Esaya 2
2
1Njem ze ngatshob ntshob Nsi Esaya nshum Amots na' njen mfà num Yuda bo Yérusalém nà.
Njoṅ ngô fa nsi be Yérusalém
(Mik. 4.1-3)
2A nsi be ngelaṅ mànjam mbat Tshùaben
b'a num ntshùa tsemo' mbale.
Yen mbat là nsi nèn tù tshùa nkônga fa,
njoṅ ngôngô fa ke nkù nda' nèn bwe.
3Ntumntum nsi nèn bwe bwoṅ, ke ntshob ndù:
Bin se' be ko' nèn num mbat
Tshùaben,
ntùm ndà Nsi Yakob,
ndù a la'te be tse manze,
be ke nzin num tse ntshagnze.
Nummbe ntshù' nsi tum Sion,
ntshob Tshùaben tum Yérusalém.
4A #Yo. 4.10nsi be ngayab kam netèt ngôngô,
be ngatshagte ntumntum yàme.
Bo nsi lo' ṅwi tshob tswe
nsofa' yi,
lo' nkô mub tswe mbitshwèt mub yi.
Mo' ngô ke nsi bèn tsho' ṅwi
num mo' ngô;
nezi'te nema' ntsho ke nsi bèn be.
5Tunndà Yakob, bin se'
bag bin zin ntùm nelàn Tshùaben.
Lé'njù Tshùaben, lé' netsho'te ntsha
6O ghua' kua' yu nzwit mèn,
tunndà Yakob kua' nenùne,
nummbe matnu ba bag ntumnyam gha' mbu ntùm bwe.
ghaka be bwe, mba netèt ba Filistia là;
bo wat kàn boa ghùn.
7Silba bo gol yàm ntùm ngô neshu,
tshunkàb be kà nga' mbu.
Nyàmdiaṅ boa nkalig dun ntùm ngô.
8Neto lo' dù' fa ntùm ngô.
Bo tshwèt ngwù nsi mbwe mfa'
mbu mube,
mbwe ju ze ntu mbu mub nabte là.
9Bo nsi biagte ben nke'nke'e,
kôg ben ndùbndùb fà nsi.
O ke nsi ghù ntù lagte.
10Tsho #Apok. 6.15; 2 Tés. 1.9ntùm ngabndoṅ, lem ntùm tsha'a,
ndù o tum ntshu tshùagntù Tshùaben
bo nelàn nkuni mi mi a ziag là.
11Bo nsi kôg ngaka'te fà nsi,
so tuswe tu ghako'tewut.
Nda' Tshùaben bèn bù' tu i tù
sen lé'njù là.
12Nummbe Tshùaben tàndà ntsho nsi
ghù mo' lé'njù,
yab nge' num ghako'tewut
boa ghaka'te,
kôg yub fà nsi.
13Tshùaben nsi lo nsi num sédra mi a Liban
ndù a sage, nèn tù là,
lo nsi num ntshalon mi a Basan nà.
14Tshùaben nsi lo nsi num njoṅ mbat nesag fa
boa njoṅ nkônga neṅate fa.
15Tshùaben nsi lo nsi num mba' mi a sag là
boa njoṅ kàbngô fa tse bo kut là.
16Tshùaben nsi lo nsi num nsitima Tarsis
boa njoṅ tshu fa ts'a be mbwô num miag là.
17Tuswe nsi ko ngako'tewut,
ngaka'te nsi kôg vù nsi.
Nda' Tshùaben nsi bèn bù' tu i nsi
sen lé'njù là.
18Njoṅ neto fa
ke nsi bèn be.
19Bo nsi tsho ntùm ngabndoṅ mba
ntùm tsha' z'a tsho neshu là.
ndùlala ndù bo le' tshùagntù Tshùaben
bo nelàn nkuni mi mi a ziag là,
ndùs'a nsi lo nsi kag bwôg num nsitsha' là.
20A nsi be num sen lé'njù là, benntùn ghua' neto silba boa neto gol tshob tse bo nabte neke ngamte là, ba tshetku boa ba neleme. 21Bo nsi tshote ntùm mfé' ngabndoṅ, boa ntô ndoṅ, ndù bo le' tshùagntù Tshùaben bo nelàn nkuni mi mi a ziag là, ndùs'a nsi lo nsi kag bwôg num nsitsha' là.
22Bin tsin neyab ntù num mènntùn,
ze nda' ywèt bèn nke ntum ntselag i là.
Kua' ke ze mènntùn ku'ni neghù à?
La Sainte Bible en Bamiléké-Medùmba © Alliance Biblique du Cameroun, 1993. All rights reserved.