ISAYA 23
23
Likhuva khu Tiro
1Likhuva lia Nyasaye khu Tiro.
Munyi vahili vi tsimeli tsia Tarishishi, mwikhule,
shichila litaala lienyu lia Tiro limali khutivitswa,
vuchila inzu yarikala inoho havundu ha tsimeli tsisinjilanga!
Lwa tsimeli tsienyu tsiarula mu shivala shia Saipurasi,
nalwo lwa vamanya makhuva kenako.
2Munyi vandu vamenyanga khuluchinga lwi inyanza, muhonjele,
halala na munyi vakuulanga vindu numukulanyinya va Sidoni;
varumwa venyu vakhalakanyila mu inyanza,
3maniveleema khu tsinyanza tsinyishi.
Mwanyola imu ya Misri khuli murungu kwenyu ku vukhala,
ya vachesanga khurula mu Muchela kwa Naili;
mwakhola vukhala na vandu vi tsimbia tsindi.
4Munyi vandu va Sidoni, nyoli tsisoni,
yivi litaala li imbinga yu mu inyanza,
shichila inyanza ivoolanga,
“Shili khuhulilakhu isalila inoho khwivula;
shili khuvilushitsa vayayi vavukha
inoho khutushitsa vakhana vachima.”
5Lwa Vamisri vahulila makhuva khu vindu viakholekha,
valiitsa khuvelelitswa muno shichila vindu viakholekha khu Tiro.
6Yambushi mutsi Tarishishi;
munyi vandu vamenyanga khuluchinga lwi inyanza,
kenyekhanga mwikhule.
7Litaala lienyu yili ni liu vuyaanzi,
liali ni liumbakhwa mumatukhu kakhale;
vandu vamenyanga mulio
vasimukha nivatsia khumenya mu vivala ihale wene.
8Ni viina wachila vindu yivi nivikholekha khu Tiro,
litaala liamihitsanga vami,
vanyaati valio vali vimilili;
vanyaati valio vali vaheelwa luyali mu shivala?
9Mwami Nyasaye wi Mikaanda Chiliihe neye waloshitsa kenako,
khwononyinya khwichinjilila khwavo khu vukhumi,
khuha tsisoni yavo voosi vaheelwa luyali mu shivala shinu.
10Munyi vandu va Tarishishi,
simushi mutsi khulima milimi chienyu;
shichila muvula havundu hi tsimeli tsingali
tsinyala khusinjilitswa.
11Mwami Nyasaye umali khunyiila mukhono kwekwe khu inyanza,
khandi utechelitsi vwami;
uhaani lilako khu Kanaani khuli tsimbinga tsiliyo tsitivitswa.
12Yavoola,
“Munyi vandu va Sidoni,
shiuliitsa khwikhoya khandi tawe;
khali niiva unyala khwilukha utsi Saipurasi,
shiuliitsa khunyolayo lihulukha tawe.”
13Lolikhu shivala shia Vababilonia! Navo vandu; shikali ni Vashuria tawe. Vakhola shivala shia Tiro khuva havundu hi tsinyama tsiumbulimu tsinyala khumenyanga. Vumbakha masisi ki minaara, manivasambulanyinya tsinzu tsiu vwami, nivalikhola lichiinga.
14Mukhuve tsikhwili munyi tsimeli tsia Tarishishi,
shichila tsimbinga tsienyu tsipomolanyinywi.
15Khuraanjila khulitukhu lienelo, litaala lia Tiro liliitsa khwivililwa khumuhika makhomi saba, nichili khuli mihika chia mwami amenyanga makhutsa. Mihika chienecho nichitsitsanga khuvwa, litaala lia Tiro liliitsa khwimbwa lwimbo khuli mulaaya yimbwangwa:
16Vukula vukhana vwovwo, uchendechende nuvotokhana mu litaala,
yivi mulaaya wi vililwa;
yimba tsinyimbo tsindahi muno.
Yimba tsinyimbo tsinyishi muno khu vandu vakhwitsushitse khandi.
17Mihika makhomi saba chienecho nichiakhavira, Mwami Nyasaye aliitsa khusalilitsa litaala lia Tiro; nalio liliitsa khuva khuli mulaaya uliitsa khukuulitsanga mmbili kwekwe khu vandu vi tsimbia tsindi tsiosi mu shivala. 18Tsisenti tsia aliitsa khunyola tsiliitsa khukholwa khuva tsindakatifu khu Mwami Nyasaye. Shililiitsa khutsivisa tawe, navutswa yavo vasaala khu Mwami Nyasaye, navo valiitsa khurumishila tsisenti tsienetso khukuula shiukhulia nende tsinguvu tsiavo.
© The Bible Society of Kenya, 2013