Joira ja Anamarumiwa 24
24
Sumeliwa wa Pawulo vamentoni va Felekisi
1Vagavirile malambo matanu, azilege ali mundimuwa wa anamakuta Ananiya vamohi na andimuwa amohiwa na mulombwana mmohi oiziwa wonga pama vamilanduni eriwa Teritulu.#24:1 mulombwana mmohi oiziwa wonga pama vamilanduni eriwa Teritulu: Teritulu kaali namatonga, ali namawonga vamilanduni. Aliba sumeliwa keretcha mpagalri mulombwana Teritulu ira aze awonge ira kahagwena mulandu. Eto aliba suma keretcha mpagalri ira aze awonge ira afwiwa kahagwena mulandu. AJudewu kohonvaha kobiri ira awonge malro omugwihana mulandu Pawulo. Aliwa kohodowa wa governadore ira kamusumele Pawulo. 2Agaitaniwe, aromile folramo mazu omugwihana mulandu Pawulo ali mulombwana Teritulu. Liye ohoroma wonga ira: <<So governadore Felekisi, nyo muli mutu oteteliwa. Hiyo uno nnawenda na murendele na mwasa wa zelru denyu. Eto ilambwela inaulukulave muwari mwa makalelo enyu. 3Hiyo nnafuna nutamaleleni zela mabasa matene munalaba nyo mwatene mwene. 4Hiyo va kannafuna nnga nudibeliheni, niwongaga jidjindji. So mbwenye nnafuna nuvepeni mwa upama wenyu, munivuruwane vang'ono bahi. 5Mutula ninfwannyena mulandu oziha joviringaniha. Gu mutu otatamula madugudugu muwari mwa hiyo aJudewu atene anafwanyeya mwilamboni mwatene ya vati. Liye eto uli muwari mwa anamasogolrelra a nikuru na vaheno vene nneriwa aNazareti. 6Liye ohofiyeda mwezo ofuna takaliha Nyumba ya Yehova. Mbwenye ahanairena, hiyo nohomuhinda, hiyo funaga nnga nimutonge zela malamulo anna hiyo. 7Eto nagamuhindile, nahanamutonge mofuna mwehu, mulombwana Liziya, mundimuwa wa anyakondo atene anafwanyeya Jeruzalemu ohoza na anyakondwaye, aliwa niwaka mutula mmandani mwihu mwa kopolo. 8Nyo mwanfuka, munowanda ona ira jatene jabure jinawonga hiyo zela mutula ti jejo.>> 9Evale aJudewu amohiwa kohovolowamo karumelelaga mazu amohive awonga mulombwana Teritulu.
10Evale governadore aganvahile Pawulo ira awonge, liye ohoroma wakula eraga: <<Miyo dihiiziwa ira nyo muhumala yaka doindjiva dene mutongaga ilambwela. Voira nyo muhuiziwa tonga, dihiziveliwa ira diwonge mbalume yaga. 11Mwaafuka atu, anorumelela ira kuma vadowile miyo Jeruzalemu ira damutamalele Nabwiya fiyeda siku na peno va, vivirile malambo kumi na menli bahi. 12Vamohive vevo kidihindilena mulandu dirunihanaga na mutu. Tchoira aliwa kidifwannye ditatamulaga madugudugu muwari mwa anamwindji a atu nne vatando va Nyumba ya Yehova nari nyumba dofundjamo Mazu nari muJeruzalemu mwatene. 13Aliwa eto kinna umboni zela jatene jinadinukeda atu.
14<<Mbwenye inafuna miyo rumela tchi ila. Miyo nnomutamalela Mulugu wa makolo ehu mohara Ndila ya Yesu, yenno inaitana atu nikuru na vaheno vene. Afwagala mbwenye ndila yenno kinarumela. Miyo eto nnororomela jatene jili muwari mwa Malamulo na mazu matene kalrembiwe na anamafiyiheda. 15Miyo vamohi na afwaga anadisumela ala, hiyo atene nihikana yoing'anela ira vasogolro Mulugu unoavenyiha mokwani atu atene, apama nari abure. 16Muwari moiziwa ira Mulugu unoza aditonge, miyo nnazuzumela ira diiregena japama ira Mulugu vamohi na atwene kaziveliwe joira jaga.>>
17<<Miyo dohomala yaka dingasi dingasi dahafiyaga Jeruzalemu. Ira didowe, dadowele ira davelele kobiri ira atu osimela muwari mwa nlogo naga kakamihediwe. Dadowele eto ira davelele jovelela wa Mulugu. 18Muwari movelela mule, aJudewu kadifwannye Nyumba ya Yehova dagali wapamene, dagamanle visakanyeda, dagali meka. Miyo kadavenda ja madugudugu. So azile tatamula madugudugu ba aJudewu kakumile Aziya. 19Yali pama aliwene kaze peno vamentoni venyu. Tchoira aliwa kahakayena makani na miyo, aliwene bafwanenle nnga kadisumele hiya ala kazile peno ala.>>
20<<Dagahindiwe, dohosumeliwa vamentoni va andimuwa otonga ja Mulugu. Akala dohofwanyeyagana mulandu dagwilena miyo, nnafuna ali eva ala kafiyede wonga mulandu wafwanyeyana miyo. 21So miyo mbwenye mulandu dahindiwena miyo, siku naimenlege miyo muwari mwa anamatongale, miyo dohowongaga na mazu okuwa ira: <Ira disumeliwe muwari mwa nyo siku na peno, mwasiwa goira miyo nnorumela ira mutu akwa, unovenya mokwani.> Kukala miyo, mulandu unna miyo.>>
22Fwanyeya ira mundimuwa Felekisi ohoiziwa jengo jidjindji zela Ndila ya Yesu. Evale liye agamanle vwa jatene ejile, ogwada makani eraga: <<Ira miyo ditonge mulandula, nnamudediha Liziya mundimuwa wa anyakondo, wenno umurumile Pawulo uno.>> 23Vevale liye ohomuruma musogolrelri mmohi wa anyakondo 100 amuing'anela Pawulo ira: <<Umutukule mutula wankoye mukadeya. Eto umuhiyege azongolege vang'ono. Waahiye eto afwaye atene kazege, kamukamihedege.>>
Pawulo ohomulaleya governadore Felekisi na muhiyanaye Duruzila
24Vagavirile malambo mangasi mangasi, governadore Felekisi ule ohoza vamohi na muhiyanaye Duruzila wenno ali muJudewu. Felekisi ohomuitaniha Pawulo ira avwe jowonga jaye. Evale kohovwa laleya wa Pawulo zela muroromela Yesu Kiristu. 25Evale Pawulo awongaga zela irana japama, no vihiyiha jabure, na makalelo Mulugu anafuna liye za tonga, mulombwana Felekisi ohokukumuwa, liye ira: <<Ikwakwana. Ubabihe dowa. Malringana dakana tempu, nnouitana akoka.>> 26Kuma evo mulombwana Felekisi omuitanetcha Pawulo, tapanyaga na liye mwasiwa afuna ira akunyariwe. Pawulo mbwenye kanvahile yengo.
27Vagavirile yaka mbinli, governadore Felekisi ugovernadore wanvahile atu womala. Ohozawo governadore mmohiwa eriwa Porisiyo Festo. Mbwenye Felekisi ahanavenyevo, mofuna aziveliwiha aJudewu, amuhiyileve Pawulo mukadeya emule.
Chwazi Kounye ya:
Joira ja Anamarumiwa 24: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral