ରୋମିୟ 2
2
ଈଶ୍ୱର ନ୍ୟାୟ୍ ବିଚାର୍
1ଏପେଙ୍ଗ୍ ଯଦି ଜେକନିକାରିଙ୍ଗ୍ ବିଚାର୍ କିଦେଙ୍ଗ୍ ଆଡ୍ନାପ୍ ଇଞ୍ଜି ଚିନ୍ତା କିନାଦେର୍, ଲାଗିଙ୍ଗ୍ ହେଦାଙ୍ଗ୍ ବୁଲ୍। ଏପେଙ୍ଗ୍ ଏଚେକାଡ଼୍ଦ ଜେକନିକାରିଙ୍ଗ୍ ବିଚାର୍ କିନାଦେର୍, ଏପେଙ୍ଗ୍ ଜାର୍ତିଙ୍ଗ୍ ଦସି ଇଞ୍ଜି ବିଚାର୍ କିନାଦେରା, ଇନେସ୍କି ଏପେଙ୍ଗ୍ ପା ହେୱାର୍ କିତିଲେକେ କିନାଦେରା। 2ଆରେ ଆପେଙ୍ଗ୍ ପୁଚାପ୍ନା ଯେ, ଇ ଲେକେ କାମାୟ୍ କିନାକାରିଙ୍ଗ୍ ଈଶ୍ୱର ଟିକ୍ ବିଚାର୍ କିନାନ୍। 3ଆରେ ଏପେଙ୍ଗ୍ ଯଦି କରାପ୍ କାମାୟ୍ କିନାକାରିଙ୍ଗ୍ ବିଚାର୍ କିନାଦେର୍, ଲାଗିଙ୍ଗ୍ ଏପେଙ୍ଗ୍ ପା ହେୱାର୍ କିନିଲେକେ କାମାୟ୍ କିନାଦେରା, ଆରେ ମିଙ୍ଗେଙ୍ଗ୍ ପା ଈଶ୍ୱର ହେୱାରିଙ୍ଗ୍ ବିଚାର୍ କିତିଲେକେ ବିଚାର୍ କିଦ୍ନାନ୍। 4ଈଶ୍ୱର ମିଙ୍ଗେଙ୍ଗ୍ ଦୟା କିଦ୍ନି କାଜିଙ୍ଗ୍, ମିଙ୍ଗେଙ୍ଗ୍ ପାପ୍ କାମାୟ୍ ପିସ୍ତି ମାନ୍ବାଦ୍ଲାୟ୍ କିଦେଙ୍ଗ୍ ସୁଯଗ୍ ହିଦ୍ନାନା। ଏପେଙ୍ଗ୍ ତା ଦୟା, ସାସ୍ ଆରେ ୱିଜୁଦିନ୍ ଲାଡ୍କିନି ବିଷୟତିଙ୍ଗ୍ ପୁଞ୍ଜେଙ୍ଗ୍ ଆଡୁଦେରା।
5ଇନେସ୍କି ଏପେଙ୍ଗ୍ ମି ଗରବ୍ ମାନ୍ ବିତ୍ରେ ମାନି ପାପ୍ କାମାୟ୍ ପିସ୍ତି ମାନ୍ବାଦ୍ଲାୟ୍ କିଉଦେରା। ହେଦାଙ୍ଗ୍ କାଜିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ବେସି ରିସା ଆଦ୍ନାନା, ଆରେ ହେୱାନ୍ ନ୍ୟାୟ୍ ବିଚାର୍କିନି ନାଞ୍ଜିଙ୍ଗ୍, ମିଙ୍ଗେଙ୍ଗ୍ ଦଣ୍ଡ୍ ହିଦ୍ନାନ୍। 6ହେୱାନ୍ ୱିଜୁ ମାନାୟାର୍ ଜାର୍-ଜାର୍ କାମାୟ୍ କିତି ଅନୁସାରେ ପୁରଷ୍କାର୍ ହିନାନ୍, 7ମାତର୍ ଇମ୍ଣାକାର୍ ସାସ୍ ଆଜି ହାର୍ କାମାୟ୍ କିନାର୍, ଗୌରବ, ସନ୍ମାନ୍ ଆରେ ୱିଜ୍ୱି ଜିବୁନ୍ ପାୟାଆନି କାଜିଙ୍ଗ୍ ୱିଜୁଦିନ୍ ଦାହ୍ନାର୍, ଈଶ୍ୱର ହେୱାରିଙ୍ଗ୍ ୱିଜ୍ୱି ଜିବୁନ୍ ହିନାତ୍। 8ମାତର୍ ଇମ୍ଣାକାର୍ ଜାର୍ ପାଇଦା କାଜିଙ୍ଗ୍ ନେ କାମାୟ୍ କିନାର୍, ଆରେ ସତ୍ କାମାୟ୍ କିଉର୍, ମାତର୍ ଅଦରମ୍ କାମାୟ୍ କିଦେଙ୍ଗ୍ ଇଚା କିନାର୍। ଈଶ୍ୱର ହେୱାରିଙ୍ଗ୍ ରିସା ଆନାନ୍ ଆରେ ଦଣ୍ଡ୍ ହିନାନ୍। 9ଇମ୍ଣି ମାନାୟାର୍ ଅଦରମ୍ନି କାମାୟ୍ କିଜିମାନାର୍। ଈଶ୍ୱର ହେ ୱିଜାର୍ ମାନାୟ୍ତିଙ୍ଗ୍ ଦଣ୍ଡ୍ ହିନାନ୍, ଆଗେ ଯିହୁଦି ଜାତିନି ମାନାୟାରିଙ୍ଗ୍ ତାପାଚେ ବିନ୍ଜାତିନି ମାନାୟାରିଙ୍ଗ୍। 10ମାତର୍ ଇମ୍ଣି ମାନାୟାର୍ ହାର୍ କାମାୟ୍ କିଜିମାନାର୍ ଈଶ୍ୱର ହେୱାରିଙ୍ଗ୍ ଗୌରବ, ସନ୍ମାନ୍ ଆରେ ଶାନ୍ତି ହିନାତ୍, ଆଗେ ଯିହୁଦି ଜାତି ମାନାୟାରିଙ୍ଗ୍ ତାପାଚେ ବିନ୍ଜାତିନି ମାନାୟାରିଙ୍ଗ୍। 11ଇନେସ୍କି ଈଶ୍ୱର ୱିଜୁ ମାନାୟାରିଙ୍ଗ୍ ହାମାନ୍ ବିଚାର୍ କିନାନ୍।
ମଶା ଲେକିକିତି ନିୟମ୍ ସାସ୍ତର୍ ଆରେ ଈଶ୍ୱରତି ବିଚାର୍
12ବିନ୍ଜାତିନି ମାନାୟାର୍ ମଶା ଲେକିକିତି ନିୟମ୍ ସାସ୍ତର୍ତିଙ୍ଗ୍ ପାୟାଆୱାଦାଙ୍ଗ୍ ମାଚିସ୍ ପା ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍। ଆରେ ଯିହୁଦି ଜାତିନି ମାନାୟାର୍ ମଶା ନିୟମ୍ତିଙ୍ଗ୍ ପାୟାଆଜି ମାନିକିୱାଦାଙ୍ଗ୍ ପାପ୍ କିତିସ୍, ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍। 13ଇନେସ୍କି ମଶା ନିୟମ୍ତିଙ୍ଗ୍ ୱେଚି ମାନାୟାର୍ ଈଶ୍ୱର ଆଗେ ଦରମ୍ ମାନାୟ୍ ଆଉର୍, ମାତର୍ ହେ ନିୟମ୍ତିଙ୍ଗ୍ ମାନିକିତି ମାନାୟ୍ତିଙ୍ଗ୍ ଈଶ୍ୱର ଦରମ୍ ମାନାୟ୍ କିନାନ୍। 14ବିନ୍ଜାତିନି ମାନାୟାର୍ତାକେ ମଶା ନିୟମ୍ ହିଲିତିସ୍ ପା, ହେୱାର୍ ତା ମାନ୍ତି ଇଚା ଅନୁସାରେ ନ୍ୟାୟ୍ କାମାୟ୍ କିନାର୍, ହେୱାର୍ ଜାଣାୟ୍ କିନାରା ଯେ, ହେୱାର୍ତାକେ ପା ସତ୍ ନିୟମ୍ ମାନାତ୍। 15ହେୱାର୍ ଈଶ୍ୱର ମଶାଙ୍ଗ୍ ହିଜିମାଚି ନିୟମ୍ ତା ଗରବ୍ତାକେ ଲେକାଆତାତ୍ନା ଇଞ୍ଜି ଚଚ୍ନାରା। ଇନେସ୍କି ହେୱାର୍ ମାନ୍ ବିରଦ୍ କିଜି ୱେଚ୍ନାତ୍ ଯେ, ହେୱାର୍ ହାର୍ କି କରାପ୍ କାମାୟ୍ କିନାରା, ଆରେ ହେୱାର୍ ମାନ୍ନେ ସତ୍ ବିଷୟତିଙ୍ଗ୍ ପୁନି କିନାତ୍। 16ହେ ଦିନ୍ ଇଲେକେ ଗଟାଆନାତ୍ ଯେ, ନା ହାର୍ଦିକାବୁର୍ ଅନୁସାରେ ଈଶ୍ୱର ଯୀଶୁ ଖ୍ରୀଷ୍ଟ ହୁଦାଙ୍ଗ୍ ମାନାୟାର୍ ଡ଼ୁକ୍ତି ବିଷୟତିଙ୍ଗ୍ ବିଚାର୍ କିନାର୍, ହେ ନାଞ୍ଜିଙ୍ଗ୍ ଇ ୱିଜୁ ପୁନ୍ୟା ଆନାତ୍।
17ଏପେଙ୍ଗ୍ ଜାର୍ତିଙ୍ଗ୍ ଯିହୁଦି ଜାତିନି ମାନାୟ୍ ଇଞ୍ଜି ୱେଚ୍ଚି ଦରମ୍ ସାସ୍ତର୍ନି ନିୟମ୍ତିଙ୍ଗ୍ ଆହା କିନାଦେରା ଆରେ ଈଶ୍ୱର ମାଙ୍ଗେଙ୍ଗ୍ ଦୟା କିତାତ୍ନା ଇଞ୍ଜି ୱେଚ୍ନାଦେରା। 18ଆରେ ଏପେଙ୍ଗ୍ ଈଶ୍ୱର ଇଚାତାଙ୍ଗ୍ ପୁଚାଦେର୍ନା ଆରେ ଏପେଙ୍ଗ୍ ଆଗେତାଙ୍ଗ୍ ମଶା ନିୟମ୍ତିଙ୍ଗ୍ ୱେଚି କାଜିଙ୍ଗ୍ ଏପେଙ୍ଗ୍ ଟିକ୍ ଆରେ ବୁଲ୍ ବିଷୟତିଙ୍ଗ୍ ପୁଚାଦେର୍ନା। 19ଆରେ ଏପେଙ୍ଗ୍ କାଣାଲଗାଙ୍ଗ୍ ହାଜି ଚଚ୍ଚେଙ୍ଗ୍ ଆରେ ମାଜ୍ଗାତାକେ ମାନି ମାନାୟାରିଙ୍ଗ୍ ଅଜଡ଼୍ ଚଚ୍ଚେଙ୍ଗ୍ ଆଡ୍ନାପ୍ ଇଞ୍ଜି ଜାର୍ତିଙ୍ଗ୍ ୱେଚ୍ନାଦେରା। 20ଆରେ ଏପେଙ୍ଗ୍ ବୁଦିହିଲି ମାନାୟାରିଙ୍ଗ୍ ହିକ୍ଷାହିଦେଙ୍ଗ୍ ଆରେ ଈଶ୍ୱରତି ସତ୍ ହିକ୍ଷାତିଙ୍ଗ୍ ହିମ୍ଣାରିଙ୍ଗ୍ ହିକାୟ୍ କିଦେଙ୍ଗ୍ ଆଡ୍ନାପ୍ ଇଞ୍ଜି ଜାର୍ତିଙ୍ଗ୍ ୱେଚ୍ନାଦେରା। ଇନେସ୍କି ମୋଶା ନିୟମ୍ତାଙ୍ଗ୍ ପୁରା ସତ୍ ଆରେ ଜ୍ଞାନ୍ନି ବିଷୟ ପୁଚାପ୍ନା ଇଞ୍ଜି ଜାର୍ତିଙ୍ଗ୍ ବାବିକିନାଦେରା।
21ଲାଗିଙ୍ଗ୍ ଏପେଙ୍ଗ୍ ଅଲ୍ଗା ନିକାରିଙ୍ଗ୍ ହିକ୍ଷା ହିନାଦେରା, ମାତର୍ ଏପେଙ୍ଗ୍ ଇନାକିଦେଙ୍ଗ୍ ନିଜେ ହେ ବିଷୟତିଙ୍ଗ୍ ହିକାଉଦେରା? ଏପେଙ୍ଗ୍ ମାନାୟାରିଙ୍ଗ୍ ଚରି କିମାଟ୍ ଇଞ୍ଜି ହିକ୍ଷା ହିନାଦେରା, ମାତର୍ ଏପେଙ୍ଗ୍ ନିଜେ ଚରି କିନାଦେରା? 22ଏପେଙ୍ଗ୍ ଦାରି କାମାୟ୍ କିମାଟ୍ ଇଞ୍ଜି ଶୁଣାୟ୍ କିନାଦେରା, ମାତର୍ ଏପେଙ୍ଗ୍ ହେ ଲେକେ କିନାଦେରା? ଏପେଙ୍ଗ୍ ମୁର୍ତିତିଙ୍ଗ୍ ପୁଜା କିନାକାରିଙ୍ଗ୍ ଗିଣ୍ କିନାଦେରା, ମାତର୍ ଏପେଙ୍ଗ୍ ବିନ୍ଜାତିନି ମାନାୟାର୍ ମନ୍ଦିର୍ନି ଜିନିସ୍ତିଙ୍ଗ୍ ଚରି କିନାଦେରା। 23ଏପେଙ୍ଗ୍ ଈଶ୍ୱର ହିତ୍ତି ନିୟମ୍ ପୁଚାପ୍ନା ଇଞ୍ଜି ଚଞ୍ଜିଆ ଆନାଦେରା, ମାତର୍ ହେ ନିୟମ୍ତିଙ୍ଗ୍ ମାନିକିୱାଦାଙ୍ଗ୍ ଈଶ୍ୱରତିଙ୍ଗ୍ ଇନସ୍ତା କିନାଦେରା। 24ଇନେସ୍କି ଦରମ୍ ସାସ୍ତର୍ତାକେ ଇଲେକେ ଲେକାଆତାତ୍ନା ଯେ, ମି କରାପ୍ କାମାୟ୍ କାଜିଙ୍ଗ୍ ବିନ୍ଜାତିନି ମାନାୟାର୍ ଈଶ୍ୱରତିଙ୍ଗ୍ ନିନ୍ଦା କିନାରା।
25ଯଦି ଏପେଙ୍ଗ୍ ମଶା ଲେକିକିତି ଦରମ୍ ସାସ୍ତର୍ ନିୟମ୍ତିଙ୍ଗ୍ ମାନି କିନାଦେରା, ଲାଗିଙ୍ଗ୍ ଏପେଙ୍ଗ୍ ସୁନତ ଆନାକା ଲାବ୍ ଆନାତ୍। ମାତର୍ ଏପେଙ୍ଗ୍ ଯଦି ଦରମ୍ ସାସ୍ତର୍ ୱେଚ୍ଚିତି ଲେକେ କିଉଦେର୍, ଲାଗିଙ୍ଗ୍ ସୁନତ୍ ଆୱିତି ବିନ୍ଜାତିନି ମାନାୟାର୍ ହୁଦାଙ୍ଗ୍ ହାମାନ୍। 26ଆରେ ଯଦି ବିନ୍ଜାତିନି ମାନାୟାର୍ ଈଶ୍ୱର ନିୟମ୍ତିଙ୍ଗ୍ ମାନିକିନାର୍, ଈଶ୍ୱର ହେୱାରିଙ୍ଗ୍ ତା ଲକ୍ ଆଦେଙ୍ଗ୍ ୱିଜୁ ଅଦିକାର୍ ଆରେ ସନ୍ମାନ୍ ହିନାନ୍। 27ଆରେ ଯଦି ସୁନତ ଆୱିତି ବିନ୍ଜାତିନି ମାନାୟ୍ ମଶା ଲେକିକିତି ନିୟମ୍ତିଙ୍ଗ୍ ମାନି କିନାରା ହେୱାନ୍ ମଶା ଲେକିକିତି ଦରମ୍ ସାସ୍ତର୍ତିଙ୍ଗ୍ ପୁଚାର୍ନା ଆରେ ସୁନତ ଆତି ମାନାୟ୍ତାଙ୍ଗ୍ ହାର୍।
28ଏପେଙ୍ଗ୍ ଯିହୁଦି ଜାତିନି କୁଟୁମ୍ତ ଜନମ୍ ଆତିସ୍ କି ସୁନତ ବିଦି ଅନୁସାରେ ସୁନତ ଆଜି ମାଚିସ୍ ପା ଏପେଙ୍ଗ୍ ସତ୍ ଯିହୁଦି ଆକାୟ୍, 29ମାତର୍ ମି ଗରବ୍ ଈଶ୍ୱର ହୁଦାଙ୍ଗ୍ ଟିକ୍ଆଜି ମାନାତ୍, ଲାଗିଙ୍ଗ୍ ଏପେଙ୍ଗ୍ ସତ୍ ଯିହୁଦି। ଆରେ ସତ୍ ସୁନତ ଇଲେକେ ଯେ, ଗାଗାଡ଼୍ନି ଜିନିଷ୍ ହଣ୍ଡ୍ନାକା ଆକାୟ୍, ମାତର୍ ଈଶ୍ୱର ଆତ୍ମା ସାଇଜତାଙ୍ଗ୍ ଜାର୍ ଗରବ୍ତିଙ୍ଗ୍ ବାଦ୍ଲାୟ୍ କିନାକା। ହେ ଲେଗ୍ଦି ମାନାୟ୍ ଈଶ୍ୱରତାଙ୍ଗ୍ ଜୟ୍-ଜୟ୍ ପାୟା ଆନାନ୍, ମାତର୍ ମାନାୟାର୍ତାଙ୍ଗ୍ ପାୟା ଆଉନ୍।
Pengo Parja Bible by The Love Fellowship is licensed under Creative Commons Attribution-ShareAlike 4.0 License.