Rutha 1
1
1HNYI ûen musi anyin hnyat owisa, ame o but hmiâ hnyi hnyei. Ke ame he ke at Bethe-leema-juda he ka laba kanyua hnyi hnyei Moaba, e, me âiân, me lakon li baga. 2Ke Elimelek ien at, ke Naomi ien âiân, ke Malona, me Kiliona ien li lakon, je hnyat Eferatha ûheny Bethe-leema-juda. Ke ödrin e o but hnyi hnyei Moaba, me laba eling. 3Ke ame mokcu Elimelek öiö Naomi, ke e biju me li lakon. 4Ke ödru me ve hok öiödru anyin je momo Moaba; Orepa ien ke at, ke Rutha ien ke at: ke ödrin e laba eling helâ me ten je huna. 5Ke ame tha mokcu Matana, me Ki liona; ke ödrin e mok degecâ monu hnen âiân me lakon li baga. 6Me e ame todrö me laûngon, me hmetu ûheny hnyi hnyei Moaba: anyin a long ut hnyi hnyei Moaba a Iehova ame senâ lakeiny me me ha ödrin. 7Ke e ame he ûheny hnyi dok e ame laba hnyin, ke tha he me laûngon; ke ödrin e vheno gethen he ka hmetu ka hnyi hnyei Juda. 8Haba Naomi ame ha ka laûngon, ka habe, E, ve hmetu ju öbu ka hnyi li uma umen lahinyöbu: ke so ame he Iehova ka betenge gabu, helâ me hnöbu hna ânyâ ka li komok, mönya minya. 9E so ame he Iehova he ka omenʼ öbu hnyi hnyaban laöiöbu. Me e ame ûcimhnyimak mödru, me tenge gan hmâ. 10Ke ödru me thu bi kâu, ka habe, ohmu me he ka tha he mou ka je lahanâm. 11Haba Naomi ame ha, ka habe, Hmetu ju öbu laûnguk: öbu me he ka tha he mönya geû? hawa, e hu je lakuk hmetu bi baga eû hnyi hnyekuk me me li öiöbu? 12Hmetu ju öbu laûnguk, ke he thö; anyin oge somaca but, ke ame ca he hmetu ka hu öiök. Oge ne ha, ka habe, E hu hnageju gak, oge ne he ka hu öiök eâu hnyinghet, me hnokoâ je baga: 13hawa öbu me he ka laba ke ne o but ödrin e gan dut? hawa, öbu me he ka bec me ca hu âiân? Ohe laûnguk: anyin ae gan hmâ anyik vec gabu, anyin a Iehova ame ip hnyamen huk. 14Me ödrin e ûtengiö, me tenge hmetu: ke haba Orepa ame ûcimhnyimak me ûngon; ke Rutha ame kece hmâ bi kâu. 15Me haingen momo, ka habe, Wâ bi, a hmetu but liamekeiny möu ka ta je lahanen, me khongon: bethe hmetu minya ju hoton liamekeiny möu. 16Me Rutha ame ha, ka habe, Ca ûjongi nya bi he ka hna degeci u, me hmetu gam; anyin a haba dok u ma he ka hnyin me oge me he bi nya ka he kâu: ke haba dok u ma he ka labâ, me oge me he bi nya ka labâ: me haba lahanâm ame he ka lahanök bi, me Khongom ama Khonguk bi: 17haba dok u me he ka mokcu hnyin me oge me he bi nya ka mokcu eling, mʼ adre me he ka konim nya hnyin: e so ame he Iehova ka ânyâ helâe kônya me bi hanen bi, ame ne he ke ûnyi ka ovesei otu, he so bi mok thibi. 18Ke a wâ hnen momo a ga hwege hnyekon kâu he ka tha he më, me e ame ca ha hmetu bi hofuc kâu. 19Ke ödru me tha he ke ne o but hnyi Bethe-leema. Ke ödru me o hnyi Bethe-leema, me ame bwebwet hia taun gadru, ke adre me ha, ka habe, Ame ne Naomi la eang? 20Ke haingen ködrin, ka habe, Ca ha iök bi, me, Naomi, ke ha iök bi, me, Mara: anyin a haba hwakecin Aekhanahia me gan hmâ hiny kônya. 21Oge me he thö kʼ iny unöngötö, ke Iehova ame ohmetu nya ke ba ta ûnyi gak: ieû gabun öbun e ha iök me Naomi, anyin a Iehova ame owisa kongo kônya, ke haba Aekhanahia ame oveci nya? 22Me ame tha hmetu Naomi me Rutha a ûngon, wale at Moaba, at a hmetu ûheny hnyi hnyei iny at Moaba: ke ödru me o but hnyi Bethe-leema hnyi ûen adre hwân he ka meno bali.
maintained by the British and Foreign Bible Society