Salsila siga Rasul 27
27
Si Pol binoo pa Rom
1Dari katobtoban pamiki Gubnul Pestus subay sohoꞌ na si Pol binoo taꞌ adjung pilay pa mman Panghuluꞌ Sultan ndooy ni Itali. Dari lay na pina-ntan si Pol ka ga kasohean pagkahi na pilisu pa mman si Juliyus. Si Juliyus ilay disu kapitan baanan sundalu Rom inawnan Batalyon Panghuluꞌ Sultan. Aku pun lay du ku ngunungan iya. 2Dari siꞌ lay na kami dutai taꞌ disu adjung bay lakka man Aramitiyum ma song maghāsan padisu-padisu daira ndooy ni Asiya. Maka luu du bay mmeꞌ si Aristalkus, disu soheꞌ kami man Tesaloneka ndooy ni Masidunya.
3Pag meꞌ sumawung, duhuꞌ man kami bay pahās ni daira Saydon. Ndooy siꞌ, mahap meꞌ Kapitan Juliyus bay buwat si Pol batan lay tugutan na si Pol duwai sitammu ka ga kabagayan na mari ya kabuwanan oy-oy kulang niiya para ni biyahi na.
4Pag tuwak kami man Saydon, song hallom lay kami taabut baliyu landos. Dari lay kami pasigpang pa dambilaꞌ nusa Kiprus mari kami kalimbuhan.
5Pag lanja kami, lay kami pingkaꞌ man bihing Silisiya ka Pampilya. Paddus mandooy, lay kami parungguꞌ ni Mira, disu daira ndooy ni Lisiya. 6Ndooy siꞌ, lay na baw Kapitan Juliyus nammu disu adjung bay lakka man daira Aleksandriya ndooy ni Ejip patuwak song pa Itali. Dari lay na kami pinasayin pilay. 7Pag tuwak kami, tud bay lawun adjung looy llēhan man sabapan baliyu landos sinugguꞌ meꞌ kami. Dari luu ga daka dangoy ngallaw boꞌ kami nakka tagan daira Kinidus ndooy ni Asiya. Na pagka yaꞌ na tasaggaꞌ kami landos baliyu ndooy, lay kami nigpang pa dambilaꞌ nusa Krit. Lān kami pilay, lay kami pingkaꞌ man daira Salmone ni nusa looy du masi. 8Na minsan siꞌ kami nusu bihing nusa looy, masi du kami paya meꞌ landos baliyu. Lipara, song hallom, lay kami tumiluꞌ pa disu labuhan pinag-awnan Labuhan Ayad, tapit pa daira Laseya.
9Na sabap tud hallom na kami bay llantan meꞌ baliyu landos looy, song piligru na pin bong kami pawus. Lai na paddus waktu man siga Yahudi puwasa. Boꞌ taabut na timpu landos. Dari yuk si Pol ni siga jama ma buwat ni adjung looy, 10“Siga kabagayan, kumpas ku bong itu tabi amu-amu pawus ni biyahi tuu, mehe situ mintu meꞌ tabi malasahi. Sarī man adjung tuu ka uwanan na, adakala sampay man umu tabi lagi hilang.”
11Sugaꞌ yaꞌ du ya bay pinaruli meꞌ dapu adjung looy ka tukang mansān. Boꞌ na, lai gi Kapitan Juliyus bay takoleꞌ da binitsalahan yaꞌ nohoꞌ mmeꞌ ni bitsala si Pol. 12Dari pagka yaꞌ du tanam lahat looy man labu bong ni timpu landos, kaekahan jama taꞌ adjung looy siꞌ doman na pawus. Katobtoban pamiki da, mas mahap gi konoꞌ bong kami pawus pa Labuhan Pinika. Labuhan looy ilay konoꞌ tanam man maddusan timpu landos batan yaꞌ katampakan meꞌ baliyu.
Ga si Pol taabut libut ni dilawut
13Dari pag niyup baliyu man sātan yaꞌ du meꞌ noy basag na, bistahan da dari na man lome. Dari lay na hinelaꞌ bahudjiꞌ pa jataꞌ, boꞌ kami lay na patuwak nusu bihing nusa Krit. 14Sugaꞌ yaꞌ gi siꞌ hallom, magti halin baliyu. Niyup na baliyu landos pōꞌ man uttaraꞌ subay ga bagju ngalintas Krit. 15Pag lay kalandosan adjung looy meꞌ baliyu, lay na jaꞌ pinabiya tinuran batan yaꞌ na takoleꞌ sinugguꞌ baliyu looy. 16Hangat kami tinuran, lay na kami nakka pa bihing nusa Kauda. Ndooy siꞌ, lay na kami kalimbuhan dangkitiꞌ meꞌ nusa looy. Dari lay na pin padutai kami tondaan kami mari yaꞌ binasa. Sugaꞌ sat madutai, kaawran gi kami. 17Pag lupus, lay na baw lagot da kasku adjung looy pahallot ka malati mari yaꞌ passaꞌ tapiꞌ na. Pag-anu siꞌ, lay na baw llabbos meꞌ da lē sabap tawu sila sumallad ndooy ni bihing Libya. Pag-anu siꞌ, lay na jaꞌ kami tinuran meꞌ baliyu.
18Na hangat magsasōng na pin landos baliyu looy, sinakat na ga adjung looy meꞌ lamba. Dari pag meꞌ sumawung, lay na ga sila nginut nimanan uwanan da ni dilawut. 19Pag taabut ni katallu ngallaw, lay na timanan da uwanan da labbasakayi sampay na mimon kalangkapan adjung looy. 20Ni kabasag libut looy, luu na ga daka dangoy ngallaw bay pingkaꞌ yaꞌ na san luu bay takita kami siga potean. Sampay mataallaw, yaꞌ na du bay takita sabap ngalikob na jaꞌ lahat. Dari song hallom, yaꞌ na san kami bay ngaholat ga salamat gi kami.
21Na kami siꞌ tu sikamimon taꞌ adjung looy, tud hallom na yaꞌ luu napsu kami mangan. Pag-anu siꞌ, yuk si Pol, “Siga kabagayan, bong siꞌ kam la bay jaꞌ pakale niyaku yaꞌ palakka man Krit, yaꞌ na situ kitabi bay tuwaꞌ kamalasahiyan meꞌ tuu na. Uwanan adjung tuu pun yaꞌ du bay luu hilang. 22San baw meꞌ naa, patagguhun bi na pin iman bi. Yaꞌ du sina kitabi luu san disu matoy. Adjung tuu du situ mintu binasa. 23Ngkon ku tu kabāꞌ meꞌ tuu batan dabuhiꞌ, luu malaikat bay patammu niyaku. Lay ya sinohoꞌ pa mman ku meꞌ Tuhan, ilooy ma sumba ku saltaꞌ na ma dapu baran ku. 24Bay bāꞌ na niyaku subay ku yaꞌ tawu. Ndang bay na konoꞌ ginantaꞌ mastiꞌ luu gi du masa ku nangge ni awpan Panghuluꞌ Sultan sinumariya. Maka man sabapan timbang Tuhan njataꞌ ku, yuk malaikat looy, salamat jaꞌ du sina sikamimon soheꞌ ku taꞌ adjung tuu.
25“Sangkon siga kabagayan, patagguhun bi na iman bi batan pitsayaꞌ ku pa Tuhan mastiꞌ binakbul jaꞌ sina mimon ma bay bāꞌ malaikat na niyaku. 26Sugaꞌ bong baw tu adjung tuu, mastiꞌ binasa jaꞌ du sumallad ni disu nusa.”
27Na ni kasapu-mpat bahangi halloman kami tinuran meꞌ baliyu palintas ni Dilawut Adriya, pag ga tangngaꞌ bahangi, bistahan ga tindog taꞌ adjung looy song patapit na pin kami pa bihing. 28Dari lay doꞌ tinongkad meꞌ da lawom boheꞌ. Pag ndaꞌ da, duwampūꞌ dappa sa lawom na. Yaꞌ lagi hallom, tinongkad na baw bbalik. Pag ndaꞌ da, sapu-liman dappa sa.
29Na sabap tawu sila sumallad taꞌ pasi, lay sila ngalabuꞌ mpat bahudjiꞌ ni buliꞌ adjung looy. Tud kainagon da deꞌ-dēꞌ na pakallat llaw supaya sila yaꞌ magtamlaꞌ bong paninggai tiluꞌ kami. 30Kuwan siga tindog taꞌ adjung looy baw siꞌ tu, doman gi patangkaw ngambanan kami. Dari bbuwatan da, lay pa mundaꞌ bahasa ngalabuꞌ ga bahudjiꞌ, boꞌ ko, iya tinonton meꞌ da tondaan adjung looy. 31Sugaꞌ katoonan si Pol du garaꞌ da. Dari yuk na ni Kapitan Juliyus ka ga sundalu na, “Bong ina ga tindog taꞌ adjung tuu duwai na, yaꞌ sina kam salamat.” 32Dari bbuwatan ga sundalu looy, lay tattas da ingkot bay man nonton tondaan looy, boꞌ lay na jaꞌ pabiya da mag-atungan ni dilawut.
33Tapit jaꞌ siꞌ deꞌ subu, lay na si Pol mitsalahan sikamimon taꞌ adjung looy nohoꞌ mangan. Yuk na, “Luu na situ sapu-mpat ngallaw halloman bi yaꞌ na san bay mangan ni kahanggaw bi. 34Mangan na kam ba mari luu anggawtaꞌ bi. Daa na kam susa. Minsan ina dalamba dūn kōk bi yaꞌ du sina hilang.”
35Paddus si Pol mitsala meꞌ looy, lay ya ngaddoꞌ tinapay boꞌ na pinagsukuhan pa Tuhan ni pag-awpan da sikamimon. Pag-anu, lay na ya nabbeꞌ, boꞌ na mangan. 36Dari sabapan kadarihan si Pol, lay na sila kagamgaman sampay lay na du sila mangan sikamimon.
37Na eka kami taꞌ adjung looy duwa hatus pitumpuꞌ-nnom. 38Sso jaꞌ siꞌ sikamimon, lay na hiyakan da siga karut taligu ma takapin ni dilawut supaya song pa maggaan na pin adjung looy.
Langkat na adjung man ga si Pol
39Pag sayu, ngita na kami disu nusa, sugaꞌ yaꞌ takila meꞌ siga tindog taꞌ adjung looy. Pag ndaꞌ da, luu na disu look ungusan. Dari pag-isunan da, pasallad da na adjung looy pa bihing tapiyan ndooy bong siꞌ luu dapat da. 40Dari lay na tattas da ingkot siga bahudjiꞌ da sampay lay jaꞌ inambanan ni tanaꞌ diyoꞌ. Maka lay na bakkasan da ingkot man bay ngalagot bansān mari sila sumunsayaꞌ na maling mundaꞌ adjung looy pa bihing. Pag-anu siꞌ, lay na baw sila matangge lē dikiꞌ ni mundaꞌ mari taturan na adjung looy meꞌ baliyu song pa tapiyan. 41Sugaꞌ yaꞌ gi siꞌ kami bay nakka tapiyan, lay na duhuꞌ lumangga mundaꞌ adjung looy pa taꞌ pasi, sampay lay na kataddasan ndooy. Kuwan buliꞌ na, song langkat na hangat sinimpok meꞌ lamba.
42Na sabap meꞌ looy, bbuwatan siga sundalu lay isun mapatoy ga pilisu sikamimon taggahaꞌ patangkaw na baw sila lumangi. 43Lipara, yaꞌ sila bay nduwan meꞌ Kapitan Juliyus sabap doman ya nalamat si Pol. Dari siꞌ, sagannap ma pandoy lumangi, lay na sohoꞌ Kapitan Juliyus kupa nohoꞌ lumangi pa tapiyan. 44Kuwan ilooy kasohean, lay sohoꞌ na magpilampung ka ga papan atawa oy-oy jaꞌ kalangkapan adjung looy. Dari siꞌ, lay na kami sikamimon nakka tapiyan, boꞌ yaꞌ du kami bay kongoy-kongoy.
Chwazi Kounye ya:
Salsila siga Rasul 27: sjm
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2021, Wycliffe Bible Translators, Inc. All rights reserved.