Wóɖómà 3
3
1Ɔ dyi ná nìǐn, ɖɛ́ Júù-nyɔ̀ jǔ-jǔ kpa ɖé Júù-nyɔ̀ ɓěɔ̀ gboɛ́? Ɖɛ́ sàà-mɛ́-mɛ́ kpa ɖé wa gbo cáá? 2Ɔ kpa wa gbo ɖɛ ɖé ɖɛ séín mú mìɔ. Kĩ́ín nyɛɛ, Gèɖèpɔ́ɔ̀ zàìn ɔ wuɖu ɓěɔ̀ Júù-nyɔ̀ ɓěɔ̀ xwáɖáún. 3Ké wa ɖíɛ́ ɓě se ma Gèɖèpɔ́ɔ̀ hwìɖǐǐ taɓaín, nìí, ɔ jè ɖɛ́ɛ̀? Wa se ma Gèɖèpɔ́ɔ̀ hwìɖǐǐ taɓa jèɛɛ, Gèɖèpɔ́ɔ̀ ké ɔ wuɖuɔ̀ mú jaɖaà? 4Hée, ɔ se ná nìɛ̀ ɓɛ́ìn. Kɛbì nyɔ séín mɛ jǔ se-nyɔ̀ kɛɛ, Gèɖèpɔ́ɔ̀ ɓéɖé ɓɛ́ ɔ ké jǎà-nyɔ̀ jǔ. Kà ɔ nyuà céèɛ̀ ɖé Gèɖèpɔ́ɔ̀-cèè-ɖɛ̀ɔ̀ múɛɛ, ɔ ɖá,
“Ɔ kpá ná, nìí ɓɛ́ nyɔǔn-dyù kéɛ dyéɖéi hwɔ̀ìn kà m̀ dyi ní zɔ̃́ín wɔ̃ po ní, ɔ mɔ̀ jǎà kɛ.
Ké wa dyi nì zaaɔ̀ cɛ̃iń nìǐn, nìí, ɔ se m̀ dúún wáɖáa mu.”
5Ɔ jǔ ké ɖɛ gbà ɓě ɓɛ́ à nyuà kɛɛ dyi Gèɖèpɔ́ɔ̀ dyí-sɛ́ɖɛ́ìn-sɛ́ɖɛ́ìnɔ̀ píé dyàǐn, nìí, xwɛ̌ à mɛ ɖáá? Gèɖèpɔ́ɔ̀ dyi à gǎ dyéìn ní, nìí, ɔ se jǎà nyuù? (Ḿ nì nyɔǔn-kà wùɖùɛ̌n.) 6Hée, ɔ se ná nìɛ̀ ɓɛ́ìn. Ɔ jǔ ké Gèɖèpɔ́ɔ̀ seɔ́ jǎà nyuín, nìí, xwɛ̌ ɔ ɓɛ́ìn ɓóɖó-kpàà zaa wɔ̃ poɛ kɛ́?
7Ɔ jǔ ké ní se-tɔ́mɔ́-tɔ́mɔ́ɔ̀ dyiɛ nyu ɓɛ́ Gèɖèpɔ́ɔ̀ jǎàɔ̀ ké kɔ̃ kpá, ɓɛ́ ɔ ké ɓàìn-ɓàìnɔ̀ dyéín, nìí, ɖɛ́ kɔ̃̀ jè ɔ kpɔ̃̀ìn kà ḿ zaa ɓó nàmàǔn nyu jè keɛ́? 8Ké nìí, ɖɛ́ kɔ̃̀ jè à ní nyuà ɖɛ gbà ɓɛ́ nɔ̀mɔ̀ dyíin kéà nìɛ́? Nyɔ ɖíɛ́ ɓě zeɖe ḿ nyɛ́nɛ́, ké wa ɖá kǎà ḿ ɖá. Kɛɛ nìí, ɔ sɛ́ɖɛ́ìn dyí ɓɛ́ zaa ké nyɔ nì kà ɓěa dúún wáɖá.
Dyí-sɛ́ɖɛ́ìn-nyɔ̀ ɖò se nì
9Ɖɛ́ kɔó dyíɛ́? À mɔ̀à Júù-nyɔ̀ ɓěɛɛ, à nììnɔ̀ nɔ̀mɔ̀ dyíin ké ɔ zi nyɔ ɓě mɔ̀ùn seà Júù-nyɔ̀ ɓěɛɛ dyíì? Gbào, ɔ se ná nì fɔɔ. Ḿ ɖǎa máa cɛ̃ kĩ́ín kà nàmàǔn kɔ̃̀ nyɔǔn séín wuɖuíɛ. Ɔ kɔ̃̀ Júù-nyɔ̀ ɓě kè ɓóɖó-dù kà kò ɖò ɓěɛ̀ nyɔ ɓě wuɖuí ɖekè. 10Kà ɔ ɖǎà céè ɖé Gèɖèpɔ́ɔ̀-cèè-ɖɛ̀ɔ̀ múɛɛ, ɔ ɖá,
“Nyɔ ɖò se ɖé wa hwìɛ̀ nì, ɓɛ́ ɔ ké dyí sɛ́ɖɛ́ìn.
Nyɔ dyúáɖò dyɛ mɔ̀ùn se nì.
11Hwòɖǒ-fɔ̀nɔ̀-nyɔ̀ ɖò se wa hwìɛ̀ nì,
ɓɛ́ ɔ hwòɖǒ ké Gèɖèpɔ́ɔ̀ mɔ́.
12Wa séín ɖǎ hwìǐ sɔ̀ìn.
Wa séínɛ̀ nyuu-ɖɛ̀ mɔ̀ ɖɛ gbà saá-saá.
Nyɔ ɖò se wa hwìɛ̀ nì, ɓɛ́ ɔ ké ɖɛín-ɖɛ̀ nyu.
Nyɔ dyúáɖò dyɛ mɔ̀ùn se nì.
13Waà bùnù-zɔ̃̌ nì kà xwɛ́-gmàà fɔ̀nɔ̀ wɔ̃ nìà kɛ.
Ké nyɔ-cá-wùɖù nì waà miɔ mánáín.
Wuɖu ɓě sɔ̀ wa wĩín nyɛɛ nì cɛ̃́ín kà sɛ nìà kɛ.
14Gboò-wùɖù ɓě dyí wa wĩín,
ké waà wuɖu nɛɛ̀ mìɔ.
15Wa fṹà ɓo xwai,
ɓɛ́ wa ké kú ɖáɓá.
16Gǎ-dyé-dyé kè mú-gbɔɔ̀-gbɔɔ̀ nì ɓó waà hwìè ɓěɔ̀ dyí kánáá pū,
17ké wa se gìɖìǐ jè dyuò fɔɔ cá.
18Gèɖèpɔ́ɔ̀-dyi-fɛ̃̀ìn-hwòɖò-dyùà ɖò se ɖé wa xwíníín nì fɔɔ cá.”
19À dyuòɛ̀ kà ɖɛ séín ɓɛ́ gmaɔ̀ cɛ̃ɛ, ɔ cɛ̃ɛ nyɔ ɓě nì gmaɔ̀ xwíɖíiɛɛ gboɛ, ɓɛ́ ɔ ké nyɔǔn séín wĩín dyi ɖáɓá, ɓɛ́ ɓóɖó-kpà gànáà ké Gèɖèpɔ́ɔ̀ zaa-wɔ̃-po-poɔ̀ kpa dyí ɖú. 20Sepóɛɖé gmaɔ̀ dyi-kpɔ̃-kpɔ̃ɔ̀ seɛ nyuɛ́ mu ɓɛ́ Gèɖèpɔ́ɔ̀ ké nyɔ ɖò dyí-sɛ́ɖɛ́ìn-nyɔ̀ ɖáìn, sepóɛɖé gmaɔ̀ nyuɛ ké à dyuò nàmàǔn dyí jɛ́ɛ́ cá.
Kà Gèɖèpɔ́ɔ̀ nyu à dyí-sɛ́ɖɛ́ìn-nyɔ̀ mú nyuɛ ɓó ɔ mìɔùn gboɛ
21Kɛɛ kàǔn wɛ̃ɛ, Gèɖèpɔ́ɔ̀ nyɔ-dyí-sɛ́ɖɛ́ìn-sɛ́ɖɛ́ìnɔ̀ ɖǎ píé wóɖó, kɛɛ gmaɔ̀ seɛ ma píé wóɖóìn fɔɔ. Gma-cèè-ɖɛ̀ɔ̀ ɔ kè kpáá-ɖɛ̀-cɛ̃-nyɔ̀ ɓěɔ̀ céè-ɖɛ̀ ɓěɔ̀ nyu ma Gèɖèpɔ́ɔ̀ dyí sɛ́ɖɛ́ìn jè zàse pū. 22Gèɖèpɔ́ɔ̀ sɛ́ɖɛ́ìn nyɔǔn dyí dyììn ɖé Kɛ́ɖɛ́ì hwìɖǐǐ-taɓa-taɓa mú. Ɔ sɛ́ɖɛ́ìn nyɔ séín ɓě ɓɛ́ wa taɓa Kɛ́ɖɛ́ì hwìɖǐǐɛɛ dyí, sepóɛɖé gbo-zaìn-zaìn ɖò se ɓó nyɔǔn-dyù pṹa nì. 23Nyɔǔn séín ɖǎ nàmàǔn nyu, ké wa se Gèɖèpɔ́ɔ̀ dĩ́ín-dĩ̀ìnɔ̀ ɓéɖé. 24Kɛɛ ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ mɔ̀ nyɔ nyuɛ ké wa sɛ́ɖɛ́ìn dyí pídyi dyììn ɖé gbǎà-gbǎà nìà ɖé Kɛ́ɖɛ́ì Jízɛ̀ múɛɛ mú. 25Gèɖèpɔ́ɔ̀ dyà ma ɔ nyɔǔn dyúa, ɓɛ́ ɔ jǔ ké nyɔ ɖò dyi ɔ hwìɖǐǐ taɓa ní, nìí, ɔ nyɔmɔɔ̀ ké nyɔɔ̀ nàmàǔn bũ̌in-zà-ɖɛ̀ jǔ. Gèɖèpɔ́ɔ̀ nyu ma ɖɛa, ɓɛ́ ɔ kéɛ nyɔǔn dyí tɛ̀mɛ̀ìn kà ɔ sɛ́ɖɛ́ìn dyíɛ. Sepóɛɖé ɔ kùìn ma nyɔǔn-dyùɛ̀ kpeɖe hwòɖǒ, ké ɔ dyéɖé wã̀ìn ma nàmàǔn ɓě ɓɛ́ wa nyu ma kĩ́ín nyɛɛ kɔ̃in. 26Gèɖèpɔ́ɔ̀ nyu ma ɖɛa, ɓɛ́ ɔ kéɛ nyɔǔn dyí tɛ̀mɛ̀ìn kàǔn kà ɔ sɛ́ɖɛ́ìn dyíɛ. Ɔ tɛ̀mɛ̀ìn nyɔǔn dyí kà ɓɛ́ ɔ mìɔùn sɛ́ɖɛ́ìn dyí, ké ɔ sɛ́ɖɛ́ìn nyɔ ɓɛ́ ɔ taɓa Jízɛ̀ hwìɖǐǐɛɛ dyí ɖekèɛ.
27Kà ɔ nìà náa, nìí, páɔ̀ nyɛ́ nì ɖé ɓó ɓɔ́ɖɔ́ jèɛ́? Ɔ ɖǎ píé sè. Kpéɔ̀ nyɛ́ kɔ̃̀ jè ɔ sèà píéɛ́? Ɔ mɔ̀ gmaɔ̀ dyi-kpɔ̃-kpɔ̃ɔ̀? Gbào, ɔ mɔ̀ hwìɖǐǐ-taɓa-taɓa jè ɔ sèà píéɛ̀. 28Sepóɛɖé ɔ nyɔ à kpɔ̃ dyiɛɛ mɔ̀ kà ɓɛ́ hwìɖǐǐ-taɓa-taɓa mɔ̀ nyɔ nyuɛ ké nyɔǔn sɛ́ɖɛ́ìn dyíɛ. Gmaɔ̀ nyuu-ɖɛ̀ ɓěɔ̀ se ɖé kpá. 29Gèɖèpɔ́ɔ̀ mɔ̀ Júù-nyɔ̀ ɓěɔ̀ ɖòùn nììn Gèɖèpɔ́ɔ̀ pūù? Ɔ se ɓóɖó-dù kà kò ɖò ɓěɛ̀ nyɔ ɓěɔ̀ nììn Gèɖèpɔ́ɔ̀ ɖekèè? Hée, ɔ mɔ̀ ɓóɖó-dù kà kò ɖò ɓěɛ̀ nyɔ ɓěɔ̀ nììn Gèɖèpɔ́ɔ̀ ɖekè, 30sepóɛɖé Gèɖèpɔ́ɔ̀ nì dyúáɖò nyɛ̀nɛ̀ɛ̀. Ɔ mu nyɔ ɓě ɓɛ́ wa ɖǎà sàà mɛ́ kɛɛ dyí sɛ́ɖɛ́ìn ɓó waà hwìɖǐǐ-taɓa-taɓaɔ̀ jè, ké nyɔ ɓě ɓɛ́ wa mɔ̀ùn seà sàà mɛ́ kɛɛ, waà hwìɖǐǐ-taɓa-taɓaɔ̀ muɛ nyuùn ɓɛ́ Gèɖèpɔ́ɔ̀ ké wa dyí sɛ́ɖɛ́ìn ɖekè. 31Ɔ xwíníín mɔ̀, à ɖú hwìɖǐǐ-taɓa-taɓa nìà kɛ dyí, ɓɛ́ à ké gmaɔ̀ mú gbɔɔ̀? Ɔ se ná nìɛ̀ ɓɛ́ìn. Kɛɛ à ɖú hwìɖǐǐ-taɓa-taɓaɔ̀ dyí, ɓɛ́ à ké gmaɔ̀ dyi kùìn.
Chwazi Kounye ya:
Wóɖómà 3: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.