Ìfísĩ̀ɔ̀ 6
6
Dyú ɓě kè waà wóɖóìn-nyɔ̀ ɓě
1Dyú ɓě, kà ɓě nìà Bounɓoɔ̀ múɛɛ, ɓě mɛ nyu ɓěɛ̀ wóɖóìn-nyɔ̀ ɓěɔ̀ wuɖu, sepóɛɖé ɔ sɛ́ɖɛ́ìn dyí ɓɛ́ ɓě kéɛ náa nyu. 2-3Gèɖèpɔ́ɔ̀-cèè-ɖɛ̀ɔ̀ ɖá, “Dyé m̀ ɖe kè m̀ ɓǎ kpéín, ɓɛ́ mana ké m̀ kɔ̃ nì, ɓɛ́ m̀ ké ɓóɖó-kpàà kɔ̃ hwèɖèìn.” Ɖɛ nìà kɛ mɔ̀ gma kĩ́ín-kĩ́ín ɓɛ́ ɔ ɓéɖé nyɛ́nɛ́ín-ɖáìn-ɖɛ̀ kɛ.
4Ɓě mɔ̀ ɓǎ ɓěɛɛ, ɓěǐn ɖá ɓɛ́ ɓě ké ɓěɛ̀ dyú ɓěɔ̀ hwòɖǒ-ɖé-ɖei-po-ɖɛ̀ ɖò bũ̌ nyu, kɛɛ ɓě mɛ gmɛ̀ìn wa, ɓɛ́ ɓě ké wa kpeɖe zà, ɓɛ́ ɓě ké wa náún po kà Bounɓoɔ̀ nyɔ ɓěɔ̀ ɓéɖé ɓɛ́ wa kéɛ nyuɛ.
Gǐì ɓě kè waà gbo-nì-ɓǎ ɓě
5Ɓě mɔ̀ gǐì ɓěɛɛ, ɓě mɛ nyu nyɔ ɓě ɓɛ́ wa kɔ̃̀à ɓě wuɖuí nɔ̄ ɓóɖó-kpàà kɔ̃ɛɛ wuɖu. Ɓě mɛ fɛ̃̀ìn wa dyi, ɓɛ́ ɓě ké wa kpéín dyé. Ɓě mɛ nyuɛ ɖéɛ hwòɖǒ wáɖáá mú kà ɓě nìɔ̌ kà Kɛ́ɖɛ́ì bìì kũ̀à nyuɛń nyɛ. 6Ɔ se ɖɛ ɓɛ́ ɓě ké nyɔɔ̀ dyiɛ dyé hwɛ̀ ɓɛ́ ɓě kéɛ nyu kà nyɔ mɔ́ ɓɛ́ wa kéɔ́ kà nyɔǔn-dyùɛ̀ hwòɖǒ dyi dèɛ. Kɛɛ ɖé ɓěɛ̀ hwòɖǒ-dyùà séín múɛɛ, ɓě mɛ nyu ɖɛ Gèɖèpɔ́ɔ̀ mɔ́ɔ kà Kɛ́ɖɛ́ì gǐì ɓě nìà kɛ. 7Ɓě mɛ nyu ɓěɛ̀ kũ̀à ɓěɔ̀ ɖé múà mú kà nyɔ ɓě nyuà Bounɓoɔ̀ bìì kũ̀à, ké wa seà nyɔǔn-dyù bìì nyuɛ. 8Ɔ mɛ nì ɓě hwìɖǐi kà Bounɓoɔ̀ mu nyɔ séín ɓě pɛ́ɛ̀ìn ɓó kũ̀à nɔ̀mɔ̀ dyíin ɓě ɓɛ́ wa nyuɛɛ jèɛ, kɛbì wa mɛ jǔ gǐì, mɔɔ wa mɛ se gǐì kɛ.
9Ɓě mɔ̀ gbo-nì-ɓǎ ɓěɛɛ, ɓě mɛ nyu ɖɛ sɛ́ɖɛ́ìn dyíɛɛ ɓěɛ̀ gǐì ɓěɔ̀ bũ̌. Ɓě ɓɔ́ wa fã̀à-wùɖù ɓě gbo poɛ. Ɔ mɛ nì ɓě hwìɖǐi kà ɓɛ́ ɓě kè ɓěɛ̀ gǐì ɓěɔ̀ ɓéɖé Wuɖuí-kɔ̃̀-nyɔ̀ dyúáɖò ɖé dyɔún, ké ɔ se nyɔ ɖò mú ɖɛ̀ɓɛ̀ mìɔ, ɓɛ́ ɔ ké nyɔ ɖò mɔ̀ùn dyí ziɛ.
Gèɖèpɔ́ɔ̀ toún-vɔ̃̀ìn-ɖɛ̀ ɓě
10Ɖɛ hwɛ̀ìn-gbɔ ḿ ɓéɖé ḿ ké ɓě gbo cɛ̃ɛ mɔ̀, ɓě mɛ ku dyi ɖé Bounɓoɔ̀ mú, dyììn ɖé ɔ kpé zi dyí ɓúáuńɔ̀ mú. 11Ɓě mɛ po toún-vɔ̃̀ìn-ɖɛ̀ séín ɓě ɓɛ́ Gèɖèpɔ́ɔ̀ nyíà ɓěɛɛ mú, ɓɛ́ ɓě ké dyi nyànàà ɓɛ́ìn, ɓɛ́ ɓě ké Nɔɔ́-nàmàǔn sɛ́ɖɛ́-ɖɛ̀ ɓěɔ̀ gbo vɔ̃. 12Sepóɛɖé à se nyɔǔn-dyù gbo vɔ̃uń nì. À nì zùù gbà kúɖúú ɓě nìà à ɖeiɛɛ gbo vɔ̃uń. Wa mɔ̀ nyɔ-kɔ̃in-nyɔ̀ ɓě kè kpé ɓě ɔ kè ɓóɖó-kpà gànáà wuɖuí-kɔ̃̀-nyɔ̀ ɓě ɓɛ́ wa nìà tíe-kpò-tì ɓɛ́ à nìà mú kàǔn wɛ̃ɛ múɛ. 13Ɔ jèɛɛ, ɓě mɛ ɖú Gèɖèpɔ́ɔ̀ toún-vɔ̃̀ìn-ɖɛ̀ séín ɓěɔ̀ dyí. Nìí, ti ɓɛ́ wé nyìnììn dyíinɔ̀ muà dyiìn nyɛɛ, ɓěɛ̀ mú-nyɛ́-nyɔ̀ɔ̀ dyi ɓě gbo vɔ̃ín, ɓě mu ɔ gbo vɔ̃ùn, ké ɓě ɖǎ ɖɛ séín nyuɛ hwɔ ní, nìí, ɓě mu dyi nyànàùn gãun-gãun ke.
14Ɔ jèɛɛ, ɓě mɛ nyànà dyi. Ɖɛ ɓě mɛ jìnììn gboɛɛ, ɔ mɛ mɔ̀ jǎà. Ké dyí-sɛ́ɖɛ́ìn-sɛ́ɖɛ́ìn mɛ jǔ ɓěɛ̀ toún-vɔ̃̀ìn-ɖɔ̀. 15Bɔ̃̌ nɔ̀mɔ̀ dyíin ɓá gìɖìǐ dyíɛɛ cɛ̃ jè ti-dyé-dyé mɛ jǔ ɓěɛ̀ ɓoún-po-bà. 16Ɓě mɛ kpa ɓěɛ̀ dyí-zĩ̀ìn-ɖɛ̀ mɔ̀à hwìɖǐǐ-taɓa-taɓa kɛɛ ti séín. Ɔ mɔ̀ ɖɛ ɖé ɓě ɓɛ́ìn sé-kpìì nì nyɛ mánáín séín ɓě ɓɛ́ Ɖɛ-gbà-nyu-nyɔ̀ɔ̀ poà kɛɛ mɔ́ìn. 17Ɓě mɛ kpɔ̃ pó-pó dyi, ɓɛ́ ɔ ké ɓěɛ̀ dú-dèìn-ɖɛ̀ jǔ. Ɓě mɛ ɖú gàsíà ɓɛ́ Zùùɔ̀ nyí ɓě, ɓɛ́ ɔ mɔ̀à Gèɖèpɔ́ɔ̀-wùɖùɔ̀ kɛɛ dyí. 18Ɓě mɛ ɓaà, ɓɛ́ Gèɖèpɔ́ɔ̀ ké ɓě gbo kpá ɖé ɖɛ séín ɓě nìà kɛ mú. Ɓě mɛ ɓaà ti séín dyììn ɖé Zùùɔ̀ mú. Ɓě mɛ nì ɓɛ́ɖɛ́ kɔ̃, ɓɛ́ ɓě ké dúún ku kánáá pū. Ɓě mɛ ɓaà ti séín ɓaɖa, ɓó Gèɖèpɔ́ɔ̀-nyɔ̀ séín ɓěɔ̀ jè. 19Ké ɓě mɛ ɓaà ɓó mɔ́ún jè ɖekè, ɓɛ́ ḿ dyi ti dyé ɓɛ́ ḿ ké wùɖù ní, nìí, Gèɖèpɔ́ɔ̀ ké ḿ wuɖu ɓěɔ̀ nyí, ɓɛ́ ḿ ké se fɛ̃̀ìn, ɓɛ́ ḿ kéɛ nyu ɓɛ́ nyɔǔn ké wuɖu jɛ́ɛ́ nì bɔ̃̌ nɔ̀mɔ̀ dyíinɔ̀ múɛɛ dyí dyuò. 20Wa po ḿ dyɔ̀ɔ̌ ɓě mú dyɛo, kɛɛ ɓó bɔ̃̌ nɔ̀mɔ̀ dyíinɔ̀ jèɛɛ, ḿ mɔ̀ Kɛ́ɖɛ́ì bɛ̃̌ǐn-nyɔ̀. Ɔ jèɛɛ, ɓě mɛ ɓaà, ɓɛ́ ḿ ké se fɛ̃̀ìn, ɓɛ́ ḿ ké ɔ jè cɛ̃ kà ḿ ɓéɖé ɓɛ́ ḿ kéɛ nyuɛ.
Cuò-wùɖù
21Tíkíkà mɔ̀à à ɖɛ̀ɓɛ̀-ɖìǐ kè gbo-nì-nyɔ̀ ɓɛ́ nyɔǔn ɓɛ́ìn hwòɖǒ kɔ̃ dèɛ̀ ɖé Bounɓoɔ̀ kũ̀àɔ̀ múɛɛ, ɔ mu ɖɛ séín ɓá ḿ dyíɛɛ jè ɓě gbo cɛ̃ìn, ɓɛ́ ɓě ké kà ḿ nyu nìɛ̀ kɛɛ dyí dyuò. 22Ɖɛ kɔ̃̀ jè ḿ nìà ɔ ɖé ɓě gbo ɖoɓoɛń nyɛɛ, ɔ nìàǒ wɛ̀. Ɔ mɔ̀, ɓɛ́ ɓě ké kà à nyu nìɛ̀ kɛɛ dyí dyuò, ɓɛ́ ɔ ké ɓě hwòɖǒ dyi dè.
23Gèɖèpɔ́ɔ̀ mɔ̀à Ɓǎɔ̀ kɛ kè Bounɓo Jízɛ̀ Kɛ́ɖɛ́ì mɛ nyí à ɖíí séín ɓěɔ̀ gìɖìǐ kè ɖɛ̀ɓɛ̀ǐn-ɖɛ̀ɓɛ̀ǐn ɔ kè hwìɖǐǐ-taɓa-taɓa. 24Gèɖèpɔ́ɔ̀ mana mɛ nì nyɔ séín ɓě ɖɛ̀ɓɛ̀à à Bounɓo Jízɛ̀ Kɛ́ɖɛ́ì mú, ké waà ɖɛ̀ɓɛ̀ǐn-ɖɛ̀ɓɛ̀ǐnɔ̀ seà kɔ̃ sɔ̀ɔ̀ ɓɛ́ìn nyɛɛ kɔ̃.
Chwazi Kounye ya:
Ìfísĩ̀ɔ̀ 6: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.
Ìfísĩ̀ɔ̀ 6
6
Dyú ɓě kè waà wóɖóìn-nyɔ̀ ɓě
1Dyú ɓě, kà ɓě nìà Bounɓoɔ̀ múɛɛ, ɓě mɛ nyu ɓěɛ̀ wóɖóìn-nyɔ̀ ɓěɔ̀ wuɖu, sepóɛɖé ɔ sɛ́ɖɛ́ìn dyí ɓɛ́ ɓě kéɛ náa nyu. 2-3Gèɖèpɔ́ɔ̀-cèè-ɖɛ̀ɔ̀ ɖá, “Dyé m̀ ɖe kè m̀ ɓǎ kpéín, ɓɛ́ mana ké m̀ kɔ̃ nì, ɓɛ́ m̀ ké ɓóɖó-kpàà kɔ̃ hwèɖèìn.” Ɖɛ nìà kɛ mɔ̀ gma kĩ́ín-kĩ́ín ɓɛ́ ɔ ɓéɖé nyɛ́nɛ́ín-ɖáìn-ɖɛ̀ kɛ.
4Ɓě mɔ̀ ɓǎ ɓěɛɛ, ɓěǐn ɖá ɓɛ́ ɓě ké ɓěɛ̀ dyú ɓěɔ̀ hwòɖǒ-ɖé-ɖei-po-ɖɛ̀ ɖò bũ̌ nyu, kɛɛ ɓě mɛ gmɛ̀ìn wa, ɓɛ́ ɓě ké wa kpeɖe zà, ɓɛ́ ɓě ké wa náún po kà Bounɓoɔ̀ nyɔ ɓěɔ̀ ɓéɖé ɓɛ́ wa kéɛ nyuɛ.
Gǐì ɓě kè waà gbo-nì-ɓǎ ɓě
5Ɓě mɔ̀ gǐì ɓěɛɛ, ɓě mɛ nyu nyɔ ɓě ɓɛ́ wa kɔ̃̀à ɓě wuɖuí nɔ̄ ɓóɖó-kpàà kɔ̃ɛɛ wuɖu. Ɓě mɛ fɛ̃̀ìn wa dyi, ɓɛ́ ɓě ké wa kpéín dyé. Ɓě mɛ nyuɛ ɖéɛ hwòɖǒ wáɖáá mú kà ɓě nìɔ̌ kà Kɛ́ɖɛ́ì bìì kũ̀à nyuɛń nyɛ. 6Ɔ se ɖɛ ɓɛ́ ɓě ké nyɔɔ̀ dyiɛ dyé hwɛ̀ ɓɛ́ ɓě kéɛ nyu kà nyɔ mɔ́ ɓɛ́ wa kéɔ́ kà nyɔǔn-dyùɛ̀ hwòɖǒ dyi dèɛ. Kɛɛ ɖé ɓěɛ̀ hwòɖǒ-dyùà séín múɛɛ, ɓě mɛ nyu ɖɛ Gèɖèpɔ́ɔ̀ mɔ́ɔ kà Kɛ́ɖɛ́ì gǐì ɓě nìà kɛ. 7Ɓě mɛ nyu ɓěɛ̀ kũ̀à ɓěɔ̀ ɖé múà mú kà nyɔ ɓě nyuà Bounɓoɔ̀ bìì kũ̀à, ké wa seà nyɔǔn-dyù bìì nyuɛ. 8Ɔ mɛ nì ɓě hwìɖǐi kà Bounɓoɔ̀ mu nyɔ séín ɓě pɛ́ɛ̀ìn ɓó kũ̀à nɔ̀mɔ̀ dyíin ɓě ɓɛ́ wa nyuɛɛ jèɛ, kɛbì wa mɛ jǔ gǐì, mɔɔ wa mɛ se gǐì kɛ.
9Ɓě mɔ̀ gbo-nì-ɓǎ ɓěɛɛ, ɓě mɛ nyu ɖɛ sɛ́ɖɛ́ìn dyíɛɛ ɓěɛ̀ gǐì ɓěɔ̀ bũ̌. Ɓě ɓɔ́ wa fã̀à-wùɖù ɓě gbo poɛ. Ɔ mɛ nì ɓě hwìɖǐi kà ɓɛ́ ɓě kè ɓěɛ̀ gǐì ɓěɔ̀ ɓéɖé Wuɖuí-kɔ̃̀-nyɔ̀ dyúáɖò ɖé dyɔún, ké ɔ se nyɔ ɖò mú ɖɛ̀ɓɛ̀ mìɔ, ɓɛ́ ɔ ké nyɔ ɖò mɔ̀ùn dyí ziɛ.
Gèɖèpɔ́ɔ̀ toún-vɔ̃̀ìn-ɖɛ̀ ɓě
10Ɖɛ hwɛ̀ìn-gbɔ ḿ ɓéɖé ḿ ké ɓě gbo cɛ̃ɛ mɔ̀, ɓě mɛ ku dyi ɖé Bounɓoɔ̀ mú, dyììn ɖé ɔ kpé zi dyí ɓúáuńɔ̀ mú. 11Ɓě mɛ po toún-vɔ̃̀ìn-ɖɛ̀ séín ɓě ɓɛ́ Gèɖèpɔ́ɔ̀ nyíà ɓěɛɛ mú, ɓɛ́ ɓě ké dyi nyànàà ɓɛ́ìn, ɓɛ́ ɓě ké Nɔɔ́-nàmàǔn sɛ́ɖɛ́-ɖɛ̀ ɓěɔ̀ gbo vɔ̃. 12Sepóɛɖé à se nyɔǔn-dyù gbo vɔ̃uń nì. À nì zùù gbà kúɖúú ɓě nìà à ɖeiɛɛ gbo vɔ̃uń. Wa mɔ̀ nyɔ-kɔ̃in-nyɔ̀ ɓě kè kpé ɓě ɔ kè ɓóɖó-kpà gànáà wuɖuí-kɔ̃̀-nyɔ̀ ɓě ɓɛ́ wa nìà tíe-kpò-tì ɓɛ́ à nìà mú kàǔn wɛ̃ɛ múɛ. 13Ɔ jèɛɛ, ɓě mɛ ɖú Gèɖèpɔ́ɔ̀ toún-vɔ̃̀ìn-ɖɛ̀ séín ɓěɔ̀ dyí. Nìí, ti ɓɛ́ wé nyìnììn dyíinɔ̀ muà dyiìn nyɛɛ, ɓěɛ̀ mú-nyɛ́-nyɔ̀ɔ̀ dyi ɓě gbo vɔ̃ín, ɓě mu ɔ gbo vɔ̃ùn, ké ɓě ɖǎ ɖɛ séín nyuɛ hwɔ ní, nìí, ɓě mu dyi nyànàùn gãun-gãun ke.
14Ɔ jèɛɛ, ɓě mɛ nyànà dyi. Ɖɛ ɓě mɛ jìnììn gboɛɛ, ɔ mɛ mɔ̀ jǎà. Ké dyí-sɛ́ɖɛ́ìn-sɛ́ɖɛ́ìn mɛ jǔ ɓěɛ̀ toún-vɔ̃̀ìn-ɖɔ̀. 15Bɔ̃̌ nɔ̀mɔ̀ dyíin ɓá gìɖìǐ dyíɛɛ cɛ̃ jè ti-dyé-dyé mɛ jǔ ɓěɛ̀ ɓoún-po-bà. 16Ɓě mɛ kpa ɓěɛ̀ dyí-zĩ̀ìn-ɖɛ̀ mɔ̀à hwìɖǐǐ-taɓa-taɓa kɛɛ ti séín. Ɔ mɔ̀ ɖɛ ɖé ɓě ɓɛ́ìn sé-kpìì nì nyɛ mánáín séín ɓě ɓɛ́ Ɖɛ-gbà-nyu-nyɔ̀ɔ̀ poà kɛɛ mɔ́ìn. 17Ɓě mɛ kpɔ̃ pó-pó dyi, ɓɛ́ ɔ ké ɓěɛ̀ dú-dèìn-ɖɛ̀ jǔ. Ɓě mɛ ɖú gàsíà ɓɛ́ Zùùɔ̀ nyí ɓě, ɓɛ́ ɔ mɔ̀à Gèɖèpɔ́ɔ̀-wùɖùɔ̀ kɛɛ dyí. 18Ɓě mɛ ɓaà, ɓɛ́ Gèɖèpɔ́ɔ̀ ké ɓě gbo kpá ɖé ɖɛ séín ɓě nìà kɛ mú. Ɓě mɛ ɓaà ti séín dyììn ɖé Zùùɔ̀ mú. Ɓě mɛ nì ɓɛ́ɖɛ́ kɔ̃, ɓɛ́ ɓě ké dúún ku kánáá pū. Ɓě mɛ ɓaà ti séín ɓaɖa, ɓó Gèɖèpɔ́ɔ̀-nyɔ̀ séín ɓěɔ̀ jè. 19Ké ɓě mɛ ɓaà ɓó mɔ́ún jè ɖekè, ɓɛ́ ḿ dyi ti dyé ɓɛ́ ḿ ké wùɖù ní, nìí, Gèɖèpɔ́ɔ̀ ké ḿ wuɖu ɓěɔ̀ nyí, ɓɛ́ ḿ ké se fɛ̃̀ìn, ɓɛ́ ḿ kéɛ nyu ɓɛ́ nyɔǔn ké wuɖu jɛ́ɛ́ nì bɔ̃̌ nɔ̀mɔ̀ dyíinɔ̀ múɛɛ dyí dyuò. 20Wa po ḿ dyɔ̀ɔ̌ ɓě mú dyɛo, kɛɛ ɓó bɔ̃̌ nɔ̀mɔ̀ dyíinɔ̀ jèɛɛ, ḿ mɔ̀ Kɛ́ɖɛ́ì bɛ̃̌ǐn-nyɔ̀. Ɔ jèɛɛ, ɓě mɛ ɓaà, ɓɛ́ ḿ ké se fɛ̃̀ìn, ɓɛ́ ḿ ké ɔ jè cɛ̃ kà ḿ ɓéɖé ɓɛ́ ḿ kéɛ nyuɛ.
Cuò-wùɖù
21Tíkíkà mɔ̀à à ɖɛ̀ɓɛ̀-ɖìǐ kè gbo-nì-nyɔ̀ ɓɛ́ nyɔǔn ɓɛ́ìn hwòɖǒ kɔ̃ dèɛ̀ ɖé Bounɓoɔ̀ kũ̀àɔ̀ múɛɛ, ɔ mu ɖɛ séín ɓá ḿ dyíɛɛ jè ɓě gbo cɛ̃ìn, ɓɛ́ ɓě ké kà ḿ nyu nìɛ̀ kɛɛ dyí dyuò. 22Ɖɛ kɔ̃̀ jè ḿ nìà ɔ ɖé ɓě gbo ɖoɓoɛń nyɛɛ, ɔ nìàǒ wɛ̀. Ɔ mɔ̀, ɓɛ́ ɓě ké kà à nyu nìɛ̀ kɛɛ dyí dyuò, ɓɛ́ ɔ ké ɓě hwòɖǒ dyi dè.
23Gèɖèpɔ́ɔ̀ mɔ̀à Ɓǎɔ̀ kɛ kè Bounɓo Jízɛ̀ Kɛ́ɖɛ́ì mɛ nyí à ɖíí séín ɓěɔ̀ gìɖìǐ kè ɖɛ̀ɓɛ̀ǐn-ɖɛ̀ɓɛ̀ǐn ɔ kè hwìɖǐǐ-taɓa-taɓa. 24Gèɖèpɔ́ɔ̀ mana mɛ nì nyɔ séín ɓě ɖɛ̀ɓɛ̀à à Bounɓo Jízɛ̀ Kɛ́ɖɛ́ì mú, ké waà ɖɛ̀ɓɛ̀ǐn-ɖɛ̀ɓɛ̀ǐnɔ̀ seà kɔ̃ sɔ̀ɔ̀ ɓɛ́ìn nyɛɛ kɔ̃.
Chwazi Kounye ya:
:
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.