Rut 3
3
Mba Rut na' ntèt Boaze nsoṅ i ze nu là
1Naomi màndu Rut tshob yi ndù: Ngon àm, a bwô ndù me ghù o fite, ntswe mebwô. 2Ndonni, Boaze ze bin à ghafa' tse tse bènnzwi ke mbe là ke' b'a mo' ndu be ké? Tshù, a' tsham nsa yen tèttswe' li dù' netsham nsa. 3Sôg wul o, mbé't'é, ma' nzwe num o, nswe' nèn mà dù' netsham nsa; kà ghù ndù a lèn o ke be ndù a miagte nejù jujù mba nenu. 4Ndùs'a nsi nèn nô nsi là, o lôte dù' i kua' mebwô, njôg nya'te nèn nô mbaṅ nku mi bam belangé. Tu wul i nsi soṅ o ju z'a bwô ndù o ghù là. 5Rut bùnte Naomi ndù: M'a' ghù ju z'o tshob me là.
6A swe' nèn dù' netsham nsa, ngù njoṅ ju fa ze màndu i lo ntshob yi là. 7Boaze jù mbèn nu, ntù i dun tsiaṅte. A nèn nô mbaṅ nku mi bam belangé. 8A be tshaṅ tèttswe', bwôg ghom Boaze; a ben wul i, njen ndù mo' mènnzwi nô mbaṅ nku mi. 9A tshob ndù: O b'a we? Rut bùnte ndù: A b'a me Rut ngafa' o ze mènnzwi, nyit mbàb mu num àm, nummb'o ghù nelo' àm fôge. 10Boaze tshob ndù: Ngon àm, a bwô ndù Tshùaben yab kàn, ntam ntse wù! Yen yoṅ nu li z'o bèn ngù là, bèn nkwé nta mu ntshùa mbwe yoṅ i, nummb'o ke' diag bonnshum, bwoṅbwoṅ ke ghafu', ghankàb lo. 11Ngon àm, ndonni kà bwôg sàm ju. Me nsi ghù mba ke lo z'o tshob là wù; nummbe njoṅ benntùn fa mum ngô lèn ndù o b'a mènnzwi ntùn, nku'ni. 12A #Rut 2.20b'a nenùn ndù me ghù nelo' o fôge, là mo' mèn num bwe ndù a ghù nebwôg lo' o fôge. 13Zi nsen ni. A be z'a tshag nkô nelo' o fôg là, mb'a' lo'. Là, a be z'a ke' kô nelo' o fôg là, mba m'a' lo' o. Me lo' lén Tshùaben z'a be ntùn nà nkàn mfe yi num yen nu là. A bwô ndù o nô nsi tà nkum nkebnjù.
14Rut nô mbaṅ nku mi tà nkum nkebnjù, ndo nsi ndùse mèn na' mbe ke yoṅ nku'ni nelèn mfèl i là. Boaze tshob ndù: A ke' bwô mèn lèn ndù mènnzwi tsho dù' netsham nsa. 15A bèn ntshob Rut ndù: Tswite kummbaṅ s'a be num o là me, ntshùb nyitt'é, Boaze fi' mbe' nkesoṅ ngefet ntôg naṅ bwe, nabte nte tu i, a bèn njam ntùm ngô. 16Rut bèn njam mbaṅ màndu i Naomi, a tshob yi ndù: Ngon àm, a b'a wù, a be ndùke? Rut soṅ njoṅ ju fa ze yen mandum nà ghù yi là. 17Rut tshob ndù: A fà men mbe' nkesoṅ ngefet ntôg li me ntshob ndù: O ke nsi bèn njam mbu ndaṅ mbaṅ màndu o. 18Naomi tshob ndù: Ngon àm, tswe ndùlala, ke tshob nu, tà nkum ndùs'o yen mba tshen nu là nsi miagte là; nummbe yen mandum nà ke nsi fite ke be ndù yen nu là ma' tu i be kua' sènni.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.