Roma 7
7
Malamulo analaba nnga muhiyana vabandjani vaye
1Abalaga, miyo nnowonga na nyo atu oiziwa malamulo. Ndoweni niumbuweleni zela malamulo makalelo analaba atu. Malamulo anamutonga mutu fiyeda ukwa waye. 2-3Tempu ili hiyo ila nkani zela malamulo unafwalrafwana nnga muhiyana oteliwa. Muhiyana agateliwe, malamulo anamutonga ira avwelelege bandja na mamunaye fiyeda ukwa waye. Mwa enne muhiyana amuhiya mamunaye vande, adowa akala na mulombwana mmohiwa, pa evale vanaitaniwa liye puta. Mbwenye muhiyanole mamunaye agakwile, voira liye gu mudiye, kuma evo malamulo kinamutongave ira anvwelelege mamunaye. Kavali nlamulo nnawendana liye. Evale avenya, ateliwa na mulombwana mmohiwa, kahi puta.
4Kalaga nnga nyo abalaga, na nyenne muwari mwa mabasa alabile Kiristu na maningwaye, wenda na malamulo uhumala. Mulugu amalihaga tempu yowenda na malamulo ali ira hiyo niwande wenda na mutu wenno uvenyihiwe mokwani, niwande vaha misapo dapama ira Mulugu ateteliwe.
5Tchoira tempu yawenda hiyo na jofuna ja maningo, jofuna janna hiyo josimbwa na mwasa wa malamulo, hiyo iragave simbwa irana jotega jile. Ora yenno misapo davaha hiyo dali misapo donikwiha. 6Mbwenye peno nihimala kutchiwa zela wenda na malamulo, mwasiwa nihimala kwa zela yenno yanimangile. Mulugu unikutchele wenda na malamulo kalrembiwe wanle ira niwendegena makalelo maxa anafwanyeya mwa Munemba.
Malamulo kahi yengo yotega, mbwenye anamuoniha mutu jotega jaye
7Nnga vire hiyo nikutchiwa zela wenda na malamulo, nnafuna niwonge avi? Kodi malamulo tchi yengo yotega? Nari, nne vang'ono! Tchoira dahaiziwa malamulo, miyo kadaiziwa jotega. Mwasiwa ahakala malamulo kawonga ira: <<Kusilrilre>>, miyo kadaiziwa ira silrilra tchi yengo yabure. 8Mbwenye voira miyo dohokana jofuna ira diiregena jotega, jotega johotukula nlamulo noira <<kusilrilre>> nne, roma disimbwihagana. Miyo iragave simbwa silrilra, dowagave sogolro. Muwari mwa nlamulo, jotega joditabwiha. Mbwenye wahali malamulo, tega kuliwo.
9Wanle tempu yali miyo dahanaiziwe malamulo, miyo daviona ira dili okalawene. Mbwenye vere miyo diiziwa malamulo, jofuna janna miyo joirana jotega johovenya. Novenya, miyo tega. Dagategile pazile miyo onelramo ira miyo nnawenda okwene. 10Fwanyeya ira nlamulo neno nafuna divaha ingumi, tidizelena ukwa.#7:10 nlamulo neno nafuna divaha ingumi: Mulugu kapanganne ira: <<Mwaharihamo malamulo, munokana ingumi yohomala.>> Mulugu mbwenye ohopangana na aIzarayeli ira: <<Nyo mwairana jatene jinawonga miyo, munokalawo malambo madjindjene mwilamboni yapama inauvahani miyo.>> (Detoronomiyo 5:33, 11:8-9, 32:46-47) Mazu matene anno anarumelela ira zela nipangano na wanle Yesu ahanaze nikwela, mutu aharihamo malamulo, ingumi yaye yolapa mwilamboni ya vati. 11Tchoira dagavwile nlamulo noira kusilrilre, jofuna janna miyo ira diiregena jotega jotukula nlamulo neno, dinyenga ira disilrilrege. Jofuna jaga jile aliwa mala dipa na nlamulo nne.
12Fwanyeya ira malamulo botchena. Kada nlamulo totchena, ta pama, towongowa. 13Kodi yali yengo yapama tcheniyo idipile miyo? Nari, nne vang'ono! Kahi nlamulo nidipile miyo so jofuna jaga joirana jotega ti jejo jidipile muwari mwa yengo yapama. Muwari mwa nlamulo puzile oneya pama pama ira jotega jinna miyo ti jotega jotakala kwaranya.
Zela Roma 7:14-25
Ala ba mazu a Pawulo zela makalelo a mutu omuroromela Yesu owenda na kopolo daye hiya kopolo da Mulugu. Mutu na kopolo daye kanawanda irana joira japama. Masiki mutu agavulusiwe, funave ira airegena japama unokana, mbwenye mwa kopolo daye kanawanda irana yapama inafuna liye irana mwasiwa unokanave jofuna ira airegena jotega.
Kalivo mutu unawanda irana japama mwa kopolo daye
14Tchoira hiyo nihiiziwa ira malamulo tchi yengo ya Munemba. Miyo mbwenye dili na jofuna ja maningo. Miyo eto na kopolo daga dili nnga muzari owanda irana jofuna ja maningo bahi. 15Inera miyo kadizi, tchoira yenno inafuna miyo irana, yengo yenno kannairana. Eto yenno inaida miyo, tchinairana miyo.
16Akala miyo nnoirana jengo jahanafuna miyo irana, miyo nnorumela ira malamulo bapama. 17Fwanyeya ira dairana yengo yahanafuna miyo irana, kahi miyo. Ti jotega jinna miyo mmaningoni mwaga. 18Tchoira dihiiziwa ira muwari mwa miyo, mmaningoni mwaga mu, kamuli yengo yapama. Tchoira miyo nnofuna nnga diirena yengo yapama eto na mwasa wa jofuna ja maningo, kannawanda. 19Miyo kannawanda irana japama jinafuna miyo irana. Mbwenye jabure jejo jahanafuna miyo irana, ti jejo jinerana miyo. 20Akala miyo nnoirana jahanafuna miyo irana, ku wonga kahi miyo. Ti jotega ejo jinafwanyeya muwari mwa miyo.
Inafwanela Mulugu atamaleliwe mwasiwa gu liyene unafuna nivuna mwa jotega jehu
21Eto fwanyeya ira inaireya tchi ila. Ora inafuna miyo nnga diirena yengo yapama, ora yenno inadikwivela ku irana yabure. 22Tchoira mmirimani mwaga, miyo nnoziveliwa malamulo a Mulugu. 23Eto mmaningoni mwaga, munafuna jotega. Jotega jile jinowana kondo na yengo yapama yafuna miyo irana mmirimani mwaga. Jotega jile jinodihinda miyo ira dikale muzari oirana jabure. 24Miyo dili mutu owendiha tangaranga! Nnga unafuna divuna mwa jofuna ja maningwaga bani?#7:24 Owu hehi Unafuna divuna mwa maningo a ukwa anna miyo bani? 25Unafuna divuna gu Mulugu! Nona Mulugu atamaleliwe mwa Nabwiya wehu, Yesu Kiristu! Fwanyeya ira miyo damwinnya na joumbuwela jaga, nnafuna diiregena makalelo a Mulugu. Eto zela jofuna ja maningwaga, miyo nnairana makalelo otega.
Chwazi Kounye ya:
Roma 7: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral