ISAYA 62
62
Lira Liyia lia Sayoni
1Nzitsanga khulekha khuhonjela shichila Sayoni,
nalekha khuhulukha shichila Yerusalemi,
nishili khulola likuura lielie niliang'ang'anga
khuli vulavu vwi liuva,
khandi lihonyinywa lielie
khuli itoochi niloleshitsanga.
2Vandu vi tsimbia tsindi
valiitsa khulola likuura liolio!
Vami voosi valiitsa khulola vukhumi vwovwo;
khandi uliitsa khulaangwa lira liyia,
lira liu Mwami Nyasaye mwene aliitsa khukhulaanga.
3Uliitsa khuva khuli itaachi yu vukhumi
mu mukhono ku Mwami Nyasaye,
khandi shilemba shiu vwami
mu mukhono kwa Nyasaye wowo.
4Valiitsa khulekha khukhulaanga khandi,
“Walekhwa”
khandi shivala shioshio shilitsa khulekha khulaangwa khandi,
“Shiangalangwi.”
Lira liolio liliitsa khuva “Nyanzitswangwa nivi,”
khandi shivala shioshio shilitsa khulaangwa
“Wahilwa nu musatsa”;
shichila Mwami Nyasaye ayaanzitswangwa nivi,
aliitsa khuva khuli musatsa wi shivala shioshio.
5Khuli musatsa muvukha ahilanga mwana wi shikhana muchima,
nindio khandi uliitsa khuhilwa nu musatsa
uliitsa khukhumbakha.
Khuli lwa musatsa mwene mwiiha yikhoyelanga mwiiha wewe,
nindio khandi Nyasaye wowo
atsitsanga khukhwikhoyela.
6Yivi litaala likali lia Yerusalemi,
ninzi wavikha valindi khulinda ikulu wa masisi koko,
valiitsa khuvula khuhonjela mbasu nu vutukhu.
Munyi vamwitsushitsanga Mwami Nyasaye,
leshi khuhulukha vutswa,
7muvuli khumuha vwiyangu vu khuhulukha
nashili khulomba vuyia Yerusalemi
nu khulikhola khuva litaala likali
lia vandu voosi vitsominyanga khulilova khunu.
8Mwami Nyasaye umali khwisuuha mu tsingulu tsietsie
khandi vunyali vwevwe navoola,
“Shinzitsanga khuvukula khandi imu yoyo
mambe vatsiku vovo khuva shiukhulia shiavo;
inoho vacheni shivalang'wa khandi idivai yoyo
ya wacheemulila nunyola tawe.
9Navutswa yavo vachesanga imu valiitsa khuchilia
nu khwitsominya Mwami Nyasaye.
Yavo vatuulanga matunda ki misabibu valiitsa khung'wa idivai
nivali mu lwanyi lwanje lwa Havundu Hatakatifu hanje.”
10Munyi vandu va Yerusalemi,
khalakanyili, mukhalakanyile mu vilivwa!
Lombi injila ya vandu vachendelakhu.
Yumbashi! Yumbashi muhaanda mukali!
Rulitsimu machina.
Vishi shimanyilu vandu vamanye.
11Mwami Nyasaye avoolelanga vandu voosi khulilova,
vavoolele vandu va Sayoni,
“Loli! Muhonyinyi wenyu yitsanga!
Loli! Ali ni shihanwa shieshie,
khandi murungu kwekwe kuli imbeli wewe.”
12Munyi muliitsa khulaangwa,
“Vandu vatakatifu,
vandu vu Mwami Nyasaye yahonyinya.”
Litaala likali lia Yerusalemi liliitsa khulaangwa,
“Litaala likali lia Nyasaye yayaanza,
Litaala likali lia Nyasaye ashili khwivilila.”
© The Bible Society of Kenya, 2013