2 TSINYINGA 2
2
Khuli Virechekha Khumbakha Litempeli
(1 Vami 5:1-18)
1Mwami Solomoni yahaana lilako liu khumbakha Litempeli lia vasaalilamu khu Mwami Nyasaye, khandi inzu yeye yu vwami. 2Mwami Solomoni yarovola vandu tsiheelefu makhomi saba vu khuchinga vindu viu khumbashila; khandi vandu tsiheelefu makhomi munane, khuyeeva nu khutuuya machina khurula mu shivala shi vikulu. Yarovola vandu tsiheelefu tsivaka ni tsimia sita, khuvasinjilila khukhola mihinzilu.
3Mwami Solomoni yarumana likhuva khu Mwami Hiramu wa Tiro vamuvoolele, “Khusayanga nuyaanza underele misala chia ceda, khuli wakholela tata wanje Daudi, lwa wamulerela, niyumbakha inzu yeye yu vwami. 4Ndi himbi khumbakha Litempeli lia vasaalilamu khu Mwami Nyasaye, uli Nyasaye wanje; khandi nzitsanga khulitakasa khuye khuva havundu ha vasambilanga vubani, khandi ha vahaanilanga vihanwa vi vindu vihuunyanga mwayu mulahi khuye; khandi ha vahaanilanga shia khase khosi mukati mutakatifu. Haliitsa khuva khandi havundu ha vatsitsanga khuhaanila vihanwa viu khusambwa shia mu mavwevwe nende halokolovo; khali khumatukhu ki Lisabato, Milukha chiu Mweli Khwilavushitsa Vuyia, khulondokhana khuli Mwami Nyasaye yalaaka Vaisraeli vakhole mihika ni mihika. 5Niitsa khumbakha Litempeli li tsingulu, shichila Nyasaye weru ali nu vunyali vunyishi khuvira vanyasaye vandi voosi. 6Navutswa ni viina uli nu vunyali vu khumumbashila Litempeli, shichila shianyala khali khwitsula mwikulu tawe? Ninzi viina unyala khumumbashila Litempeli, nikakhali vutswa khuli havundu ha vasambilanga vubani khuye? 7Khulwa yako, khusayanga nuyaanza undumile mundu wechela muhinzilu kukhurumishila itsahabu, ifetsa, mukasa, nende shivia, khandi wamanya khunaava tsinguvu tsia bulu, sambarau, nende tsimuuchi. Mundu mwenoyo alakhola muhinzilu na vahinzili vandi navo mu shivala shia Yuda nende Yerusalemi, va tata wanje Daudi yamba. 8Nuyaanza undumile misala chia ceda, mitarakwa, nende musala kusasanga ikambi khurula Lebanoni; shichila manyi vulahi ndi varumishi vovo vamanya khwara tsimbaho mu Lebanoni. Varumishi vaanje vatsitsanga khukhola mihinzilu na varumishi vovo, 9khunzarila tsimbaho mu vunyishi; shichila Litempeli lia nzitsanga khumbakha, liliitsa khuva li tsingulu khandi liu khuchenyinya. 10Niitsa khuha varumishi vovo, nivali yavo varaanga tsimbaho, inganu tsitani tsiheelefu tsivili (2,000), ishayiri tsitani tsiheelefu tsivili (2,000), idivai tsilita tsiheelefu tsimia tsine (400,000), nende makura ku musayituni tsilita tsiheelefu tsimia tsine (400,000). ”
11Nalwo lwa Mwami Hiramu yachipila Mwami Solomoni mu ibarwa; navoola, “Mwami Nyasaye wayaanza vandu veve, khandi wa khwamihitswa khuva mwami wavo. 12Nzitsominyanga Mwami Nyasaye, uli Nyasaye wa Israeli, walomba likulu nende lilova! Neye wachila Mwami Daudi, niyivula mwana wu vusitsa, witsula limanya nende vucheli, uliitsa khumbakha Litempeli liu Mwami Nyasaye nende inzu yeye yu vwami. 13Khurumilanga nunundi mundu wechela vufundi, mundu mucheli, ulaangwangwa Huramu Abi, 14mama wewe arulanga mu vandu vuluhia lwa Dani, navutswa tata wewe nu mulala khu vandu vi litaala lia Tiro. Wayechitswa khulomba vindu khu itsahabu, ifetsa, mukasa, shivia, machina, nende tsimbaho. Wamanya khandi khunava tsinguvu tsia bulu, sambarau, nende tsimuuchi nende vitambaya vilavu. Wamanya khuchora michoro manyishi lukanu, khandi anyala khulomba muchoro ka umuha akhulombele. Lekha akhole mihinzilu na vafundi vovo nende yavo vakholelanga muruchi wanje, uli Daudi tata wowo. 15Khulwa yako, nyenyanga muruchi wanje arumile varumishi varaanga tsimbaho, inganu, ishayiri, idivai, nende makura ku musayituni, khuli yali niyalaaka aliitsa khukhola. 16Khuliitsa khukhureemela misala chiosi chia wenyanga mu vikulu via Lebanoni. Khutsitsanga khuchivoha mu vituma khucheleminyi khu matsi ki inyanza khutukha mu litaala lia Yopa, khu muchitikulukhitsi Yerusalemi.”
Khuli Varanga Khumbakha Litempeli
(1 Vami 6:1-38)
17Nalwo lwa Mwami Solomoni yavalitsa vandu vacheni voosi, vamenyanga mu shivala shia Israeli, nili ya khavili khulonda khu isavu ya tata wewe Daudi, yali niyavukula lukhuraanga. Isavu ya vandu vacheni yanyolekha khuva vandu tsiheelefu imia indala makhomi karanu na kavaka ni tsimia sita. 18Yarovola vandu tsiheelefu makhomi saba khuchinga vindu viu khumbashila; khandi vandi tsiheelefu makhomi munane khuyeeva nu khutuuya machina mu shivala shi vikulu. Yarovola vandi tsiheelefu tsivaka ni tsimia sita, khusinjilila vandu vakholanga muhinzilu.
© The Bible Society of Kenya, 2013