ISAYA 10
10
1Muli khu vutiinyu munyi valombanga malako kakhali katoto,
munyi vahaananga malako kachilanga vandu nivatambitswa.
2Mwikalilanga vandu vamanani khukholelwa katoto,
khandi muvula khuvarweshitsilwa lienya liavo,
vayaayanga vindu via vakhutsakhali,
nu khunuula vavisandu vindu viavo.
3Ni shina shia muliitsa khukhola khulitukhu liu khusalilitswa,
lwa matiinyu kaliitsa khumukwila khurula ihale wene?
Ni viina wa muliitsa khwilushilakhu amukhonye?
Ni hena ha muliitsa khulekha miandu chienyu?
4Shindu shivulakhuho shirikale,
navutswa khwilinjila vutswa mu vavohe
nu khwiira navo muliihe.
Khali nindio, vurima vu Mwami Nyasaye vuliitsa khuvula khucheha;
shichila alatsililila khuvasalilitsa.
Lichelihitswa khu Mwami wa Ashuria
5Mwami Nyasaye avoolanga,
“Yivi Ashuria! Nivi uli khuli indovoshi yu vurima vwanje,
nivi uli ni shikong'o shiu vululu vwanje!
6Ninzi wamuruma khukwana luhia lutamanu lwakorwa Nyasaye;
ninzi wahaana lilako khusalilitsa vandu vachilanga nimba nu vurima,
khutsia khuvayaaya nu khuvakumila voosi,
khuvatuvachila hasi khuli matohi mu tsinjila.”
7Navutswa Mwami wa Ashuria yavula lienya lienelo,
inoho inganakani yu khukhola kenako;
navutswa yali ni lienya lindi liu khwononyinya,
khutivitsa vandu vi tsimbia tsinyishi;
8shichila yichinjilila navoola,
“Vimilili vi mikaanda chia vasikali vaanje voosi ni vami!
9Litaala lia Kaluno linyala khuvula khuva khuli litaala lia Karakemishi?
Litaala lia Hamaatsi linyala khuvula khuva khuli litaala lia Arapadi?
Litaala lia Samaria linyala khuvula khuva khuli litaala lia Damasika?
10Nikava nasalilitsa ningura vwami vwasaalanga khu misambwa chi tsingulu tsinyishi
khuvira misambwa chia Yerusalemi nende Samaria,
11ni kilikali, nyala khukhaywa khukhola ndio khu Yerusalemi nende misambwa chiavo,
khuli nakhola Samaria nende misambwa chiavo?”
12Lwa Mwami Nyasaye aliitsa khuva namali khukhola muhinzilu kwekwe kwosi khu Shikulu shia Sayoni, khandi mu Yerusalemi, aliitsa khusalilitsa Mwami wa Ashuria shichila yichinjililanga nu khwilola.
13Mwami wa Ashuria avoolanga,
“Mali khukhola kenako khuvirila khu tsingulu tsianje,
khandi khuvirila khu vusitsa vwanje,
shichila ndi ni limanya.
Ninzi warinyuula mipaka chia vandu vi tsimbia tsindi,
khandi ninzaya shia shindu shiosi mu livishilu liavo;
ninzi wakulula yavo vikhalanga khu visoko viu vwami khuli ichilishi ikholanga.
14Khuli lwa mundu anyiilanga mukhono kwekwe natiila mu shitsu shi linyonyi,
nindio khandi navukula miandu chia vandu vi tsimbia tsindi;
khuli lwa mundu avunjelitsanga halala mavuyu kalekhwa,
nindio khandi nalera halala vivala viosi;
khali livulakhuho lilala liachingakhu luvaha,
inoho khwasama munwa kwalio,
inoho khali khunziulila.”
15Navutswa Mwami Nyasaye avoolanga,
“Ihaywa inyala khwivukula ili ni tsingulu khuvira mundu uchirumishilanga?
Musumeno kunyala khwichinjilila kuli nu vunyali khuvira mundu ukurumishilanga?
Indovoshi shinyala khuchingula ikulu mundu umali khuchichinga,
inoho shikong'o khuchingula mundu ushirumishilanga tawe.”
16Khulwa yako, Mwami Nyasaye wi Mikaanda Chiliihe,
aliitsa khuruma vulwale vukhung'ahitsa vasikali veve valahi,
khandi luyali lwavo luliitsa khuvwa
khuli mulilu kulaalitsanga shindu.
17Nyasaye uli khuli vulavu vwa Israeli aliitsa khukwa khuli mulilu,
Mutakatifu wa Israeli aliitsa khukwa khuli lumemo lu mulilu;
luliitsa khulaalitsa shia shindu shiosi,
mavwa keke nende maraakalu keke khulitukhu lilala.
18Mwami Nyasaye aliitsa khutivitsa shia shindu shiosi,
miliru chiechie chiu vukhumi nende milimi chiechie minuulu,
kaliitsa khuva khuli mundu wu vulwale vwang'ahitsa.
19Misala miti nachio chiliitsa khurikala mu muliru kwekwe,
khali mwana muti aliitsa khuchivalitsa.
Ni Vati Vonyene Valiitsa Khukalukha
20Khulitukhu lienelo, Vaisraeli valiitsa khuva nivarikala, vandu vashili mwoyo vi inzu ya Yakobo, valiitsa khuvula khwenya khukhonywa khandi na vandu vuluhia lwali nu lwa vasalilitsa. Navutswa valiitsa khwenya khukhonywa mu vwatoto nu Mwami Nyasaye, uli Nyasaye Mutakatifu wa Israeli. 21Ni vati vonyene, vandu valiitsa khuva nivashili mwoyo vi inzu ya Yakobo, navo valiitsa khukalukha khu Nyasaye Uli Ikulu khu Viosi. 22Khali nikava Vaisraeli vayivulana mu vunyishi khuli muyeeshe ku mu inyanza, nikhali ni vati vonyene vutswa valiitsa khukalukha. Kali nikalachikha valiitsa khutivitswa, khwenya katoto khurweshitswa; 23shichila Mwami Nyasaye wi Mikaanda Chiliihe, aliitsa khurweshitsa khuli yalaaka aliitsa khukhola shivala shiosi.
Mwami Nyasaye Aliitsa Khusalilitsa Ashuria
24Khulwa yako, Mwami Nyasaye wi Mikaanda Chiliihe, avoolanga, “Munyi vandu vaanje vamenyanga mu Sayoni, muvuli khuria Vashuria, vamurumulanga ni indovoshi nende shikong'o, khuli Vamisiri vakholanga. 25Khali ndio, harikale hatititi vutswa vurima vwanje khu munyi khuvwa, khandi ngalukhane salilitsi Vashuria. 26Inzi Mwami Nyasaye wi Mikaanda Chiliihe, niitsa khumurumula shivoko khuli narumula vandu va Midia ha lwanda lwa Orebu. Niitsa khuchingula indovoshi yanje khu matsi, khuli nakhola mu shivala shia Misri. 27Khulitukhu lienelo, niitsa khuvakhola khuva vavoholole khurula khu Vashuria, khu valivula khumutiukha misiko militoho.”
Mutsiku Yaseera
28Yinjila mu litaala lia Ayatsi;
yakhalakanyila havundu halaangwangwa Miguroni;
nalekha misiko chiechie mu litaala lia Mikimashi.
29Vambukha injila,
nivakona tsindolo mu litaala lia Geba.
Vandu vi litaala lia Raama vatechelitswa,
vandu vi litaala lia Geba, liali lia Saulu vilukha.
30Munyi vandu vi litaala lia Galimu, mulaanjilile nu mwoyo mukali!
Munyi vandu vi litaala lia Lahisha, muhulishitsi!
Munyi vandu vi litaala lia Anatsotsi, muchipi!
31Vandu vi litaala lia Matimena vilukhanga,
vandu vamenyanga Gebimu vilukhanga khuvula khwiirwa.
32Nunundi mutsiku umali khutukha mu litaala lia Nobu;
Ulinjile Shikulu shia Sayoni tsingumi;
khandi aliitsa khulinjila litaala likali lia Yerusalemi tsingumi tsietsie.
33Lolikhu, Mwami Nyasaye wi Mikaanda Chiliihe
aliitsa khuvatong'olanyinya khuli tsisia tsireemwangwa khu musala.
Misala miraambi chiliitsa khuyeelitswa
vikalihitsanga valiitsa khuheelwa tsisoni.
34Mwami Nyasaye aliitsa khuyeelitsa ni ihaywa misala minyishi mu muliru;
muliru kwa Lebanoni nende misala chiakwo milahi chiliitsa khureemelwa hasi.
© The Bible Society of Kenya, 2013