ISAYA 8
8
Mwana wa Isaya Khuli Shimanyilu khu Vandu
1Nalwo lwa Mwami Nyasaye yambolela, “Vukula lichina liraambi liakhongwa, ma uhandichi khulio mu tsindukuta tsingali, ‘Ni shia Maheri-shalala-hashibazi.’ 2Inzi mwene nalaanga musalisi Uria nende Zakaria mwana wa Yeberekia vave khuli vashiahidi vaanje vasuuvilwa.”
3Khu, nasimukha ninzia khukona nu mukhali muprofeti; yavelekha niyivula mwana wi shiyayi. Mwami Nyasaye yambolela, “Mukulishi lira Maheri-shalala-hashibazi; 4shichila khali mwana wi shiyayi mwenoyo nashili khumanya khulaanga ‘Tata wanje’ inoho ‘Mama wanje’ Mwami wa Ashuria aliitsa khuva wachinguula miandu chiosi mu litaala lia Damasika nende vindu via vayaaya, nivalera mu litaala lia Samaria.”
Mwami wa Ashuria Yitsanga
5Mwami Nyasaye yalomoloma khwinzi khandi, nambolela, 6“Lwa vandu yava vambakhane khung'wa matsi ki litaala lia Shilo, kelelekhanga kalaha, khandi vakhutsanga mwoyo shichila Rezini nende Mwami Peka mwana wa Remalia, 7lolikhu khuli inzi Mwami Nyasaye nzitsanga khuchila Mwami wa Ashuria nende mukaanda kwa vasikali veve voosi khwitsa khukwana Yuda. Valiitsa khuroonjela khuli michelelo chia i matsmanyishi ku Muchela kwa Efurate, kasumeelanga kamala luchinga lwosi lu muchela kwenoko. 8Kaliitsa khuhilana shia shindu shiosi mu shivala shia Yuda, nikasumeela khandi nikakhunikha shia shindu shiosi.
“Yivi Emanweli, tsimbaha tsiotsio tsiliitsa khuvambukha nitsikhunikha shivala shienyu!”
9Munyi vandu vi tsimbia tsiosi, mwivunjelitse, numuheenda mwoyo!
Munyi vivala viosi virulanga ihale wene, muhulishitsi.
Mwirecheshe khukwana, numuheenda mwoyo;
mwirecheshe khukwana numuheenda mwoyo!
10Muloshitse ka mwenyanga khukhola, navutswa shiumukuura tawe.
Mulomolome likhuva, navutswa shindu shivulakhuho shitsitsanga khwikholekha,
shichila Nyasaye ali na khutsi.
Mwami Nyasaye Yachelihitsa Muprofeti
11Mwami Nyasaye yalomoloma khwinzi, khuvirila mu tsingulu tsietsie; nambolela mbuli khulonda mwiima kwa vandu venavo. Yambolela, 12“Ukhasanga na vandu yava mu vindu via valoshitsi khukhola, inoho khuria vindu vichilanga nivaria inoho khutechela tawe. 13Navutswa witsushitse inzi Mwami Nyasaye wi Mikaanda Chiliihe, neye mutakatifu. Ninzi wa kenyekhanga uhe luyali, khandi unyala khukhukhola khutechela. 14Lwa ndi mutakatifu wu khuchenyinya, nzitsanga khukwa khuli lichina liu khwisikaritsa vandu; ndi khuli mureeko ku khukumila vandu varulanga mu vwami vwa Yuda nende Israeli, halala na vandu vamenyanga mu Yerusalemi. 15Vandu vanyishi valiitsa khwisikarila; valiitsa khukwa nu khusionolwa. Valiitsa khureekwa nu khukumilwa.”
16Navutswa munyi, vamuli khuli veechi vaanje mwenyekhanga muhaane vushiahidi nu khwechitsa mechitso ka Nyasaye yamba. 17Niitsa khulindilila Mwami Nyasaye, uli ihale wene khurula khu vandu vi inzu ya Yakobo; niitsa khuvikha lisuuvilitswa lianje muye.
18Ndi hanu na vaana vu Mwami Nyasaye wi Mikaanda Chiliihe yamba. Khuli vutswa khuli vilolelo nende vimanyilu mu Israeli khurula khu Mwami Nyasaye, wumenyanga khu Shikulu shia Sayoni.
19Navutswa lwa vandu valala vamuvoolela, “Reevi vukhonyi khu vakhumu nende valoochi vatsiulanga khuli linyonyi khandi vimonyanga likhuva,” katoto vandu vanyala khwambakhana khureeveshitsa khu Nyasaye wavo? Shivanyala khureeva vukhonyi khu vandu vakhutsa havukono ha vandu vashili mwoyo tawe.
20Mwenyekhanga muvachipe, “Hulishitsi mechitso ku Mwami Nyasaye amwechitsanga! Muvuli khuhulishitsakhu ka vakhumu; shichila ka vamuvoolelanga shikanyala khwikalila matiinyu tawe.”
Matukhu ku Vutiinyu Vulivaho
21Vandu valiitsa khuhuya huya shia havundu hosi mu shivala nivamali khukhutsa mwoyo, khandi inzala nimali khuvaleka. Lwa inzala iliitsa khuva nivalechi, valiitsa khukumila vurima; nu khuraanga khulaama mwami wavo nende Nyasaye wavo, nivaheenza ikulu. 22Valiitsa khuheenza hasi, nikhali valiitsa khulola vutswa matiinyu nende shisuundi. Valiitsa khutuunya, shichila linyakhana; nu khusiuvwa mu shisuundi shikali muno.
© The Bible Society of Kenya, 2013