Máà 7
7
Tɛ̀mɛ̀ìn-ɖɛ̀ sɔ̀ìn ɖé ɓǎ nììn ɓǎ ɓěɔ̀ gboɛ
(Máfíò 15:1-9)
1Ké Fáɖòsíì-nyɔ̀ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɖíɛ́ ɓě sɔ̀ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké wa poìn ma ɓó Jízɛ̀ gbo dyí. 2Wa dyéɛ ma ké ɔ ɖeín-nà-nyɔ̀ ɓěɔ̀ ɖíɛ́ ɓě ɖììn ma sɔ̃ kpɔ̃ zɛ̀nɛ̌ kɛɛ ɖɛ.
3Ɔ nì ná kɛɛ, Fáɖòsíì-nyɔ̀ ɓěɔ̀ kè Júù-nyɔ̀ tɔ̀ɔ̀ ɓěɔ̀ dèɖè xwai wɛ̃́ɛ́ hwɛ̀ ké wa ɖi ɖɛ, sepóɛɖé wa kpɔ̃ ma wa ɓǎ nììn ɓǎ ɓěɛ̀ tɛ̀mɛ̀ìn-ɖɛ̀ ɓěɔ̀ dyi jè. 4Wa dyi ɖɛ dɔ̃uń sɔ̀ ní, nìí, wa ní ɖi ɖɛ, ɔ sèìn ké wa dèɖè xwai wɛ̃́ɛ́ hwɛ̀. Ké wa kpɔ̃ ɖɛ tɔ̀ɔ̀ ɓě ɓɛ́ wa ɓǎ nììn ɓǎ ɓěɔ̀ cɛ̃ wa gboɛɛ dyi. Wa wɔɔ̀ ní-kpɛ̀ɛ̀ kè jìà ɔ kè bàɖàsǐ-gbòɖòò.
5Ké Fáɖòsíì-nyɔ̀ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ diè ma Jízɛ̀ dyi, ké wa ɖá, “Ɖɛ́ kɔ̃̀ jè nì ɖeín-nà-nyɔ̀ ɓěɔ̀ se cĩ́ kà ɓɛ́ à ɓǎ nììn ɓǎ ɓěɔ̀ nyuɛ ma kà à tɛ̀mɛ̀ìn nyɛ, ké wa dyià sɔ̃ kpɔ̃ zɛ̀nɛ̌ ɖɛ ɖììn nyɛ́?”
6Ké ɔ cɛ̃ɛ ma wa gbo, ké ɔ ɖá, “Ɓě mɔ̀ dyéɖéi-nyu-nyɔ̀ ɓěɛɛ, ɖɛ Àzédyà cɛ̃ zɔ̃̌ɔ̀ ɓá ɓě jè dyíɛɛ mɔ̀ jǎà. Ɖɛ ɔ cɛ̃ zɔ̃̌ɔ̀ kɛɛ kɛà kɛ̀. Ɔ ɖá,
‘Nyɔ ɓěɛ̀ dè ḿ dya ɖé waà wĩín-wùɖù mú,
kɛɛ waà hwòɖǒ-dyùà tɔmɔìn ḿ bũ̌in mìɔ.
7Ní ɓiè-ɓiè ɓɛ́ wa nyuɛɛ se xwíníín ɖò kɔ̃̀.
Wa tɛ̀mɛ̀ìn nyɔǔn ɓɛ́ wa ké nyɔǔn-dyùɛ̀ tɛ̀mɛ̀ìn-ɖɛ̀ kíɖíí sí kà ɔ mɔ̀ɔ̌ kà Gèɖèpɔ́ɔ̀ gma ɓěɔ̀ kɛ.’
8Ɓě táà Gèɖèpɔ́ɔ̀ gmaɔ̀ dyi, ké ɓě kpɔ̃ nyɔǔn-dyù nììn tɛ̀mɛ̀ìn-ɖɛ̀ dyi.”
9Ké ɔ cɛ̃ɛ ma wa gbo ɖe, ké ɔ ɖá, “Ɔ nɔ̀mɔ̀ dyíin wà! Ɓě ɓɔ́ Gèɖèpɔ́ɔ̀ gmaɔ̀, ɓɛ́ ɓě ké ɓě ɓǎ nììn ɓǎ ɓěɔ̀ tɛ̀mɛ̀ìn-ɖɛ̀ dyi kpɔ̃ jè. 10Mózè ɖá, ‘M̀ mɛ dyé m̀ ɖe kè m̀ ɓǎ kpéín,’ ɔ kè ‘Nyɔ mɔ̀ nyɔ ɓɛ́ ɔ cɛ̃ ɔ ɖe mɔɔ ɔ ɓǎ wuɖu gbà kɔ̃ún wɛ̃ɛ, wa mɛ ɖáɓá nyɔɔ̀ cá.’ 11Kɛɛ ɓě mɔ̀ùn ɖá, ‘Ɔ jǔ ké nyɔ ɖò dyi ɖɛ ɔ kéɔ́ ɔ ɖe mɔɔ ɔ ɓǎ gbo kpáìn nyɛɛ ɓéɖé, ké ɔ dyiɛ cɛ̃ kà ɓɛ́ ɔ ɖǎa Gèɖèpɔ́ɔ̀ nyíɛɛ ní, 12nìí, ɔ se ɓéɖé ɓɛ́ ɔ ké ɔ ɖe mɔɔ ɔ ɓǎ gbo kpá ɖe.’ 13Ɓě dyiɛ náa nyuín, nìí, ɖɛ ɓɛ́ Gèɖèpɔ́ɔ̀ cɛ̃à ɓě gboɛɛ, ɓě se ɔ ɖɛ ɖá. Ɓě se ɔ ɖɛ ɖá ɓó tɛ̀mɛ̀ìn-ɖɛ̀ ɓɛ́ ɓě kpɔ̃à dyi, ɓɛ́ ɓě dyià nyɔǔn-dyù tɛ̀mɛ̀ǐn nìɛɛ jè. Ɓě nyu ɖɛ pàɖǎ ɓě nì kà kɛɛ ní.”
Jízɛ̀ cɛ̃ ɖɛ nyuɛ ké nyɔ se mú hwɛ̀ kɛɛ jè
(Máfíò 15:10-20)
14Sɔ̀ìn ɓóɛ gboɛɛ, Jízɛ̀ ɖá ma nyɔ kúɖúú ɓěɔ̀ ɖé ɔ mìɔùn gbo, ké ɔ cɛ̃ɛ ma wa gbo, ké ɔ ɖá, “Ɓě séín tò ḿ gbo ɖùǔ, ɓɛ́ ɓě ké ɖɛ ní muà cɛ̃ìn nyɛɛ múin wɔ̃́. 15Ɖɛ ɖò se nì ɓɛ́ nyɔǔn kéɛ ɖi, ɓɛ́ ɔ kéɛ nyu ɓɛ́ wa ké se mú hwɛ̀. Kɛɛ ɖɛ ɓě ɓɛ́ wa sɔ̀ ɖé waà hwòɖǒ bũ̌ kɛɛ nyuɛ ké wa se mú hwɛ̀. [ 16Nyɔ ɖò dyi ɖùǔ ɓéɖé ɓɛ́ ɔ ké dyi wɔ̃́ ní, nìí, ɔ mɛ tò ɖùǔ.”]
17Ti ɓɛ́ ɔ ɖǎ ma ɖé ɔ ɓíɖí-gbǒǔn mu, ké ɔ se ma ɓó nyɔǔn ɓěɔ̀ hwìɛ̀ nì ɖeɛɛ, ɔ ɖeín-nà-nyɔ̀ ɓěɔ̀ diè ma ɔ dyi ɓó nɔ́ɔ̀ jè. 18Ké ɔ cɛ̃ɛ ma wa gbo, ké ɔ ɖá, “Ɓě mɔ̀ùn se ɖɛ múin wɔ̃́ɔ ɓɛ́ìn ɖekèè? Ɓě seɛ múin wɔ̃́ kà ɓɛ́ ɖɛ nyɔǔn ɖiɛɛ seɛ nyuɛ ɓɛ́ìn ɓɛ́ wa ké se mú hwɛ̀ kɛɛ̀? 19Ɖɛ wa ɖiɛɛ se waà hwòɖǒ bũ̌ mu, kɛɛ ɔ mu ɖé wa xwíníín, ké wa mu hwìè gbo.” Ɖé wuɖu nìà kɛ múɛɛ, Jízɛ̀ cɛ̃ɛ ma kà ɓɛ́ ɖii-ɖɛ̀ séín nɔ̀mɔ̀ dyíin ɓɛ́ nyɔǔn kéɛ ɖiɛ.
20Ké Jízɛ̀ kpa wuɖu dyúa, ké ɔ ɖá, “Ɖɛ ɓɛ́ ɔ sɔ̀ ɖé nyɔǔn-dyùɛ̀ hwòɖǒ bũ̌ɛɛ, ɔ nyuɛ ké wa se mú hwɛ̀. 21Sepóɛɖé ɖɛ gbà ɓě nì ɖé nyɔǔn-dyùɛ̀ hwòɖǒ bũ̌ɛɛ, ɖéɛ̀ ɔ nyu. Ɔ hwɔìn kà gbàɖàùn-po-po kè dyíɖí-dyíɖí kè kú-ɖáɓá-ɖáɓá kè gmaɖe-po-po 22kè ɖɛ-mɔ́-mɔ́ kè hwòɖǒ-kɔ̃in-nyìnììn-nyìnììn kè gbá-gbá kè jíí-zi-zi kè hwɛ̀nɛ̌ kè nyɔ mǔè ɖò ɖɛ gbà kɔ̃ún-cɛ̃-cɛ̃ kè nyɔ-mìɔùn-dyí-ɓúáìn-ɓúáìn ɔ kè zuɖuu-ɖɛ̀ xwai-nyu-nyu. 23Ɖɛ gbà séín ɓěɛ̀ sɔ̀ ɖé nyɔǔn-dyùɛ̀ hwòɖǒ bũ̌, ké ɔ nyuɛ ké wa se mú hwɛ̀.”
Màa ɖòɛ̀ hwìɖǐǐ-taɓa-taɓa
(Máfíò 15:21-28)
24Sɔ̀ìn ɓóɛ gboɛɛ, Jízɛ̀ sɔ̀ ma ɓó páɔ̀ mú, ké ɔ mu ma ɖé pá kɔ̃̀ mú Táà-hwɔ̀ɖɔ̀ɔ̀ kè Zíɖɔ̀ùn-hwɔ̀ɖɔ̀ɔ̀ nìà kɛ. Ké ɔ dyá ma gbǒ ɖò mú, ké ɔ se mɔ́ ɓɛ́ nyɔ ɖò ké dɛ̀ ɔ nì ma kɛɛ jè dyuò, kɛɛ ɔ jè se ma vǐèɛ̀ ɓɛ́ìn. 25Ké màa ɖò ɓéɖé ma dyú-màà ɖò. Zùù gbà nì ma dyú-gbɔ́ɔ̀ mú. Ké màaɔ̀ wɔ̃́ ma Jízɛ̀ jè, ké ɔ dyi ma, ké ɔ jìɖǐ ma ɓó Jízɛ̀ ɓo zɔ̃̌ dyi. 26Màaɔ̀ mɔ̀ ma ɓóɖóɔ̀ dyú, kɛɛ ɔ po ma Gíɖíì-wùɖù. Ɔ ɓaà ma Jízɛ̀, ɓɛ́ ɔ ké ma zùù gbàɔ̀ ɔ dyúɔ̀ mú zà. 27Ké Jízɛ̀ cɛ̃ɛ ma màaɔ̀ gbo, ké ɔ ɖá, “Dyú ɓěɔ̀ mɛ ɖi ɖɛ kĩ́ín. Ɔ se dyíin nɔ̀mɔ̀ ɓɛ́ nyɔ ké dyú ɓěɔ̀ ɖii-ɖɛ̀ɔ̀ dyí ɖú, ɓɛ́ nyɔ kéɛ gbe nyí.”
28Ké màaɔ̀ ɖá, “Ɓɔ̌ɔ̀, ɔ mɔ̀ jǎà jɛ́ɛ́, kɛɛ gbe ɓěɔ̀ ɖi dyú ɓěɔ̀ ɖii-ɖɛ̀-bùǒ ɓě wáɖáà ɓíɖíiɛɛ ní.”
29Hwɛ̀ ké ɔ cɛ̃ɛ ma màaɔ̀ gbo, ké ɔ ɖá, “Ɖɛ m̀ cɛ̃à kɛɛ nɔ̀mɔ̀ dyíin. Ɔ jèɛɛ, m̀ mɛ mu ɖe. Zùù gbàɔ̀ ɖǎ nì dyú-mààɔ̀ mú sɔ̀.”
30Ké màaɔ̀ mu ma ɔ ɓíɖí-taún ɖe, ké ɔ dyɛ̀ìn ma ɔ dyú-mààɔ̀ kɔ̃-pɛ̃́-ɖɛ̀ɔ̀ kɔ̃ dyi pɛ̃́ɛ. Zùù gbàɔ̀ ɖǎ ma ɔ dyúɔ̀ mú sɔ̀.
Jízɛ̀ kánáìn ɓo-ɓo-gàà ɖò dyi
31Sɔ̀ìn ɓóɛ gboɛɛ, Jízɛ̀ sɔ̀ ma ɖé pá kɔ̃̀ mú Táà-hwɔ̀ɖɔ̀ɔ̀ nìà kɛ, ké ɔ mu ma ɖé Gáɖàɖíì Dòùnɓìǎɔ̀ wĩín ɖe. Ti ɔ nì ma muɛń nyɛɛ, ɔ zĩ̀ìn ma ɖé Zíɖɔ̀ùn-hwɔ̀ɖɔ̀ɔ̀ kè Dìkápòɖè Gbɛ̌ɛ̀ɔ̀ mú. 32Ke wa dyà ma ɓo-ɓo-gàà ɖò Jízɛ̀ gbo. Gàaɔ̀ se ma wùɖùɛ̀ dyuò nɔ̀mɔ̀ dyíin. Ké wa ɓaà ma Jízɛ̀, ɓɛ́ ɔ ké ma gàaɔ̀ sɔ̃ kɔ̃ pɛ̃́ìn. 33Ké Jízɛ̀ zà ma ɓó gàaɔ̀ nyɔ ɓěɔ̀ hwìɛ̀, ké ɔ kpa ma gàaɔ̀ jìì ɖùǔ-ɓìǐn, ké ɔ tóìn ma tɔ̃ɔ jìì, ké ɔ tìnìɛ̀n ma gàaɔ̀ miɔɔ̀ dyi. 34Ké ɔ gmɔ̀ ma dyií, ké ɔ nì ma dĩin. Ɔ cɛ̃ɛ gàaɔ̀ gbo, ké ɔ ɖá, “Ɛ̀fátà.” Ɔ xwíníín mɔ̀, “M̀ mɛ kaà.”
35Púɛɛ, gàaɔ̀ ɖùǔ ɓěɔ̀ kaà ma, ké ɔ miɔ-mànàɔ̀ fɛ̃́ìn xwa, ké ɔ wùɖù ma nɔ̀mɔ̀ dyíin. 36Ké Jízɛ̀ cɛ̃ɛ ma nyɔ ɓěɔ̀ gbo, ké ɔ ɖá, “Ɓěǐn ɖá ɓɛ́ ɓě ké ɖɛ nìà kɛ jè nyɔ ɖò gbo cɛ̃o.” Kɛbì ɔ mɛ cɛ̃ɛ wa gbo cɛ̃̀ɛ̌ kɛɛ, wa se wa mìɔùn dyí kpɔ̃ɔ ɓɛ́ìn. 37Díɖí taɓa ma wa mìɔ, ké wa ɖá, “Ɔ ɖǎ ɖɛ séín nyu nɔ̀mɔ̀ dyíin. Ɔ nyuɛ ké nyɔ ɓě ɓɛ́ wa sṹ kɛɛ wɔ̃́ dyi, ké nyɔ ɓě séè wùɖù ɖòɛɛ wùɖù.”
Chwazi Kounye ya:
Máà 7: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.
Máà 7
7
Tɛ̀mɛ̀ìn-ɖɛ̀ sɔ̀ìn ɖé ɓǎ nììn ɓǎ ɓěɔ̀ gboɛ
(Máfíò 15:1-9)
1Ké Fáɖòsíì-nyɔ̀ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɖíɛ́ ɓě sɔ̀ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké wa poìn ma ɓó Jízɛ̀ gbo dyí. 2Wa dyéɛ ma ké ɔ ɖeín-nà-nyɔ̀ ɓěɔ̀ ɖíɛ́ ɓě ɖììn ma sɔ̃ kpɔ̃ zɛ̀nɛ̌ kɛɛ ɖɛ.
3Ɔ nì ná kɛɛ, Fáɖòsíì-nyɔ̀ ɓěɔ̀ kè Júù-nyɔ̀ tɔ̀ɔ̀ ɓěɔ̀ dèɖè xwai wɛ̃́ɛ́ hwɛ̀ ké wa ɖi ɖɛ, sepóɛɖé wa kpɔ̃ ma wa ɓǎ nììn ɓǎ ɓěɛ̀ tɛ̀mɛ̀ìn-ɖɛ̀ ɓěɔ̀ dyi jè. 4Wa dyi ɖɛ dɔ̃uń sɔ̀ ní, nìí, wa ní ɖi ɖɛ, ɔ sèìn ké wa dèɖè xwai wɛ̃́ɛ́ hwɛ̀. Ké wa kpɔ̃ ɖɛ tɔ̀ɔ̀ ɓě ɓɛ́ wa ɓǎ nììn ɓǎ ɓěɔ̀ cɛ̃ wa gboɛɛ dyi. Wa wɔɔ̀ ní-kpɛ̀ɛ̀ kè jìà ɔ kè bàɖàsǐ-gbòɖòò.
5Ké Fáɖòsíì-nyɔ̀ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ diè ma Jízɛ̀ dyi, ké wa ɖá, “Ɖɛ́ kɔ̃̀ jè nì ɖeín-nà-nyɔ̀ ɓěɔ̀ se cĩ́ kà ɓɛ́ à ɓǎ nììn ɓǎ ɓěɔ̀ nyuɛ ma kà à tɛ̀mɛ̀ìn nyɛ, ké wa dyià sɔ̃ kpɔ̃ zɛ̀nɛ̌ ɖɛ ɖììn nyɛ́?”
6Ké ɔ cɛ̃ɛ ma wa gbo, ké ɔ ɖá, “Ɓě mɔ̀ dyéɖéi-nyu-nyɔ̀ ɓěɛɛ, ɖɛ Àzédyà cɛ̃ zɔ̃̌ɔ̀ ɓá ɓě jè dyíɛɛ mɔ̀ jǎà. Ɖɛ ɔ cɛ̃ zɔ̃̌ɔ̀ kɛɛ kɛà kɛ̀. Ɔ ɖá,
‘Nyɔ ɓěɛ̀ dè ḿ dya ɖé waà wĩín-wùɖù mú,
kɛɛ waà hwòɖǒ-dyùà tɔmɔìn ḿ bũ̌in mìɔ.
7Ní ɓiè-ɓiè ɓɛ́ wa nyuɛɛ se xwíníín ɖò kɔ̃̀.
Wa tɛ̀mɛ̀ìn nyɔǔn ɓɛ́ wa ké nyɔǔn-dyùɛ̀ tɛ̀mɛ̀ìn-ɖɛ̀ kíɖíí sí kà ɔ mɔ̀ɔ̌ kà Gèɖèpɔ́ɔ̀ gma ɓěɔ̀ kɛ.’
8Ɓě táà Gèɖèpɔ́ɔ̀ gmaɔ̀ dyi, ké ɓě kpɔ̃ nyɔǔn-dyù nììn tɛ̀mɛ̀ìn-ɖɛ̀ dyi.”
9Ké ɔ cɛ̃ɛ ma wa gbo ɖe, ké ɔ ɖá, “Ɔ nɔ̀mɔ̀ dyíin wà! Ɓě ɓɔ́ Gèɖèpɔ́ɔ̀ gmaɔ̀, ɓɛ́ ɓě ké ɓě ɓǎ nììn ɓǎ ɓěɔ̀ tɛ̀mɛ̀ìn-ɖɛ̀ dyi kpɔ̃ jè. 10Mózè ɖá, ‘M̀ mɛ dyé m̀ ɖe kè m̀ ɓǎ kpéín,’ ɔ kè ‘Nyɔ mɔ̀ nyɔ ɓɛ́ ɔ cɛ̃ ɔ ɖe mɔɔ ɔ ɓǎ wuɖu gbà kɔ̃ún wɛ̃ɛ, wa mɛ ɖáɓá nyɔɔ̀ cá.’ 11Kɛɛ ɓě mɔ̀ùn ɖá, ‘Ɔ jǔ ké nyɔ ɖò dyi ɖɛ ɔ kéɔ́ ɔ ɖe mɔɔ ɔ ɓǎ gbo kpáìn nyɛɛ ɓéɖé, ké ɔ dyiɛ cɛ̃ kà ɓɛ́ ɔ ɖǎa Gèɖèpɔ́ɔ̀ nyíɛɛ ní, 12nìí, ɔ se ɓéɖé ɓɛ́ ɔ ké ɔ ɖe mɔɔ ɔ ɓǎ gbo kpá ɖe.’ 13Ɓě dyiɛ náa nyuín, nìí, ɖɛ ɓɛ́ Gèɖèpɔ́ɔ̀ cɛ̃à ɓě gboɛɛ, ɓě se ɔ ɖɛ ɖá. Ɓě se ɔ ɖɛ ɖá ɓó tɛ̀mɛ̀ìn-ɖɛ̀ ɓɛ́ ɓě kpɔ̃à dyi, ɓɛ́ ɓě dyià nyɔǔn-dyù tɛ̀mɛ̀ǐn nìɛɛ jè. Ɓě nyu ɖɛ pàɖǎ ɓě nì kà kɛɛ ní.”
Jízɛ̀ cɛ̃ ɖɛ nyuɛ ké nyɔ se mú hwɛ̀ kɛɛ jè
(Máfíò 15:10-20)
14Sɔ̀ìn ɓóɛ gboɛɛ, Jízɛ̀ ɖá ma nyɔ kúɖúú ɓěɔ̀ ɖé ɔ mìɔùn gbo, ké ɔ cɛ̃ɛ ma wa gbo, ké ɔ ɖá, “Ɓě séín tò ḿ gbo ɖùǔ, ɓɛ́ ɓě ké ɖɛ ní muà cɛ̃ìn nyɛɛ múin wɔ̃́. 15Ɖɛ ɖò se nì ɓɛ́ nyɔǔn kéɛ ɖi, ɓɛ́ ɔ kéɛ nyu ɓɛ́ wa ké se mú hwɛ̀. Kɛɛ ɖɛ ɓě ɓɛ́ wa sɔ̀ ɖé waà hwòɖǒ bũ̌ kɛɛ nyuɛ ké wa se mú hwɛ̀. [ 16Nyɔ ɖò dyi ɖùǔ ɓéɖé ɓɛ́ ɔ ké dyi wɔ̃́ ní, nìí, ɔ mɛ tò ɖùǔ.”]
17Ti ɓɛ́ ɔ ɖǎ ma ɖé ɔ ɓíɖí-gbǒǔn mu, ké ɔ se ma ɓó nyɔǔn ɓěɔ̀ hwìɛ̀ nì ɖeɛɛ, ɔ ɖeín-nà-nyɔ̀ ɓěɔ̀ diè ma ɔ dyi ɓó nɔ́ɔ̀ jè. 18Ké ɔ cɛ̃ɛ ma wa gbo, ké ɔ ɖá, “Ɓě mɔ̀ùn se ɖɛ múin wɔ̃́ɔ ɓɛ́ìn ɖekèè? Ɓě seɛ múin wɔ̃́ kà ɓɛ́ ɖɛ nyɔǔn ɖiɛɛ seɛ nyuɛ ɓɛ́ìn ɓɛ́ wa ké se mú hwɛ̀ kɛɛ̀? 19Ɖɛ wa ɖiɛɛ se waà hwòɖǒ bũ̌ mu, kɛɛ ɔ mu ɖé wa xwíníín, ké wa mu hwìè gbo.” Ɖé wuɖu nìà kɛ múɛɛ, Jízɛ̀ cɛ̃ɛ ma kà ɓɛ́ ɖii-ɖɛ̀ séín nɔ̀mɔ̀ dyíin ɓɛ́ nyɔǔn kéɛ ɖiɛ.
20Ké Jízɛ̀ kpa wuɖu dyúa, ké ɔ ɖá, “Ɖɛ ɓɛ́ ɔ sɔ̀ ɖé nyɔǔn-dyùɛ̀ hwòɖǒ bũ̌ɛɛ, ɔ nyuɛ ké wa se mú hwɛ̀. 21Sepóɛɖé ɖɛ gbà ɓě nì ɖé nyɔǔn-dyùɛ̀ hwòɖǒ bũ̌ɛɛ, ɖéɛ̀ ɔ nyu. Ɔ hwɔìn kà gbàɖàùn-po-po kè dyíɖí-dyíɖí kè kú-ɖáɓá-ɖáɓá kè gmaɖe-po-po 22kè ɖɛ-mɔ́-mɔ́ kè hwòɖǒ-kɔ̃in-nyìnììn-nyìnììn kè gbá-gbá kè jíí-zi-zi kè hwɛ̀nɛ̌ kè nyɔ mǔè ɖò ɖɛ gbà kɔ̃ún-cɛ̃-cɛ̃ kè nyɔ-mìɔùn-dyí-ɓúáìn-ɓúáìn ɔ kè zuɖuu-ɖɛ̀ xwai-nyu-nyu. 23Ɖɛ gbà séín ɓěɛ̀ sɔ̀ ɖé nyɔǔn-dyùɛ̀ hwòɖǒ bũ̌, ké ɔ nyuɛ ké wa se mú hwɛ̀.”
Màa ɖòɛ̀ hwìɖǐǐ-taɓa-taɓa
(Máfíò 15:21-28)
24Sɔ̀ìn ɓóɛ gboɛɛ, Jízɛ̀ sɔ̀ ma ɓó páɔ̀ mú, ké ɔ mu ma ɖé pá kɔ̃̀ mú Táà-hwɔ̀ɖɔ̀ɔ̀ kè Zíɖɔ̀ùn-hwɔ̀ɖɔ̀ɔ̀ nìà kɛ. Ké ɔ dyá ma gbǒ ɖò mú, ké ɔ se mɔ́ ɓɛ́ nyɔ ɖò ké dɛ̀ ɔ nì ma kɛɛ jè dyuò, kɛɛ ɔ jè se ma vǐèɛ̀ ɓɛ́ìn. 25Ké màa ɖò ɓéɖé ma dyú-màà ɖò. Zùù gbà nì ma dyú-gbɔ́ɔ̀ mú. Ké màaɔ̀ wɔ̃́ ma Jízɛ̀ jè, ké ɔ dyi ma, ké ɔ jìɖǐ ma ɓó Jízɛ̀ ɓo zɔ̃̌ dyi. 26Màaɔ̀ mɔ̀ ma ɓóɖóɔ̀ dyú, kɛɛ ɔ po ma Gíɖíì-wùɖù. Ɔ ɓaà ma Jízɛ̀, ɓɛ́ ɔ ké ma zùù gbàɔ̀ ɔ dyúɔ̀ mú zà. 27Ké Jízɛ̀ cɛ̃ɛ ma màaɔ̀ gbo, ké ɔ ɖá, “Dyú ɓěɔ̀ mɛ ɖi ɖɛ kĩ́ín. Ɔ se dyíin nɔ̀mɔ̀ ɓɛ́ nyɔ ké dyú ɓěɔ̀ ɖii-ɖɛ̀ɔ̀ dyí ɖú, ɓɛ́ nyɔ kéɛ gbe nyí.”
28Ké màaɔ̀ ɖá, “Ɓɔ̌ɔ̀, ɔ mɔ̀ jǎà jɛ́ɛ́, kɛɛ gbe ɓěɔ̀ ɖi dyú ɓěɔ̀ ɖii-ɖɛ̀-bùǒ ɓě wáɖáà ɓíɖíiɛɛ ní.”
29Hwɛ̀ ké ɔ cɛ̃ɛ ma màaɔ̀ gbo, ké ɔ ɖá, “Ɖɛ m̀ cɛ̃à kɛɛ nɔ̀mɔ̀ dyíin. Ɔ jèɛɛ, m̀ mɛ mu ɖe. Zùù gbàɔ̀ ɖǎ nì dyú-mààɔ̀ mú sɔ̀.”
30Ké màaɔ̀ mu ma ɔ ɓíɖí-taún ɖe, ké ɔ dyɛ̀ìn ma ɔ dyú-mààɔ̀ kɔ̃-pɛ̃́-ɖɛ̀ɔ̀ kɔ̃ dyi pɛ̃́ɛ. Zùù gbàɔ̀ ɖǎ ma ɔ dyúɔ̀ mú sɔ̀.
Jízɛ̀ kánáìn ɓo-ɓo-gàà ɖò dyi
31Sɔ̀ìn ɓóɛ gboɛɛ, Jízɛ̀ sɔ̀ ma ɖé pá kɔ̃̀ mú Táà-hwɔ̀ɖɔ̀ɔ̀ nìà kɛ, ké ɔ mu ma ɖé Gáɖàɖíì Dòùnɓìǎɔ̀ wĩín ɖe. Ti ɔ nì ma muɛń nyɛɛ, ɔ zĩ̀ìn ma ɖé Zíɖɔ̀ùn-hwɔ̀ɖɔ̀ɔ̀ kè Dìkápòɖè Gbɛ̌ɛ̀ɔ̀ mú. 32Ke wa dyà ma ɓo-ɓo-gàà ɖò Jízɛ̀ gbo. Gàaɔ̀ se ma wùɖùɛ̀ dyuò nɔ̀mɔ̀ dyíin. Ké wa ɓaà ma Jízɛ̀, ɓɛ́ ɔ ké ma gàaɔ̀ sɔ̃ kɔ̃ pɛ̃́ìn. 33Ké Jízɛ̀ zà ma ɓó gàaɔ̀ nyɔ ɓěɔ̀ hwìɛ̀, ké ɔ kpa ma gàaɔ̀ jìì ɖùǔ-ɓìǐn, ké ɔ tóìn ma tɔ̃ɔ jìì, ké ɔ tìnìɛ̀n ma gàaɔ̀ miɔɔ̀ dyi. 34Ké ɔ gmɔ̀ ma dyií, ké ɔ nì ma dĩin. Ɔ cɛ̃ɛ gàaɔ̀ gbo, ké ɔ ɖá, “Ɛ̀fátà.” Ɔ xwíníín mɔ̀, “M̀ mɛ kaà.”
35Púɛɛ, gàaɔ̀ ɖùǔ ɓěɔ̀ kaà ma, ké ɔ miɔ-mànàɔ̀ fɛ̃́ìn xwa, ké ɔ wùɖù ma nɔ̀mɔ̀ dyíin. 36Ké Jízɛ̀ cɛ̃ɛ ma nyɔ ɓěɔ̀ gbo, ké ɔ ɖá, “Ɓěǐn ɖá ɓɛ́ ɓě ké ɖɛ nìà kɛ jè nyɔ ɖò gbo cɛ̃o.” Kɛbì ɔ mɛ cɛ̃ɛ wa gbo cɛ̃̀ɛ̌ kɛɛ, wa se wa mìɔùn dyí kpɔ̃ɔ ɓɛ́ìn. 37Díɖí taɓa ma wa mìɔ, ké wa ɖá, “Ɔ ɖǎ ɖɛ séín nyu nɔ̀mɔ̀ dyíin. Ɔ nyuɛ ké nyɔ ɓě ɓɛ́ wa sṹ kɛɛ wɔ̃́ dyi, ké nyɔ ɓě séè wùɖù ɖòɛɛ wùɖù.”
Chwazi Kounye ya:
:
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.