Osé 7
7
Nekag kamkam boa fenfen
1Ndùse me ke nkô neyate Israél là,
nukebwô Efraim bo tshùagntù Samaria
yoṅ ntswite wut tshobe,
nummbe bo lo lo' à tatte ngù nu yi.
Ba tshô tsho ntùm ndà ndà,
fimntshu tsho ntùm njoṅ dù' fa mum ngô
mba num njoṅ manze fa.
2Bo ke' be kwate tshob ntù bo
ndù me num nkwimte njoṅ tshùagntù yub fa.
Ngùninu mub lam yub ndonni mbume,
ngùninu mub b'a num miag màm.
3Bo num ndem tshùagntù tse bo ghù là,
nke ngù fenfen nke ntsiaṅte.
Tatte tshob nke ngù kamkam tshob nke ṅwate.
4Njoṅ yub fa b'a ba ghù màndà.
bo be ndaṅndaṅ à mba tômbwôg
ngaka tag z'a kwé'te mbwôg bwe là.
Yen mèn ni be tsin ke bèn nefette mbwôg neto' ndùs'a
tébte mbab bàn nà,
tà nkum ndùs'a ko' là.
5A num mbe mum lé'njù mfen yub,
kamkam tam ngokét,
njam ndu' bo nu ke njoṅ i là;
mba' ndu' nke nzwiaṅte ghatshùag.
6Ntù mfùm nke nkù mba mbwôg neka tag là,
tèttswe' a fite,
njù be làne a kù mba mbwôg nga là.
7Njoṅ yub fa dum à mba tômbwôg là,
bo be nkù tshob ghatsho'te.
Njoṅ fenfen tshob fa vù nsi,
sàm mèn netèt bo ke kua' ntsiaṅ àm.
8Efraim tsho netèt tsemo' ngô,
Efraim b'a mba makela' bo ka ke
kaṅ njam i là.
9Ba tum lo' ze neta fa,
nda' ndù a ke lèn tse;
mba ywèn à tsho num i,
nda' ndù a ke lèn tse.
10Ze ko'tewut ba Israél ghù kwénta kebwô num bo,
là, bo ke' bèn njam ntèt Tshùaben
Nsi yub,
bo ke diag i num njoṅ yen nu là fa.
11Efraim b'a mba bwoṅtambia' z'a fùmni là,
ke ghù zenu,
bo tsiaṅ Egipto, nèn
Asiria.
12Ngelaṅ ze bo tshwèt nèn nà, me ma'
fot sàm num bo,
nsoṅ yub yi bo swe' mba saṅ s'a swe'
kamànyam nà;
m'a' naṅ ntsha tu bo ndùse bo yoṅ ntshob nu
mbumte yub là.
13A bwô bo be ghayennge', nummbe bo tshwèt nkù àm,
a bwô nu fam yube, nummbe bo gha àm.
Tu wul àm me lo ghù netshu' yub
ngelaṅ ze bo tshwèt ntshob be tatte num àm nà ké?
14Bo ke' kua' me ntùm ntù nenùn,
ngelaṅ ze bo tshwèt ntsiaṅ àm
ndù me ywimte yub là.
Là nke nzimte num nkunndà mube,
a num mbe num nsa bo ndu' nedùmte bo vèn wut tshobe,
ntù' ghatatu mbwe àm.
15Là, tu wul àm lo tswite yube, nso neta ntùm mbu mube,
mba ndùlala bo kwate be nukebwô num àm.
16A be ze bo bèn njam nà, mba bo ke bèn njam
nse' a mbaṅ àm;
bo b'a ntshu ntsho z'a be mfùte là.
Kamkam tshob nsi kwù ṅwi ntsho,
nummbe lém sob num ntshob tshùagkèt ntshobe.
Yen ni b'a kua' nu z'a nsi ghù bo tù' ju komzwi
mbwe ngô Egipto là.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.