2 Kɔ̀ɖéíntĩ̀ɔ̀ 11
11
Pɔ́ɔ̀ kè nyɔ ɓě ɖáìn wa mìɔùn àpɔ́sò ké wa seɛ mɔ̀ɛ
1Ní mɔ́ ɓɛ́ ɓě ké ní kpeɖeɔ̀ hwòɖǒ kùìn, kɛbì ḿ mɛ nyu zuɖuu-ɖɛ̀ tííwè kɛ. Ɓě mɛ kùìn wɛ́ɛ ní kpeɖeɔ̀ hwòɖǒ. 2Ḿ kpá hwɛ̀nɛ̌ǐn ɓó ɓě jè kà ɓɛ́ Gèɖèpɔ́ɔ̀ mɔ̀ùn kpáà hwɛ̀nɛ̌ǐn ɓó ɓě mɔ̀ùn jèɛ. Ɓě nì kà màa se toɖo kɔ̃ jè dyí dyuò, ké ɔ se múàǔn vòɛɛ nìà kɛ. Ké ḿ ɖǎa ɓě nyɛ́nɛ́ín ɖáìn, ɓɛ́ ɓě ké gàa dyúáɖò nyɛ̀nɛ̀ɛ̀ dyi kpɔ̃. Gàaɔ̀ mɔ̀ Kɛ́ɖɛ́ì. 3Kɛɛ ḿ fɛ̃̀ìn ɓɛ́ ɓěɛ̀ hwìɖǐi-poìn-ɖɛ̀ ɓěɔ̀ ní kɔ̃̀ ɖà dyíin nyìnììn, ɓɛ́ ɔ kéɛ nyu ɓɛ́ ɓě ké ɓě ɖɛ̀ɓɛ̀ǐn-ɖɛ̀ɓɛ̀ǐn nɔ̀mɔ̀ dyíin sɔ̀ ɓě hwòɖǒ bũ̌, ɓɛ́ ɓě ɓéɖéà ɓó Kɛ́ɖɛ́ì bììɛɛ dyi táà kà dyúáɖò kà sɛɔ̀ cá ma kà Íì sɛ́ɖɛ́-kà kɛ. 4Sepóɛɖé nyɔ ɖò dyi dyi, ké ɔ dyi Jízɛ̀ kà kò ɖò kɔ̃̀ jè ɓɛ́ à mɔ̀ùn seà cɛ̃ɛ jè zio mú pòìn ní, nìí, ɓě kùìn ɔ kpeɖeɔ̀ hwòɖǒ cá. Ké ɓě kpɔ̃ zùù kò-kò ɖò kè bɔ̃̌ nɔ̀mɔ̀ dyíin kò-kò ɓɛ́ ɔ kè Zùùɔ̀ nyɔ ɔ kè Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ nyɔ sɔ̀ìn ma kà à xwaún wɛ̃ɛ seà hwɔìn nyɛɛ dyi.
5Ḿ poɛ̀n hwìɖǐi kà ɓɛ́ ḿ kpa ɖɛ ɖekè kà ɓɛ́ àpɔ́sò ɓě ɖá wa zià dyíin nɔ̀mɔ̀ǔn wɛ̃ɛ kpaà ɖɛ kɛ. 6Kɛbì ḿ mɛ jǔ ɖɛ-gbɔ-dè-nyɔ̀ ɖé wùɖù-wùɖù múɛɛ, ḿ se ɖɛ-gbɔ-dè-nyɔ̀ ɖé hwòɖǒ-fɔ̀nɔ̀-fɔ̀nɔ̀ mú. À ɖǎ ɓě ɖɛ nìà kɛ dyí tɛ̀mɛ̀ìn wáɖáá ti séín ɓàɖà, ɖé ɖɛ séín mú.
7Ti ḿ cɛ̃ ma bɔ̃̌ nɔ̀mɔ̀ dyíin ɓá Gèɖèpɔ́ɔ̀ jè dyíɛɛ ɓě gboɛɛ, ḿ seɛ ma ɓě gbo cɛ̃, ɓɛ́ ɓě ké ma ɖɛ ɖò pɛ́ɛ̀. Ḿ dyà ma ḿ mìɔùn ɓíɖíi, ɓɛ́ ɓě mɔ̀ùn ké dyií ɖú. Nyuɛ ḿ nyuɛ ma kà náa kɛɛ mɔ̀ ma ɖɛ gbàe? 8Ti ḿ nì ma ɖé ɓě gbo kũ̀à nyuɛń nyɛɛ, ḿ kpɔ̃ ma pɛ́ɛ̀-ɖɛ̀ sɔ̀ìn ma ɖé cɔ́cì-nyɔ̀ kà kò ɖò ɓě nì dà tɔ̀ɔ̀ ɓěɛɛ xwaún wɛ̃ɛ dyi. Ɔ nì ma pū kà ḿ nì ma wa ɖɛ gana xwa zàǐn, ɓɛ́ ḿ ké ma ɓě gbo kpáa. 9Ké ti ḿ nì ma ɖé ɓě gbo, ké ḿ se ma ɖɛ ɖò ɓéɖéɛɛ, ḿ se ma ɓě fũ̀à-fṹá nyùìn ɓó ní gbo kpá jè, sepóɛɖé ɖíí ɓě sɔ̀ ma ɖé Màsèdónìà-ɓòɖòɔ̀ kɔ̃ɛɛ dyà ma ḿ ɖɛ ɓě ḿ kɔ̃̀ ɓɛ́ ḿ ké ma dyéɛ. Kà ḿ nyuɛ ma kà kĩ́ín nyɛɛ, kǎà ní muɛ nyuùn ɖé dyúa. Ḿ se gbɛ̌ jǔɛ mu, ɓɛ́ ḿ ké ɓě ma. 10Kà ɓɛ́ Kɛ́ɖɛ́ì jǎàɔ̀ nìà ɖé ḿ mú jɛ́ɛ́ cáa, ɓɔ́ɖɔ́-ɓɔ́ɖɔ́ ɓɛ́ ḿ nìà nyuɛń nyɛɛ, ɔ se ɓɔ́í kpáa mu ɖé Àkédyà-ɓòɖòɔ̀ dà séín. 11Ɖɛ́ kɔ̃̀ jè ḿ cɛ̃à náa kɛ́? Ɔ mɔ̀, sepóɛɖé ḿ se ɓě mú ɖɛ̀ɓɛ̀ jèè? Hée, Gèɖèpɔ́ɔ̀ dyuòɛ̀ dyí kà ḿ ɖɛ̀ɓɛ̀ ɓě múɛ.
12Ké ɖɛ ḿ nìà nyuɛń nyɛɛ, ní muɛ nyuùn kánáá pū, ɓɛ́ ḿ ké se nyɔ ɓě ɓɛ́ wa mɔ́ ɓɛ́ wa kéà cɛ̃ kà ɓɛ́ à kè wa hwɔìn ɖé kũ̀à kɔ̃̀ jè wa ɓɔ́ɖɔ́à kɛ múɛɛ ti nyí. 13Nyɔ ɓě nìà kɛ se jǎà àpɔ́sò ɓě. Wa cá nyɔǔn ɖé waà kũ̀à-nyu-nyu mú, ké wa nyu wa mìɔùn kà Kɛ́ɖɛ́ì àpɔ́sò ɓě nìà kɛ. 14Ɖɛ nìà kɛ se ɓéɖé ɓɛ́ ɔ ké à hwìɖǐi kpèìn, sepóɛɖé Sétɔ̃̀ mìɔùn nyu ɔ mìɔùn kà ínjà nyɔ ɓɛ́ ɔ dyàà ceɛɛ nìà kɛ. 15Ɔ jèɛɛ, ɔ gbo-nì-nyɔ̀ ɓěɔ̀ dyi wa mìɔùn nyu kà dyí-sɛ́ɖɛ́ìn-ɖɛ̀-nyu-nyɔ̀ ɓě nìà kɛɛ ní, nìí, ɔ se ɖɛ vɛ̀nɛ̀ ɖò. Ɖé mánáín nyɛɛ, kà wa nyuu-ɖɛ̀ ɓě nìà kɛɛ, kǎà ɖɛ wa mu dyéìn nyɛɛ mu nììn.
Gǎ-dyé-dyé ɓě ɓɛ́ Pɔ́ɔ̀ nyu ɖé ɔ àpɔ́sò-kũ̀àɔ̀ nyu-nyu múɛ
16Ḿ nìɛ̀ ɓě gbo cɛ̃iń ɖe. Nyɔ ɖò ní poìn hwìɖǐi kà ḿ mɔ̀ zuɖuu-nyɔ̀ kɛ. Kɛɛ ɔ jǔ ké ɓě dyiɛ náa nyuín, ɓě mɛ kpɔ̃ dyɛ ḿ kà nyɔ kpɔ̃à zuɖuu-nyɔ̀ kɛ. Ɓě mɛ wɔ̃́ ɓɛ́ ḿ ké ɓɔ́ɖɔ́ tííwè ɖekè. 17Ɖɛ ḿ nìà cɛ̃iń kàǔn wɛ̃ɛ, ɔ se ɖɛ ɓɛ́ Bounɓoɔ̀ mɔ́ ɓɛ́ ḿ ké cɛ̃ɛ. Ɖé ɓɔ́ɖɔ́-ɓɔ́ɖɔ́ jè nìà kɛ múɛɛ, ḿ nì wùɖùɛ̌n pū kà zuɖuu-nyɔ̀ nìà kɛ. 18Nyɔ ɓáún-ɓáún ɓě mɔ̀ùn ɓɔ́ɖɔ́ ɓó ɓóɖó-kpàà nììn ɖɛ ɓě jè. Ɔ jèɛɛ, mɔ́ún mu ɖɛ dyúáɖòɔ̀ nyuùn ɖekè. 19Ɓě mɔ̀ùn zi hwòɖǒ fɔ̀nɔ̀ǔn jèɛɛ, ɓě kpá múàǔn, ké ɓě kùìn zuɖuu-nyɔ̀ ɓěɔ̀ kpeɖe hwòɖǒ. 20Nyɔ ɖò dyi ɓě kɔ̃in ɓáìn, ké ɔ dyi ɓěɛ̀ ɖɛ ɓěɔ̀ ɖi, ké ɔ dyi ɖɛ ɔ mɔ́ ɓě mú nyùɛ̀n dyiɛɛ ɓě mú nyùìn, ké ɔ dyi ɔ mìɔùn nyɔ vɛ̀nɛ̀ mú nyu, ké ɔ dyi ɓě kpá dyúa taɓaín, nìí, ɓě kùìn ɔ kpeɖeɔ̀ hwòɖǒ. 21Dɛ̃ nyu ḿ, ɓɛ́ ḿ kéɛ ɓě gbo cɛ̃ kà kpé zi ma à dyí hwɛ̀ǐn mìɔ ɓó ɖɛ nìà kɛ jèɛ.
Kɛɛ ɖɛ kã̀ìn séín kɔ̃̀ jè nyɔ ɖò se fɛ̃̀ǐn mu ɓó ɓɔ́ɖɔ́ jèɛɛ, mɔ́ún se fɛ̃̀ǐn mu ɖekè. (Ḿ nì zuɖuu-kà wùɖùɛ̌n.) 22Wa mɔ̀ Híìbúɖúù-nyɔ̀ ɓěe? Kǎà mɔ́ún nì ɖekè. Wa mɔ̀ Éézùɖùɛ̀-nyɔ̀ ɓěe? Kǎà mɔ́ún nì ɖekè. Wa mɔ̀ Ééɓòɖòhɛ̃́ɛ̀ nyúà-dyú ɓěe? Kǎà mɔ́ún nì ɖekè. 23Wa mɔ̀ Kɛ́ɖɛ́ì gbo-nì-nyɔ̀ ɓěe? Ḿ mɔ̀ gbo-nì-nyɔ̀ nɔ̀mɔ̀ dyíin ké ḿ zi wa mɔ̀ùn dyí. (Ḿ wùɖù kà sã̀à-nyɔ̀ wùɖùà kɛɛ ɖé ɖɛ nìà kɛ mú.) Ḿ ɖǎ kũ̀à nyuɛń zi mìɔ. Ḿ ɖǎ kpɔɖɔ ɖeín kpá ɓó ti pàɖǎ xwíníín. Wa ɖǎ ḿ ɓaɖauń hwèɖèìn. Ti ɓáún-ɓáún xwíníín nyɛɛ, ɔ nì kà ḿ ɖǎ ma mɛ́ɛ. 24Júù-nyɔ̀ ɓěɔ̀ ɖǎ ḿ gbàtò-wùɖù kpáɖá-nyɔ ɓaɖa-bùè sè mɛ̀nɛ̌ìn-hĩinyɛ kɔ̃ún zàìn kpa hm̀m̌. 25Nyɔ ɓě ɖǎ ḿ ɓà-cù ɓàɖàìn kpa tã. Ti ɖòɛ̀ ɓaɖaa, wa taɓaìn ma ḿ sɔ́ɔ́-kpò dyi. Méè ɖǎ ḿ wáɖáìn kpa tã. Ti ɖòɛ̀ ɓaɖaa, méè wáɖáìn ma ḿ, ké ḿ nyu ma máaún-hwùɖù dyúáɖò kè dyóɖóaún-wè dyúáɖò ɖé dyóóɔ̀ kɔ̃. 26Ḿ ɖǎ nà-nà ɓáún-ɓáún nyu mìɔ. Ḿ táà ma níɔ sèɛ̀. Nyɔ-ɖɛ-gana-xwa-zàìn-nyɔ̀ ɓěɔ̀ kè ḿ mìɔùn nììn ɓíɖí-nyɔ̀ ɓěɔ̀ ɔ kè ɓóɖó-dù kà kò ɖò ɓěɛ̀ nyɔ ɓěɔ̀ táà ma ḿ ɖáɓáa. Ḿ táà ma mɛ́ɛ ɖé hwɔɖɔ vɛ̀nɛ̀ ɓěɔ̀ mú, kè ɖé gbǎùn-fúɖúá ɓěɔ̀ kɔ̃, ɔ kè ɖé dyóóɔ̀ kɔ̃. Nyɔ ɓě ɖá wa mɔ̀ ma kà ní ɓǎto ɓěɛɛ, wa táà ma ḿ ɖáɓáa. 27Kũ̀à ɓě ḿ nyu ma kɛɛ wɛ́ìn ma ḿ ní. Ḿ dyé ma ti kàmàǔn-kàmàǔn. Ti ɖíɛ́ ɓě ɓaɖaín, mɔ́ún mɔ́ ma fɔɔ. Mɔ́ kè ní-ná-tò nyu ma ḿ. Ké ti ɖíɛ́ ɓě ɓaɖaín, ḿ se ma ɖii-ɖɛ̀ ɖò dyéɛ ɓɛ́ìn. Sɔ̃̀ɔ̀ nyu ma ḿ, ké ḿ se ma mú-po-ɖɔ̀ ɓéɖé. 28Ɓó ɖɛ tɔ̀ɔ̀ ɓě nìà kɛ wáún wɛ̃ɛ, cɔ́cì-nyɔ̀ ɓě nì dà séín nyɛɛ, wa dyí gmɔ̀ jè nì ḿ hwòɖǒ bũ̌ ti séín. 29Nyɛ́ mɔ̀ùn hwɛ̀ kpéí, ké kpé se mɔ́ún dyí hwɛ̀ɛ́? Ɖɛ́ nyu ké nyɔ tɔ̀ɔ̀ ɖò mɔ̀ùn ɓuɖu, ké ní hwòɖǒ-dyùà ní sĩɛ́?
30Ɔ jǔ ké ḿ dyi ɓéɖé ɓɛ́ ḿ ké ɓɔ́ɖɔ́ín, nìí, ní mu ɓɔ́ɖɔ́ùn ɓó ɖɛ ɓě tɛ̀mɛ̀ìn nyɔǔn dyí kà ḿ hwɛ̀ kpéíɛɛ jè. 31Gèɖèpɔ́ɔ̀ mɔ̀à Bounɓo Jízɛ̀ Ɓǎa mɔ̀ nyɔ muà ɓàìn-ɓàìn dyéìn kánáá pūɛɛ dyuòɛ̀ kà ḿ se se tɔ́mɔ́uń nìɛ. 32Ti ḿ nì ma Dìmásìkɔ̀-hwɔ̀ɖɔ̀ɔ̀ múɛɛ, gàa mɔ̀ ma hwɔɖɔɔ̀ ɓǎ ɓó Kã́á Àwéɖétɔ̀ xwíɖíiɛɛ po ma nyɔ ɓě hwɔɖɔɔ̀ gmɔ-wɔ̃̀ɔ̀ dyí, ɓɛ́ wa ké ma ḿ kpɔ̃. 33Kɛɛ wa po ma ḿ tìě-ɓò ɖò mú, ké wa zĩ̀ìn ma ḿ ɓí ɖò nì ma gmɔɔ̀ múɛɛ mú, ké wa síìn ma ḿ ɓíɖíi ɖé gmɔɔ̀ ɖeín. Ké ḿ sɔ̀ ma ɔ xwaún.
Chwazi Kounye ya:
2 Kɔ̀ɖéíntĩ̀ɔ̀ 11: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.