ISAYA 47
47
Khuli Shivala shia Babilonia Shikhalachilwa
1Mwami Nyasaye avoolanga,
“Yivi litaala lia Babilonia, yikha hasi wikhale khu malova;
Yivi litaala lia Babilonia, khola nu wikhala hasi vuchila shisiko shiu vwami;
shichila utsitsanga khuvula khulaangwa munyelele
inoho mutoro toro.
2Vukuli isio usi imu;
Unavule shitambaya!
Nurulitsa tsikaanzu tsiotsio,
khandi ukumile tsinguvu tsiotsio khu vilenje
nu khalakinyila mu michela.
3Uliitsa khulolwa shekenye, ma tsisoni tsiotsio ni tsiloleshe havulavu
niitsa khuvanzila, khandi mundu avulakhuho waniitsa khurika.”
4Mwami Nyasaye wi Mikaanda Chiliihe neye Muhavini weru --
neye Nyasaye Mutakatifu wa Israeli.
5Mwami Nyasaye avoolelanga Babilonia,
“Yikhala nuhonjeli khandi mu shisuundi;
shichila shiuliitsa khulaangwakhu
khandi Muruchi wi shikhali wa vandu vi tsimbia tsindi tawe!
6Nali nu vurima shichila vandu vaanje;
nimbula khuvakhola khuli ni vaanje;
nachila numuvakuura;
wambakhana khuvavela tsimbavasi.
Khali wanyashitsa vululu vandu vasakhula.
7Wakanakana nuvoola,
‘Niitsa khuva mwami wi shikhali mihika ni mihika,’
khali wivilila khuvikha kenako mu mwoyo kwokwo
inoho khali khukanakanakhu kaliitsa khukhukwila.
8“Yivi wayaanza limenya liu khwiyaanzilila, uhulishitsi,
yivi wikhalanga nukanakana wumenyanga vulahi,
yivi uvoolanga mu mwoyo kwokwo,
‘Ninzi utushili,
khandi mundu avulakhuho wundi khuvira inzi;
niitsa khuvula khwikhala khuli mukhutsakhali
inoho khukhutsilwa vaana vaanje.’
9Vindu vivili yivi viliitsa khukhukwila vwangu khulitukhu lilala,
vuchila khumanyakhu shindu:
khukhutsilwa vaana vovo nende musatsa wowo.
Viliitsa khukhukwila khuvira shichelo,
khali niiva uchendanga mu valoochi vanyishi khandi
wurumishilanga vakhumu vanyishi.
10“Wali wasuuvilila mu vutamanu vwovwo;
nuvoola, ‘Mundu avulakhuho ulolanga inzi’;
vusitsa vwovwo nende vucheli vwovwo vwakhukoyanyinya;
mwene nuvoola, ‘Ninzi utushili,
mundu avulakhuho wundi unyala khusasanyinywa khwinzi.’
11Navutswa matiinyu kaliitsa khukhukwila,
kaliitsa khukhaya khwikalilwa;
matiinyu kaliitsa khukhunyola,
ka uliitsa khukhaywa khurulitsaho;
khandi uliitsa khutivitswa vwangu
khali vuchila khumanyakhu shindu shiosi.
12Khulwa yako, tinyilila khurumishila vakhumu vovo
halala na valoochi vovo vanyishi,
va warumishilanga nushili muvukha;
haundi uliitsa khukuura,
haundi uliitsa khurishitsa vandu.
13Khali yivi mwene wavwa tsingulu
khurulana khu inganakani inyishi ya ukhonywangwa;
nu vulahi, leshi vitsi imbeli vakhuhonyinyi,
yavo varunishitsanga likulu,
vaheenzanga khu tsinyining'ini,
yavo vavoolanga kushili kaliitsa khwikholekha khu yivi
mumatukhu ku mweli kulolekhanga.
14“Ni kilikali, valiitsa khuva khuli vunyasi vuumu,
mulilu kuliitsa khuvalaalitsa;
valiitsa khuvula khwihonyinya vene
khurula mu mulilu mululu kwakhanga;
kuliitsa khuva khuli mulilu kwa mundu yoranga vutswa anyole luya;
kuliitsa khuva mulilu kworelwangwa ihale wene!
15Nako koosi ka valiitsa khukhukhola yivi --
yavo va warumishilanga khandi nuchenda navo nushili muvukha.
Shia mulala khuvo ahuya huyanga iyi neyo mu injila yeye mwene;
khali mundu avulakhuho uliitsa khukhuhonyinya.”
© The Bible Society of Kenya, 2013