TSABURI 2
2
Mwami wa Nyasaye Yarovola
1Shichila shina vandu vi tsimbia tsindi vikholanga shileeche?
Shichila shina vakanakananga khukhola makhuva kavo ki shikhaya?
2Vami vi vivala vayirechekha,
vamihi vavo vavoolelana khuli vakhola,
khuhinganyinya Mwami Nyasaye nende mwami wa yarovola.
3Vavoolanga, “Chendi khuve vavoholole
khuvuli khwamihwa navo;
leshi vavuli khukhwimilila.”
4Mwami Nyasaye wamihanga mwikulu,
avasekhanga nu khuvakholela shihenye henye.
5Khali avakondeshelanga mu vurima vwevwe,
nu khuvatechelitsa mu vululu vwevwe, navoola,
6“Mali khwamihitsa mwami wa narovola,
yamihanga khu shikulu shianje shitakatifu shia Sayoni.”
7Mwami avoolanga, “Niitsa khulanditsa ku Mwami Nyasaye aviritsi khukhola.
Yambolela, ‘Uli mwana wanje;
nunundi mali khuva tata wowo.
8Ndeva shia wenyanga
ninzi niitsa khukhuha vivala khuva viovio;
lilova liosi liliitsa khuva liolio.
9Uliitsa khuvamiha nu vunyali muno;
uliitsa khuvaraanyinya khuli inyungu
yatikhanga mu vikonjio.’ ”
10Munyi vami, muve nu vusitsa;
munyi vamihi vi shivala mwechitswi liechitso yili.
11Murumishile Mwami Nyasaye nu khumuha luyali;
khali mwikhoye numutechela.
12Mutechele nu mumwinamila;
nikakhavele kario aliitsa khuva nu vurima, nu khumutivitsa
vurima vwevwe nu vu vwangu.
Vali ni ikhaavi voosi vilushilanga muye avakhonye.
© The Bible Society of Kenya, 2013