1 Kɔ̀ɖéíntĩ̀ɔ̀ 12
12
Nyíí-ɖɛ̀ ɓɛ́ Gèɖèpɔ́ɔ̀ Zùùɔ̀ nyí nyɔɛ
1Ḿ ɖíí ɓě, ní mɔ́ ɓɛ́ ɓě ké nyíí-ɖɛ̀ ɓɛ́ Gèɖèpɔ́ɔ̀ Zùùɔ̀ nyí nyɔ kɛɛ jè dyuò. 2Ɓě dyuòɛ̀ kà ti ɓɛ́ ɓě séè ma Gèɖèpɔ́ɔ̀ jè dyuò keɛɛ, nyɔ ɓě kpa ma ɓě kũùn-kpò ɓě ɓɛ́ wa seà wùɖùɛ̀ ɓɛ́ìn nyɛɛ gbo, ké wa nyuɛ ké ɓě sɔ̀ìn hwìǐɛ. 3Ɔ jèɛɛ, ní mɔ́ ɓɛ́ ɓě kéɛ múin wɔ̃́ kà ɓɛ́ Gèɖèpɔ́ɔ̀ Zùùɔ̀ ní nyuɛ ɓɛ́ nyɔ ɖò kéɛ cɛ̃, ɓɛ́ ɔ ké níiń, “Gboò-wùɖù mɛ nì Jízɛ̀ kɔ̃” kɛ. Ké Zùù Hwɛ̀ǐn-hwɛ̀ǐnɔ̀ ɖòùn mɔ̀ nyɔ ɓɛ́ìn nyuɛ ɓɛ́ nyɔ ɖò kéɛ cɛ̃, ɓɛ́ ɔ ké níiń, “Jízɛ̀ mɔ̀ Bounɓoɔ̀.”
4Nyíí-ɖɛ̀ ɓěɔ̀ kpa kòɛ̀ ɖò-ɖò, kɛɛ Zùù dyúáɖòɔ̀ mɔ̀ nyɔ tò wa. 5Kũ̀à ɓěɔ̀ kpa kòɛ̀ ɖò-ɖò, kɛɛ wa mɔ̀ Bounɓo dyúáɖòɔ̀ bìì. 6Kũ̀à ɓɛ́ Gèɖèpɔ́ɔ̀ kpéɔ̀ nyuɛɛ kpa kòɛ̀ ɖò-ɖò, kɛɛ Gèɖèpɔ́ɔ̀ dyúáɖòɔ̀ mɔ̀ nyɔ nìà kũ̀à kò-kò ɓěɔ̀ nyuɛń ɖé nyɔ séín múɛ̀. 7Ɖɛ ɓɛ́ ɔ tɛ̀mɛ̀ìn nyɔǔn dyí kà ɓɛ́ nyɔ ɓéɖé Zùùɔ̀ kɛɛ, Zùùɔ̀ nyíɛ à ɖò-ɖò, ɓɛ́ ɔ ké nyɔǔn gbo kpá. 8Gèɖèpɔ́ɔ̀ nyí nyɔǔn ɖíɛ́ ɓě hwòɖǒ-fɔ̀nɔ̀-kà wùɖù-wùɖù dyììn ɖé Zùùɔ̀ mú. Ké nyɔ ɖíɛ́ ɓě dyuò ɖɛ ɓě wa ɖǎ cɛ̃́ɛ nyɔ ɓě gbo cɛ̃ɛ dyììn ɖé Zùù dyúáɖòɔ̀ mú. 9Zùù dyúáɖòɔ̀ nyí nyɔ ɖíɛ́ ɓě hwìɖǐǐ-taɓa-taɓa. Zùù dyúáɖòɔ̀ nyí nyɔ ɖíɛ́ ɓě nyíí-ɖɛ̀, ké ɔ nyuɛ ké wa kánáìn nyɔǔn dyi. 10Ké ɔ nyí nyɔ ɖíɛ́ ɓě zɛ̃̀ìn-ɖɛ̀-nyu-kpè, ké ɔ nyí ɖíɛ́ ɓě ɖɛ ɓɛ́ Gèɖèpɔ́ɔ̀ dèìn wa wĩín nyɛɛ cɛ̃-cɛ̃. Ké ɔ nyí ɖíɛ́ ɓě kpé, ɓɛ́ wa ké zùù gbà ɓě dyí dyuò. Ké ɔ nyí ɖíɛ́ ɓě wuɖu-dù kà kò ɖò ɓě po-po, ké ɔ nyí ɖíɛ́ ɓě kpé, ɓɛ́ wa ké wuɖu ɓěa mú zà. 11Ɖɛ séín ɓěa kɛɛ, wa mɔ̀ Zùù dyúáɖòɔ̀ nyuu-kũ̀à. Ɔ geɛ̀n nyɔ ɓěɔ̀ múin ɖò-ɖò kà ɔ mɔ́ ɓɛ́ ɔ kéɛ wa nyíɛ.
À séín mɔ̀ kpóɖó-dyùà dyúáɖòɛ̀ wáká ɓě
12Kɛ́ɖɛ́ì nì kà kpóɖó-dyùà dyúáɖò ɓɛ́ ɔ ɓéɖéà wáká pàɖǎ kɛɛ nìà kɛ. Wáká ɓěɔ̀ vò dyí dyɛo, kɛɛ wa séín poìn dyíɔ̀ nyuà kpóɖó-dyùàɔ̀ kɛ̀. 13Sepóɛɖé Zùù dyúáɖòɔ̀ dyà à mɔ̀à Júù-nyɔ̀ kè ɓóɖó-dù kà kò ɖò ɓěɛ̀ nyɔɛ, gǐì kè nyɔ ɓě se gǐìɛɛ kpóɖó-dyùà dyúáɖò mú dyììn ɖé níɔ-kpá-kpá mú. Gèɖèpɔ́ɔ̀ nyí à séín Zùù dyúáɖòɔ̀, ɓɛ́ à kéɛ ná kà nyɔ náà níɛ.
14Kpóɖó-dyùàɔ̀ se wáká dyúáɖò, kɛɛ wáká ɓěɔ̀ vò dyí. 15Ɓoɔ̀ dyiɔ́ɔ cɛ̃, ké ɔ dyi níiń, “Ḿ se sɔ̃ jèɛɛ, ḿ se kpóɖó-dyùàɔ̀ wáká ɓěɔ̀ ɖò” ní, nìí, ɖɛ ɔ cɛ̃à kɛɛ seɛ nyu ɓɛ́ ɔ ké se kpóɖó-dyùàɔ̀ wáká ɓěɔ̀ ɖò. 16Ké ɖùǔɔ̀ dyiɔ́ɔ cɛ̃, ké ɔ dyi níiń, “Ḿ se dyéɖé jèɛɛ, ḿ se kpóɖó-dyùàɔ̀ wáká ɓěɔ̀ ɖò” ní, nìí, ɖɛ ɔ cɛ̃à kɛɛ seɛ nyu ɓɛ́ ɔ ké se kpóɖó-dyùàɔ̀ wáká ɓěɔ̀ ɖò. 17Ɔ jǔ ké kpóɖó-dyùà gànáɔ̀ dyiɔ́ má dyéɖé ɖòùn jǔǐn, nìí, dɛ̌ ɖùǔ mɔ̀ùn jè sèɛ́? Mɔɔ kpóɖó-dyùà gànáɔ̀ dyiɔ́ má ɖùǔ jǔǐn, nìí, xwɛ̌ ɔ muɔ́ ɖɛ ɖòɛ̀ nyɔ́ wɔ̃́ɔ nyuùn wɛ̃́? 18Kɛɛ kà ɔ nìà kàǔn wɛ̃ɛ, kǎà Gèɖèpɔ́ɔ̀ nyu ma wáká ɓěɔ̀ waà pá ɓěɔ̀ mú poɛ ɖò-ɖò kà ɓɛ́ ɔ mɔ́ɔ ma nyuɛ dyiɛ. 19Ɔ jǔ ké wa séínɔ̀ dyiɔ́ wáká dyúáɖò jǔǐn, dɛ̌ kpóɖó-dyùàɔ̀ muɔ́ nììn nyɛ́? 20Kɛɛ kà ɔ nìà kà kɛɛ, wáká ɓáún-ɓáún nì, kɛɛ ɔ mɔ̀ kpóɖó-dyùà dyúáɖò pū.
21Dyéɖéɔ̀ seɛ sɔ̃ɔ̀ gbo cɛ̃ɛ ɓɛ́ìn, ɓɛ́ ɔ ké níiń, “Ḿ se m̀ mɔ́.” Ké dúɔ̀ mɔ̀ùn seɛ ɓoɔ̀ gbo cɛ̃ɛ ɓɛ́ìn, ɓɛ́ ɔ ké níiń, “Ḿ se m̀ mɔ́.” 22Kɛɛ ɖɛ mɔ̀ jǎà jɛ́ɛ́ kɛɛ mɔ̀ kpóɖó-dyùàɔ̀ wákáɔ̀ nyɔ ɓě m̀ dyià dyéìn, ɓɛ́ m̀ ɖá wa seà ɖɛ ɖò kpá kɛɛ, wa mɔ̀ nyɔ ɖé nyɔ ɓéɖé ɓɛ́ nyɔ ké ɓéɖé. 23Ké kpóɖó-dyùàɔ̀ wákáɔ̀ nyɔ ɓě ɓɛ́ à ɖáìn wa seà dyíin nɔ̀mɔ̀ɛɛ, à kpɔ̃ wa nɔ̀mɔ̀ dyíin. À wákáɔ̀ nyɔ ɓě seà dyíin nɔ̀mɔ̀ɛɛ, à nyu wa nɔ̀mɔ̀ dyíin mìɔ. 24Kɛɛ à wákáɔ̀ nyɔ ɓě nɔ̀mɔ̀à dyíin nyɛɛ, wa se ɖɛ nɔ̀mɔ̀ dyíin ɖò mɔ́. Kɛɛ Gèɖèpɔ́ɔ̀ ɖǎ kpóɖó-dyùàɔ̀ wáká ɓěɔ̀ dyí poìn, ké ɔ nyuɛ ké kpóɖó-dyùàɔ̀ wákáɔ̀ nyɔ seà ɖɛ kpaa nɔ̀mɔ̀ dyíin mìɔ. 25Ɔ nyuɛ náa ɓɛ́ mú-ge-ge ɖò ké se kpóɖó-dyùàɔ̀ mú nì, kɛɛ ɓɛ́ wáká ɓěɔ̀ ké wa mǔè ɓěɔ̀ jè gbo kɔ̃̀. 26Ɔ jǔ ké wáká ɓěɔ̀ ɖò dyi gǎ dyéín, wa séín dyé gǎ. Ké wáká ɖò dyi ɓàìn-ɓàìn ɓéɖéín, nìí, wa séín kpá múàǔn.
27Ɓě mɔ̀ Kɛ́ɖɛ́ì kpóɖó-dyùàɔ̀, ké ɓě ɖò-ɖò mɔ̀ ɔ wáká ɓěɔ̀ ɖò. 28Nyɔ ɖò-ɖò ɓě ɓɛ́ Gèɖèpɔ́ɔ̀ ɖǎ cɔ́cì-nyɔ̀ ɓěɔ̀ hwìɛ̀ poɛɛ, wa kɛà kɛ̀. Ɖíɛ́ ɓě mɔ̀ àpɔ́sò. Wa mɔ̀ nyɔ vɛ̀nɛ̀ ɓěɔ̀. Nyɔ ɓě kɔ ɓó dyíɛɛ mɔ̀ kpáá-ɖɛ̀-cɛ̃-nyɔ̀. Nyɔ kɔó dyí ɖeɛɛ mɔ̀ nyɔ-ɖɛ-tɛ̀mɛ̀ìn-nyɔ̀ ɓě kè zɛ̃̀ìn-ɖɛ̀-nyu-nyɔ̀ ɓě kè nyɔ-dyi-kánáìn-nyɔ̀ ɓě kè nyɔ-gbo-kpá-nyɔ̀ ɓě kè nyɔ-wuɖuí-kɔ̃̀-nyɔ̀ ɓě ɔ kè wuɖu-dù kà kò ɖò ɓě mú-wùɖùìn-nyɔ̀ ɓě. 29Nyɔ séín mɔ̀ àpɔ́sòe? Nyɔ séín mɔ̀ kpáá-ɖɛ̀-cɛ̃-nyɔ̀ ɓěe? Nyɔ séín mɔ̀ nyɔ-ɖɛ-tɛ̀mɛ̀ìn-nyɔ̀e? Nyɔ séín nyu zɛ̃̀ìn-ɖɛ̀ ɓěe? 30Zùùɔ̀ nyí nyɔ séín nyíí-ɖɛ̀, ɓɛ́ wa ké nyɔǔn dyi kánáìne? Nyɔ séín wùɖùìn wuɖu kà kò ɖò múe? Nyɔ séín ɓɛ́ìn wuɖu ɓěa mú zààe? 31Kɛɛ ɖɛ ɓě mɛ kpɔ̃ ɓě hwòɖǒ mìɔ kɛɛ, ɔ mɛ mɔ̀ nyíí-ɖɛ̀ɔ̀ nyɔ kpa ɖɛ mìɔ kɛ.
Ké ní muá ɓě hwìèɔ̀ nyɔ zi ɖɛ kpauń mìɔ kɛɛ da zàìn.
Chwazi Kounye ya:
1 Kɔ̀ɖéíntĩ̀ɔ̀ 12: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.