Máà 4
4
Nɔ́ɔ́ ɓá ɖɛ-ɓá-nyɔ̀ ɖò jè dyíɛ
(Máfíò 13:1-9; Ɖúù 8:4-8)
1Sɔ̀ìn ɓóɛ gboɛɛ, Jízɛ̀ dè ma nyɔ ɓěɔ̀ ɖɛ tɛ̀mɛ̀ìn gbɔ ɖé dòùnɓìǎɔ̀ wĩín ɖe, ké nyɔ kúɖúú ɓě poìn ma ɓó ɔ gbo dyí. Ɔ jèɛɛ, ɔ dyá ma ɓáɖáà ɖò mú, ké ɔ dèɖě ma ɖé ɓáɖáàɔ̀ mú dya. Ké nyɔ kúɖúú ɓěɔ̀ nì ma ɖé níɔ̀ kpóóɔ̀ kɔ̃. 2Ké Jízɛ̀ tɛ̀mɛ̀ìn ma wa ɖɛ pàɖǎ ɖé nɔ́ɔ́ mú. Ti ɔ nì ma wa ɖɛ tɛ̀mɛ̀ǐn nyɛɛ, ɔ cɛ̃ɛ ma wa gbo, ké ɔ ɖá, 3“Ɓě tò ɖùǔo! Gàa ɖò sɔ̀ ma dyí, ké ɔ mu ma ɓáá-ɖɛ̀ ɓáùn. 4Ti ɔ nì ma ɓáá-ɖɛ̀-dyùàɔ̀ mɛ́nɛ́iń nyɛɛ, ɔ dyúàɔ̀ ɖíɛ́ ɓě wáɖá ma ɓó hwìèɔ̀ gbìǐ dyi, ké naà ɓě dyi, ke wa manaa ma. 5Ké ɖíɛ́ ɓě kpá ma ɓó ɓóɖó wè ɓáìn ma sɔ́ɔ́-pìɔ̌ kɔ̃in nyɛɛ mú. Wa se ɓóɖó pàɖǎ ɓéɖé, ké wa gbǎ ma kɔ̃́ɔ́ wàɖà. 6Kɛɛ ti ɓɛ́ dyóɖóɔ̀ sí ma ɓáá-ɖɛ̀-kɔ̃̀ɔ̌ mú mìɔ kɛɛ, wa mɛ́ ma, sepóɛɖé wa se ma ɓóɖó pàɖǎ ɓéɖé jè. 7Ké ɓáá-ɖɛ̀-dyùàɔ̀ ɖíɛ́ ɓě kpá ma dɛ̀ ɓɛ́ wí-gbǎ ɓě nì ma kɛ, ké wí ɓěɔ̀ mɛ ma, ké wa taɓaìn ma ɓáá-ɖɛ̀ ɓěɔ̀ dyi, ké wa se ma tòɖò. 8Ké ɓáá-ɖɛ̀-dyùàɔ̀ ɖíɛ́ ɓě kpá ɓóɖó bùɛ̀-bùɛ̀ mú, ké wa gbǎ ma kɔ̃́ɔ́, ké wa mɛ, ké wa zaìn dúún. Ɖíɛ́ ɓě tòɖò ma ɓo kpáɖá-nyɔ ɓaɖa-bùè, ké ɖíɛ́ ɓě tòɖò ma ɓo kpáɖá-nyɔ tã, ké ɖíɛ́ ɓě tòɖò ma ɓo hɔ̃dɛ̀ɖɛ̀ ɖò.”
9Ké Jízɛ̀ ɖá, “Nyɔ ɓɛ́ ɔ ɓéɖé ɖùǔ ɓɛ́ ɔ ké dyi wɔ̃́ɛɛ, ɔ mɛ tò ɖùǔ.”
Xwíníín kɔ̃̀ jè Jízɛ̀ poà nɔ́ɔ́ kɛ
(Máfíò 13:10-17; Ɖúù 8:9-10)
10Ti ɓɛ́ nyɔ kúɖúú ɓěɔ̀ se ma ɓó Jízɛ̀ gbo nì ɖeɛɛ, nyɔ ɓě sí ma ɔ ɖeín, dè ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀ kɔ̃ɛɛ, diè ma ɔ dyi, ɓɛ́ ɔ ké nɔ́ɔ́ ɓěɔ̀ xwíníín mú zà. 11Ké ɔ cɛ̃ɛ ma wa gbo, ké ɔ ɖá, “Gèɖèpɔ́ɔ̀ ɖǎa nyu ɓɛ́ ɓě ké ɖɛ ɓě vǐè ma kĩ́ín ɓá ɔ kã́á-ɓòɖòɔ̀ jè dyíɛɛ dyí dyuò, kɛɛ nyɔ tɔ̀ɔ̀ ɓěɔ̀ ɓéɖé wa ké vǐè-ɖɛ̀ séín ɓěɔ̀ wɔ̃́ ɖé nɔ́ɔ́ mú.
12Ɔ nì ná, ɓɛ́ kɛbì wa mɛ gmɔ̀ ɓó gmɔ̀ɔ̀ kɛɛ, wa ké seɛ múin dyé,
ké kɛbì wa mɛ wɔ̃́ɔ wɔ̃̀ɔ̀ kɛɛ, wa ké seɛ múin wɔ̃́.
Ɖɛ nìà kɛ kpá ná, ɓɛ́ wa ní kɔ̃̀ ɖà Gèɖèpɔ́ɔ̀ gbo gmɔ̀ìn,
ɓɛ́ ɔ ní kɔ̃̀ ɖà waà nàmàǔn ɓěɔ̀ kɔ̃in zĩ̀ìn.”
Jízɛ̀ zà nɔ́ɔ́ ɓá ɖɛ-ɓá-nyɔ̀ɔ̀ jè dyíɛɛ xwíníín mú
(Máfíò 13:18-23; Ɖúù 8:11-15)
13Hwɛ̀ ké Jízɛ̀ diè ma wa dyi, ké ɔ ɖá, “Ɓě se nɔ́ɔ́ nìà kɛ múin wɔ̃́ ní, nìí, xwɛ̌ ɓě mu nɔ́ɔ́ tɔ̀ɔ̀ ɓěɔ̀ múin wɔ̃́ɔ nyuùn wɛ̃́? 14Ɖɛ ɓɛ́ ɖɛ-ɓá-nyɔ̀ɔ̀ ɓáà kɛɛ mɔ̀ bɔ̃̌ nɔ̀mɔ̀ dyíinɔ̀. 15Ɓáá-ɖɛ̀-dyùà ɓě wáɖáìn ma kà ɓó hwìèɔ̀ gbìǐ dyiɛɛ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀ nyɛ̀nɛ̀ɛ̀ cá kɛɛ, Sétɔ̃̀ dyi wàɖà, ké ɔ bǎ bɔ̃̌ nɔ̀mɔ̀ dyíin ɓɛ́ wa wɔ̃́ɔ́ kà kɛɛ ɖé wa múɛ. 16Kà dyúáɖòɔ̀ kǎà ɔ nì ɓó nyɔ ɓě kpáà ɓó sɔ́ɔ́-pìɔ̌ɔ̀ kɔ̃ɛɛ bìì. Ti ɓɛ́ wa wɔ̃́ bɔ̃̌ nɔ̀mɔ̀ dyíinɔ̀ kɛɛ, wa kpá múàǔn, ké wa kpɔ̃ ɔ jè dyi wàɖà. 17Kɛɛ wuɖuɔ̀ se ɖé waà fɛ̀ɛ̀ɔ̀ mú kpá jɛ́ɛ́ cá. Wuɖuɔ̀ nyu ɖé wa mú ti xwã́ún-xwã́ún wè pū. Ti ɓɛ́ nyɔǔn ɓě dyéìn wa gǎ ɓó wuɖuɔ̀ jè kɛɛ, wa táà ɔ jè dyi wàɖà. 18Ɓáá-ɖɛ̀-dyùàɔ̀ nyɔ kpáà wí-gbǎɔ̀ múɛɛ, ɔ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀, 19kɛɛ wa poìn ɓóɖó-kpàà jè hwìɖǐi mìɔ, ké bã jè kpɔ̃ wa hwòɖǒ, ké ɔ hwɔìn wí ké ɔ taɓaìn bɔ̃̌ nɔ̀mɔ̀ dyíinɔ̀ dyi, ké wuɖuɔ̀ se ɖɛ ɖò nyu ɖé waà fɛ̀ɛ̀ɔ̀ múɛ. 20Ké ɓáá-ɖɛ̀-dyùàɔ̀ nyɔ ɓɛ́ ɖɛ-ɓá-nyɔ̀ɔ̀ mɛ́nɛ́ ma kà ɖé ɓóɖó bùɛ̀-bùɛ̀ɔ̀ múɛɛ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀, ké wa kpɔ̃ɔ jè dyiɛ. Ké bɔ̃̌ nɔ̀mɔ̀ dyíinɔ̀ tòɖò ɖé wa mú. Ɖíɛ́ ɓě tòɖò ɓo kpáɖá-nyɔ ɓaɖa-bùè, ké ɖíɛ́ ɓě tòɖò ɓo kpáɖá-nyɔ tã, ké ɖíɛ́ ɓě tòɖò ɓo hɔ̃dɛ̀ɖɛ̀ ɖò.”
Ɖáùnpò ní nì gbǎ-wĩín ɖò xwíɖíi
(Ɖúù 8:16-18)
21Ké Jízɛ̀ diè ma wa dyi, ké ɔ ɖá, “Nyɔǔn ɓɛ́ìn ɖáùnpò dyí kpɔ̃̀ìn, ɓɛ́ wa kéɛ gbǎ-wĩín xwíɖíi dèè, mɔɔ ɓɛ́ wa kéɛ gbɛ xwíɖíi dèè? Má, wa muɛ dyàùn, ɓɛ́ wa kéɛ ɖáùnpò-kɔ̃-dè-ɖɛ̀ kɔ̃ dèe? 22Ɖɛ séín ɓě ɓɛ́ nyɔǔn vǐè kɛɛ mu píé wóɖóùn, ké ɖɛ séín ɓě ɓɛ́ wa gàìn nyɛɛ mu ce dyí dyiìn. 23Nyɔ ɖò dyi ɖùǔ ɓéɖé ɓɛ́ ɔ ké dyi wɔ̃́ ní, nìí, ɔ mɛ tò ɖùǔ.”
24Ké ɔ cɛ̃ɛ wa gbo ɖe, ké ɔ ɖá, “Ɓě mɛ tò ɖɛ ɓě ɓɛ́ ḿ cɛ̃à kɛɛ gbo ɖùǔ nɔ̀mɔ̀ dyíin. Ɖɛ ɓě nyí nyɔǔn wɛ̃ɛ mɔ̀ ɖɛ ɓě mu dyéìn ɖekè, ké ɓě mu ɖò dyéìn ɓó kɔ̃in ɖe. 25Sepóɛɖé nyɔ mɔ̀ nyɔ ɓɛ́ ɔ ɓéɖé ɖɛ ɖò kɛɛ, ɔ mu ɖò dyéìn ɖe, kɛɛ nyɔ mɔ̀ nyɔ ɓɛ́ ɔ se ɖɛ ɖò ɓéɖéɛɛ, ɔ nyɔ wè ɓɛ́ ɔ ɓéɖéà kɛɛ mu ɔ xwa sɔ̀ùn.”
Nɔ́ɔ́ ɓá ɓáá-ɖɛ̀-dyùà nì mɛiń jè dyíɛ
26Ké Jízɛ̀ cɛ̃ɛ ma wa gbo ɖe, ké ɔ ɖá, “Gèɖèpɔ́ɔ̀ kã́á-ɓòɖòɔ̀ nì kà gàa ɖò ɓɛ́ ɔ po ɓáá-ɖɛ̀-dyùà ɓóɖóún wɛ̃ɛ nìà kɛ. 27Ɔ pɛ̃́ ma dyi máaún, ké ɔ mɔ́, ké ɔ sɔ̀ dyí gànà-kṹún tee. Ké ɓáá-ɖɛ̀-dyùà ɓěɔ̀ gbǎ ma kɔ̃́ɔ́, ké wa mɛ. Gàaɔ̀ se dyuò kà wa nyu mɛɛ kɛ. 28Ɓóɖóɔ̀ mìɔùn nyuɛ ké ɓáá-ɖɛ̀ ɓěɔ̀ zaìn dúún. Kĩ́ín-kĩ́ín nyɛɛ, wa po mí, ké wa wa, ké wa kɔ́. 29Ti wa kɔ́ kɛɛ, gàaɔ̀ tò ɖé nyɔǔn ɓě wàɖà, ɓɛ́ wa kéɛ cɛ̃, sepóɛɖé waà cɛ̃-tìɔ̀ ɖǎ dyi.”
Nɔ́ɔ́ ɓá ɓáá-ɖɛ̀-dyùà tííwè ɖò jè dyíɛ
(Máfíò 13:31-32, 34; Ɖúù 13:18-19)
30Sɔ̀ìn ɓóɛ gboɛɛ, Jízɛ̀ diè ma ɖɛi ɖe, ké ɔ ɖá, “Ɖɛ́ nyɔ ɓɛ́ìn Gèɖèpɔ́ɔ̀ kã́á-ɓòɖòɔ̀ dyí poìn nyɛ́? Ké nɔ́ɔ́ nyɛ́ nyɔ ɓɛ́ìn poɛ ɓá ɔ jè dyíɛ́? 31Ɔ nì kà dyɛ̀ɛ̀-dyùà nìà kɛ. Ɔ ɓíè dyí ké ɔ zi ɓáá-ɖɛ̀-dyùà séín nì ɓóɖó-kpàà kɔ̃ɛɛ dyí. 32Kɛɛ ti ɓɛ́ wa ɓáa kɛɛ, ɔ mɛ, ké ɔ ɓúá dyí ké ɔ zi ɓáá-ɖɛ̀ ɖíɛ́ ɓě dyí. Ɔ zà ɖɔ́ vɛ̀nɛ̀-vɛ̀nɛ̀, ké naà ɓě dè waà téɖé ɖé ɔ ɖɔ́ ɓěɔ̀ dya.”
33Kǎà Jízɛ̀ cɛ̃ ma nyɔ ɓěɔ̀ Gèɖèpɔ́ɔ̀-wùɖù gbo ɖé nɔ́ɔ́ pàɖǎ mú. Ɔ cɛ̃ ma Gèɖèpɔ́ɔ̀-wùɖù jĩ̀ kà wa ɓɛ́ìn múin wɔ̃́ɔ kɛ. 34Ɔ se ma nɔ́ɔ́ po ní, nìí, ɔ se ma wa ɖɛ ɖò gbo cɛ̃ɛ ɓɛ́ìn. Kɛɛ ti ɓɛ́ ɔ kè ɔ ɖeín-nà-nyɔ̀ ɓěɔ̀ kpá ma wáká kɛɛ ní, nìí, ɔ zà nɔ́ɔ́ ɓěɔ̀ xwíníín mú ɖé wa gbo.
Jízɛ̀ po dìì ɖò ɓɔ́í
(Máfíò 8:23-27; Ɖúù 8:22-25)
35Ɓó wé dyúáɖòɔ̀ ɓaɖaa, ti ɓɛ́ hwìo ɖǎ ma jǔɛɛ, Jízɛ̀ cɛ̃ɛ ma ɖeín-nà-nyɔ̀ ɓěɔ̀ gbo, ké ɔ ɖá, “Ɓěà mu ɖé dòùnɓìǎɔ̀ ɖeín.” 36Ke wa sɔ̀ ma ɓó nyɔ kúɖúú ɓěɔ̀ gbo dyí, ké wa kpàìn ma Jízɛ̀ ɖé ɓáɖáà ɓɛ́ ɔ nì ma kà múɛɛ mú. Ké ɓáɖáà ɖíɛ́ ɓě sí ma wa kíɖíí. 37Ké dìì vɛ̀nɛ̀ ɖò dyi ma, ké dyóó-kpɛ̀ nì ma ɖé ɓáɖáàɔ̀ mú wáɖáuń, ké ní nì ma ɓáɖáàɔ̀ mú dyíɛń. 38Kɛɛ Jízɛ̀ nì ma ɖé ɓáɖáàɔ̀ gbɔ kɔ̃, ké ɔ dè ma dú-kɔ̃-dè-ɖɛ̀ ɖò dú kɔ̃, ké ɔ nì ma mɔ́uń. Ké ɔ ɖeín-nà-nyɔ̀ ɓěɔ̀ túò ma ɔ, ké wa ɖá, “Nyɔ-ɖɛ-tɛ̀mɛ̀ìn-nyɔ̀, à nì mú gbɔɔ̀ǔn. M̀ se ɖé à jè gbo kɔ̃̀ɔ̀?”
39Ké Jízɛ̀ sɔ̀ ma dyí, ké ɔ cɛ̃ɛ ma dììɔ̀ kè dyóó-kpɛ̀ɔ̀ gbo gana-kà, ké ɔ ɖá, “Nì gìɖìǐ, ɓɛ́ m̀ ké dyi dè dɔ̃̀ùn-dɔ̃̀ùn.” Ké dììɔ̀ ɓɔ́, ké dyóó-kpɛ̀ɔ̀ kpá ma ɓɔ́í. 40Ɔ diè ma ɖeín-nà-nyɔ̀ ɓěɔ̀ dyi, ké ɔ ɖá, “Ɖɛ́ kɔ̃̀ jè ɓě fɛ̃̀ìn kà kɛ́? Ɓě se hwìɖǐǐ-taɓa-taɓa ɖò ɓéɖéè?”
41Púɛɛ, díɖí taɓa ma wa mìɔ, ké wa cɛ̃ìn cɛ̃̀ìn ma gbo, ké wa ɖá, “Gàaɔ̀ nyɛ́ nìà kà kɛ́? Dìì kè dyóó-kpɛ̀ ɓěɔ̀ mɔ̀ùn nyu ɔ wuɖu wà!”
Chwazi Kounye ya:
Máà 4: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.