Tànkùt 7
7
Mènnzwi màndà num ndo' tu ménnshum
1Nshum àm, ntshùb ntshob màm,
ndé' ntag màm ntùm ntù o.
2Ke nze ntag màm, o nsi yôge,
ke ndem ntag màm à mb'o be ndem
nyilag là.
3Kut yub num ntu mbu mu,
tshébte yub ntùm ntù o.
4Tshob zenu ndù a b'a mfèl o ze mènnzwi
tshob nesiaṅte ndù a b'a yu nshune;
5ndùlala ndù bo béb o num
ngùn mènnzwi
num ngùn mènnzwi z'a ghù botte ntshob là.
6Me lo tsin tôndà àm,
nke ndôte ntùm mfé' ntùn mi me fate bwe là,
7me lo ke ndôte netèt kagni
njen mo' ménnshum bwe, ndù lèn
nkwate ke tu i.
8A lo ke ntshùa num manze, mbaṅ tôg nze
dù' ze mo' ta' i netèt tshen ghùn bènnzwi là tsin nà.
A nke nzin nda'nda' nke nèn nze dù' ba' i be là.
9A na' mb'a nkabte njù,
ndù mfetnjù,
netèt tèttswe' bo
njame.
10Tshù, mo' mènnzwi kù'
nèn mbaṅ i,
ndù a ghù mat kattù, bo mfù
ntùm ntù i.
11A lo ke mvôgte, ke ke ngom wul i nze,
nku mi ke be ghô ntùm
ze ndà.
12O lo ke ntèl i num manze,
ntèl i num ba nsém,
num njoṅ ntôg nze fa, a ke nya'a.
13Mènnzwi là ghom ménnshum nà
ntsiag i,
ntshob yi se se ndù:
14Njo jule'te ze ma' mbu lo be
tu àm,
sènni me zwiagte yen
nka'ni là.
15A ndùlala bèn ngù kà me ntum
nse' mbwe o,
nediag o. Tshù wù là ze me fon là.
16M'a' lo' ba belangé nabte kunndà yi,
ndo' nzwe nevèn tse ndeb i fe à Egipto là mbomte kunndà yi.
17M'a' naṅ tshu nelamte num kunndà sàm,
mire, aloès, kinamo.
18Ndonni se' be nèn ntamte ntùm nkôni
tà nkum nkebnjù,
be fà wut be ntùm ghag, ntsiaṅte.
19Nummbe ndu àm ke ndà,
a nèn nkatte tà ngùanesà.
20A lo' bam nkàb nèn yi;
a nsi bèn njam ndà à tà ntshùa ṅwù.
21A tshùa njam ntshob ndo' tu ménnshum,
a lo' ntshob nebotte mi a ntshu i là nsoṅt'é yi.
22Ménnshum tam njam i be ndùse,
mba ta' mbabun ze bo kul i nelab i là.
23A be mbe ndùlala tà nkum ndùse két
to bi se,
mba saṅ s'a vù ntùm nkù,
ke lèn ndù a nsi be miagte lo' tu i là.
24Nshumnshum tshàm, ndonni a bwô bin ju' me,
bin kù' ntoṅ num ntshob mi a tum
ntshu àm nà.
25Kà ntù tsin kaṅ njab num tse manze lèn
yen mènnzwi là.
Kà tam num tse manze mbi.
26Nummb'a ghù benntùn yàm
vù nsi.
Benntùn ts'a zwi yub là yàm nga' mbu.
27Ndà i b'a manze ngô fe ben.
A b'a ya'nze z'a be nswe' nèn nkum
dù'ntswe vùkob là.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.