀэкӀауэ,
ар зейм сыт щхьэпэу абы къыхихыр?
11Ишхар куэдми, мащӀэми
цӀыху лэжьакӀуэр ӀэфӀу мэжей.
Ауэ мылъкум къыщыкъеикӀар
зэмызэгъыжу зегъэджэрэзри пӀэм хэлъщ.
12Мы уафэм и щӀагъым нэгъуэщӀ зы тхьэмыщкӀагъэшхуи щыслъэгъуащ:
цӀыхум зэхуихьэса мылъкум и хъер илъэгъужакъым –
13сатум хилъэфащ,
быным къыхуигъэнэни иӀэжкъым.
14ЦӀыхур дунейм пцӀанэу къытохьэ,
апхуэдэ дыдэу пцӀанэуи дунейм йохыж.
Зэхуихьэсам щыщу
зы мастэ хуэдизи хьэдрыхэ хуздэхьынукъым.
15Мыри тхьэмыщкӀагъэшхуэщ:
цӀыхур дунейм къызэрытехьам хуэдэ дыдэу токӀыж,
ищӀэми, илэжьми къыпэкӀуэ щымыӀэу жьым ихьыжмэ,
сытыр и щхьэпэ?
16Хуабжьу щӀегъуэжауэ, гукъеуэр имыухыу, губжьым иӀыгъыу
и гъащӀэ псор мазэхэ жэщым хэтым ещхьу ехь.
17Ешхэрэ ефэу, мы уафэм и щӀагъым щӀэту гугъуехьыр пылъу къыщилэжьми щыгуфӀыкӀыу Тхьэм кърита гъащӀэ тӀэкӀур къипсэуным нэхъыфӀ цӀыхум дежкӀэ зэрыщымыӀэр итӀанэщ къыщызгурыӀуар. Аращ насыпуи Тхьэм абы къыхуигъэфэщар. 18Уеблэмэ, Тхьэм зыгуэрым беигъэр щыбгъэдилъхьэкӀэ, ар зэригъакӀуэу и Ӏыхьи къызэрыхихыжын Ӏэмал щригъэгъуэткӀэ, и лэжьыгъи щыгуфӀыкӀыжыну игъуэ щригъахуэкӀэ – Тхьэр къетауэ аращ. 19Тхьэм зи гур апхуэдэ тхъэгъуэкӀэ щыз ищӀа цӀыхур игъакӀуэ гъащӀэм зэрегупсыс щыӀэкъым.
Chwazi Kounye ya:
ДжакӀуэ 5: АдгФЛ
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Институт перевода Библии, 2009, 2018, 2021