ISAYA 34
34
1Munyi vandu vi tsimbia tsiosi, mwisuundie himbi muhulishitsi;
vandu munyi, muhulishitsi!
Leshi vandu voosi khulilova vahulile, halala ni vindu viosi vili mushio;
shivala nende vindu virulanga mushio.
2Mwami Nyasaye ali nu vurima na vandu vi tsimbia tsiosi,
walechela vasikali vavo voosi.
Neye waloshitsa khuvamulula,
waviritsa khuvativitswa.
3Mivili chia vandu vakhutsa vavo chiliitsa khusiuvwa;
vukuundu vwi mivili chienecho vuliitsa khuhuunya shia havundu hosi;
masahi kaliitsa khusalana shia havundu hosi khu vikulu.
4Vindu viu mwikulu viosi viliitsa khusionokhana,
malesi kaliitsa khwilinganyinya khuli shitabu;
vindu viu mwikulu viosi viliitsa khuniala,
khuli lisambu linialanga khu musabibu,
inoho khuli litunda lienganga khu mukhuyu.
5Mwami Nyasaye warecheshitsa shivavi shieshie mwikulu;
loli khuli akwanila Edomu,
nivali vandu va yakhalachila khutivitswa.
6Mwami Nyasaye ali ni shivavi;
shivavi shienesho shiavekhwa masahi khandi shilikhu ni shivana,
khuli masahi ka makondi nende tsimbuli,
nende shivana shi tsimbiiko tsia mamiiko;
shichila Mwami Nyasaye aliitsa khukhola musango mu litaala lia Bozira;
vandu vanyishi valiitsa khwiirwa mu shivala shia Edomu.
7Tsihili tsiumbulimu tsiliitsa khwiirwa navo;
vimoli nende tsichilishi.
Shivala shiliitsa khwitsula masahi,
malova kaliitsa khunuula shichila shivana shiavo;
8shichila nalio litukhu liu Mwami Nyasaye aliitsa khuvanzila;
muhika ku khuvanzila vatsiku va Sayoni.
9Michela chia Edomu chiliitsa khukwa ilaamu,
malova kachio khukalukhana khukwa khuli salufa;
milimi chiashio chiliitsa khukwa khuli ilaamu yakhanga mulilu.
10Kuliitsa khwakha mulilu mbasu nu vutukhu vuchila khutsiminywa,
mwooshi kurulanga khukwo kuliitsa khutuuma mihika ni mihika.
Milimi chiliitsa khuhangalala chiarikala miele khumatukhu koosi.
Mundu avulakhuho uliitsa khukhalakanyila mu shivala shienesho.
11Navutswa makhongotsa nende makhule kaliitsa khumenyamu;
likhule nende likhokho viliitsa khumenyamu.
Nyasaye aliitsa khuchila shivala shienesho shikoyane
khuli shiavetsanga muliraanga.
12Shivala shienesho shilitsa khulaangwa
“Shivala shia mwami akhamihanga tawe”;
vimilili vi shivala shienesho valiitsa khuva varulaho.
13Mavwa kaliitsa khumeela mu tsimbinga tsiasho,
maraakalu nende vinakootsi viliitsa khumeela havundu hevwa.
Shiliitsa khuva ni hango hi vivwe,
havundu ha mayahutu kaliitsa khumenya.
14Vipaka viumbulimu viliitsa khukonamu ni visusu,
Majini nende vinanyenzo viliitsa kalaanganayo;
Kunyama ku mu vutukhu kuliitsa khwitsayo
makunyole ha kuhulushila.
15Makhule kaliitsa khumbakhayo vitsu viako,
kaliitsa khurelayo nu khwalulila mushiniikha shiashio;
khali makhokho kaliitsa khwivunjelitsilayo,
shia likhokho nu mulina walio.
16Mukhavilitse mu shitabu shiu Mwami Nyasaye,
mamusome shia kavoolanga:
Shilombe shivulakhuho mu viosi shiliitsa khukora;
shia shindu shiosi shia naloonga
shiliitsa khuva nu mulina washio.
Mwami Nyasaye umali khuvoola,
khandi Roho wewe neye wavilera halala.
17Mwami Nyasaye wamala khukhuva ikura vive nivili ha vili yaho;
warumishila ikavilo khuvapimila shivala shienesho;
valiitsa khumenyamu mihika ni mihika;
valiitsa khumenyamu khumatukhu koosi.
© The Bible Society of Kenya, 2013