1 Kɔ̀ɖéíntĩ̀ɔ̀ 11
11
1Ɓě mɛ dyéìn ḿ ɖé ɖɛ ɓěa mú kà ɓɛ́ mɔ́ún dyéàìn Kɛ́ɖɛ́ì mɔ̀ùn wɛ̃.
Ɖɛ ɓá màa ɓěɛ̀ dú ɖɛ kɔ̃in ɓáìn jè dyí ɖé Gèɖèpɔ́ɔ̀ ɓièìn-naín nyɛ
2Ḿ ɓàìn ɓě, sepóɛɖé ní jè nì ɓě hwìɖǐi ɖé ɖɛ séín mú, ké ɓě kpɔ̃ kpeɖe ɓě ɓɛ́ ḿ tɛ̀mɛ̀ìn ma kà ɓěɛɛ dyi kóɖó-kóɖó. 3Kɛɛ ní mɔ́ ɓɛ́ ɓě kéɛ dyí dyuò kà nyɔ ɓɛ́ ɔ nì gàa séín kɔ̃in nyɛɛ, ɔ mɔ̀ Kɛ́ɖɛ́ì, ké nyɔ ɓɛ́ ɔ nì màa kɔ̃in nyɛɛ, ɔ mɔ̀ gàa kɛ. Ké Gèɖèpɔ́ɔ̀ nì Kɛ́ɖɛ́ì mɔ̀ùn kɔ̃in. 4Gàa ɖò dyi ɖɛ ɖò dú dèìn, ké ɔ dyi ɓaà, mɔɔ ɔ dyi ɖɛ Gèɖèpɔ́ɔ̀ dèìn ɔ wĩín nyɛɛ cɛ̃ín, nìí, ɔ se ɔ dúɔ̀ ɖɛ ɖá. 5Kɛɛ ɔ jǔ ké màa ɖò dyi dúi fɔ̀nɔ̀, ké ɔ dyi ɓaà, mɔɔ ɔ dyi ɖɛ Gèɖèpɔ́ɔ̀ dèìn ɔ wĩín nyɛɛ cɛ̃ín, nìí, ɔ se ɔ dúɔ̀ ɖɛ ɖá. Ɔ kè màa ɓɛ́ ɔ kpanaà ɔ dú-mìɛɛ jè hwɔìn ní. 6Ɔ jǔ ké màa ɖò se mɔ́ ɓɛ́ ɔ ké ɖɛ ɖò dú jìnììn ní, nìí, ɔ nɔ̀mɔ̀ dyíin ɓɛ́ ɔ ké dyɛ ɔ míɔ̀ cɛ̃ pū. Kɛɛ ɔ jǔ ké ɔ dyi dɛ̃ nì, ɓɛ́ màaɔ̀ ké ɔ míɔ̀ cɛ̃, mɔɔ ɓɛ́ ɔ ké ɔ míɔ̀ kpana ní, nìí, ɔ mɛ jìnììn ɖɔ dú. 7Gàa ɖò se ɓéɖé ɓɛ́ ɔ ké ɖɛ ɖò dú dèìn, sepóɛɖé ɔ mɔ̀ Gèɖèpɔ́ɔ̀ hwɔìn-ɖɛ̀, ké dĩ́ín-dĩ̀ìn ɓɛ́ ɔ ɓéɖéà kɛɛ sɔ̀ìn ɖé Gèɖèpɔ́ɔ̀ mú. Kɛɛ dĩ́ín-dĩ̀ìn ɓɛ́ màa ɓéɖéà kɛɛ sɔ̀ìn ɖé gàa mú. 8Sepóɛɖé Gèɖèpɔ́ɔ̀ se ma gàa mɛ sɔ̀ìn ɖé màa mú, kɛɛ ɔ mɛ màa sɔ̀ìn ɖé gàa mú. 9Gèɖèpɔ́ɔ̀ se ma gàa mɛ ɓó màaɔ̀ jè, kɛɛ ɔ mɛ ma màa ɓó gàaɔ̀ jè. 10Ɔ jèɛɛ, màa ɓéɖé ɓɛ́ ɔ ké kpéɔ̀ dyí-tɛ̀mɛ̀ìn-ɖɛ̀ ɓéɖé ɖé ɔ dú, ɓó ínjà ɓěɔ̀ jè. 11Kɛɛ wɛ̃́ɛ́ kɛɛ, ɖé Bounɓoɔ̀ múɛɛ, màa ɖòùn se ɖɛ ɖò nyuɛ ɓɛ́ìn ɔ jǔ ké gàa se nìǐn, ké gàa ɖòùn se ɖɛ ɖò nyuɛ ɓɛ́ìn ɔ jǔ ké màa se nìǐn. 12Sepóɛɖé kà ɓɛ́ Gèɖèpɔ́ɔ̀ mɛ ma kà màa sɔ̀ìn ɖé gàa múɛɛ, kǎà gàa mɔ̀ùn nyu màa xwíníín wóɖóɛ. Ké ɖɛ séín sɔ̀ìn ɖé Gèɖèpɔ́ɔ̀ gbo.
13Ɓě mìɔùn mɛ poɛ wɔ̃. Ɔ nɔ̀mɔ̀ dyíin ɓɛ́ màa ɖò ké dúi fɔ̀nɔ̀, ɓɛ́ ɔ ké Gèɖèpɔ́ɔ̀ ɓaàe? 14Nyɔǔn séín hwìɖǐi-poìn-ɖɛ̀ ɓá wa míɔ̀ dyíɛɛ tɛ̀mɛ̀ìn nyɔǔn dyí kà ɓɛ́ gàa ɖòɛ̀ mí dyi tɔ̀mɔ̀ǐn, nìí, ɔ mɔ̀ dɛ̃-ɖɛ̀ ɓó ɔ bììɛ. 15Kɛɛ ɔ jǔ ké màa ɖòɛ̀ mí dyi tɔ̀mɔ̀ǐn, nìí, ɔ míɔ̀ muɛ nyuùn ɓɛ́ ɔ ké ɓàìn-ɓàìn ɓéɖé. Ɔ se ná nìì? Gèɖèpɔ́ɔ̀ nyí màa mí tɔ̀mɔ̀-tɔ̀mɔ̀ɔ̀, ɓɛ́ ɔ ké ɔ dúɔ̀ kɔ̃in ɓáìn. 16Ɔ jǔ ké nyɔ ɖò dyi mɔ́ ɓɛ́ ɔ ké ɖɛín zàǐn, nìí, ɔ mɛ dyuòɛ̀ dyí kà à se kpeɖe kà kò ɖò ɓéɖé, ké Gèɖèpɔ́ɔ̀ cɔ́cì-nyɔ̀ ɓě nì dà séín nyɛɛ se ɖò ɓéɖé ɖekèɛ.
Gèɖèpɔ́ɔ̀-bɛ̀ɖɛ̀ɛ̀ɔ̀ ɖi-ɖi
(Máfíò 26:26-29; Máà 14:22-25; Ɖúù 22:14-20)
17Ḿ cɛ̃ ɓě ɖɛa gbo, kɛɛ ḿ se ɓě ɓàìn, sepóɛɖé ɓě dyi dyí poìn ní, nìí, ɔ se ɖɛ nɔ̀mɔ̀ dyíin ɖò ɓě bìì nyu. Ɔ dyà fũ̀à-fṹá pū. 18Ɖɛ ní mu cɛ̃ìn kĩ́ín nyɛɛ, ɔ kɛà kɛ̀. Ḿ wɔ̃́ɔ kà ɔ jǔ ké ɓě mɔ̀ cɔ́cì-nyɔ̀ ɓěɔ̀ kɛɛ dyi dyí poìn ní, nìí, mú-ge-ge nì ɓě hwìɛ̀ kɛ. Ké ḿ poìn hwìɖǐi kà ɔ ɓɛ́ìn jǎà jǔɛ kɛ. 19Hwìɖǐi-poìn-ɖɛ̀ kò-kò ɓéɖé ɓɛ́ ɔ ké ɓě hwìɛ̀ nì, ɓɛ́ ɓě ké nyɔ ɓě ɓɛ́ìn hwòɖǒ kɔ̃ dèɛ̀ kɛɛ dyí dyuò. 20Ɓě dyi dyí poìn ní, nìí, ɖii-ɖɛ̀ ɓɛ́ ɓě ɖià kɛɛ, ɔ se Bounɓoɔ̀ ɖii-ɖɛ̀ɔ̀. 21Sepóɛɖé ɓě ɖò-ɖò fṹà, ɓɛ́ ɔ ké ɔ nììn ɖii-ɖɛ̀ɔ̀ ɖi. Ké ɖíɛ́ ɓě mɔ́ nyu wa, ké nyɔ ɖíɛ́ ɓě náín. 22Kē! Ɓě se taún ɓě ɓéɖé, ɓɛ́ ɓě ké ɖé ɖɛ ɖiì, mɔɔ ɓɛ́ ɓě ké ɖé náà? Ɓě zàìn Gèɖèpɔ́ɔ̀ cɔ́cì-nyɔ̀ ɓěɔ̀ zùǔn, ké ɓě nyùìn nyɔ ɓě seà ɖɛ ɖò ɓéɖéɛɛ dɛ̃ɛ̀? Ɖɛ́ ḿ mɛ cɛ̃ ɓě gboɛ́? Ḿ mɛ ɓàìn ɓě ɖé ɖɛa múù? Gbào. Ḿ seɛ náa nyuɛ́ mu.
23Tɛ̀mɛ̀ìn-ɖɛ̀ ḿ zàìn ma ɓě xwáɖáún wɛ̃ɛ, ɔ mɔ̀ ɖɛ ɓɛ́ ḿ dyé ma sɔ̀ìn ɖé Bounɓoɔ̀ gboɛ. Ɔ mɔ̀, máaún-hwùɖù kɔ̃̀ mú ɓɛ́ wa zàìn ma kà Bounɓo Jízɛ̀ ɔ mú-nyɛ́-nyɔ̀ ɓěɔ̀ xwáɖáún wɛ̃ɛ, ɔ ɖú ma bɛɖɛɛ̀ dyí. 24Ké ti ɔ ɖǎ ma Gèɖèpɔ́ɔ̀ zùo poɛɛ, ɔ jaɖaìn ma kpói, ké ɔ ɖá, “Ɖɛ nìà kɛ mɔ̀ ní kpóɖó-dyùàɔ̀ ɓó ɓě bìì. Ɓě mɛ nyu ɖɛ nìà kɛ, ɓɛ́ ɔ ké ní jè ɓě hwìɖǐi dyà.” 25Kà dyúáɖòɔ̀ kǎà, ti wa ɖǎ ma ɖɛ ɖiɛ hwɔɛɛ, ɔ ɖú ma kópòɔ̀ dyí, ké ɔ ɖá, “Kópò nìà kɛ mɔ̀ dèè-wùɖù ɖìè ɓɛ́ ní nyɔmɔɔ̀ nyuɛ ké ɔ ɖǎà ɖɛ kpa kɛ. Ti séín ɓě muɛ náùn wɛ̃ɛ, ɓě mɛ nyu ɖɛ nìà kɛ, ɓɛ́ ɔ ké ní jè ɓě hwìɖǐi dyà.” 26Sepóɛɖé ti séín ɓɛ́ ɓě mu bɛɖɛɛ̀ɔ̀ ɖiìn, ké ɓě mu ɖɛ nìà kópòɔ̀ múɛɛ náùn wɛ̃ɛ, nìí, ɓě mu Bounɓoɔ̀ mɛ́ jè cɛ̃ìn tee, ɓɛ́ ɔ ké dyi hwɛ̀.
27Ɔ jèɛɛ, nyɔ mu bɛɖɛɛ̀ɔ̀ ɖiìn, ké ɔ mu ɖɛ nìà Bounɓoɔ̀ kópòɔ̀ múɛɛ náùn pū kà nyɔ náà ní ɔ kè kà nyɔ ɖià ɖii-ɖɛ̀ kà kò ɖòɛɛ, nìí, zaa ɓá Bounɓoɔ̀ kpóɖó-dyùàɔ̀ kè ɔ nyɔmɔɔ̀ jè dyíɛɛ mu ɔ dúún nììn. 28Hwɛ̀ ɓɛ́ nyɔ ɖò ké bɛɖɛɛ̀ɔ̀ ɖò ɖiɛɛ, mɔɔ ɓɛ́ ɔ ké ɖɛ nìà kópòɔ̀ múɛɛ ɖò náa, ɔ mɛ gmɔìn ɔ mìɔùn múin. 29Nyɔ ɖò se kpóɖó-dyùàɔ̀ jè dyí dyuò, ké ɔ dyi ɖɛa ɖiín, mɔɔ ɔ dyi ɖɛa náín, nìí, ɔ ɖɛɔ̀ ɖi-ɖiɔ̀ kè ɔ ɖɛɔ̀ ná-náɔ̀ mu zaa-wɔ̃-po-po ɔ mìɔùn kɔ̃ dyàùn. 30Ɖɛ nìà kɛ kɔ̃̀ jè ɓě ɓáún-ɓáún hwɛ̀à kpéí, ké ɓěɛ̀ nyɔ ɓáún-ɓáún wɛ́à, ké ɖíɛ́ ɓě ɖǎà mɛ́ kɛ̀. 31Kɛɛ ɔ jǔ ké à dyi à mìɔùn múin gmɔìn jǎà jɛ́ɛ́ cáín, nìí, à zaaɔ̀ se kà ná wɔ̃ kpáa mu. 32Kɛɛ wɛ̃́ɛ́ kɛɛ, Bounɓoɔ̀ dyi à zaa wɔ̃ poín, nìí, ɔ nì à nììn kpeɖe zàǔn ɓɛ́ à ké zaa-dúún-wáɖá-wáɖá muà ɓóɖó-kpàà kɔ̃ dyiìn nyɛɛ xwaún pó.
33Ɔ jèɛɛ, ḿ ɖíí ɓě, ɔ jǔ ké ɓě dyi dyí poìn, ɓɛ́ ɓě ké ɖɛ ɖiín, nìí, ɓě mɛ fòìn ɓě mǔè ɓěɔ̀. 34Mɔ́ dyi nyɔ ɖò nyuín, ɔ mɛ ɖi ɖɛ ɖé ɔ ɓíɖí-taún, ɓɛ́ ɓěɛ̀ dyí-poìn-poìnɔ̀ ní kɔ̃̀ ɖà zaa-wɔ̃-po-po ɓě kɔ̃ dyà. Ɓá ɖɛ tɔ̀ɔ̀ ɓěɔ̀ jè dyíɛɛ, ní mu ɖé dyiìn, hwɛ̀ ḿ ké wa jè cɛ̃.
Chwazi Kounye ya:
1 Kɔ̀ɖéíntĩ̀ɔ̀ 11: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.
1 Kɔ̀ɖéíntĩ̀ɔ̀ 11
11
1Ɓě mɛ dyéìn ḿ ɖé ɖɛ ɓěa mú kà ɓɛ́ mɔ́ún dyéàìn Kɛ́ɖɛ́ì mɔ̀ùn wɛ̃.
Ɖɛ ɓá màa ɓěɛ̀ dú ɖɛ kɔ̃in ɓáìn jè dyí ɖé Gèɖèpɔ́ɔ̀ ɓièìn-naín nyɛ
2Ḿ ɓàìn ɓě, sepóɛɖé ní jè nì ɓě hwìɖǐi ɖé ɖɛ séín mú, ké ɓě kpɔ̃ kpeɖe ɓě ɓɛ́ ḿ tɛ̀mɛ̀ìn ma kà ɓěɛɛ dyi kóɖó-kóɖó. 3Kɛɛ ní mɔ́ ɓɛ́ ɓě kéɛ dyí dyuò kà nyɔ ɓɛ́ ɔ nì gàa séín kɔ̃in nyɛɛ, ɔ mɔ̀ Kɛ́ɖɛ́ì, ké nyɔ ɓɛ́ ɔ nì màa kɔ̃in nyɛɛ, ɔ mɔ̀ gàa kɛ. Ké Gèɖèpɔ́ɔ̀ nì Kɛ́ɖɛ́ì mɔ̀ùn kɔ̃in. 4Gàa ɖò dyi ɖɛ ɖò dú dèìn, ké ɔ dyi ɓaà, mɔɔ ɔ dyi ɖɛ Gèɖèpɔ́ɔ̀ dèìn ɔ wĩín nyɛɛ cɛ̃ín, nìí, ɔ se ɔ dúɔ̀ ɖɛ ɖá. 5Kɛɛ ɔ jǔ ké màa ɖò dyi dúi fɔ̀nɔ̀, ké ɔ dyi ɓaà, mɔɔ ɔ dyi ɖɛ Gèɖèpɔ́ɔ̀ dèìn ɔ wĩín nyɛɛ cɛ̃ín, nìí, ɔ se ɔ dúɔ̀ ɖɛ ɖá. Ɔ kè màa ɓɛ́ ɔ kpanaà ɔ dú-mìɛɛ jè hwɔìn ní. 6Ɔ jǔ ké màa ɖò se mɔ́ ɓɛ́ ɔ ké ɖɛ ɖò dú jìnììn ní, nìí, ɔ nɔ̀mɔ̀ dyíin ɓɛ́ ɔ ké dyɛ ɔ míɔ̀ cɛ̃ pū. Kɛɛ ɔ jǔ ké ɔ dyi dɛ̃ nì, ɓɛ́ màaɔ̀ ké ɔ míɔ̀ cɛ̃, mɔɔ ɓɛ́ ɔ ké ɔ míɔ̀ kpana ní, nìí, ɔ mɛ jìnììn ɖɔ dú. 7Gàa ɖò se ɓéɖé ɓɛ́ ɔ ké ɖɛ ɖò dú dèìn, sepóɛɖé ɔ mɔ̀ Gèɖèpɔ́ɔ̀ hwɔìn-ɖɛ̀, ké dĩ́ín-dĩ̀ìn ɓɛ́ ɔ ɓéɖéà kɛɛ sɔ̀ìn ɖé Gèɖèpɔ́ɔ̀ mú. Kɛɛ dĩ́ín-dĩ̀ìn ɓɛ́ màa ɓéɖéà kɛɛ sɔ̀ìn ɖé gàa mú. 8Sepóɛɖé Gèɖèpɔ́ɔ̀ se ma gàa mɛ sɔ̀ìn ɖé màa mú, kɛɛ ɔ mɛ màa sɔ̀ìn ɖé gàa mú. 9Gèɖèpɔ́ɔ̀ se ma gàa mɛ ɓó màaɔ̀ jè, kɛɛ ɔ mɛ ma màa ɓó gàaɔ̀ jè. 10Ɔ jèɛɛ, màa ɓéɖé ɓɛ́ ɔ ké kpéɔ̀ dyí-tɛ̀mɛ̀ìn-ɖɛ̀ ɓéɖé ɖé ɔ dú, ɓó ínjà ɓěɔ̀ jè. 11Kɛɛ wɛ̃́ɛ́ kɛɛ, ɖé Bounɓoɔ̀ múɛɛ, màa ɖòùn se ɖɛ ɖò nyuɛ ɓɛ́ìn ɔ jǔ ké gàa se nìǐn, ké gàa ɖòùn se ɖɛ ɖò nyuɛ ɓɛ́ìn ɔ jǔ ké màa se nìǐn. 12Sepóɛɖé kà ɓɛ́ Gèɖèpɔ́ɔ̀ mɛ ma kà màa sɔ̀ìn ɖé gàa múɛɛ, kǎà gàa mɔ̀ùn nyu màa xwíníín wóɖóɛ. Ké ɖɛ séín sɔ̀ìn ɖé Gèɖèpɔ́ɔ̀ gbo.
13Ɓě mìɔùn mɛ poɛ wɔ̃. Ɔ nɔ̀mɔ̀ dyíin ɓɛ́ màa ɖò ké dúi fɔ̀nɔ̀, ɓɛ́ ɔ ké Gèɖèpɔ́ɔ̀ ɓaàe? 14Nyɔǔn séín hwìɖǐi-poìn-ɖɛ̀ ɓá wa míɔ̀ dyíɛɛ tɛ̀mɛ̀ìn nyɔǔn dyí kà ɓɛ́ gàa ɖòɛ̀ mí dyi tɔ̀mɔ̀ǐn, nìí, ɔ mɔ̀ dɛ̃-ɖɛ̀ ɓó ɔ bììɛ. 15Kɛɛ ɔ jǔ ké màa ɖòɛ̀ mí dyi tɔ̀mɔ̀ǐn, nìí, ɔ míɔ̀ muɛ nyuùn ɓɛ́ ɔ ké ɓàìn-ɓàìn ɓéɖé. Ɔ se ná nìì? Gèɖèpɔ́ɔ̀ nyí màa mí tɔ̀mɔ̀-tɔ̀mɔ̀ɔ̀, ɓɛ́ ɔ ké ɔ dúɔ̀ kɔ̃in ɓáìn. 16Ɔ jǔ ké nyɔ ɖò dyi mɔ́ ɓɛ́ ɔ ké ɖɛín zàǐn, nìí, ɔ mɛ dyuòɛ̀ dyí kà à se kpeɖe kà kò ɖò ɓéɖé, ké Gèɖèpɔ́ɔ̀ cɔ́cì-nyɔ̀ ɓě nì dà séín nyɛɛ se ɖò ɓéɖé ɖekèɛ.
Gèɖèpɔ́ɔ̀-bɛ̀ɖɛ̀ɛ̀ɔ̀ ɖi-ɖi
(Máfíò 26:26-29; Máà 14:22-25; Ɖúù 22:14-20)
17Ḿ cɛ̃ ɓě ɖɛa gbo, kɛɛ ḿ se ɓě ɓàìn, sepóɛɖé ɓě dyi dyí poìn ní, nìí, ɔ se ɖɛ nɔ̀mɔ̀ dyíin ɖò ɓě bìì nyu. Ɔ dyà fũ̀à-fṹá pū. 18Ɖɛ ní mu cɛ̃ìn kĩ́ín nyɛɛ, ɔ kɛà kɛ̀. Ḿ wɔ̃́ɔ kà ɔ jǔ ké ɓě mɔ̀ cɔ́cì-nyɔ̀ ɓěɔ̀ kɛɛ dyi dyí poìn ní, nìí, mú-ge-ge nì ɓě hwìɛ̀ kɛ. Ké ḿ poìn hwìɖǐi kà ɔ ɓɛ́ìn jǎà jǔɛ kɛ. 19Hwìɖǐi-poìn-ɖɛ̀ kò-kò ɓéɖé ɓɛ́ ɔ ké ɓě hwìɛ̀ nì, ɓɛ́ ɓě ké nyɔ ɓě ɓɛ́ìn hwòɖǒ kɔ̃ dèɛ̀ kɛɛ dyí dyuò. 20Ɓě dyi dyí poìn ní, nìí, ɖii-ɖɛ̀ ɓɛ́ ɓě ɖià kɛɛ, ɔ se Bounɓoɔ̀ ɖii-ɖɛ̀ɔ̀. 21Sepóɛɖé ɓě ɖò-ɖò fṹà, ɓɛ́ ɔ ké ɔ nììn ɖii-ɖɛ̀ɔ̀ ɖi. Ké ɖíɛ́ ɓě mɔ́ nyu wa, ké nyɔ ɖíɛ́ ɓě náín. 22Kē! Ɓě se taún ɓě ɓéɖé, ɓɛ́ ɓě ké ɖé ɖɛ ɖiì, mɔɔ ɓɛ́ ɓě ké ɖé náà? Ɓě zàìn Gèɖèpɔ́ɔ̀ cɔ́cì-nyɔ̀ ɓěɔ̀ zùǔn, ké ɓě nyùìn nyɔ ɓě seà ɖɛ ɖò ɓéɖéɛɛ dɛ̃ɛ̀? Ɖɛ́ ḿ mɛ cɛ̃ ɓě gboɛ́? Ḿ mɛ ɓàìn ɓě ɖé ɖɛa múù? Gbào. Ḿ seɛ náa nyuɛ́ mu.
23Tɛ̀mɛ̀ìn-ɖɛ̀ ḿ zàìn ma ɓě xwáɖáún wɛ̃ɛ, ɔ mɔ̀ ɖɛ ɓɛ́ ḿ dyé ma sɔ̀ìn ɖé Bounɓoɔ̀ gboɛ. Ɔ mɔ̀, máaún-hwùɖù kɔ̃̀ mú ɓɛ́ wa zàìn ma kà Bounɓo Jízɛ̀ ɔ mú-nyɛ́-nyɔ̀ ɓěɔ̀ xwáɖáún wɛ̃ɛ, ɔ ɖú ma bɛɖɛɛ̀ dyí. 24Ké ti ɔ ɖǎ ma Gèɖèpɔ́ɔ̀ zùo poɛɛ, ɔ jaɖaìn ma kpói, ké ɔ ɖá, “Ɖɛ nìà kɛ mɔ̀ ní kpóɖó-dyùàɔ̀ ɓó ɓě bìì. Ɓě mɛ nyu ɖɛ nìà kɛ, ɓɛ́ ɔ ké ní jè ɓě hwìɖǐi dyà.” 25Kà dyúáɖòɔ̀ kǎà, ti wa ɖǎ ma ɖɛ ɖiɛ hwɔɛɛ, ɔ ɖú ma kópòɔ̀ dyí, ké ɔ ɖá, “Kópò nìà kɛ mɔ̀ dèè-wùɖù ɖìè ɓɛ́ ní nyɔmɔɔ̀ nyuɛ ké ɔ ɖǎà ɖɛ kpa kɛ. Ti séín ɓě muɛ náùn wɛ̃ɛ, ɓě mɛ nyu ɖɛ nìà kɛ, ɓɛ́ ɔ ké ní jè ɓě hwìɖǐi dyà.” 26Sepóɛɖé ti séín ɓɛ́ ɓě mu bɛɖɛɛ̀ɔ̀ ɖiìn, ké ɓě mu ɖɛ nìà kópòɔ̀ múɛɛ náùn wɛ̃ɛ, nìí, ɓě mu Bounɓoɔ̀ mɛ́ jè cɛ̃ìn tee, ɓɛ́ ɔ ké dyi hwɛ̀.
27Ɔ jèɛɛ, nyɔ mu bɛɖɛɛ̀ɔ̀ ɖiìn, ké ɔ mu ɖɛ nìà Bounɓoɔ̀ kópòɔ̀ múɛɛ náùn pū kà nyɔ náà ní ɔ kè kà nyɔ ɖià ɖii-ɖɛ̀ kà kò ɖòɛɛ, nìí, zaa ɓá Bounɓoɔ̀ kpóɖó-dyùàɔ̀ kè ɔ nyɔmɔɔ̀ jè dyíɛɛ mu ɔ dúún nììn. 28Hwɛ̀ ɓɛ́ nyɔ ɖò ké bɛɖɛɛ̀ɔ̀ ɖò ɖiɛɛ, mɔɔ ɓɛ́ ɔ ké ɖɛ nìà kópòɔ̀ múɛɛ ɖò náa, ɔ mɛ gmɔìn ɔ mìɔùn múin. 29Nyɔ ɖò se kpóɖó-dyùàɔ̀ jè dyí dyuò, ké ɔ dyi ɖɛa ɖiín, mɔɔ ɔ dyi ɖɛa náín, nìí, ɔ ɖɛɔ̀ ɖi-ɖiɔ̀ kè ɔ ɖɛɔ̀ ná-náɔ̀ mu zaa-wɔ̃-po-po ɔ mìɔùn kɔ̃ dyàùn. 30Ɖɛ nìà kɛ kɔ̃̀ jè ɓě ɓáún-ɓáún hwɛ̀à kpéí, ké ɓěɛ̀ nyɔ ɓáún-ɓáún wɛ́à, ké ɖíɛ́ ɓě ɖǎà mɛ́ kɛ̀. 31Kɛɛ ɔ jǔ ké à dyi à mìɔùn múin gmɔìn jǎà jɛ́ɛ́ cáín, nìí, à zaaɔ̀ se kà ná wɔ̃ kpáa mu. 32Kɛɛ wɛ̃́ɛ́ kɛɛ, Bounɓoɔ̀ dyi à zaa wɔ̃ poín, nìí, ɔ nì à nììn kpeɖe zàǔn ɓɛ́ à ké zaa-dúún-wáɖá-wáɖá muà ɓóɖó-kpàà kɔ̃ dyiìn nyɛɛ xwaún pó.
33Ɔ jèɛɛ, ḿ ɖíí ɓě, ɔ jǔ ké ɓě dyi dyí poìn, ɓɛ́ ɓě ké ɖɛ ɖiín, nìí, ɓě mɛ fòìn ɓě mǔè ɓěɔ̀. 34Mɔ́ dyi nyɔ ɖò nyuín, ɔ mɛ ɖi ɖɛ ɖé ɔ ɓíɖí-taún, ɓɛ́ ɓěɛ̀ dyí-poìn-poìnɔ̀ ní kɔ̃̀ ɖà zaa-wɔ̃-po-po ɓě kɔ̃ dyà. Ɓá ɖɛ tɔ̀ɔ̀ ɓěɔ̀ jè dyíɛɛ, ní mu ɖé dyiìn, hwɛ̀ ḿ ké wa jè cɛ̃.
Chwazi Kounye ya:
:
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.