2 PETRO 3
3
Khuli Mwami Yesu Aliitsa Khukalukha
1Valina vaanje va nayaanza, iyi nayo ibarwa ya khavili yamali khumuhandichila. Mutsibarwa tsivili yitsi, njelitsi khuli nyala khumukhola muve ni tsinganakani tsindahi tsiene, nu khumwitsushitsa makhuva khulondokhana khu vindu vienevo. 2Nyenyanga mwitsushitse makhuva ka vaprofeti vatakatifu valomoloma mumatukhu ka khale; khandi lilako liarula khu Mwami Yesu, uli Muhonyinyi, lia varumwa venyu vamuha. 3Lukhuraanga lwene, muve numumanyi ndi mumatukhu kukhumalilikha yaka, vandu valala vi likomba liu khukhola vindu vitamanu limililanga, valiitsa khulolekha. Valiitsa khumukholela shihenye henye 4nivareeva, “Yalaaka aliitsa khukalukha! Ni hena wali? Khurula vakuuka veru nivakhutsa, vindu viosi vishili vutswa khuli viavetsanga, khurula shivala nishiloongwa!” 5Navutswa vandu venavo, khuvirila khu vwikholi vwavo vene, vikholanga vayivilila ndi mumatukhu ka khale, Nyasaye yahaana lilako, ma likulu nende lilova nivilombwa. Lilova lialombwa khu matsi khandi khuvirila khu matsi, 6khandi khuvirila khu matsi, nikali matsi ki michelelo, vandu vu khuraanga khumenya mu shivala vativitswa. 7Navutswa lilako lilala lienelo, nalio lilindanga likulu nende lilova viliho nunundi, khutukha lwa viliitsa khutivitswa nu mulilu. Vialinditswa khutukha Khulitukhu liu Khukhalachilwa lwa vandu vatamanu vakorwa Nyasaye, valiitsa khukhalachilwa nu khutivitswa.
8Navutswa munyi valina vaanje va nayaanza, muvuli khwivililakhu shindu shilala! Vwavukhani vuvulakhuho hakari hi litukhu lilala nende mihika iheelefu indala khu Mwami; litukhu nende mihika ni shindu shilala khuye. 9Navutswa Mwami, shiali nu wakalaha khurweshitsa ka yalaaka, khuli valala khu munyi vakanakananga tawe. Nikhali, wayikhutsila shichila munyi lwa avula lienya liu mundu khutivitswa; navutswa yenyanga vandu voosi vave nivikanilanga khurula mu vwoni vwavo.
10Navutswa Litukhu liu Mwami liliitsa khutukha khuli shihuuvi. Khulitukhu lienelo, likulu liliitsa khukora khuvirila mu liyooko linyishi muno; vindu viu mwikulu viliitsa khulaalitswa nu mulilu. Lilova nende vindu viosi vili mulio, viliitsa khukora. 11Lwa vindu vienevo viosi viliitsa khuva ni viakhativitswa munjila yeneyo, nu muve vandu lukanu shina? Mwenyekhanga mumenye mu vutakatifu, khandi khuli vandu vihaana nu mwoyo kwosi khu Nyasaye, 12lwa mulindililanga litukhu lia Nyasaye, khandi khuchelitsa khulikhola liloleshe vwangu; shichila nalio litukhu li likulu liliitsa khulaalitswa nu mulilu, khandi vindu viu mwikulu, viliitsa khuyekukha shichila luya lu mulilu. 13Navutswa khulindililanga shia Nyasaye yakhulaaka: likulu liyia nende lilova liyia, hango ha vandu vi likhola liu vulunji valiitsa khumenya.
14Khulwa yako, valina vaanje va nayaanza, lwa mulindililanga litukhu lienelo, muchelitsi khuva vandu vanihu vavula vutamanu inoho imbala yosi imbeli wa Nyasaye; khandi mumenye mu milembe naye. 15Mwenyekhanga muvukule vwitsumishitsi vu Mwami weru khuva khuli vwiyangu vwenyu vwa yamuha vu khuhonyinywa, khuli musuuvili wa khwayaanza washieru Paulu yamuhandichila, khuvirila khu vusitsa vwa Nyasaye yamuha. 16Ahandikanga nalomoloma makhuva khulondokhana khu vindu vilala viele mu tsibarwa tsietsie tsiosi. Vindu vilala viatinya mu tsibarwa tsietsie, via vandu vakhacheliha khandi vahaya hayanga vakorwa katoto khulondokhana khuvio, khuli vasomanga mu Mahandiko Matakatifu kandi. Nindi vene vitivitsanga.
17Khulwa yako, munyi valina vaanje va nayaanza, lwa mumanyi khale vindu vienevo, muve vacheli. Nikakhavele kario, munyala khukoyanyinywa na vandu vakholanga vindu vitamanu, nu khukoritsa vwiyangu vwenyu vulahi vwamulimu. 18Navutswa mutsililile khumenya mu tsimbavasi nende vucheli vu Mwami, uli Muhonyinyi Yesu Kristo. Vukhumi vuve khuye, nunundi khandi mihika ni mihika! Amina.
© The Bible Society of Kenya, 2013