Ta je Vejec 20
20
1HABA waina, me wale at hlumö at, ke haba grâg me wale at ame mede monu.
Ke ca metâ bi at ame monu ge li ûnyi e.
2Haba outen than, me helâ me liona ame kuku:
Haba at ame ohmönyinâ e, me ame ka okongoâ e bi.
3Hnân ogânâ at ame ne tot sâkâû ge iwatretra:
Kʼ ame he tavat hia ae monu ka beû.
4Haba ūsēnyin me ame höcö he ka seû kânâ can megic;
Anyin a wale e ame he ka sumat hnyi ûen menu, ke ba bi.
5Haba hna ûnykûme eû hnyi hnyekon at, me helâ me köiö ae dit;
Kʼ ame he at wâ ûnykûme ka sâû e.
6E se hia tavat adre me ve ha hwakecidra bi ae betenge:
Ke ie at ae khana elâm at ae hnathu?
7Haba at ae wisa, wale at ame he hnyi anyin wisa,
Me hnahic bi lakon hwaban.
8Haba than ame tabâ theroniny owisa,
Me ame oveseâ ta je hulo hia ge li emakan.
9Ie at ame he ka ha, ka habe, Oge hia but okalaötâ hnyekuk,
Iny bo so but ûnyi ge hulo?
10A ne ve ihmakiny bi tulut, kʼ ame ne ve tulut bi,
Me hmiö Iehova li ûnyi hia e.
11E manen wanakat bi ge hnen hna ânyâ,
Ame ne so, ame ne wisa anyin huliwa.
12Hnyiköny at ame long, ke ecmak at ame bwele,
Ke Iehova ame tha up hia.
13Ca hnyokâ bemokut, wâ u nye theduoc;
Hmak ut, e me sekom ge jeû.
14Haingen at ûco ke ûnyi, ka habe, Ûnyi baû, ûnyi baû:
Ke e ame he but, me e ame hobâ gan.
15E hu gol, ke se hia ta je penina:
Ke haba li esongot ame wâhmakhmeto me wale omjeû ae ûnyi hnathu.
16Hom do ûkhaûen at ame tilö hwaban atkanyua;
Ke hok haten ûnyi ge at ame tot hnân hwaban je atkanyua.
17E hnebwia ka at jeû hwaban thoi;
Ke hnyi ke bong ame he ka unöngöt hnyimen ge kânâ.
18Ame ohmâ ta je ûnykûme hnen ûhnenamö:
Ke u ma vak dö vat hoton hna ûhnenamö wia.
19Haba at ame hok ûsabû me ame omanenâ ta je ûnyi ae iyong:
Awe, ca tha e me at ame memang li esongodiny.
20Haba at ame hangâ kamen me hinyen,
Me adre me he ka ume anyin lamepa hnyi wanben menekholom.
21Adre me ne ie hom tang omjeû hnyi hwân;
Ke ame ca he ka hnahic obiny.
22Ca ha, ka habe, Oge me he ka bi hwaban monu:
Halubahing Iehova ju, ke e ame he ka omeli u.
23E hmiö Iehova je tulut ae ve ihmakiny;
Ke ca so tulut uhni ae iyawo.
24Ûnyi ga Iehova ta je hna okca hnen at;
Ke ame he at ka kâmâu ka wâ ûnykûme deny gethen?
25Hnân hnewe ka at ame ie ha okabâ ke ûnyi,
Ke e ka hia but bi khöbi, me ame he bi ka hnö.
26Haba than ae metâ, me ame oveseâ ta je monu,
Me wiwia waengen hnyi hudrin.
27Lamepa anyi Iehova, me hanon at,
Ame elâm ta je ke keihen hnyok hia.
28Betenge me hnathu, li at tuö than:
Ke haba ciny anyin theron me ibetengiö.
29Haba mecin wahidröu, me tang hwege gadra:
Ke haba hmanenanginy wahingat, me hûen.
30Adre me hneû degecâ hulo ge je hna kot ame aatâ:
Kʼ ame dit ka hnyi hnyin hnyok ta je hna kot.
maintained by the British and Foreign Bible Society