Máà 9
9
1Ké ɔ cɛ̃ɛ ma wa gbo ɖe, ké ɔ ɖá, “Ḿ cɛ̃ ɓě jǎà gbo, nyɔ ɖíɛ́ ɓě nì dà ɓě hwìɛ̀, ké wa se gĩɔ muɛ́ mu, ɓɛ́ Gèɖèpɔ́ɔ̀ kã́á-ɓòɖòɔ̀ ké dyi ɖé kpé mú hwɛ̀.”
Jízɛ̀ zĩàìn gbo
(Máfíò 17:1-13; Ɖúù 9:28-36)
2Ti ɓɛ́ wé mɛ̀nɛ̌ìn-ɖò ɖǎ ma ziɛɛ, Jízɛ̀ ɖú ma Píɖɛ̀ kè Jĩ́ìn ɔ kè Jɔ̃́ɔ́ dyí, ké ɔ kpa ma wa ɖé toɖo tɔ̀mɔ̀ dya ɖò dúún. Ké ɔ zĩàìn ma gbo ɓó wa dyéɖé waí. 3Ɔ mú-po-ɖɔ̀ɔ̀ dè ma fãa gbɔ, ké ɔ nì ma séɖéé tá-tá. Ɖɔ-wɔɔ̀-nyɔ̀ ɖò se ɓóɖóɛ̀ kɔ̃ nì ɓɛ́ ɔ kéɛ náa mú hwɔ. 4Púɛɛ, Ìɖáájɔ̀ kè Mózè wóɖóìn ma wa dyí, ké wa kè Jízɛ̀ nì ma wùɖùɛ̌n. 5Ké Píɖɛ̀ cɛ̃ɛ ma Jízɛ̀ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, ɔ nɔ̀mɔ̀ dyíin ɓɛ́ à ké dà nì. À mɛ po ɓeè-dyù tã, mɔ̀ùn ké dyúáɖò kɔ̃̀, ɓɛ́ Mózè ké dyúáɖò kɔ̃̀, ɓɛ́ Ìɖáájɔ̀ mɔ̀ùn ké dyúáɖò kɔ̃̀.” 6Ɔ cɛ̃ɛ ma náa, sepóɛɖé ɔ se ɖɛ ɔ ké ma cɛ̃ɛ dyuò, wa fɛ̃̀ìn ma mìɔ jè.
7Ké ní-kpò ɖò ɓáìn ma wa kɔ̃in, ké wuɖu ɖò sɔ̀ìn ma ɖé ní-kpòɔ̀ mú, ké wuɖuɔ̀ ɖá, “Nyɔ nìà kɛ mɔ̀ ní hwòɖǒ-kɔ̃-dè-dyùɔ̀. Ɓě mɛ tò ɔ gbo ɖùǔ.” 8Ti ɓɛ́ wa wɔ̃́ ma wuɖuɔ̀ nyɛ̀nɛ̀ɛ̀ cá kɛɛ, wa gmɔìn ma dyi, ké wa se ma nyɔ kà kò ɖò dyé ɖe, ɔ sèìn ma Jízɛ̀ ɖòùn.
9Ti ɓɛ́ wa kè Jízɛ̀ nì ma ɖé toɖoɔ̀ dya sɔ̀ǔn wɛ̃ɛ, ɔ cɛ̃ɛ ma wa gbo kóɖó-kóɖó, ɓɛ́ wa ní kɔ̃̀ ɖà ɖɛ wa ɖǎà dyéɛɛ jè nyɔ ɖò gbo cɛ̃, ɓɛ́ ɔ mɔ̀à Nyɔǔn-dyùɛ̀ Dyú-gààɔ̀ kɛɛ ké gĩɔ wóɖó hwɛ̀.
10Ké wa kpɔ̃ ma ɔ wuɖuɔ̀ dyi, ké wa nì ɖɛ mɔ̀ ma gĩɔ-wóɖó-wóɖó xwíníín nyɛɛ jè hwìɖǐi poɛ̌n. 11Ké wa diè ma ɔ dyi, ké wa ɖá, “Ɖɛ́ kɔ̃̀ jè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ cɛ̃à kà Ìɖáájɔ̀ ɓéɖé ɓɛ́ ɔ ké dyi kĩ́ín hwɛ̀ ɓɛ́ Kɛ́ɖɛ́ìɔ̀ kéà dyi kɛ́?”
12Ké Jízɛ̀ zà ma ɖé wuɖu, ké ɔ ɖá, “Jǎà jɛ́ɛ́, Ìɖáájɔ̀ mu dyiìn kĩ́ín, ké ɔ mu ɖɛ séín páún poùn. Kɛɛ má, wa céèɛ kà mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ ɓéɖé ɓɛ́ ḿ ké gǎ dyé mìɔ, ɓɛ́ wa ké ḿ zùǔn zàìn nyɛe? 13Kɛɛ ḿ cɛ̃ɛ ɓě gbo kà ɓɛ́ Ìɖáájɔ̀ ɖǎ dyi nɔ̀ɔ̀ kɛ, ké wa nyu ma ɖɛ ɓě ɓɛ́ wa mɔ́ ma ɔ bũ̌ nyuɛ dyiɛɛ ɔ bũ̌ kà ɔ jè nyuà céèɛ̀ kɛ.”
Jízɛ̀ zà zùù gbà gàa-dyù-gbɔ́ɔ́ ɖò mú
(Máfíò 17:14-21; Ɖúù 9:37-43a)
14Ti wa dyi ma ɖé ɖeín-nà-nyɔ̀ tɔ̀ɔ̀ ɓěɔ̀ gboɛɛ, wa dyé ma nyɔ pàɖǎ, ké wa nì ma wa ɖei. Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ nì ma ɖeín-nà-nyɔ̀ ɓěɔ̀ gbo jɛiń. 15Ti ɓɛ́ nyɔ ɓěɔ̀ dyé ma Jízɛ̀ nyɛ̀nɛ̀ɛ̀ kɛɛ, wa giniìn ma dyi mìɔ, ké wa kpa ma peɖeɛ, ké wa zà ma ɔ nyíɔún. 16Ké Jízɛ̀ diè ma ɖeín-nà-nyɔ̀ ɓěɔ̀ dyi, ké ɔ ɖá, “Ɖɛ́ ɓě kè wa nìɔ̌ kà mú zàǔn wɛ̃́?”
17Ké nyɔ kúɖúú ɓěɔ̀ ɖò zà ma ɖé wuɖu, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, ḿ dyà ní dyú-gààɔ̀ m̀ gbo, sepóɛɖé ɔ ɓéɖé zùù gbà, ké zùù gbàɔ̀ nyuɛ ké ɔ se wùɖùɛ̀ ɓɛ́ìn. 18Dà séín ɓě ɓɛ́ zùù gbàɔ̀ mu dya wóɖóìn nyɛɛ, nìí, ɔ ɖu ɔ ní. Ké dyúɔ̀ ɖu vúú, ké ɔ tà nyɛ́nɛ́, ké ɔ nì sãin. Ḿ dièɔ̌ nì ɖeín-nà-nyɔ̀ ɓěɔ̀ dyi, ɓɛ́ wa ké zùù gbàɔ̀ ɔ mú zà, kɛɛ wa seɛ nyuɛ ɓɛ́ìn.”
19Ké Jízɛ̀ zà ma ɖé wuɖu, ké ɔ ɖá, “Kē! Ɓě mɔ̀à nyɔ ɓě seà hwìɖǐǐ-taɓa-taɓa ɓéɖéɛɛ, xwɛ̌ ḿ mɛ nyuá ɓě gbo hwèɖèɛ̀n nyɛ́? Xwɛ̌ ḿ mɛ nyuá ɓěɛ̀ kpeɖe hwìɖǐi kùɛ̀n nyɛ́? Dyà nɔ̄ nì dyúɔ̀ ḿ gbo.” 20Ké wa kpa ma ɔ gàa-dyùɔ̀ gbo.
Ti ɓɛ́ zùù gbàɔ̀ dyé ma Jízɛ̀ kɛɛ, ɔ po ma dyúɔ̀ kṹún wàɖà. Ké dyúɔ̀ suèìn ma ɓó ɓíɖíi dyi, ké ɔ ɖu vúú. 21Ké Jízɛ̀ diè ma dyúɔ̀ ɓǎɔ̀ dyi, ké ɔ ɖá, “Ti jĩ̀ xwɛ̌ ɔ nyuá ɔ múɛ́?”
Ké ɔ ɖá, “Ɔ mɔ̀ sɔ̀ìn ɖé ɔ dyú-gbɔ́ɔ́ ɓìɖì. 22Zùù gbàɔ̀ po ɔ dyéɖé kè níɔ tee, ɓɛ́ ɔ ké ɔ ɖáɓá. Kɛɛ m̀ dyi wɛ́ɛ ɖɛ ɖò nyuɛ ɓɛ́ìn ní, nìí, m̀ mɛ dyé à wìǐn, ɓɛ́ m̀ ké à gbo kpá.”
23Ké Jízɛ̀ cɛ̃ɛ ma ɔ gbo, ké ɔ ɖá, “M̀ dyi hwìɖǐǐ-taɓa-taɓa ɓéɖé ní, nìí, ɔ ɓɛ́ìn ná nìɛ̀, sepóɛɖé nyɔ mɔ̀ nyɔ ɓɛ́ ɔ taɓa Gèɖèpɔ́ɔ̀ hwìɖǐǐɛɛ, Gèɖèpɔ́ɔ̀ ɓɛ́ìn ɔ bìì ɖɛ séín nyuɛ.”
24Ké dyúɔ̀ ɓǎ páná ma mú, ké ɔ ɖá, “Ḿ taɓa Gèɖèpɔ́ɔ̀ hwìɖǐǐ. Kpá ḿ gbo dɛ̀ ɓɛ́ ḿ seà Gèɖèpɔ́ɔ̀ hwìɖǐǐ taɓaìn nyɛ.”
25Ti ɓɛ́ Jízɛ̀ dyé ma nyɔ kúɖúú ɓěɔ̀ peɖeɛ dyàà kɛɛ, ɔ wùɖù ma zùù gbàɔ̀ gbo gana-kà, ké ɔ ɖá, “Mɔ̀ zùù gbà nyuà ké nyɔǔn seà wùɖùɛ̀ ɓɛ́ìn, ké wa ní wɔ̃́à dyi kɛɛ, ḿ cɛ̃ɛ m̀ gbo, sɔ̀ dyúɔ̀ mú. Mɔ̀ǔn ɖá m̀ ké ɔ mú dyi ɖe.”
26Ti ɓɛ́ zùù gbàɔ̀ páná ma múɛɛ, ɔ po ma dyúɔ̀ kṹún síɔ́-síɔ́, hwɛ̀ ké ɔ sɔ̀ ma ɔ mú. Ké dyúɔ̀ nì ma kà xwɛ́ nìà kɛ. Ɔ jèɛɛ, nyɔ pàɖǎ cɛ̃ɛ ma, ké wa ɖá, “Ɔ ɖǎ mɛ́.” 27Kɛɛ Jízɛ̀ kpɔ̃ ma ɔ sɔ̃in, ké ɔ sɔ̀ìn ma ɔ dyí, ké ɔ nyànà dyi.
28Ti ɓɛ́ Jízɛ̀ ɖǎ ma gbǒɔ̀ mú dyá, ké nyɔ ɖò se ma ɓó nìɛɛ, ɔ ɖeín-nà-nyɔ̀ ɓěɔ̀ diè ma ɔ dyi, ké wa ɖá, “Ɖɛ́ kɔ̃̀ jè à mɔ̀ùn seà zùù gbàɔ̀ dyúɔ̀ mú zàà ɓɛ́ìn nyɛ́?”
29Ké ɔ cɛ̃ɛ ma wa gbo, ké ɔ ɖá, “Zùù gbà nì kà kɛɛ, m̀ se ɓaà kóɖó-kóɖó ní, nìí, m̀ seɛ nyɔ ɖò mú zàà ɓɛ́ìn.”
Jízɛ̀ cɛ̃ ɔ mɛ́ jèɔ̀ ɖe
(Máfíò 17:22-23; Ɖúù 9:43b-45)
30Sɔ̀ìn ɓóɛ gboɛɛ, wa zĩ̀ìn ma ɖé Gáɖàɖíì-ɓòɖòɔ̀ kɔ̃. Kɛɛ Jízɛ̀ se mɔ́ ɓɛ́ nyɔ ɖò kéɛ jè dyuò, 31sepóɛɖé ɔ nì ma ɔ ɖeín-nà-nyɔ̀ ɓěɔ̀ ɖɛ tɛ̀mɛ̀ǐn. Ɔ cɛ̃ɛ ma wa gbo, ké ɔ ɖá, “Wa mu mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ nyɔ ɓěɔ̀ xwaún dyi poùn. Ké nyɔ ɓěɔ̀ mu ḿ ɖáɓáùn, kɛɛ wé tã dyi zi ní, nìí, ní mu gĩɔ wóɖóùn.”
32Kɛɛ wa se ma ɖɛ ɔ cɛ̃ ma kà kɛɛ múin wɔ̃́, ké wa fɛ̃̀ìn ma ɓɛ́ wa ké ɔ dyi diè.
Nyɔ mɔ̀ nyɔ kpa ɖɛ kɛ
(Máfíò 18:1-5; Ɖúù 9:46-48)
33Ti ɓɛ́ Jízɛ̀ kè ɔ ɖeín-nà-nyɔ̀ ɓěɔ̀ nyini ma ɖé Kɔ̀pánìà-hwɔ̀ɖɔ̀ɔ̀ mú, ké wa nì ma ɖé gbǒ ɖò múɛɛ, Jízɛ̀ diè ma ɔ ɖeín-nà-nyɔ̀ ɓěɔ̀ dyi, ké ɔ ɖá, “Ɖɛ́ ɓě nìɔ̌ kà cɛ̃iń ɖé hwìèɔ̀ kɔ̃ kɛ́?” 34Wa se ma wùɖù, sepóɛɖé ɖé hwìèɔ̀ kɔ̃ɛɛ, wa cɛ̃ɛ ma ɖé wa mìɔùn hwìɛ̀ ɓá wa nyɔ mɔ̀ nyɔ kpa ɖɛ ké ɔ zi wa séín dyíɛɛ jè dyí. 35Hwɛ̀ ké Jízɛ̀ dèɖě ma dya, ké ɔ ɖá ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀, ké ɔ cɛ̃ɛ ma wa gbo, ké ɔ ɖá, “Nyɔ ɖò dyi mɔ́ ɓɛ́ ɔ ké nyɔ kpa ɖɛ jǔ ní, nìí, ɔ mɛ nyu ɔ mìɔùn dyú-gbɔ́ɔ́ mú, ɓɛ́ ɔ ké nyɔ séín gbo-nì-nyɔ̀ jǔ.” 36Ké ɔ dyà ma dyú-gbɔ́ɔ́ ɖò, ké ɔ nyànàìn ma ɔ ɓó wa hwìɛ̀ dyi, ké ɔ gbèɖèìn ɔ hwòɖǒ, ké ɔ cɛ̃ɛ ma wa gbo, ké ɔ ɖá, 37“Nyɔ mɔ̀ nyɔ ɓɛ́ ɔ kpɔ̃ dyú-gbɔ́ɔ́ nì kà kɛɛ jè dyi ɓó ní nyɛ́nɛ́ɔ̀ jèɛɛ, nìí, ɔ kpɔ̃ ní jè dyi. Ké nyɔ mɔ̀ nyɔ ɓɛ́ ɔ kpɔ̃ ní jè dyiɛɛ, ɔ se ní jè dyi kpɔ̃ ɖòùn pū, kɛɛ ɔ kpɔ̃ nyɔ tòà ḿ wɛ̃ɛ jè dyi.”
Nyɔ se à gbo vɔ̃ɛɛ mɔ̀ à nyɔ
(Ɖúù 9:49-50)
38Wé ɖòɛ̀ ɓaɖaa, Jɔ̃́ɔ́ cɛ̃ɛ ma Jízɛ̀ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, à dyé gàa ɖò, ké ɔ nì nyɔ ɖò zùù gbà mú zàǔn ɖé nì nyɛ́nɛ́ɔ̀ mú, ké à po ɔ ɓɔ́í ɔ ní kɔ̃̀ɔ̀ ɖà náa nyu, sepóɛɖé ɔ se à ɖò.”
39Kɛɛ Jízɛ̀ ɖá, “Ɓě ɓɔ́ ɔ ɓɔ́í poɛ. Ɔ mɛ nyuɛ náa, sepóɛɖé nyɔ mɔ̀ nyɔ ɓɛ́ ɔ nyu zɛ̃̀ìn-ɖɛ̀ ɖé ní nyɛ́nɛ́ɔ̀ múɛɛ se ḿ ɖɛ gbà kɔ̃ún cɛ̃ɛ ɓɛ́ìn ɓó ti dyúáɖòɔ̀ mú. 40Sepóɛɖé nyɔ mɔ̀ nyɔ ɓɛ́ ɔ se à gbo vɔ̃ɛɛ, ɔ mɔ̀ à ɖò. 41Ḿ cɛ̃ ɓě jǎà gbo, nyɔ mɔ̀ nyɔ nyí m̀ ní pɛ̀ɛ̀ wè ɓɛ́ m̀ kéɛ ná, sepóɛɖé m̀ mɔ̀ Kɛ́ɖɛ́ìɛ̀ nyɔ jèɛɛ, ɔ mu ɔ pɛ́ɛ̀-ɖɛ̀ dyéìn wɛ̃́ɛ́.
Ɖɛ ɓě nyuɛ ɓɛ́ nyɔ dyi nàmàǔn nyuɛ
(Máfíò 18:6-9; Ɖúù 17:1-2)
42“Nyɔ mɔ̀ nyɔ ɓɛ́ ɔ muɛ nyuùn ɓɛ́ dyú-gbɔ́ɔ́ ɓě taɓaà ḿ hwìɖǐǐɛɛ ɖò ké hwìǐ sɔ̀ìn nyɛɛ, ɔ muɔ́ dyíin nɔ̀mɔ̀ùn ɓó nyɔɔ̀ bìì, ɓɛ́ wa kéɔ́ ɔ sɔ́ɔ́-kpò vɛ̀nɛ̀ ɖò ɖɔ ɓá, ɓɛ́ wa kéɔ́ ɔ dyóóɔ̀ kɔ̃ po. 43Ɔ jǔ ké nì sɔ̃ɔ̀ dyiɛ nyu, ɓɛ́ m̀ ké hwìǐ sɔ̀ìn ní, nìí, m̀ mɛ cɛ̃ɛ ɓóɛ. Ɔ nɔ̀mɔ̀ dyíin ɓɛ́ m̀ ké sɔ̃ dyúáɖò ɓéɖé, ɓɛ́ m̀ ké dyɔún mu, ɓɛ́ m̀ ké ɖé cĩ́, ké ɔ zi ɓɛ́ m̀ ké sɔ̃ sɔ̃́ hɛ́ɛ̀ kpa kɛɛ dyí, dɛ̀ ɓɛ́ nyɛ seà mɔ́-mɔ́ kɔ̃̀, [ 44ɓɛ́ sɔ̀mɔ̀ɔ̌ ɓě seà mɛ́-mɛ́ kɔ̃̀ɛɛ ɖià nyɔǔn wɛ̃ɛ nìà kɛ.] 45Ɔ jǔ ké nì ɓoɔ̀ dyiɛ nyu, ɓɛ́ m̀ ké hwìǐ sɔ̀ìn ní, nìí, m̀ mɛ cɛ̃ɛ ɓóɛ. Ɔ nɔ̀mɔ̀ dyíin ɓɛ́ m̀ ké ɓo dyúáɖò ɓéɖé, ɓɛ́ m̀ ké dyɔún mu, ɓɛ́ m̀ ké ɖé cĩ́, ké ɔ zi ɓɛ́ wa ké m̀ kè nì ɓo sɔ̃́ɔ̀ hɛ́ɛ̀ poɛɛ dyí, [ 46dɛ̀ ɓɛ́ sɔ̀mɔ̀ɔ̌ se mɛ́-mɛ́ kɔ̃̀ ɓěɔ̀ ɖià nyɔǔn, ɓɛ́ nyɛ se mɔ́-mɔ́ kɔ̃̀ɔ̀ nìà kɛ.] 47Ɔ jǔ ké nì dyéɖéɔ̀ dyiɛ nyu, ɓɛ́ m̀ ké hwìǐ sɔ̀ìn ní, nìí, m̀ mɛ zàà ɖéɛ. Ɔ nɔ̀mɔ̀ dyíin ɓɛ́ m̀ ké dyéɖé dyúáɖò ɓéɖé, ɓɛ́ m̀ ké ɖé Gèɖèpɔ́ɔ̀ kã́á-ɓòɖòɔ̀ kɔ̃ mu, ké ɔ zi ɓɛ́ wa ké m̀ kè nì dyéɖé sɔ̃́ɔ̀ hɛ́ɛ̀ poɛɛ dyí, 48dɛ̀ ɓɛ́ sɔ̀mɔ̀ɔ̌ se mɛ́-mɛ́ kɔ̃̀ ɓěɔ̀ ɖià nyɔǔn, ɓɛ́ nyɛ se mɔ́-mɔ́ kɔ̃̀ɔ̀ nìà kɛ.
49“Nyɛ mu nyɔǔn séín zɔ̃̌ìn kà nyɔ zɔ̃̌ìn kà cɔ́ɔ́ kɛ.
50“Tɔ̃́ nɔ̀mɔ̀ dyíin, kɛɛ tɔ̃́ɔ̀ ɖéè-ɖéèɔ̀ dyi ɔ mú sɔ̀ ní, xwɛ̌ nì muɛ ɖéɛ poɛ nyuùn ɖeɛ́?
“Ɓě mɛ ɓéɖé tɔ̃́ ɖé ɓě mìɔùn mú, ɓɛ́ gìɖìǐ ké ɓě pṹa nì.”
Chwazi Kounye ya:
Máà 9: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.
Máà 9
9
1Ké ɔ cɛ̃ɛ ma wa gbo ɖe, ké ɔ ɖá, “Ḿ cɛ̃ ɓě jǎà gbo, nyɔ ɖíɛ́ ɓě nì dà ɓě hwìɛ̀, ké wa se gĩɔ muɛ́ mu, ɓɛ́ Gèɖèpɔ́ɔ̀ kã́á-ɓòɖòɔ̀ ké dyi ɖé kpé mú hwɛ̀.”
Jízɛ̀ zĩàìn gbo
(Máfíò 17:1-13; Ɖúù 9:28-36)
2Ti ɓɛ́ wé mɛ̀nɛ̌ìn-ɖò ɖǎ ma ziɛɛ, Jízɛ̀ ɖú ma Píɖɛ̀ kè Jĩ́ìn ɔ kè Jɔ̃́ɔ́ dyí, ké ɔ kpa ma wa ɖé toɖo tɔ̀mɔ̀ dya ɖò dúún. Ké ɔ zĩàìn ma gbo ɓó wa dyéɖé waí. 3Ɔ mú-po-ɖɔ̀ɔ̀ dè ma fãa gbɔ, ké ɔ nì ma séɖéé tá-tá. Ɖɔ-wɔɔ̀-nyɔ̀ ɖò se ɓóɖóɛ̀ kɔ̃ nì ɓɛ́ ɔ kéɛ náa mú hwɔ. 4Púɛɛ, Ìɖáájɔ̀ kè Mózè wóɖóìn ma wa dyí, ké wa kè Jízɛ̀ nì ma wùɖùɛ̌n. 5Ké Píɖɛ̀ cɛ̃ɛ ma Jízɛ̀ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, ɔ nɔ̀mɔ̀ dyíin ɓɛ́ à ké dà nì. À mɛ po ɓeè-dyù tã, mɔ̀ùn ké dyúáɖò kɔ̃̀, ɓɛ́ Mózè ké dyúáɖò kɔ̃̀, ɓɛ́ Ìɖáájɔ̀ mɔ̀ùn ké dyúáɖò kɔ̃̀.” 6Ɔ cɛ̃ɛ ma náa, sepóɛɖé ɔ se ɖɛ ɔ ké ma cɛ̃ɛ dyuò, wa fɛ̃̀ìn ma mìɔ jè.
7Ké ní-kpò ɖò ɓáìn ma wa kɔ̃in, ké wuɖu ɖò sɔ̀ìn ma ɖé ní-kpòɔ̀ mú, ké wuɖuɔ̀ ɖá, “Nyɔ nìà kɛ mɔ̀ ní hwòɖǒ-kɔ̃-dè-dyùɔ̀. Ɓě mɛ tò ɔ gbo ɖùǔ.” 8Ti ɓɛ́ wa wɔ̃́ ma wuɖuɔ̀ nyɛ̀nɛ̀ɛ̀ cá kɛɛ, wa gmɔìn ma dyi, ké wa se ma nyɔ kà kò ɖò dyé ɖe, ɔ sèìn ma Jízɛ̀ ɖòùn.
9Ti ɓɛ́ wa kè Jízɛ̀ nì ma ɖé toɖoɔ̀ dya sɔ̀ǔn wɛ̃ɛ, ɔ cɛ̃ɛ ma wa gbo kóɖó-kóɖó, ɓɛ́ wa ní kɔ̃̀ ɖà ɖɛ wa ɖǎà dyéɛɛ jè nyɔ ɖò gbo cɛ̃, ɓɛ́ ɔ mɔ̀à Nyɔǔn-dyùɛ̀ Dyú-gààɔ̀ kɛɛ ké gĩɔ wóɖó hwɛ̀.
10Ké wa kpɔ̃ ma ɔ wuɖuɔ̀ dyi, ké wa nì ɖɛ mɔ̀ ma gĩɔ-wóɖó-wóɖó xwíníín nyɛɛ jè hwìɖǐi poɛ̌n. 11Ké wa diè ma ɔ dyi, ké wa ɖá, “Ɖɛ́ kɔ̃̀ jè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ cɛ̃à kà Ìɖáájɔ̀ ɓéɖé ɓɛ́ ɔ ké dyi kĩ́ín hwɛ̀ ɓɛ́ Kɛ́ɖɛ́ìɔ̀ kéà dyi kɛ́?”
12Ké Jízɛ̀ zà ma ɖé wuɖu, ké ɔ ɖá, “Jǎà jɛ́ɛ́, Ìɖáájɔ̀ mu dyiìn kĩ́ín, ké ɔ mu ɖɛ séín páún poùn. Kɛɛ má, wa céèɛ kà mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ ɓéɖé ɓɛ́ ḿ ké gǎ dyé mìɔ, ɓɛ́ wa ké ḿ zùǔn zàìn nyɛe? 13Kɛɛ ḿ cɛ̃ɛ ɓě gbo kà ɓɛ́ Ìɖáájɔ̀ ɖǎ dyi nɔ̀ɔ̀ kɛ, ké wa nyu ma ɖɛ ɓě ɓɛ́ wa mɔ́ ma ɔ bũ̌ nyuɛ dyiɛɛ ɔ bũ̌ kà ɔ jè nyuà céèɛ̀ kɛ.”
Jízɛ̀ zà zùù gbà gàa-dyù-gbɔ́ɔ́ ɖò mú
(Máfíò 17:14-21; Ɖúù 9:37-43a)
14Ti wa dyi ma ɖé ɖeín-nà-nyɔ̀ tɔ̀ɔ̀ ɓěɔ̀ gboɛɛ, wa dyé ma nyɔ pàɖǎ, ké wa nì ma wa ɖei. Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ nì ma ɖeín-nà-nyɔ̀ ɓěɔ̀ gbo jɛiń. 15Ti ɓɛ́ nyɔ ɓěɔ̀ dyé ma Jízɛ̀ nyɛ̀nɛ̀ɛ̀ kɛɛ, wa giniìn ma dyi mìɔ, ké wa kpa ma peɖeɛ, ké wa zà ma ɔ nyíɔún. 16Ké Jízɛ̀ diè ma ɖeín-nà-nyɔ̀ ɓěɔ̀ dyi, ké ɔ ɖá, “Ɖɛ́ ɓě kè wa nìɔ̌ kà mú zàǔn wɛ̃́?”
17Ké nyɔ kúɖúú ɓěɔ̀ ɖò zà ma ɖé wuɖu, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, ḿ dyà ní dyú-gààɔ̀ m̀ gbo, sepóɛɖé ɔ ɓéɖé zùù gbà, ké zùù gbàɔ̀ nyuɛ ké ɔ se wùɖùɛ̀ ɓɛ́ìn. 18Dà séín ɓě ɓɛ́ zùù gbàɔ̀ mu dya wóɖóìn nyɛɛ, nìí, ɔ ɖu ɔ ní. Ké dyúɔ̀ ɖu vúú, ké ɔ tà nyɛ́nɛ́, ké ɔ nì sãin. Ḿ dièɔ̌ nì ɖeín-nà-nyɔ̀ ɓěɔ̀ dyi, ɓɛ́ wa ké zùù gbàɔ̀ ɔ mú zà, kɛɛ wa seɛ nyuɛ ɓɛ́ìn.”
19Ké Jízɛ̀ zà ma ɖé wuɖu, ké ɔ ɖá, “Kē! Ɓě mɔ̀à nyɔ ɓě seà hwìɖǐǐ-taɓa-taɓa ɓéɖéɛɛ, xwɛ̌ ḿ mɛ nyuá ɓě gbo hwèɖèɛ̀n nyɛ́? Xwɛ̌ ḿ mɛ nyuá ɓěɛ̀ kpeɖe hwìɖǐi kùɛ̀n nyɛ́? Dyà nɔ̄ nì dyúɔ̀ ḿ gbo.” 20Ké wa kpa ma ɔ gàa-dyùɔ̀ gbo.
Ti ɓɛ́ zùù gbàɔ̀ dyé ma Jízɛ̀ kɛɛ, ɔ po ma dyúɔ̀ kṹún wàɖà. Ké dyúɔ̀ suèìn ma ɓó ɓíɖíi dyi, ké ɔ ɖu vúú. 21Ké Jízɛ̀ diè ma dyúɔ̀ ɓǎɔ̀ dyi, ké ɔ ɖá, “Ti jĩ̀ xwɛ̌ ɔ nyuá ɔ múɛ́?”
Ké ɔ ɖá, “Ɔ mɔ̀ sɔ̀ìn ɖé ɔ dyú-gbɔ́ɔ́ ɓìɖì. 22Zùù gbàɔ̀ po ɔ dyéɖé kè níɔ tee, ɓɛ́ ɔ ké ɔ ɖáɓá. Kɛɛ m̀ dyi wɛ́ɛ ɖɛ ɖò nyuɛ ɓɛ́ìn ní, nìí, m̀ mɛ dyé à wìǐn, ɓɛ́ m̀ ké à gbo kpá.”
23Ké Jízɛ̀ cɛ̃ɛ ma ɔ gbo, ké ɔ ɖá, “M̀ dyi hwìɖǐǐ-taɓa-taɓa ɓéɖé ní, nìí, ɔ ɓɛ́ìn ná nìɛ̀, sepóɛɖé nyɔ mɔ̀ nyɔ ɓɛ́ ɔ taɓa Gèɖèpɔ́ɔ̀ hwìɖǐǐɛɛ, Gèɖèpɔ́ɔ̀ ɓɛ́ìn ɔ bìì ɖɛ séín nyuɛ.”
24Ké dyúɔ̀ ɓǎ páná ma mú, ké ɔ ɖá, “Ḿ taɓa Gèɖèpɔ́ɔ̀ hwìɖǐǐ. Kpá ḿ gbo dɛ̀ ɓɛ́ ḿ seà Gèɖèpɔ́ɔ̀ hwìɖǐǐ taɓaìn nyɛ.”
25Ti ɓɛ́ Jízɛ̀ dyé ma nyɔ kúɖúú ɓěɔ̀ peɖeɛ dyàà kɛɛ, ɔ wùɖù ma zùù gbàɔ̀ gbo gana-kà, ké ɔ ɖá, “Mɔ̀ zùù gbà nyuà ké nyɔǔn seà wùɖùɛ̀ ɓɛ́ìn, ké wa ní wɔ̃́à dyi kɛɛ, ḿ cɛ̃ɛ m̀ gbo, sɔ̀ dyúɔ̀ mú. Mɔ̀ǔn ɖá m̀ ké ɔ mú dyi ɖe.”
26Ti ɓɛ́ zùù gbàɔ̀ páná ma múɛɛ, ɔ po ma dyúɔ̀ kṹún síɔ́-síɔ́, hwɛ̀ ké ɔ sɔ̀ ma ɔ mú. Ké dyúɔ̀ nì ma kà xwɛ́ nìà kɛ. Ɔ jèɛɛ, nyɔ pàɖǎ cɛ̃ɛ ma, ké wa ɖá, “Ɔ ɖǎ mɛ́.” 27Kɛɛ Jízɛ̀ kpɔ̃ ma ɔ sɔ̃in, ké ɔ sɔ̀ìn ma ɔ dyí, ké ɔ nyànà dyi.
28Ti ɓɛ́ Jízɛ̀ ɖǎ ma gbǒɔ̀ mú dyá, ké nyɔ ɖò se ma ɓó nìɛɛ, ɔ ɖeín-nà-nyɔ̀ ɓěɔ̀ diè ma ɔ dyi, ké wa ɖá, “Ɖɛ́ kɔ̃̀ jè à mɔ̀ùn seà zùù gbàɔ̀ dyúɔ̀ mú zàà ɓɛ́ìn nyɛ́?”
29Ké ɔ cɛ̃ɛ ma wa gbo, ké ɔ ɖá, “Zùù gbà nì kà kɛɛ, m̀ se ɓaà kóɖó-kóɖó ní, nìí, m̀ seɛ nyɔ ɖò mú zàà ɓɛ́ìn.”
Jízɛ̀ cɛ̃ ɔ mɛ́ jèɔ̀ ɖe
(Máfíò 17:22-23; Ɖúù 9:43b-45)
30Sɔ̀ìn ɓóɛ gboɛɛ, wa zĩ̀ìn ma ɖé Gáɖàɖíì-ɓòɖòɔ̀ kɔ̃. Kɛɛ Jízɛ̀ se mɔ́ ɓɛ́ nyɔ ɖò kéɛ jè dyuò, 31sepóɛɖé ɔ nì ma ɔ ɖeín-nà-nyɔ̀ ɓěɔ̀ ɖɛ tɛ̀mɛ̀ǐn. Ɔ cɛ̃ɛ ma wa gbo, ké ɔ ɖá, “Wa mu mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ nyɔ ɓěɔ̀ xwaún dyi poùn. Ké nyɔ ɓěɔ̀ mu ḿ ɖáɓáùn, kɛɛ wé tã dyi zi ní, nìí, ní mu gĩɔ wóɖóùn.”
32Kɛɛ wa se ma ɖɛ ɔ cɛ̃ ma kà kɛɛ múin wɔ̃́, ké wa fɛ̃̀ìn ma ɓɛ́ wa ké ɔ dyi diè.
Nyɔ mɔ̀ nyɔ kpa ɖɛ kɛ
(Máfíò 18:1-5; Ɖúù 9:46-48)
33Ti ɓɛ́ Jízɛ̀ kè ɔ ɖeín-nà-nyɔ̀ ɓěɔ̀ nyini ma ɖé Kɔ̀pánìà-hwɔ̀ɖɔ̀ɔ̀ mú, ké wa nì ma ɖé gbǒ ɖò múɛɛ, Jízɛ̀ diè ma ɔ ɖeín-nà-nyɔ̀ ɓěɔ̀ dyi, ké ɔ ɖá, “Ɖɛ́ ɓě nìɔ̌ kà cɛ̃iń ɖé hwìèɔ̀ kɔ̃ kɛ́?” 34Wa se ma wùɖù, sepóɛɖé ɖé hwìèɔ̀ kɔ̃ɛɛ, wa cɛ̃ɛ ma ɖé wa mìɔùn hwìɛ̀ ɓá wa nyɔ mɔ̀ nyɔ kpa ɖɛ ké ɔ zi wa séín dyíɛɛ jè dyí. 35Hwɛ̀ ké Jízɛ̀ dèɖě ma dya, ké ɔ ɖá ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀, ké ɔ cɛ̃ɛ ma wa gbo, ké ɔ ɖá, “Nyɔ ɖò dyi mɔ́ ɓɛ́ ɔ ké nyɔ kpa ɖɛ jǔ ní, nìí, ɔ mɛ nyu ɔ mìɔùn dyú-gbɔ́ɔ́ mú, ɓɛ́ ɔ ké nyɔ séín gbo-nì-nyɔ̀ jǔ.” 36Ké ɔ dyà ma dyú-gbɔ́ɔ́ ɖò, ké ɔ nyànàìn ma ɔ ɓó wa hwìɛ̀ dyi, ké ɔ gbèɖèìn ɔ hwòɖǒ, ké ɔ cɛ̃ɛ ma wa gbo, ké ɔ ɖá, 37“Nyɔ mɔ̀ nyɔ ɓɛ́ ɔ kpɔ̃ dyú-gbɔ́ɔ́ nì kà kɛɛ jè dyi ɓó ní nyɛ́nɛ́ɔ̀ jèɛɛ, nìí, ɔ kpɔ̃ ní jè dyi. Ké nyɔ mɔ̀ nyɔ ɓɛ́ ɔ kpɔ̃ ní jè dyiɛɛ, ɔ se ní jè dyi kpɔ̃ ɖòùn pū, kɛɛ ɔ kpɔ̃ nyɔ tòà ḿ wɛ̃ɛ jè dyi.”
Nyɔ se à gbo vɔ̃ɛɛ mɔ̀ à nyɔ
(Ɖúù 9:49-50)
38Wé ɖòɛ̀ ɓaɖaa, Jɔ̃́ɔ́ cɛ̃ɛ ma Jízɛ̀ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, à dyé gàa ɖò, ké ɔ nì nyɔ ɖò zùù gbà mú zàǔn ɖé nì nyɛ́nɛ́ɔ̀ mú, ké à po ɔ ɓɔ́í ɔ ní kɔ̃̀ɔ̀ ɖà náa nyu, sepóɛɖé ɔ se à ɖò.”
39Kɛɛ Jízɛ̀ ɖá, “Ɓě ɓɔ́ ɔ ɓɔ́í poɛ. Ɔ mɛ nyuɛ náa, sepóɛɖé nyɔ mɔ̀ nyɔ ɓɛ́ ɔ nyu zɛ̃̀ìn-ɖɛ̀ ɖé ní nyɛ́nɛ́ɔ̀ múɛɛ se ḿ ɖɛ gbà kɔ̃ún cɛ̃ɛ ɓɛ́ìn ɓó ti dyúáɖòɔ̀ mú. 40Sepóɛɖé nyɔ mɔ̀ nyɔ ɓɛ́ ɔ se à gbo vɔ̃ɛɛ, ɔ mɔ̀ à ɖò. 41Ḿ cɛ̃ ɓě jǎà gbo, nyɔ mɔ̀ nyɔ nyí m̀ ní pɛ̀ɛ̀ wè ɓɛ́ m̀ kéɛ ná, sepóɛɖé m̀ mɔ̀ Kɛ́ɖɛ́ìɛ̀ nyɔ jèɛɛ, ɔ mu ɔ pɛ́ɛ̀-ɖɛ̀ dyéìn wɛ̃́ɛ́.
Ɖɛ ɓě nyuɛ ɓɛ́ nyɔ dyi nàmàǔn nyuɛ
(Máfíò 18:6-9; Ɖúù 17:1-2)
42“Nyɔ mɔ̀ nyɔ ɓɛ́ ɔ muɛ nyuùn ɓɛ́ dyú-gbɔ́ɔ́ ɓě taɓaà ḿ hwìɖǐǐɛɛ ɖò ké hwìǐ sɔ̀ìn nyɛɛ, ɔ muɔ́ dyíin nɔ̀mɔ̀ùn ɓó nyɔɔ̀ bìì, ɓɛ́ wa kéɔ́ ɔ sɔ́ɔ́-kpò vɛ̀nɛ̀ ɖò ɖɔ ɓá, ɓɛ́ wa kéɔ́ ɔ dyóóɔ̀ kɔ̃ po. 43Ɔ jǔ ké nì sɔ̃ɔ̀ dyiɛ nyu, ɓɛ́ m̀ ké hwìǐ sɔ̀ìn ní, nìí, m̀ mɛ cɛ̃ɛ ɓóɛ. Ɔ nɔ̀mɔ̀ dyíin ɓɛ́ m̀ ké sɔ̃ dyúáɖò ɓéɖé, ɓɛ́ m̀ ké dyɔún mu, ɓɛ́ m̀ ké ɖé cĩ́, ké ɔ zi ɓɛ́ m̀ ké sɔ̃ sɔ̃́ hɛ́ɛ̀ kpa kɛɛ dyí, dɛ̀ ɓɛ́ nyɛ seà mɔ́-mɔ́ kɔ̃̀, [ 44ɓɛ́ sɔ̀mɔ̀ɔ̌ ɓě seà mɛ́-mɛ́ kɔ̃̀ɛɛ ɖià nyɔǔn wɛ̃ɛ nìà kɛ.] 45Ɔ jǔ ké nì ɓoɔ̀ dyiɛ nyu, ɓɛ́ m̀ ké hwìǐ sɔ̀ìn ní, nìí, m̀ mɛ cɛ̃ɛ ɓóɛ. Ɔ nɔ̀mɔ̀ dyíin ɓɛ́ m̀ ké ɓo dyúáɖò ɓéɖé, ɓɛ́ m̀ ké dyɔún mu, ɓɛ́ m̀ ké ɖé cĩ́, ké ɔ zi ɓɛ́ wa ké m̀ kè nì ɓo sɔ̃́ɔ̀ hɛ́ɛ̀ poɛɛ dyí, [ 46dɛ̀ ɓɛ́ sɔ̀mɔ̀ɔ̌ se mɛ́-mɛ́ kɔ̃̀ ɓěɔ̀ ɖià nyɔǔn, ɓɛ́ nyɛ se mɔ́-mɔ́ kɔ̃̀ɔ̀ nìà kɛ.] 47Ɔ jǔ ké nì dyéɖéɔ̀ dyiɛ nyu, ɓɛ́ m̀ ké hwìǐ sɔ̀ìn ní, nìí, m̀ mɛ zàà ɖéɛ. Ɔ nɔ̀mɔ̀ dyíin ɓɛ́ m̀ ké dyéɖé dyúáɖò ɓéɖé, ɓɛ́ m̀ ké ɖé Gèɖèpɔ́ɔ̀ kã́á-ɓòɖòɔ̀ kɔ̃ mu, ké ɔ zi ɓɛ́ wa ké m̀ kè nì dyéɖé sɔ̃́ɔ̀ hɛ́ɛ̀ poɛɛ dyí, 48dɛ̀ ɓɛ́ sɔ̀mɔ̀ɔ̌ se mɛ́-mɛ́ kɔ̃̀ ɓěɔ̀ ɖià nyɔǔn, ɓɛ́ nyɛ se mɔ́-mɔ́ kɔ̃̀ɔ̀ nìà kɛ.
49“Nyɛ mu nyɔǔn séín zɔ̃̌ìn kà nyɔ zɔ̃̌ìn kà cɔ́ɔ́ kɛ.
50“Tɔ̃́ nɔ̀mɔ̀ dyíin, kɛɛ tɔ̃́ɔ̀ ɖéè-ɖéèɔ̀ dyi ɔ mú sɔ̀ ní, xwɛ̌ nì muɛ ɖéɛ poɛ nyuùn ɖeɛ́?
“Ɓě mɛ ɓéɖé tɔ̃́ ɖé ɓě mìɔùn mú, ɓɛ́ gìɖìǐ ké ɓě pṹa nì.”
Chwazi Kounye ya:
:
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.