Kejadian 5
5
Adam deng Hawa pu anana cucu
5:1-32
(1 Taw 1:1-4)
1-2Allah bikin laki-laki deng prempuan dong sperti Allah. Allah kas berkat dorang trus panggil dong ʻmanusia.ʼ Ini manusia pertama yang nama Adam ni de pu daftar anana cucu.
3Waktu Adam pu umur su masuk 130 taun, de pu anak satu yang sperti de, lahir. Adam kas nama de pu anak tu, Set. 4Habis Set lahir, Adam masi hidup sampe 800 taun lagi, trus de masi pu anana laki-laki deng prempuan yang lain juga. 5Jadi, Adam pu umur tu sampe 930 taun, baru de mninggal.
6Waktu Set pu umur su masuk 105 taun, de pu anak yang nama Enos lahir. 7Habis Enos lahir, Set masi hidup sampe 807 taun lagi, trus de masi ada anana laki-laki deng prempuan yang lain lagi. 8Jadi, Set pu umur tu sampe 912 taun, baru de mninggal.
9Waktu Enos pu umur su masuk 90 taun, de pu anak yang nama Kenan lahir. 10Habis Kenan lahir, Enos masi hidup sampe 815 taun lagi, trus de masi ada anana laki-laki deng prempuan yang lain lagi. 11Jadi, Enos pu umur tu sampe 905 taun, baru de mninggal.
12Waktu Kenan pu umur su masuk 70 taun, de pu anak yang nama Mahalaleel lahir. 13Habis Mahalaleel lahir, Kenan masi hidup sampe 840 taun lagi, trus de masi ada anana laki-laki deng prempuan yang lain lagi. 14Jadi, Kenan pu umur tu sampe 910 taun, baru de mninggal.
15Waktu Mahalaleel pu umur su masuk 65 taun, de pu anak yang nama Yared lahir. 16Habis Yared lahir, Mahalaleel masi hidup sampe 830 taun lagi, trus de masi ada anana laki-laki deng prempuan yang lain lagi. 17Jadi, Mahalaleel pu umur tu sampe 895 taun, baru de mninggal.
18Waktu Yared pu umur su masuk 162 taun, de pu anak yang nama Henokh lahir. 19Habis Henokh lahir, Yared masi hidup sampe 800 taun lagi, trus de masi ada anana laki-laki deng prempuan yang lain lagi. 20Jadi, Yared pu umur tu sampe 962 taun, baru de mninggal.
21Waktu Henokh pu umur su masuk 65 taun, de pu anak yang nama Metusala lahir. 22Habis itu, Henokh masi hidup sampe 300 taun lagi. Dalam 300 taun itu, Henokh de baku teman dekat skali deng Allah. Habis Metusala, masi ada anana laki-laki deng prempuan lagi yang lahir untuk Henokh. 23Henokh hidup sampe umur 365 taun. 24De hidup baku teman dekat skali deng Allah, trus de hilang. Karna Allah angkat de langsung dari dunia ini.
25Waktu Metusala pu umur su masuk 187 taun, de pu anak yang nama Lamek lahir. 26Habis Lamek lahir, Metusala masi hidup sampe 782 taun lagi, trus de masi ada anana laki-laki deng prempuan yang lain lagi. 27Jadi, Metusala pu umur tu sampe 969 taun, baru de mninggal.
28Waktu Lamek pu umur su masuk 182 taun, de pu anak satu lahir. 29Lamek bilang begini, “Anak ini, de nanti bikin tong rasa lega dari tong pu kerja stenga mati di tana yang TUHAN su kutuk ini.” Itu yang, Lamek kas nama de Nuh.#5:29 Nuh ‒ Nama ini pu arti ʻistirahat.ʼ 30Habis Nuh lahir, Lamek masi hidup sampe 595 taun lagi, trus de masi ada anana laki-laki deng prempuan yang lain lagi. 31Jadi, Lamek pu umur tu sampe 777 taun, baru de mninggal.
32Waktu Nuh pu umur su masuk 500 taun, de pu anana laki-laki tiga lahir. Dong pu nama tu Sem, Yafet, deng Ham.
Chwazi Kounye ya:
Kejadian 5: MPapua
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2023 (Active), Wycliffe Bible Translators, Inc. All rights reserved.