Máà 2
2
Jízɛ̀ kánáìn gàa ɖò kɔ̃̀ wáká mɛ́ɛ dyi
(Máfíò 9:1-8; Ɖúù 5:17-26)
1Ti ɓɛ́ wé gbɛ̀ǐ-gbɛ̀ǐ ɖǎ ma ziɛɛ, Jízɛ̀ dyi ma ɖé Kɔ̀pánìà-hwɔ̀ɖɔ̀ɔ̀ mú ɖe, ké nyɔ ɓěɔ̀ wɔ̃́ɔ ma kà Jízɛ̀ ɖǎ ma ɔ ɓíɖí ɖe dyiɛ. 2Ké nyɔ ɓáún-ɓáún poìn ɖé gbǒ kɔ̃̀ mú ɔ nì ma kɛɛ mú dyí, ké pá ɖò se ma ɖé nì, hwɛ̀ ḿ po níiń, ɓó gbǒ-wɔ̃̀ɔ̀ gbo dyi nyànà jè. Ké Jízɛ̀ nì ma wa Gèɖèpɔ́ɔ̀-wùɖù gbo cɛ̃iń. 3Ké nyɔ-kpò hĩinyɛ dyà ma gàa ɖò kɔ̃̀ wáká mɛ́ɛ ɔ gbo. 4Ti ɓɛ́ wa se ma ɓó ɔ gbo nyiniɛ ɓɛ́ìn ɓó nyɔ kúɖúú ɓěɔ̀ jèɛɛ, nyɔ hĩinyɛ ɓěɔ̀ nyu ma ɓí ɖò ɖé gbǒɔ̀#2:4 Júù-nyɔ̀ ɓěɔ̀ nììn gbǒ ɓěɔ̀ dú-hwìɛ̀ nì bɔ̀ɔ̀-bɔ̀ɔ̀, ké nyɔ ɓɛ́ìn ɖé dyi nàà. kɔ̃in, dɛ̀ ɓɛ́ Jízɛ̀ ɓɛ̀ɖɛ̀ìn ma kà dyíɛ, ké wa tòìn ma ɓó kɔ̃-pɛ̃́-ɖɛ̀ ɓɛ́ gàaɔ̀ pɛ̃́ ma kà kɔ̃ɛ, ké ɔ dè ma ɓíɖíi. 5Ké Jízɛ̀ dyéɛ ma kà ɓɛ́ wa ɓéɖé ma hwìɖǐǐ-taɓa-taɓa kɛ, ké ɔ cɛ̃ɛ ma gàa wáká mɛ́-mɛ́ɔ̀ gbo, ké ɔ ɖá, “Ní dyú, ḿ ɖǎ nì nàmàǔn ɓěɔ̀ kɔ̃in zĩ̀ìn.”
6Púɛɛ, Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɖíɛ́ ɓě ɓɛ́ wa kò ma ɓó dyiɛɛ cɛ̃ɛ ma ɖé wa hwòɖǒ bũ̌, ké wa ɖá, 7“Ɖɛ́ kɔ̃̀ jè gàa nìà kɛ cɛ̃ ɖɛ nì kàà kɛ́? Ɔ cɛ̃ ɖɛ gbà Gèɖèpɔ́ɔ̀ kɔ̃ún. Nyɛ́ ɓɛ́ìn nàmàǔn kɔ̃in zĩ̀ɛ̀n nyɛ́? Ɔ sèìn Gèɖèpɔ́ɔ̀ ɖòùn.”
8Wàɖà cáa, Jízɛ̀ dyuò ɖɛ wa nì ma kà hwìɖǐi poɛ̌n nyɛɛ dyí, ké ɔ ɖá, “Ɖɛ́ kɔ̃̀ jè ɓě nìà ɖɛ nì kàà hwìɖǐi poɛ̌n nyɛ́? 9Ɖɛ ɓě nìà kɛɛ, ɔ nyɛ́ kàmà mú kɛ́? Ɓɛ́ ḿ kéɛ gàa wáká mɛ́-mɛ́ɔ̀ gbo cɛ̃, ɓɛ́ ḿ ké níiń, ‘Ḿ ɖǎ nì nàmàǔn ɓěɔ̀ kɔ̃in zĩ̀ìn,’ mɔɔ ɓɛ́ ḿ ké níiń, ‘Sɔ̀ dyí, ɓɛ́ m̀ ké nì kɔ̃-pɛ̃́-ɖɛ̀ɔ̀ dyí ɖú, ɓɛ́ m̀ ké nàe?’ 10Ní muɛ ɓě dyí tɛ̀mɛ̀ìn kà ɓɛ́ mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ, ḿ ɓéɖé kpé nɔ̄ toɖo-kpàà kɔ̃, ɓɛ́ ḿ ké nàmàǔn kɔ̃in zĩ̀ìn nyɛ.” Ɔ jèɛɛ, Jízɛ̀ cɛ̃ɛ ma gàa wáká mɛ́-mɛ́ɔ̀ gbo, ké ɔ ɖá, 11“Ḿ cɛ̃ɛ m̀ gbo, sɔ̀ dyí, ɖú nì kɔ̃-pɛ̃́-ɖɛ̀ɔ̀ dyí, ɓɛ́ m̀ ké m̀ ɓíɖí-taún mu.”
12Púɛɛ, gàaɔ̀ sɔ̀ ma dyí, ké ɔ ɖú ɔ kɔ̃-pɛ̃́-ɖɛ̀ɔ̀ dyí ɓó wa séín dyéɖé waí ké ɔ mu ma. Ké wa séín giniìn ma dyi, ké wa ɓàìn ma Gèɖèpɔ́ɔ̀, ké wa ɖá, “À séè ɖɛ nì kàà dyé ɖò.”
Jízɛ̀ ɖá Ɖíìváà
(Máfíò 9:9-13; Ɖúù 5:27-32)
13Sɔ̀ìn ɓóɛ gboɛɛ, Jízɛ̀ sɔ̀ ma dyí, ké ɔ mu ma ɖé dòùnɓìǎɔ̀ wĩín ɖe. Ké nyɔ kúɖúú ɓě poìn ma ɓó ɔ gbo dyí, ké ɔ tɛ̀mɛ̀ìn ma wa ɖɛ. 14Ti ɓɛ́ Jízɛ̀ nì ma nàà kpauń wɛ̃ɛ, ɔ dyé ma Ɖíìváà ɓɛ́ ɔ mɔ̀ ma Áfìàà dyú-gàà kɛ. Ɖíìváà kò ma dɛ̀ wa kpɔ̃̀ìn tácì kɛɛ dyi. Ké Jízɛ̀ cɛ̃ɛ ma ɔ gbo, ké ɔ ɖá, “Sí ḿ kíɖíí.” Ké Ɖíìváà sɔ̀ ma dyí, ké ɔ sí ma ɔ kíɖíí.
15Ti ɓɛ́ Jízɛ̀ nì ma ɖɛ ɖiɛń ɖé Ɖíìváà ɓíɖí-taún wɛ̃ɛ, tácì-kpɔ̃-nyɔ̀ pàɖǎ kè nàmàǔn-nyɔ̀ ɓě dyi ma, ké wa kè Jízɛ̀ kè ɔ ɖeín-nà-nyɔ̀ ɓěɔ̀ kò ma téɓèɖèɔ̀ gbɔi, sepóɛɖé tácì-kpɔ̃-nyɔ̀ kè nàmàǔn-nyɔ̀ pàɖǎ sí ma Jízɛ̀ kíɖíí. 16Ti ɓɛ́ Gèɖèpɔ́ɔ̀-cèè-ɖɛ̀ dyuò-nyɔ̀ ɓě mɔ̀à Fáɖòsíì-nyɔ̀ ɓěɔ̀ kɛɛ dyéɛ ma ké Jízɛ̀ kè nàmàǔn-nyɔ̀ ɓěɔ̀ ɔ kè tácì-kpɔ̃-nyɔ̀ ɓěɔ̀ nì ma ɖɛ ɖiɛń dà dyúáɖò kɛɛ, wa diè ma ɔ ɖeín-nà-nyɔ̀ ɓěɔ̀ dyi, ké wa ɖá, “Ɖɛ́ kɔ̃̀ jè ɓěɛ̀ ɖɛ-tɛ̀mɛ̀ìn-nyɔ̀ɔ̀ kè tácì-kpɔ̃-nyɔ̀ ɓěɔ̀ kè nàmàǔn-nyɔ̀ ɓěɔ̀ ɖià ɖɛ dà dyúáɖò kɛ́?”
17Ti ɓɛ́ Jízɛ̀ wɔ̃́ɔ ma kɛɛ, ɔ cɛ̃ɛ ma wa gbo, ke ɔ ɖá, “Nyɔ ɓě kɔ̃̀ dyɔɔ̀ wóɖó múɛɛ se hwǒò-nyɔ̀ mɔ́, kɛɛ nyɔ ɓě ɓɛ́ wa wɛ́ kɛɛ, wa mɔ̀ nyɔ mɔ́ hwǒò-nyɔ̀. Ḿ se dyi, ɓɛ́ ḿ ké dyí-sɛ́ɖɛ́ìn-nyɔ̀ ɓě ɖá, kɛɛ ḿ dyi, ɓɛ́ ḿ ké nàmàǔn-nyɔ̀ ɓě ɖá.”
Dyi-diè-ɖɛ̀ ɓá wɔ̃ kɔ̃ hwèɖè jè dyíɛ
(Máfíò 9:14-17; Ɖúù 5:33-39)
18Ɓó tia ɓaɖaa, Jɔ̃́ɔ́ɛ̀ ɖeín-nà-nyɔ̀ ɓěɔ̀ kè Fáɖòsíì-nyɔ̀ ɓěɔ̀ nì ma wɔ̃ kɔ̃ hwèɖèɛ̌n. Ké nyɔǔn ɓě dyi ma Jízɛ̀ gbo, ké wa diè ma ɔ dyi, ké wa ɖá, “Ɖɛ́ kɔ̃̀ jè Jɔ̃́ɔ́ɛ̀ ɖeín-nà-nyɔ̀ ɓěɔ̀ kè Fáɖòsíì-nyɔ̀ ɓěɔ̀ ɖeín-nà-nyɔ̀ ɓěɔ̀ hwèɖèà wɔ̃ kɔ̃, ké nììn ɖeín-nà-nyɔ̀ ɓěɔ̀ ní hwèɖèà wɔ̃ kɔ̃ kɛ́?”
19Ké Jízɛ̀ diè ma wa dyi, ké ɔ ɖá, “Má, nyɔ́nɔ́-ɓǎɔ̀ dyi ɓó nyɔ ɓě dyià nyɔ́nɔ́-dyi-kpɔ̃-hwɔ̀ɔ̀ kɔ̃ɛɛ gbo nì ní, nìí, wa se wɔ̃ kɔ̃ hwèɖèɛ̀ ɓɛ́ìne? Kà ɓɛ́ nyɔ́nɔ́-ɓǎɔ̀ nì ɓó wa gboɛɛ, wa se wɔ̃ kɔ̃ hwèɖèɛ̀ ɓɛ́ìn. 20Kɛɛ ti ɖò mu dyiìn, ɓɛ́ nyɔ ɖò ké wa nyɔ́nɔ́-ɓǎɔ̀ hwìɛ̀ zà. Nìí, wa muá wɔ̃ kɔ̃ hwèɖèìn.
21“Ɖɔ sùà dyi fá ní, nyɔ ɖò ní gmàìn ɓó ɖɔ-wɔ̃̀ ɖìè. Ɔ dyiɛ náa nyu ní, nìí, ɖɔ-wɔ̃̀ ɖìèɔ̀ mu ɓó ɖɔ sùàɔ̀ ɖò cɛ̃ìn, ké ɖɔɔ̀ fá-fáɔ̀ mu gbà gbo kpáùn. 22Ké nyɔ ɖò ní po wã́ìn ɖìè wã́ìn-tɛ̀ɓɛ̀ɛ̌ gbà#2:22 Wã́ìn-tɛ̀ɓɛ̀ɛ̌ mɔ̀ ma ɖɛ ɓɛ́ Éézùɖùɛ̀-nyɔ̀ ɓěɔ̀ gma ma sɔ̀ìn nimii-kùɖùù mú ti pàɖǎ múɛ. mú. Ɔ dyiɛ náa nyu ní, nìí, wã́ìnɔ̀ mu tɛ̀ɓɛ̀ɛ̌ɔ̀ waùn, ké wã́ìnɔ̀ kè tɛ̀ɓɛ̀ɛ̌ɔ̀ mu mú gbɔɔ̀ùn. Kɛɛ wa po wã́ìn ɖìè tɛ̀ɓɛ̀ɛ̌ ɖìè mú.”
Dyi-diè-ɖɛ̀ ɓá Gèɖèpɔ́ɔ̀ fɔ̀-wèɔ̀ jè dyíɛ
(Máfíò 12:1-8; Ɖúù 6:1-5)
23Gèɖèpɔ́ɔ̀ fɔ̀-wè ɖòɛ̀ ɓaɖaa, Jízɛ̀ nì ma hwítì-gèɖè ɖò gbo zĩ̀ɛ̌n, ké ɔ ɖeín-nà-nyɔ̀ ɓěɔ̀ ɖú ma hwítìɔ̀ dúi kɔɖɔ kpàǐ, ɓɛ́ wa kéɛ ɖi. 24Ké Fáɖòsíì-nyɔ̀ ɓěɔ̀ cɛ̃ɛ ma Jízɛ̀ gbo, ké wa ɖá, “Gmɔ̀ nɔ̄, ɖɛ́ kɔ̃̀ jè nì ɖeín-nà-nyɔ̀ ɓěɔ̀ nì ɖɛ se dyíin nɔ̀mɔ̀ ɓɛ́ nyɔǔn ké nyu ɓó Gèɖèpɔ́ɔ̀ fɔ̀-wèɔ̀ xwíníín nyɛɛ nyuɛń nyɛ́?”
25Kɛɛ Jízɛ̀ cɛ̃ɛ ma wa gbo, ké ɔ ɖá, “Ɓě séè ɖɛ ɓɛ́ Dèɓé kè ɔ gàa ɓě nì zɔ̃̌ɔ̀ ɓó ɔ gboɛɛ nyu zɔ̃̌ɔ̀, ti ɓɛ́ mɔ́ nì ma wa nyuɛń nyɛɛ jè wuɖuún zà ɖòò? 26Ɔ mɔ̀ ti ɓɛ́ Ábìáfà mɔ̀ ma sáa-zà-nyɔ̀ vɛ̀nɛ̀ kɛ. Dèɓé dyá ma ɖé Gèɖèpɔ́ɔ̀ gbǒɔ̀ mú, ké ɔ ɖi ma bɛɖɛɛ̀ ɓɛ́ wa dè ma ɓó Gèɖèpɔ́ɔ̀ dyúa dyiɛ, ké ɔ nyí bɛɖɛɛ̀ɔ̀ ɖò gàa ɓě nì ma ɓó ɔ gboɛɛ ɖekè. Ɔ se ma dyíin nɔ̀mɔ̀ ɓɛ́ nyɔ ɖò kéɛ ɖi, ɔ sèìn sáa-zà-nyɔ̀ ɓěɔ̀ ɖòùn.”
27Ké ɔ cɛ̃ɛ ma wa gbo ɖe, ké ɔ ɖá, “Gèɖèpɔ́ɔ̀ nyu ma ɔ fɔ̀-wèɔ̀ ɓó nyɔǔn-dyù bìì, kɛɛ ɔ se ma nyɔǔn-dyù mɛ ɓó fɔ̀-wèɔ̀ bìì. 28Ɔ jèɛɛ, mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ, mɔ̄ kɔ̃̀ fɔ̀-wèɔ̀ wuɖuí.”
Chwazi Kounye ya:
Máà 2: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.