Tànkùt 26
26
Nkagni
1Nywin mbaṅ ke' be bwô dum,
ke mbaṅ no num ngelaṅ netsho' tshu,
be ndaṅndaṅ nku'ni ke' be bwô nkagni.
2Ndaṅndaṅ mba saṅ num nkù,
nganelét nke mfùt là,
be ndaṅndaṅ ndon ze bo so num mèn ke ntun nà
ke' be tsho num ng'é.
3Shua' #Yobk. 32.9-10; Tànk. 10.13b'a num nyàmdiaṅe, ntùn ntshu nyàm
be num kekwène
bo ke ntam ṅwag à mvèn kagni.
4Kà yé'te num bà nkagni mbùnte nu yi,
mbwôg ndù kà tu wul o
fut'é;
5bùnte nkagni mba kua' bà i be yi là,
mbwôg ndù k'a yen wul i mba nzenu là.
6Mèn z'a be ntshag nkùn nkagni là
num nso mfaṅ num nku mi, nke nu lem
ntùm ngùtni.
7Nekeb ntsha z'a tum ntshu nkagni là
ke' ghù neta,
ndaṅndaṅ mba nku nke'kèt be mbwoṅ neta là.
8Mèn ghù nku'ni nkagni
mb'a tswe à mb'o taṅ loṅ
num shùmte là.
9Nekeb ntsha' z'a tum ntshu
kagni là,
b'a mba njô ze nganu ndu'
tshùb bu i là.
10Mèn z'a num ndo' kagni boa ghatshùanze
ntùm ntshufa' là
b'a mba ngama' két z'a be ntam njoṅ benntùn fa là.
11Nkagni be mbèn njam num bà i
mba mbù num mbèn njam num ju
z'a ywi' là.
12O njen mènntùn a nke ndo' wul i
mba nzenu là,
o lèn mb'a bwô nenywinte num nkagni
ntshùa i kua' neshu.
Keki ndô
13Ndô num ntshob ndù: Ngwayit
num manze là,
ta' ngwayit be num ba manze là.
14Tshètndà num nkaṅte num saṅ se bo taṅ i bwe là,
be ndaṅndaṅ ndô num nkaṅte wul i num kunndà.
15Ndô so bu i ntùm
kàb,
ke bèn ndo' mbèn yi njam netshag ntshu i.
16Ndô ke njen wul i mb'a b'a nzenu ta là
mb'a ze nu ntshùa benntùn sammbàa tse bo ghù nkwate ntùn nà.
Tsemo' tànkùt
17Ntshùanze z'a be nja ntù num ntanta
z'a ke' lôt'é là,
fut'a mèn z'a num ntshùb mbù
num ntoṅ mi là.
18Ndaṅndaṅ mba tshùagkèt mbabun nà,
a be ma' ba nesèn mbwôge,
nkét bo vùkob;
19ng'é fut'a mèn z'a num mfùte mfèl i là
a num ntshob ndù: Be lo ke ke ntam à fiaṅnsoṅ ké?
20Ntshwèn be ke be mba mbwôg bi;
ngashu'te be ke be,
mba ntanta à mi.
21Kekimbwôg be mfà nge'mbwôge,
ntshwèn nke mfà mbwôge.
Be ndaṅndaṅ nga ntanta be ntènte tantshu.
22Ntshob ngashu' ndàm ke mb'a mba
bon tshu nelamte là,
ntshob là be ntsho num mèn
tà nkum tà ntù i.
23Ndaṅndaṅ mba ba befe silba z'a ṅab
num kab tsha' là,
nkub ntshu nelote bo ntù kebwô
b'a ndùlala.
24Ngakeban ke ndo' à nkub ntshu mi
mfùte yi,
a num ndem mfùm ntùm ntù i.
25Ndùs'a lo' nze nebotte là, o
bamnà
nummb'a ghù tshùaya'nu ntù i sammbàa.
26A be z'a lem ze nkembàn,
nkab'é là,
mba tshùagntù i nsi la'te wul i
ntùm mbumte.
27Mèn z'a tswe' tam nà, mb'a' vù ntùm bwe;
mèn ma' loṅ mb'a nsi tam à
be ng'é.
28Lém s'a num ntatte là num ndo'
kebwô nse' yi.
Ntshu z'a be mbatte là num nse' fam.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.