ISAYA 30
30
Lilakano li Shikhaya Liakholwa na Misri
1Mwami Nyasaye avoolanga,
“Wooyi! Muli khu vutiinyu munyi vandu vambinjitsanga,
munyi vamuloshitsanga kamukhola, navutswa shiali ninzi uloshitsanga;
munyi vakholanga lilakano, navutswa shikali ni lienya lianje tawe;
munyi mumeetanga vwoni khu vwoni vundi;
2munyi vamuraanganga luchendo lu khutsia Misri,
vuchila khundeva inganakani yu khumukhonya;
vilushilanga khu Mwami wa Misri khulindwa,
nivakhava vulindi vulahi mu shivala shia Misri.
3Khulwa yako, vulindi vu Mwami wa Misri vuliitsa khumuha tsisoni,
khandi numwilushila khu Misri khulindwa,
khuliitsa khuchila mwakwa mu matiinyu.
4Khali niiva vimilili va Misri vali havundu halaangwangwa Zohani,
varumwa veve vatukha Hanesi,
5shia mundu wosi aliitsa khuheelwa tsisoni
khuvirila khu vandu vi shikhaya khuvo,
vavula shia vanyala khuvakhonya inoho vukhala vwosi,
navutswa valiitsa khuchila vanyole tsisoni nende matiinyu.”
6Yili nalio likhuva liu Mwami Nyasaye khulondokhana khu tsinyama tsili mu shiangalangwi khuluveka luli ikuvanda,
“Varumwa vachendanga nivavirila mu shivala shia maraava,
wa tsisimba tsimenyanga
khandi wa tsinzukha tsiu vutsiva
nende miyuukha chipulukhanga chiamenya.
Vachikhanga vihanwa viu vukuuli vululu khu tsipunda nende tsingamia tsiavo
khuhila khu vandu vi tsimbia tsinyala khuvula khuvakhonya;
7shichila vukhonyi vwa Misri ahaananga nu vwi shikhaya.
Khulwa yako, nakulikha Misri, ‘Kuyuukha kuvula tsingulu.’ ”
Vandu Vambakhana Khulonda Malako
8Nyasaye yambolela:
Simukha utsi khuhandika khu lichina liavaatswa,
handika likhuva yili nivalolanga,
live khumatukhu kaliitsa khuvaho,
khuli vushiahidi vwi mihika ni mihika.
9Vandu yava ni vahingani, vaana vaoolanga vuvehi,
vandu vambakhananga khuhulishitsa mivaalo ku Mwami Nyasaye.
10Vavoolelanga valoli: Mukhaloli malolo tawe!
Vavoolela vaprofeti, “Mukhakhuvoolelikhu likhola liu vulunji tawe!
Khuvooleli vindu vinyala khukhuyaanzitsa,
numuhaana vuprofeti vu vuvehi.
11Mukalukhane mamuleshe khwikalila katoto;
muvuli khukhuvoolelakhu shindu khu Nyasaye Mutakatifu wa Israeli!”
12Khulwa yako, Nyasaye, uli Mutakatifu wa Israeli avoolanga,
“Lwa mwambakhana khulonda likhuva lianje,
numuyaanzilila khutambitswa nu khukaatwa,
13vindu vitamanu yivi viliitsa khumutivitsa
khuli likoko liu vwasasu mu lisisi liaraambiha;
lilikuukhanga liene, lili himbi khuyongovela,
liyongovelanga vwangu vuchila khumanyakhu shindu shiosi;
14liliitsa khutong'okhanamu mu vitonye khuli inyungu yu muloonji,
itong'okhanamu vutamanu muno,
khali shisia khu vikonjo vienevo shishinyala khunyolekhakhu
khurumishilwa khwihuula mulilu khurula mumayiika
inoho khuteeha matsi khurula mu isieveye tawe.”
15Mwami Nyasaye, uli Mutakatifu wa Israeli avoolanga,
“Numukalukha khwinzi munjila yu khwikhutsila muliitsa khuhonyinywa;
muliitsa khunyola tsingulu
niiva muliitsa khuhonjela khandi mure lisuuvilitsa lienyu mwinzi.”
Navutswa munyi mwambakhana khukhola ndio,
16numuvoola,
“Shiukhwenyi tawe.
Khutsitsanga khwilushila khu tsifarasi tsia maliviri.”
Nu vulahi, muliitsa khwilushila khu tsifarasi tsia maliviri,
navutswa tsifarasi tsia vatsiku venyu
tsiliitsa khuva na maliviri khuvira tsienyu.
17Vandu venyu iheelefu valiitsa khwilukha
shichila musikali mulala wa vatsiku venyu;
munyi voosi muliitsa khwilukha vasikali varanu,
khutukha lwa mulirikala
khuli shilaka shi ipendera khu vutoonje vwi shikulu,
khuli shimanyilu khu shikulu.
18Khulwa yako, Mwami Nyasaye alindililanga khumuvela tsimbavasi;
aliitsa khwihaanila vukhumi mwene khumuvela tsimbavasi;
shichila Mwami Nyasaye, neye Nyasaye wi likhola liatoto;
vali ni ikhaavi vandu valindililanga muye!
19Ni kilikali, munyi vandu va Sayoni, vamenyanga mu Yerusalemi, muliitsa khulekha khulila khandi. Aliitsa khumuvela tsimbavasi lwa aliitsa khuhulila numulilanga. Lwa aliitsa khuhulila numulilanga, nalwo lwa aliitsa khumuchipa. 20Khali niiva Mwami Nyasaye amukholanga muvirila mu matiinyu nu khunyakhana, neye mwechitsi wenyu khandi aliitsa khuvula khwivisa; navutswa munyi vene muliitsa khumulola ni tsimoni tsienyu. 21Lwa muliitsa khwishevukha khuluveka lu mukhono musatsa inoho mukhali, muliitsa khuhulila likhuva inyuma wenyu, nilivoolanga, “Iyi nayo injila; chendeli khuyo.” 22Muliitsa khwononyinya misambwa chienyu chiavekhwa ifetsa nende vimanyilu vienyu viavekhwa itsahabu; muliitsa khusiuva ihale wene khuli tsinguvu tsi shifwavi. Muliitsa khuvoola, “Ruli hanu!”
23Aliitsa khukhuvitsa imbula khu viraakwa vienyu via muraakanga mu milimi, khandi muliitsa khuchesa lichesa linyishi muno khurula mu milimi chienyu. Muliitsa khuva ni miruku minyishi khuvira shichelo. 24Tsihili nende tsipunda tsienyu tsiliitsa khulia shiukhulia shilahi shene. 25Khulitukhu lia vandu vanyishi valiitsa khusinzwa, lwa minaara chiliitsa khukwa, michela chia matsi chiliitsa khurulila mu shia shikulu shiosi khandi mu shia khakulu. 26Mweli kuliitsa khwang'ang'a vulavu muno khuli liuva, khandi liuva liliitsa khuva nu vulavu hali saba vunyishi, khuli vulavu vwakhanga khulala khumatukhu saba. Kaliitsa khwikholekha lwa Mwami Nyasaye aliitsa khuvoha, nu khuhonyinya makuule ka vandu veve, ka yachila nivanyola.
27Loli! Mwami Nyasaye yitsanga khurula ihale wene! Ali nu vurima khandi mwooshi kutuumanga. Alomolomanga, khandi makhuva keke kakhanga khuli mulilu. 28Miuya chiechie chili khuli muchelelo kwa matsi kweyanga shia shindu shiosi khurulaho. Ativitsanga vandu vi tsimbia khutukha lwa vativa, khandi amulula vindu vitamanu via valoshitsanga khukhola. 29Navutswa munyi va muli vandu va Nyasaye, muliitsa khuva nu vuyaanzi khandi mumwimbile tsinyimbo khuli mukholanga mu vutukhu vwa muvetsanga nu mulukha. Muliitsa khuva nu vuyaanzi khuli vwa yavo vachendanga lwa vahulilanga lwimbo lwi indulelo, nivatsitsanga mu Litempeli liu Mwami Nyasaye, uli lwanda lwa Israeli.
30Mwami Nyasaye aliitsa khuchila shia mundu wosi alihulila mwoyo kwekwe, nu khuvamanyinya vurima vwevwe vululu. Khuliitsa khuva ni tsimemo tsiu mulilu, malesi khuhilikana, imbula ya machina, nende imbula inyililanga. 31Vashuria valiitsa khuria lwa vahulila mwoyo ku Mwami Nyasaye; nu khusalilitswa vutamanu muno. 32Lwa Mwami Nyasaye aliitsa khuvasalilitsa khandi, vandu veve valiitsa khulonda isaa nivakhuvanga tsindumba nende vilili. Nyasaye mwene neye uliitsa khukwana Vashuria. 33Mumatukhu kakhale havundu halombwa ha mulilu munyishi kuliitsa khusambila Mwami wa Ashuria. Nu mulilu mukali muno khandi kwayachikhwakhu tsikhuyi tsinyishi. Mwami Nyasaye aliitsa khuruma tsimemo khukusamba.
© The Bible Society of Kenya, 2013