Roma 13
13
Zela nvwelela guverno
1Inafwanela mutu uli watene anvwelelege guverno wenno unamutonga. Tchoira kavali utongi wahanazela wa Mulugu. Unaruma ira mwilamboni mukale aguverno otonga gu Mulugu. 2Mutu wenno ahananvwelela guverno, kanavwelela utongi urumile Mulugu. Eto atu ohovwelela anadediha tongiwa. 3Tchoira andimuwa kinamuzuzumiha mutu unerana yapama mbwenye anamuzuzumiha mutu unerana yabure. Wafunaga ira uwende pama mwilamboni muno na guverno mohoova, inafwanela uiregena japama. Waira eno, guverno unoutetela. 4Tchoira andimuwa analaba mabasa a Mulugu ira we ukale pama. Mbwenye we waira yabure, waaovege. Tchoira andimuwa mwilamboni muno anawenda na masupada. Eto masupadale kinawendelana vasayi, mbwenye anawendana ira kalabegena. Aliwa ba anamalaba a Mulugu, ba aliba weliha kunyakunya daye, banamuoniha uwali wa Mulugu ule unera jabure. 5Nona inafwanela mutu uli watene aavwelelege andimuwa. Kahi so ira ahakayena mulandu mbwenye ili eto ira ahakayena yokumbanya mmirimani mwaye.
6Na mwasa mmohive, inafwanela kada mutu avelelege misoko. Tchoira anamasogolrelra kalabaga mabasiwa analaba mabasa a Mulugu. 7Ninvahege kada mutu yaye. Akala misoko, ninvahege misoko, akala josokela, nikumihege. Nimurihedege mutu wenno unafwanela rihediwa eto nimutitimihege mutu wenno unafwanela titimihiwa.
Jokokomeza jimohi jiwa zela atu omuroromela Yesu
8Kanikayena mangawa ali atene na mutu uli watene. So mangawa anafuna hiyo kana kakale mangawa ozivelana. Tchoira ule unamuzivela nfwaye gwenno uwandile kwakwaneliheda malamulo. 9Malamulo oira: <<Kuraruwe, kumpe mutu, kube, kusilrilre.>> vamohi na malamulo amohiwa ira uwonge mogwada mwene ku wonga ira: <<Umuziveliwege mutu uli watene nnga munaviziveliwela we wa mwinnya.>>#Levitiku 19:18 10Ule unamuziveliwa mutu kanampudja. Nona muziveliwa nfwawo ku kwakwaneliheda malamulo.
11Vamohive vevo nyo muhumala iziwa ira tempu ili hiyo ila kahi tempu yogona, tchi tempu yoira mutu arurumuwe. Tchoira vulusiwa wehu unnana nikwivela hiyaniha na siku naromile hiyo muroromela Yesu, mwasiwa va kada siku, malambwihu anagwadeyawo. 12Mahiyu anamala. Uhanle vang'ono ira unde utche. Nona ndoweni nihiye joira ja mahiyu, niwareni jowara ja anyakondo jomoneya.#Efezo 6:11-17 13Ndoweni niwendeni na mawendelo ofwanela nnga ha vini mutu awendaga na ntana. Kaniiregena makalelo matene abure, dowaga vamainelo, ng'waga, djaga bure,#13:13 djaga bure: Dja bure unawongiwa ku wonga mutu agarumbanleve liye kanyihedagave, hiya uwa so jodja jile jifiyede mala. Na izugu anaitana glutonaria. gayelagana, lrezelraga. Nne kaniiregena makalelo matene oraruwa, gonihanaga burebure. Nne kaniiregena makalelo matene okangana no kalelana nrima. 14Kanibalreni jofuna ja maningo ira niiregena jofuna ejo. So mbwenye niwareni mawendelo a Nabwiya Yesu Kiristu.
Chwazi Kounye ya:
Roma 13: iLolo
Pati Souliye
Pataje
Kopye

Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral