2 Kɔ̀ɖéíntĩ̀ɔ̀ 5
5
1Sepóɛɖé à dyuòɛ̀ dyí kà vàà-ɖɛ̀ ɓɛ́ à cĩ́à mú dà ɓóɖó-kpàà kɔ̃, ɓɛ́ ɔ mɔ̀à à kpóɖó-dyùà nìà kɛɛ dyi wáɖáín, nìí, à ɓéɖé poo-ɖɛ̀ ɖò ɖé dyɔún wɛ̃. Gèɖèpɔ́ɔ̀ mɔ̀ nyɔ poɛ. Ɔ mɔ̀ gbǒ ɓɛ́ nyɔǔn-dyù se poɛ, ké ɔ mɔ̀ sè-ná-sèɛ̀ ɖɛ. 2À nì vàà-ɖɛ̀ nìà kɛ xwíɖíi, ké à nì kpéɖéɛń, ɓɛ́ à ké à cĩ́-naín nìà ɖé dyɔún wɛ̃ɛ kɔ̃in po, sepóɛɖé ɔ tó nyu à ní. 3Kɛɛ ɔ jǔ ké à dyiɛ ɓóɛ kɔ̃in po ní, nìí, à se nìɛ̌ mu ɓɛ́ à ké se kpóɖó-dyùà ɖò ɓéɖé. 4Kà ɓɛ́ à nìà vàà-ɖɛ̀ nìà kɛ xwíɖíi cĩ́ɛń keɛɛ, nìí, ɔ nì kà à ɓéɖéà gbɛ̌ ku xwa, ké à nìà ɔ xwíɖíi kpòɛ̌n nyɛ. Ɔ se ɖɛ ɓɛ́ à ké mɔ́ ɓɛ́ à kpóɖó-dyùà sùàɔ̀ ké à mú sɔ̀ɛ, kɛɛ à mɔ́ ɓɛ́ ɔ ɖieɔ̀ ké ɔ kɔ̃in kpá, ɓɛ́ fɛ̀ɛ̀ɔ̀ ké ɖɛ muà mɛ́ìn nyɛɛ dyi zĩ̀ìn. 5Gèɖèpɔ́ɔ̀ mɔ̀ nyɔ dyéìn ma à ti ɓó ɖɛ nìà kɛ jè, ké ɔ nyí ma ɔ Zùùɔ̀ à, ɓɛ́ ɔ ké ɖɛ séín ɓě ɓɛ́ ɔ ɓéɖé à bììɛɛ ɓo-kɔ̃-pòìn-ɖɛ̀ jǔ.
6Ɔ jèɛɛ, à ku hwòɖǒ ti séín. À dyuòɛ̀ dyí kà à dyi à kpóɖó-dyùàɔ̀ mú cĩ́ɛń nì ke ní, nìí, à se Bounɓoɔ̀ ɓíɖí nì kɛ. 7À cĩ́ ɖé hwìɖǐǐ-taɓa-taɓa mú. À se cĩ́ ɓó ɖɛ ɓě ɓɛ́ à dyéɖé dyéɛɛ jè. 8À ku hwòɖǒ. À muɛ mú ɖɛ̀ɓɛ̀ìn ɓɛ́ à ké à kpóɖó-dyùàɔ̀ dyi táà, ɓɛ́ à ké ɖé Bounɓoɔ̀ gbo nì. 9Ɔ jèɛɛ, kɛbì à mɛ nì nɔ̄ à ɓíɖí, mɔɔ kɛbì à mɛ nì ɖé ɔ gboɛɛ, ɖɛ kpɔ̃ à hwòɖǒ cáa mɔ̀ ɓɛ́ à ké ɔ hwòɖǒ dyi dè. 10Sepóɛɖé à séín ɓéɖé ɓɛ́ à ké Kɛ́ɖɛ́ì zaa-wɔ̃-po-poɔ̀ dyúa mu, ké nìí, ɖɛ ɖò se gàǐn mu, ɓɛ́ à séín ké ɖɛ à ɓéɖé ɓɛ́ à ké dyé ɓó ɖɛ ɓɛ́ à ɖǎ nyu ɖé à kpóɖó-dyùàɔ̀ múɛ jèɛɛ dyé, kɛbì à mɛ nyu ma ɖɛ nɔ̀mɔ̀ dyíin mɔɔ ɖɛ nyìnììn dyíin nyuɛ.
À kè Gèɖèpɔ́ɔ̀ mɔ̀ǎ ɓǎto dyììn ɖé Kɛ́ɖɛ́ì mú
11À dyuò ɖɛ mɔ̀ Bounɓoɔ̀ dyi-fɛ̃̀ìn-fɛ̃̀ìn xwíníín nyɛ. Ɔ jèɛɛ, à nì vɔ̃uń ɓɛ́ à ké nyɔǔn pɛ́í po. Gèɖèpɔ́ɔ̀ dyuò nyɔ à jǔɛɛ dyí, ké ḿ dèɛ̀ hwòɖǒ kɔ̃ kà ɓě dyuò nyɔ ɓɛ́ à mɔ̀ùn jǔ jɛ́ɛ́ kɛɛ dyí ɖé ɓě hwòɖǒ-dyùà ɓěɔ̀ mú ɖekèɛ. 12À se vɔ̃uń nì ɓɛ́ à ké à mìɔùn ɓě dyí tɛ̀mɛ̀ìn ɖe. À nì ɓě ti nyíɛń, ɓɛ́ ɓě ké à jè múàǔn kpá, ɓɛ́ ɓě ké ɖɛ ɖò ɓéɖé, ɓɛ́ ɓě kéɛ nyɔ ɓě mɔ̀à múàǔn-kpá-nyɔ̀ ɓó kà nyɔ ɖò nyu nìɛ̀ ɓó ɔ ku kɔ̃in, ké ɔ se kà ɔ nyu nìɛ̀ ɖé ɔ hwòɖǒ-dyùà dyéɖéíɛ jèɛɛ gbo cɛ̃. 13À hwòɖǒ-dyùà dyi cáín, nìí, ɔ mɔ̀ ɓó Gèɖèpɔ́ɔ̀ jè. Ké à hwòɖǒ-dyùà se cáín, nìí, ɔ mɔ̀ ɓó ɓě mɔ̀ùn jè. 14Sepóɛɖé ɖɛ̀ɓɛ̀ǐn-ɖɛ̀ɓɛ̀ǐn ɓɛ́ Kɛ́ɖɛ́ì ɓéɖé à bììɛɛ kɔ̃̀ à wuɖuí. Sepóɛɖé à ɖǎa dyí dyuò kà nyɔ dyúáɖò mɛ́ ma ɓó nyɔ séín bììɛ. Ɔ jèɛɛ, ɔ kè nyɔ séín peɖeìn ɔ mɛ́-mɛ́ɔ̀ mú. 15Ɔ mɛ́ ma ɓó nyɔ séín bìì, ɓɛ́ nyɔ ɓě nìà cĩ́ɛń nyɛɛ ké se wa mìɔùn bìì cĩ́ ɖe, kɛɛ ɓɛ́ wa kéá cĩ́ ɓó nyɔ ɓɛ́ ɔ mɛ́ ma, ké Gèɖèpɔ́ɔ̀ zà ma kà ɔ gĩɔ ɓó wa jèɛɛ bìì.
16À ní poìn nyɔ ɖò jè hwìɖǐi kà ɓóɖó-kpàà nyɔ ɓě nyuà kɛɛ ɖe. À ɖǎ ma Kɛ́ɖɛ́ì jè hwìɖǐi poìn kĩ́ín kà ɓóɖó-kpàà nyɔ ɓě nyuà kɛɛ dyɛo, kɛɛ à ní nyuɛ náa ɖe. 17Ɔ jèɛɛ, nyɔ ɖò kè Kɛ́ɖɛ́ì dyi nyɔ dyúáɖò jǔǐn, nìí, Gèɖèpɔ́ɔ̀ ɖǎ ɔ nyu ɖe ɖie. Ɖɛ ɓě nì ma kĩ́ín nyɛɛ ɖǎ dyi zi. Ké dyéɛ, wa ɖǎ ɖɛ ɖìè jǔ. 18Gèɖèpɔ́ɔ̀ mɔ̀ nyɔ nyu ɖɛ séín ɓě nìà kɛ. Gèɖèpɔ́ɔ̀ ɖǎ bĩ̀ǎ nì ma ɓó à kè ɔ pṹa kɛɛ zà dyììn ɖé Kɛ́ɖɛ́ì mú. Ké ɔ ɖǎ à kũ̀à mɔ̀à bĩ̀ǎ-zà-zà jè cɛ̃-cɛ̃ kɛɛ nyí. 19Ɖɛ à cɛ̃à kɛɛ mɔ̀ Gèɖèpɔ́ɔ̀ nì ma bĩ̀ǎ ɓɛ́ ɔ nìà ɓó ɔ kè ɓóɖó-kpàà pṹa kɛɛ zàǔn dyììn ɖé Kɛ́ɖɛ́ì mú. Ɔ se ma waà ɖɛ gbà ɓěɔ̀ kpa wa dyí zàǐn nì ɖe, ké ɔ ɖǎ à wuɖu ɓá bĩ̀ǎ-zà-zàɔ̀ jè dyíɛɛ gbo sè, ɓɛ́ à kéɛ cɛ̃.
20Ɔ jèɛɛ, à mɔ̀ Kɛ́ɖɛ́ì bɛ̃̌ǐn-nyɔ̀ ɓě, kà Gèɖèpɔ́ɔ̀ mìɔùn nìɔ̌ kà ɓě gbo wùɖùɛ̌n dyììn ɖé à múɛ. À ɓaà ɓě ɓó Kɛ́ɖɛ́ì jè, ɓě mɛ wɔ̃́ ɓɛ́ Gèɖèpɔ́ɔ̀ ké bĩ̀ǎ nìà ɓó ɓě kèɔ̀ kè pṹa kɛɛ zà. 21Kɛ́ɖɛ́ì se ma nàmàǔn ɖò nyu fɔɔ, kɛɛ Gèɖèpɔ́ɔ̀ nyu ma ɔ nàmàǔn mú ɓó à jè, ɓɛ́ à mɔ̀ nyɔ ɓɛ́ à kè Kɛ́ɖɛ́ì mɔ̀à nyɔ dyúáɖò kɛɛ, à kè Gèɖèpɔ́ɔ̀ ké ɔ dyí-sɛ́ɖɛ́ìn-sɛ́ɖɛ́ìnɔ̀ mú peɖeìn.
Chwazi Kounye ya:
2 Kɔ̀ɖéíntĩ̀ɔ̀ 5: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.