Àpɔ́sò 23
23
1Ké Pɔ́ɔ̀ gmɔ̀ ma tɔ̀ɔ̀-ɓìɔ̀ ɓěɔ̀ dya gãa, ké ɔ ɖá, “Ɖíí ɓě, ḿ wóɖóó wɛɛ, ní hwòɖǒɔ̀ nì wáɖáá ɓó Gèɖèpɔ́ɔ̀ gbo tee.” 2Ké Ánànádyà ɓɛ́ ɔ mɔ̀ ma sáa-zà-nyɔ̀ vɛ̀nɛ̀ɔ̀ kɛɛ cɛ̃ɛ ma nyɔ ɓě ɓɛ́ wa nyànà ma ɓó Pɔ́ɔ̀ wáún dyiɛɛ gbo, ɓɛ́ wa ké ɔ kpá wĩín taɓa. 3Ké Pɔ́ɔ̀ cɛ̃ɛ ma ɔ gbo, ké ɔ ɖá, “Mɔ̀ mɔ̀à gbǒ ɓɛ́ wa poà tɛnɛɛ́-pɛ̀ɛ̀ bũ̌in nyɛɛ, Gèɖèpɔ́ɔ̀ mu mɔ̀ùn kpá wĩín taɓaùn. M̀ kò ɓóa dyi, ɓɛ́ m̀ ké ní zaaɔ̀ wɔ̃ po kà gmaɔ̀ nyuà cɛ̃ɛ kɛ, kɛɛ má, ɖɛ gmaɔ̀ ɖá nyɔ ní nyuɛɛ, ɖé m̀ ɖá wa mɛ nyuà ḿ bũ̌ kɛ̀e?”
4Ké nyɔ ɓě ɓɛ́ wa nyànà ma ɓó dyiɛɛ ɖá, “Nì mɔ́ ɓɛ́ m̀ ké Gèɖèpɔ́ɔ̀ sáa-zà-nyɔ̀ vɛ̀nɛ̀ɔ̀ wuɖuún ɖaɓaà?”
5Ké Pɔ́ɔ̀ ɖá, “Ɖíí ɓě, ḿ seɛ dyuò kà ɔ mɔ̀ sáa-zà-nyɔ̀ vɛ̀nɛ̀ɔ̀ kɛ. Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, ‘Mɔ̀ǔn ɖá ɓɛ́ m̀ ké nì nyɔ ɓěɔ̀ wuɖuí-kɔ̃̀-nyɔ̀ɔ̀ wuɖuún ɖaɓa.’ ”
6Kɛɛ Pɔ́ɔ̀ dyéɛ ma kà tɔ̀ɔ̀-ɓìɔ̀ ɓěɔ̀ ɖíɛ́ ɓě mɔ̀ ma Sádyùsíì-nyɔ̀, ké ɖíɛ́ ɓě mɔ̀ ma Fáɖòsíì-nyɔ̀ ɓě kɛ, ké ɔ ɖá, “Ɖíí ɓě, ḿ mɔ̀ Fáɖòsíì-nyɔ̀, ké ḿ mɔ̀ Fáɖòsíì-nyɔ̀ɛ̀ dyú. Ɖɛ kɔ̃̀ jè wa kpɔ̃à ḿ wɛ̃ɛ, ɔ mɔ̀, ḿ dèɛ̀ hwòɖǒ kɔ̃ kà nyɔ ɖò dyi mɛ́ín, ɔ mu gĩɔ wóɖóùn ɖeɛ.”
7Ti ɔ ɖǎ ma ɖɛa cɛ̃ɛ, Fáɖòsíì-nyɔ̀ ɓěɔ̀ kè Sádyùsíì-nyɔ̀ ɓěɔ̀ ɖú ma dòǐn zà kpàǐ cá, ké nyɔ ɓěɔ̀ ge ma mú. 8Sádyùsíì-nyɔ̀ ɓěɔ̀ mɔ̀ùn ɖá ɔ jǔ ké nyɔ ɖò dyi mɛ́ín, nìí, ɔ se gĩɔ wóɖóɛ ɓɛ́ìn ɖe. Wa ɖá ínjà kè ɖɛ jè ɖò se nì, kɛɛ Fáɖòsíì-nyɔ̀ ɓěɔ̀ mɔ̀ùn kpɔ̃ ɖɛ séín ɓěɛ̀ dyi. 9Ti wa ɖú ma kuɖu-kuɖu ɓáún-ɓáún nyu kpàǐ kɛɛ, Fáɖòsíì-nyɔ̀ ɓěɔ̀ Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɖíɛ́ ɓě nyànà ma dyi, ké wa zi ma Pɔ́ɔ̀ gbo, ké wa ɖá, “À se gàa nìà kɛ kɛɛ ɖò mú dyé. Ti ɖòɛ̀ ɓaɖaín, ínjà ɖò mɔɔ ɖɛ ɖò ɖǎ ɔ gbo wùɖù.”
10Ti waà dòǐn-zà-zàɔ̀ nì ma wɔ̃ kuɛń nyɛɛ, sójà-ɓǎɔ̀ fɛ̃̀ìn ma, wa ní kɔ̃̀ ɖà Pɔ́ɔ̀ dyi fáìn. Ɔ jèɛɛ, ɔ cɛ̃ɛ ma sójà ɓěɔ̀ gbo, ɓɛ́ wa ké Pɔ́ɔ̀ nyɔ ɓěɔ̀ hwìɛ̀ zà, ɓɛ́ wa ké ɔ ɖé ɔ sójà-gbòɔ̀ zɔ̃̌ kpa.
11Ɓó máaún wɛ̃ɛ, Bounɓoɔ̀ wóɖóìn ma Pɔ́ɔ̀ dyí, ké ɔ ɖá, “M̀ mɛ ku hwòɖǒ. M̀ ɖǎ ḿ bìì zàse nyu nɔ̄ Jùɖúsɛ̀ɖɛ̀ìn-hwɔ̀ɖɔ̀ɛ̀ mú, ké m̀ ɓéɖé ɓɛ́ m̀ ké ɖɛ dyúáɖòɔ̀ ɖé Wóɖóùn-hwɔ̀ɖɔ̀ɔ̀ mú nyu ɖekè.”
Wa sɔ́ Pɔ́ɔ̀ ɓɛ́ wa ké ɔ ɖáɓá
12Ti zɔ̃ ɖǎ ma zɔ̃ɛɛ, Júù-nyɔ̀ ɓěɔ̀ ɖíɛ́ ɓě poìn ma wuɖuí, ké wa ɖi ma wuɖu kà ɔ jǔ ké wa se ma Pɔ́ɔ̀ ɖáɓáín, nìí, wa se ní kè ɖii-ɖɛ̀ ɖò wɔ̃ dɔ̃̌ɔ muɛ. 13Nyɔ ɓě ɓɛ́ wa ɖi ma kà wuɖu kɛɛ, wa zi ma nyɔ-kpò kpáɖá-nyɔ sɔ̃́ kɔ̃. 14Ké wa mu ma ɖé sáa-zà-nyɔ̀ kpa ɖɛ ɓěɔ̀ kè nyɔ vɛ̀nɛ̀ ɓěɔ̀ gbo, ké wa ɖá, “À ɖǎ wuɖu ɖi cá kà ɔ jǔ ké à se Pɔ́ɔ̀ ɖáɓáín, nìí, à se ɖii-ɖɛ̀ ɖò wɔ̃ dɔ̃̌ɔ muɛ. 15Ɔ jèɛɛ, ɓě kè tɔ̀ɔ̀-ɓìɔ̀ ɓěɔ̀ mɛ cɛ̃ɛ sójà-ɓǎɔ̀ gbo, ɓɛ́ ɔ ké Pɔ́ɔ̀ nɔ̄ ɓě gbo dyà kà nyɔ mɔ́ ɓɛ́ nyɔ kéɔ́ kà ɖɛɔ̀ múin gmɔìn nɔ̀mɔ̀ dyíin nyɛ. Ké à ɖǎ ti dyé ɓɛ́ à ké ɔ ɖáɓá, hwɛ̀ ɓɛ́ ɔ ké nyini dyɛ mɔ̀ùn.”
16Ɓó tia ɓaɖaa, Pɔ́ɔ̀ ɖíí-màà ɓéɖé ma gàa-dyù hwà ɖò, ké ɔ wɔ̃́ ma sɔ́-sɔ́ ɓě ɓɛ́ nyɔ ɓěɔ̀ ɖǎ ma kà nyuɛ. Ɔ jèɛɛ, ɔ mu, ké ɔ dyá ma ɖé sójà-gbòɔ̀ mú, ké ɔ cɛ̃ɛ ma Pɔ́ɔ̀ gbo. 17Ké Pɔ́ɔ̀ ɖá ma sójà hɔ̃dɛ̀ɖɛ̀ ɖòɛ̀ ɓǎ ɓěɔ̀ ɖò, ké ɔ cɛ̃ɛ ma ɔ gbo, ké ɔ ɖá, “Kpa gàa-dyù nìà kɛ ɖé ɓěɛ̀ ɓǎɔ̀ gbo. Ɔ mɔ́ ɓɛ́ ɔ ké ɔ ɖɛ ɖò gbo cɛ̃.” 18Ɔ jèɛɛ, ɔ ɖú ma gàa-dyùɔ̀ dyí, ké ɔ kpa ma ɔ ɖé waà sójà-ɓǎɔ̀ gbo, ké ɔ ɖá, “Pɔ́ɔ̀ mɔ̀à kpɔɖɔ-ɖeín-nì-nyɔ̀ɔ̀ kɛɛ ɖáɔ́ má ḿ, ké ɔ cɛ̃ɔ́ɔ ḿ gbo, ké ɔ ɖá ḿ mɛ dyà gàa-dyù nìà kɛ m̀ gbo. Ɔ ɓéɖé ɖɛ ɖò, ɓɛ́ ɔ kéɛ m̀ gbo cɛ̃.”
19Ké sójà-ɓǎɔ̀ kpɔ̃ ma gàa-dyùɔ̀ sɔ̃in, ké ɔ kpa ma ɔ gã gbo, ké ɔ diè ma ɔ dyi, ké ɔ ɖá, “Ɖɛ́ m̀ ɓéɖé ɓɛ́ m̀ kéà ḿ gbo cɛ̃ɛ́?”
20Ké ɔ ɖá, “Júù-nyɔ̀ ɓěɔ̀ ɖǎ wuɖuí poìn, ɓɛ́ wa kéɛ m̀ gbo cɛ̃, ɓɛ́ m̀ ké Pɔ́ɔ̀ ɖé tɔ̀ɔ̀-ɓìɔ̀ ɓěɔ̀ gbo kpa ɓó gàɖàà kà wa mɔ́ ɓɛ́ wa kéɔ́ kà ɔ dyi diè nɔ̀mɔ̀ dyíin nyɛ. 21Mɔ̀ǔn ɖá ɓɛ́ m̀ ké wɔ̃́, sepóɛɖé wa ɓáún-ɓáún nì ɔ hwìè fòèɛ̌n. Wa zi nyɔ-kpò kpáɖá-nyɔ sɔ̃́ kɔ̃. Wa ɖǎ wuɖu ɖi kà ɔ jǔ ké wa se ɔ ɖáɓáín, wa se ní kè ɖii-ɖɛ̀ ɖò wɔ̃ dɔ̃̌ɔ muɛ. Ké wa dyé ti kàǔn. Wa nì fòɛ̌n ɓɛ́ m̀ ké wɔ̃́ pū.”
22Ké sójà-ɓǎɔ̀ cɛ̃ɛ ma ɔ gbo, ké ɔ ɖá, “M̀ mɛ mu. Kɛɛ mɔ̀ǔn ɖá ɓɛ́ nyɔ ɖò kéɛ dyuò kà m̀ ɖǎ ḿ ɖɛ nìà kɛ gbo cɛ̃ɛ.”
Wa tò Pɔ́ɔ̀ ɖé ɓóɖóɔ̀ nàìn-nyɔ̀ mɔ̀ Fíɖè kɛɛ gbo
23Ti ɓɛ́ sójà-ɓǎɔ̀ wɔ̃́ ma ɖɛa kɛɛ, ɔ ɖá ma sójà hɔ̃dɛ̀ɖɛ̀ ɓěɔ̀ ɓǎ sɔ̃́, ké ɔ cɛ̃ɛ ma wa gbo, ké ɔ ɖá, “Ɓě ɖú sójà hɔ̃dɛ̀ɖɛ̀ sɔ̃́ kè sǒ-nàìn-nyɔ̀ kpáɖá-nyɔ tã ɓaɖa-bùè ɔ kè nyɔ-kpò hɔ̃dɛ̀ɖɛ̀ sɔ̃́ ɓě mɔ̀ ɖí-vɔ̃̀ìn-nyɔ̀ ɓěɛɛ dyí, ɓɛ́ ɓě ké ti dyé ɓɛ́ ɓě ké ɖé Sɛ̀sɛ̀wíɖíà-hwɔ̀ɖɔ̀ɔ̀ mú mu ɓó nyɔ ɓě gbǒǔn-mu-tì. 24Ké ɓě mɛ dyà nimii ɖò, ɓɛ́ Pɔ́ɔ̀ kéɛ kɔ̃ún kò, ɓɛ́ ɓě ké mu. Ké ɓě mɛ kpa ɔ, ɓɛ́ ɓě ké ɔ ɖé Fíɖè mɔ̀à gɔ̌mànàɔ̀ kɛɛ gbo nyìnììn.” 25Ké sójà-ɓǎɔ̀ céè ma céè-ɖɛ̀ ɖò, ké céè-ɖɛ̀ɔ̀ ɖá,
26“Ɓǎ Fíɖè, ḿ zà m̀ nyíɔún. Ní nyɛ́nɛ́ mɔ̀ Kɔ́ɖɔ́ɖìàsì Ɖísìà. 27Júù-nyɔ̀ ɓěɔ̀ kpɔ̃ ma gàa nìà kɛ, ké wa nì ma ɔ ɖáɓáuń muɛń nyɛ̀nɛ̀ɛ̀, ké ḿ kè ní sójà ɓěɔ̀ ɓɛ̀ɖɛ̀ìn ma ɓó dyí, ké à póìn ma ɔ wa xwaún, sepóɛɖé ḿ ɖǎa ma wɔ̃́ kà ɓɛ́ ɔ mɔ̀ ma Wóɖóùn-dyù kɛ. 28Ké ní mɔ́ ɓɛ́ ḿ ké ma ɖɛ kɔ̃̀ jè wa kpɔ̃ ma kà ɔ kɛɛ múin wɔ̃́. Ɔ jèɛɛ, ḿ kpa ma ɔ ɖé waà tɔ̀ɔ̀-ɓìɔ̀ ɓěɔ̀ gbo. 29Ḿ wɔ̃́ɔ ma kà wa kpɔ̃ ma ɔ ɓó wa mìɔùn nììn gma ɓěɔ̀ jèɛ. Kɛɛ ɖɛ kɔ̃̀ jè wa kpɔ̃ ma kà ɔ kɛɛ, ɔ se ɖɛ kɔ̃̀ jè ḿ ké ɔ kpɔɖɔ ɖeín po, mɔɔ ɓɛ́ ḿ ké ɔ ɖáɓáa. 30Kɛɛ ḿ ɖǎa wɔ̃́ kà ɓɛ́ wa poìn wuɖuí, ɓɛ́ wa ké ma ɔ ɖáɓáa. Ɔ jèɛɛ, ḿ tòà ɔ ɖé m̀ gbo wàɖà kɛ̀. Ké ḿ ɖǎa nyɔ ɓě kpɔ̃à ɔ kɛɛ gbo cɛ̃, ɓɛ́ wa ké ɖɛ kɔ̃̀ jè wa kpɔ̃à ɔ kɛɛ m̀ dyúa kɔ̃in zaìn.”
31Ké sójà ɓěɔ̀ ɖú ma Pɔ́ɔ̀ dyí, ké wa kpa ma ɔ ɖé Ã̀típátèɖè-hwɔ̀ɖɔ̀ɔ̀ mú ɓó máaún-hwùɖùɔ̀ mú kà waà sójà-ɓǎɔ̀ nyuɛ ma kà wa gbo cɛ̃ɛ kɛ. 32Ké wéɔ̀ nyɔ kɔ ma ɓó dyíɛɛ, sójàɔ̀ nyɔ ɓě se ma kà sǒ nàìn nyɛɛ kɔ́ìn ma ɖe, ké wa mu ma ɖé waà sójà-gbòɔ̀ zɔ̃̌ ɖe. Ké sǒ-nàìn-nyɔ̀ ɓěɔ̀ kpa ma Pɔ́ɔ̀ dyúa, 33ké wa nyini ma Sɛ̀sɛ̀wíɖíà-hwɔ̀ɖɔ̀ɔ̀ mú. Ké wa tò ma céè-ɖɛ̀ɔ̀ gɔ̌mànàɔ̀ dyí, ké wa zà ma Pɔ́ɔ̀ xwáɖáún. 34Ké gɔ̌mànàɔ̀ zà ma céè-ɖɛ̀ɔ̀ wuɖuún, ké ɔ diè ma wa ɓóɖó kɔ̃̀ kɔ̃ Pɔ́ɔ̀ sɔ̀ɛɛ jè dyi. Ké ti ɔ wɔ̃́ɔ ma kà ɔ sɔ̀ ma Sàɖésìà-ɓòɖòɔ̀ kɔ̃ kɛɛ, 35ɔ cɛ̃ɛ ɔ gbo, ké ɔ ɖá, “Nyɔ ɓě kpɔ̃à m̀ wɛ̃ɛ, wa mu dyiìn, hwɛ̀ ɓɛ́ ḿ ké nì zaaɔ̀ múin gmɔìn.” Ké ɔ cɛ̃ɛ ma, ɓɛ́ wa ké Pɔ́ɔ̀ dyí gmɔ̀ ɖé Hɛ́wɔ̀ɖɔ̀ nììn gɔ̌mànàɔ̀ gbǒɔ̀ mú.
Chwazi Kounye ya:
Àpɔ́sò 23: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.
Àpɔ́sò 23
23
1Ké Pɔ́ɔ̀ gmɔ̀ ma tɔ̀ɔ̀-ɓìɔ̀ ɓěɔ̀ dya gãa, ké ɔ ɖá, “Ɖíí ɓě, ḿ wóɖóó wɛɛ, ní hwòɖǒɔ̀ nì wáɖáá ɓó Gèɖèpɔ́ɔ̀ gbo tee.” 2Ké Ánànádyà ɓɛ́ ɔ mɔ̀ ma sáa-zà-nyɔ̀ vɛ̀nɛ̀ɔ̀ kɛɛ cɛ̃ɛ ma nyɔ ɓě ɓɛ́ wa nyànà ma ɓó Pɔ́ɔ̀ wáún dyiɛɛ gbo, ɓɛ́ wa ké ɔ kpá wĩín taɓa. 3Ké Pɔ́ɔ̀ cɛ̃ɛ ma ɔ gbo, ké ɔ ɖá, “Mɔ̀ mɔ̀à gbǒ ɓɛ́ wa poà tɛnɛɛ́-pɛ̀ɛ̀ bũ̌in nyɛɛ, Gèɖèpɔ́ɔ̀ mu mɔ̀ùn kpá wĩín taɓaùn. M̀ kò ɓóa dyi, ɓɛ́ m̀ ké ní zaaɔ̀ wɔ̃ po kà gmaɔ̀ nyuà cɛ̃ɛ kɛ, kɛɛ má, ɖɛ gmaɔ̀ ɖá nyɔ ní nyuɛɛ, ɖé m̀ ɖá wa mɛ nyuà ḿ bũ̌ kɛ̀e?”
4Ké nyɔ ɓě ɓɛ́ wa nyànà ma ɓó dyiɛɛ ɖá, “Nì mɔ́ ɓɛ́ m̀ ké Gèɖèpɔ́ɔ̀ sáa-zà-nyɔ̀ vɛ̀nɛ̀ɔ̀ wuɖuún ɖaɓaà?”
5Ké Pɔ́ɔ̀ ɖá, “Ɖíí ɓě, ḿ seɛ dyuò kà ɔ mɔ̀ sáa-zà-nyɔ̀ vɛ̀nɛ̀ɔ̀ kɛ. Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, ‘Mɔ̀ǔn ɖá ɓɛ́ m̀ ké nì nyɔ ɓěɔ̀ wuɖuí-kɔ̃̀-nyɔ̀ɔ̀ wuɖuún ɖaɓa.’ ”
6Kɛɛ Pɔ́ɔ̀ dyéɛ ma kà tɔ̀ɔ̀-ɓìɔ̀ ɓěɔ̀ ɖíɛ́ ɓě mɔ̀ ma Sádyùsíì-nyɔ̀, ké ɖíɛ́ ɓě mɔ̀ ma Fáɖòsíì-nyɔ̀ ɓě kɛ, ké ɔ ɖá, “Ɖíí ɓě, ḿ mɔ̀ Fáɖòsíì-nyɔ̀, ké ḿ mɔ̀ Fáɖòsíì-nyɔ̀ɛ̀ dyú. Ɖɛ kɔ̃̀ jè wa kpɔ̃à ḿ wɛ̃ɛ, ɔ mɔ̀, ḿ dèɛ̀ hwòɖǒ kɔ̃ kà nyɔ ɖò dyi mɛ́ín, ɔ mu gĩɔ wóɖóùn ɖeɛ.”
7Ti ɔ ɖǎ ma ɖɛa cɛ̃ɛ, Fáɖòsíì-nyɔ̀ ɓěɔ̀ kè Sádyùsíì-nyɔ̀ ɓěɔ̀ ɖú ma dòǐn zà kpàǐ cá, ké nyɔ ɓěɔ̀ ge ma mú. 8Sádyùsíì-nyɔ̀ ɓěɔ̀ mɔ̀ùn ɖá ɔ jǔ ké nyɔ ɖò dyi mɛ́ín, nìí, ɔ se gĩɔ wóɖóɛ ɓɛ́ìn ɖe. Wa ɖá ínjà kè ɖɛ jè ɖò se nì, kɛɛ Fáɖòsíì-nyɔ̀ ɓěɔ̀ mɔ̀ùn kpɔ̃ ɖɛ séín ɓěɛ̀ dyi. 9Ti wa ɖú ma kuɖu-kuɖu ɓáún-ɓáún nyu kpàǐ kɛɛ, Fáɖòsíì-nyɔ̀ ɓěɔ̀ Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɖíɛ́ ɓě nyànà ma dyi, ké wa zi ma Pɔ́ɔ̀ gbo, ké wa ɖá, “À se gàa nìà kɛ kɛɛ ɖò mú dyé. Ti ɖòɛ̀ ɓaɖaín, ínjà ɖò mɔɔ ɖɛ ɖò ɖǎ ɔ gbo wùɖù.”
10Ti waà dòǐn-zà-zàɔ̀ nì ma wɔ̃ kuɛń nyɛɛ, sójà-ɓǎɔ̀ fɛ̃̀ìn ma, wa ní kɔ̃̀ ɖà Pɔ́ɔ̀ dyi fáìn. Ɔ jèɛɛ, ɔ cɛ̃ɛ ma sójà ɓěɔ̀ gbo, ɓɛ́ wa ké Pɔ́ɔ̀ nyɔ ɓěɔ̀ hwìɛ̀ zà, ɓɛ́ wa ké ɔ ɖé ɔ sójà-gbòɔ̀ zɔ̃̌ kpa.
11Ɓó máaún wɛ̃ɛ, Bounɓoɔ̀ wóɖóìn ma Pɔ́ɔ̀ dyí, ké ɔ ɖá, “M̀ mɛ ku hwòɖǒ. M̀ ɖǎ ḿ bìì zàse nyu nɔ̄ Jùɖúsɛ̀ɖɛ̀ìn-hwɔ̀ɖɔ̀ɛ̀ mú, ké m̀ ɓéɖé ɓɛ́ m̀ ké ɖɛ dyúáɖòɔ̀ ɖé Wóɖóùn-hwɔ̀ɖɔ̀ɔ̀ mú nyu ɖekè.”
Wa sɔ́ Pɔ́ɔ̀ ɓɛ́ wa ké ɔ ɖáɓá
12Ti zɔ̃ ɖǎ ma zɔ̃ɛɛ, Júù-nyɔ̀ ɓěɔ̀ ɖíɛ́ ɓě poìn ma wuɖuí, ké wa ɖi ma wuɖu kà ɔ jǔ ké wa se ma Pɔ́ɔ̀ ɖáɓáín, nìí, wa se ní kè ɖii-ɖɛ̀ ɖò wɔ̃ dɔ̃̌ɔ muɛ. 13Nyɔ ɓě ɓɛ́ wa ɖi ma kà wuɖu kɛɛ, wa zi ma nyɔ-kpò kpáɖá-nyɔ sɔ̃́ kɔ̃. 14Ké wa mu ma ɖé sáa-zà-nyɔ̀ kpa ɖɛ ɓěɔ̀ kè nyɔ vɛ̀nɛ̀ ɓěɔ̀ gbo, ké wa ɖá, “À ɖǎ wuɖu ɖi cá kà ɔ jǔ ké à se Pɔ́ɔ̀ ɖáɓáín, nìí, à se ɖii-ɖɛ̀ ɖò wɔ̃ dɔ̃̌ɔ muɛ. 15Ɔ jèɛɛ, ɓě kè tɔ̀ɔ̀-ɓìɔ̀ ɓěɔ̀ mɛ cɛ̃ɛ sójà-ɓǎɔ̀ gbo, ɓɛ́ ɔ ké Pɔ́ɔ̀ nɔ̄ ɓě gbo dyà kà nyɔ mɔ́ ɓɛ́ nyɔ kéɔ́ kà ɖɛɔ̀ múin gmɔìn nɔ̀mɔ̀ dyíin nyɛ. Ké à ɖǎ ti dyé ɓɛ́ à ké ɔ ɖáɓá, hwɛ̀ ɓɛ́ ɔ ké nyini dyɛ mɔ̀ùn.”
16Ɓó tia ɓaɖaa, Pɔ́ɔ̀ ɖíí-màà ɓéɖé ma gàa-dyù hwà ɖò, ké ɔ wɔ̃́ ma sɔ́-sɔ́ ɓě ɓɛ́ nyɔ ɓěɔ̀ ɖǎ ma kà nyuɛ. Ɔ jèɛɛ, ɔ mu, ké ɔ dyá ma ɖé sójà-gbòɔ̀ mú, ké ɔ cɛ̃ɛ ma Pɔ́ɔ̀ gbo. 17Ké Pɔ́ɔ̀ ɖá ma sójà hɔ̃dɛ̀ɖɛ̀ ɖòɛ̀ ɓǎ ɓěɔ̀ ɖò, ké ɔ cɛ̃ɛ ma ɔ gbo, ké ɔ ɖá, “Kpa gàa-dyù nìà kɛ ɖé ɓěɛ̀ ɓǎɔ̀ gbo. Ɔ mɔ́ ɓɛ́ ɔ ké ɔ ɖɛ ɖò gbo cɛ̃.” 18Ɔ jèɛɛ, ɔ ɖú ma gàa-dyùɔ̀ dyí, ké ɔ kpa ma ɔ ɖé waà sójà-ɓǎɔ̀ gbo, ké ɔ ɖá, “Pɔ́ɔ̀ mɔ̀à kpɔɖɔ-ɖeín-nì-nyɔ̀ɔ̀ kɛɛ ɖáɔ́ má ḿ, ké ɔ cɛ̃ɔ́ɔ ḿ gbo, ké ɔ ɖá ḿ mɛ dyà gàa-dyù nìà kɛ m̀ gbo. Ɔ ɓéɖé ɖɛ ɖò, ɓɛ́ ɔ kéɛ m̀ gbo cɛ̃.”
19Ké sójà-ɓǎɔ̀ kpɔ̃ ma gàa-dyùɔ̀ sɔ̃in, ké ɔ kpa ma ɔ gã gbo, ké ɔ diè ma ɔ dyi, ké ɔ ɖá, “Ɖɛ́ m̀ ɓéɖé ɓɛ́ m̀ kéà ḿ gbo cɛ̃ɛ́?”
20Ké ɔ ɖá, “Júù-nyɔ̀ ɓěɔ̀ ɖǎ wuɖuí poìn, ɓɛ́ wa kéɛ m̀ gbo cɛ̃, ɓɛ́ m̀ ké Pɔ́ɔ̀ ɖé tɔ̀ɔ̀-ɓìɔ̀ ɓěɔ̀ gbo kpa ɓó gàɖàà kà wa mɔ́ ɓɛ́ wa kéɔ́ kà ɔ dyi diè nɔ̀mɔ̀ dyíin nyɛ. 21Mɔ̀ǔn ɖá ɓɛ́ m̀ ké wɔ̃́, sepóɛɖé wa ɓáún-ɓáún nì ɔ hwìè fòèɛ̌n. Wa zi nyɔ-kpò kpáɖá-nyɔ sɔ̃́ kɔ̃. Wa ɖǎ wuɖu ɖi kà ɔ jǔ ké wa se ɔ ɖáɓáín, wa se ní kè ɖii-ɖɛ̀ ɖò wɔ̃ dɔ̃̌ɔ muɛ. Ké wa dyé ti kàǔn. Wa nì fòɛ̌n ɓɛ́ m̀ ké wɔ̃́ pū.”
22Ké sójà-ɓǎɔ̀ cɛ̃ɛ ma ɔ gbo, ké ɔ ɖá, “M̀ mɛ mu. Kɛɛ mɔ̀ǔn ɖá ɓɛ́ nyɔ ɖò kéɛ dyuò kà m̀ ɖǎ ḿ ɖɛ nìà kɛ gbo cɛ̃ɛ.”
Wa tò Pɔ́ɔ̀ ɖé ɓóɖóɔ̀ nàìn-nyɔ̀ mɔ̀ Fíɖè kɛɛ gbo
23Ti ɓɛ́ sójà-ɓǎɔ̀ wɔ̃́ ma ɖɛa kɛɛ, ɔ ɖá ma sójà hɔ̃dɛ̀ɖɛ̀ ɓěɔ̀ ɓǎ sɔ̃́, ké ɔ cɛ̃ɛ ma wa gbo, ké ɔ ɖá, “Ɓě ɖú sójà hɔ̃dɛ̀ɖɛ̀ sɔ̃́ kè sǒ-nàìn-nyɔ̀ kpáɖá-nyɔ tã ɓaɖa-bùè ɔ kè nyɔ-kpò hɔ̃dɛ̀ɖɛ̀ sɔ̃́ ɓě mɔ̀ ɖí-vɔ̃̀ìn-nyɔ̀ ɓěɛɛ dyí, ɓɛ́ ɓě ké ti dyé ɓɛ́ ɓě ké ɖé Sɛ̀sɛ̀wíɖíà-hwɔ̀ɖɔ̀ɔ̀ mú mu ɓó nyɔ ɓě gbǒǔn-mu-tì. 24Ké ɓě mɛ dyà nimii ɖò, ɓɛ́ Pɔ́ɔ̀ kéɛ kɔ̃ún kò, ɓɛ́ ɓě ké mu. Ké ɓě mɛ kpa ɔ, ɓɛ́ ɓě ké ɔ ɖé Fíɖè mɔ̀à gɔ̌mànàɔ̀ kɛɛ gbo nyìnììn.” 25Ké sójà-ɓǎɔ̀ céè ma céè-ɖɛ̀ ɖò, ké céè-ɖɛ̀ɔ̀ ɖá,
26“Ɓǎ Fíɖè, ḿ zà m̀ nyíɔún. Ní nyɛ́nɛ́ mɔ̀ Kɔ́ɖɔ́ɖìàsì Ɖísìà. 27Júù-nyɔ̀ ɓěɔ̀ kpɔ̃ ma gàa nìà kɛ, ké wa nì ma ɔ ɖáɓáuń muɛń nyɛ̀nɛ̀ɛ̀, ké ḿ kè ní sójà ɓěɔ̀ ɓɛ̀ɖɛ̀ìn ma ɓó dyí, ké à póìn ma ɔ wa xwaún, sepóɛɖé ḿ ɖǎa ma wɔ̃́ kà ɓɛ́ ɔ mɔ̀ ma Wóɖóùn-dyù kɛ. 28Ké ní mɔ́ ɓɛ́ ḿ ké ma ɖɛ kɔ̃̀ jè wa kpɔ̃ ma kà ɔ kɛɛ múin wɔ̃́. Ɔ jèɛɛ, ḿ kpa ma ɔ ɖé waà tɔ̀ɔ̀-ɓìɔ̀ ɓěɔ̀ gbo. 29Ḿ wɔ̃́ɔ ma kà wa kpɔ̃ ma ɔ ɓó wa mìɔùn nììn gma ɓěɔ̀ jèɛ. Kɛɛ ɖɛ kɔ̃̀ jè wa kpɔ̃ ma kà ɔ kɛɛ, ɔ se ɖɛ kɔ̃̀ jè ḿ ké ɔ kpɔɖɔ ɖeín po, mɔɔ ɓɛ́ ḿ ké ɔ ɖáɓáa. 30Kɛɛ ḿ ɖǎa wɔ̃́ kà ɓɛ́ wa poìn wuɖuí, ɓɛ́ wa ké ma ɔ ɖáɓáa. Ɔ jèɛɛ, ḿ tòà ɔ ɖé m̀ gbo wàɖà kɛ̀. Ké ḿ ɖǎa nyɔ ɓě kpɔ̃à ɔ kɛɛ gbo cɛ̃, ɓɛ́ wa ké ɖɛ kɔ̃̀ jè wa kpɔ̃à ɔ kɛɛ m̀ dyúa kɔ̃in zaìn.”
31Ké sójà ɓěɔ̀ ɖú ma Pɔ́ɔ̀ dyí, ké wa kpa ma ɔ ɖé Ã̀típátèɖè-hwɔ̀ɖɔ̀ɔ̀ mú ɓó máaún-hwùɖùɔ̀ mú kà waà sójà-ɓǎɔ̀ nyuɛ ma kà wa gbo cɛ̃ɛ kɛ. 32Ké wéɔ̀ nyɔ kɔ ma ɓó dyíɛɛ, sójàɔ̀ nyɔ ɓě se ma kà sǒ nàìn nyɛɛ kɔ́ìn ma ɖe, ké wa mu ma ɖé waà sójà-gbòɔ̀ zɔ̃̌ ɖe. Ké sǒ-nàìn-nyɔ̀ ɓěɔ̀ kpa ma Pɔ́ɔ̀ dyúa, 33ké wa nyini ma Sɛ̀sɛ̀wíɖíà-hwɔ̀ɖɔ̀ɔ̀ mú. Ké wa tò ma céè-ɖɛ̀ɔ̀ gɔ̌mànàɔ̀ dyí, ké wa zà ma Pɔ́ɔ̀ xwáɖáún. 34Ké gɔ̌mànàɔ̀ zà ma céè-ɖɛ̀ɔ̀ wuɖuún, ké ɔ diè ma wa ɓóɖó kɔ̃̀ kɔ̃ Pɔ́ɔ̀ sɔ̀ɛɛ jè dyi. Ké ti ɔ wɔ̃́ɔ ma kà ɔ sɔ̀ ma Sàɖésìà-ɓòɖòɔ̀ kɔ̃ kɛɛ, 35ɔ cɛ̃ɛ ɔ gbo, ké ɔ ɖá, “Nyɔ ɓě kpɔ̃à m̀ wɛ̃ɛ, wa mu dyiìn, hwɛ̀ ɓɛ́ ḿ ké nì zaaɔ̀ múin gmɔìn.” Ké ɔ cɛ̃ɛ ma, ɓɛ́ wa ké Pɔ́ɔ̀ dyí gmɔ̀ ɖé Hɛ́wɔ̀ɖɔ̀ nììn gɔ̌mànàɔ̀ gbǒɔ̀ mú.
Chwazi Kounye ya:
:
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.