लूका जाणकारी

जाणकारी

लूका एक बेद हो जखो इ चोखा समचारनै मांड्यो। बो इकै अलावा भेजेड़ा चेला का काम नाम की पोथीनै बी मांड्यो हो। लूका क जरिए मांडेड़ो ओ चोखो समचार कद अर कठै मांड्यो गयो इका एकदम सई टेम क बारां म कोई कोनी जाणै। पण घणकराक ज्ञ्याता मानी हीं क ओ चोखो समचार ईसु क जलम क करीब सत्तर बरसा पाछै मांड्यो गयो हो।

इकै मांडबा का तरिका अर भासाऊँ ओ बेरो पड़ै ह क बो एक पढ्यो लिख्यो मिनख हो। लूका ईसु का जीवन की बातानै अर घटनानै जंय्यां बे बिती बंय्यां मांडबो चायो जिऊँ बाचबाळानै इको फाईदो मिल सकै। (1:1–3) बो गैर-यहूदि मिनख हो (कलुसीयो 4:10–14) अर बो इ चोखा समचारनै इ तरिकाऊँ मांड्यो जिऊँ गैर-यहूदि मिनख चोखा समचारनै समज सकै, जंय्यां बो यहूदि रिती-रिवाजनै समजायो इमै बा बात साप दिखै ह (1:8)।

लूका क जरिए मांड्यो गयो चोखो समचार ईसुनै इजरायल क सागै परमेसरऊँ बचन करेड़ो छुटकारो देबाळो अर सागै की सागै सगळा जगत का मिनखानै बचाबाळो बतावै ह। इ चोखा समचार म दो भाग हीं (पाठ 1-2 अर 9-19) जखा बोळीसारकी बाताऊँ भर्या पड़्या हीं, जखा खाली इ चोखा समचार मई लाधै ह। जंय्यां क ईस्बर नगरी दुता को गीत, ईसु का जलम प गुवाळ्या को जाबो, टाबरपुणा म ईसु को मनदर म होबा की क्हाण्या, अर चोखा सामरी अर खाऊ-उडाऊ बेटा की निती-कथा। सगळा चोखा समचार म अरदास, पबितर आत्मा, ईसु का सेवा काम म लूगाया की भूमिका अर पापऊँ परमेसर की माफी क बारां म घणो जोर दिओ गयो ह।

रूपरेखा

1) लूका इ चोखा समचार को परिचय देवै ह अर बतावै ह क बो इनै क्युं मांड्यो (1:1–4)

2) जणा पाछै बो ईसु का जलम अर बो कंय्यां सेवा का काम ताँई त्यार होयो आ बतावै ह (1:5—4:13)

3) चोखा समचार का बाकी का भाग म लूका ईसु का करेड़ा काम क बारां म बतावै ह, खासकर बिकी सीख अर चमत्कार जखा बो कर्यो। (4:14—21:38)

4) आखरी का दो पाठा म बो इ बातनै बतावै ह क ईसु कंय्यां मर्यो, गाड्यो गयो अर मरेड़ा मऊँ जी उठ्यो। (22—24)

Chwazi Kounye ya:

लूका जाणकारी: एस डब्लु वी

Pati Souliye

Pataje

Kopye