Ñwed Mbon Rom 2

Adinen Ubiireikpe Abasi

1Ndin afo, a-akpeeghe ikpe anọọ awo mfen, unieghe ntak, sia naña afo akpe ikpe mbon mfen, afo ñko abiom idem mfo ikpe, sia afo akpeikpe anam ukem mme ñkpọ ado. 2Ndin ñnyịn imidiọọñọ ke ubiireikpe Abasi a-abañake mbon e-enamma utọ ñkpọ ami akọñọ ke akpanikọ. 3Ndin afo ñkaña awo, umaubiire ikpe unọ ammọ ado afo asʌk anam ukem ñkpọ ado, afo akere abo ke imọ iyaibọkkọ ubiomikpe Abasi? 4Me afo asịn uwak mfọnido Abasi, ediyọ ye ime amọ ke ndek? Ado nte afo udiọọñọke ke mfọnido Abasi ado adinam afo atua ñkpọfiọk?

5Ado ke ntak nsọñiwuod ye unana adikappa esịd, afo asʌk akọ ifiobesịd anịm anọ idem mfo ke usen iyadesịd Abasi, ke ini adinen ubiireikpe amọ adiiyaara. 6Abasi “ayaanọ awo keedekeed utịb akeene se ammọ enam.” 7Amaado mbon e-esịnne ifịk ke adinam nti ñkpọ, eyem ubọọñ, ukpono ye unana ñkpa nsi-nsi, anye ayaanọ nsi-nsi uwem. 8Ado amaado mbon e-eyemme ubọọñ idem ammọ, enyʌñ esịn akpanikọ, ndin ekeene idiọọk, ifiobesịd ye iyadesịd Abasi ayaaba. 9Afanekọñ ye nnananyen ayaaba anọ afịd awo e-enamma idiọọk, akpa, anọ mme Yuu, ndin mme Gentile. 10Ado ubọọñ, ukpono ye emem anie afịd awo se inam nti ñkpọ; akpa anọ mme Yuu, ndin mme Gentile. 11Sia Abasi akpe ikpe afịd awo ukem-ukem.

12Afịd awo se inam idiọọk ke unana mbed eyaekịt nsobo ke unana mbed, ndin afịd awo se inam idiọọkñkpọ ke idak mbed eyaebọ ubiireikpe ke idak mbed. 13Sia idooho mbon se ikop mbed edoñño ndinen ke iso Abasi, ado mbon se inam mbed ke ediikoot ndinen. 14(Ke akpanikọ, ke ini mme Gentile i-imiinieghe mbed, enamma ke uduud ammọ nte awo mme ñkpọ e-ekewette ke mbed, ammọ edo mbed enọ idem ammọ, akpọkọm a-ammọ imiinieghe mbed. 15Sia ammọ e-ewọt ke se mbed ayem awere ke esịd ammọ. Akikere esịd ammọ ado ntiense, ndin akikere ado abiom ammọ ikpe usʌk ini, anyʌñ afak ammọ asio ñko usʌk ini.) 16Ami ayaadat itie ke usen a-Abasi adiikpe ikpe ibaña mme ndịbe ñkpọ uduud awo ato ke Yisọs Krais naña eti etob mmi atañ.

Mme Yuu ye Mbed

17Idahami afo, adieke afo akoodo idem mfo Yuu, akpedo ada ke mbed ndin anam inua abaña ewuana mfo ye Abasi, 18akpedo afo amediọọñọ uduak amọ anyʌñ anyịmme se ifọn ikan ke ntak a-adooho afo amediọọñọ mbed; 19akpedo afo amenịm ke afo ado adadusʌñ anọ mme nnan, ado unwana anọ mme andiba ke ekịm, 20ado anọitem anọ mme akọi, ado andikpeeb anọ ntəkayịn, sia afo amenie ke mbed ayọhọ ifiọk ye akpanikọ; 21afo ndin, a-akpeebe mbon mfen, ukpeebe idem mfo ñko? Afo a-akwọrọke abo awo akuuyịp inọ, nte afo ameyịp inọ? 22Afo a-abooho mme awo ekuusịn efịbe, nte afo amesịn efịbe? Afo a-asuaha usọsọiñkpọ, afo ameyiip ñkpọ ke mme tembịd? 23Afo a-awọkkọ inua abaña mbed, nte afo ametre ikpono Abasi ke adibiat mbed? 24Nte naña ewet: “E-esịn anyịñ Abasi ke ndek ke atu mme Gentile ato ke ntak mfo.”

25Adifọọrọ edʌd a-afọn akpedo afo amenịm mbed, ado akpedo amebiat mbed, amekappa aba nte awo ikuufọọrọke fiin edʌd. 26Ke ntoro, adieke mbio i-imiifọọrọke edʌd enamma se isịne ke mbed, nte awo idiidatta ammọ nte mme afọọrọ edʌd? 27Awo i-imiifọọrọke edʌd ke abʌkidem, ado anam se mbed atemme, ayaubiom fiin ikpe, sia afo ado abiad mbed, akpesʌkado a-afo anieghe uwewed mbed anyʌññọ afọọrọ edʌd.

28Awo idooho Yuu ke abʌkidem ikpọọñ, kpa naña adifọọrọ edʌd miidooho se ekịt ke anyen me ke abʌkidem ikpọọñ. 29Iyoo, awo ado Yuu ke esịd idem; ndin ufọọrọ edʌd, ado ufọọrọ edʌd ake esịd, ke Sịbidịd, idooho ke uwewed mbed. Utọ itooro ado itooho awo, ado ato Abasi.

Chwazi Kounye ya:

Ñwed Mbon Rom 2: ICB

Pati Souliye

Kopye

Konpare

Pataje