Numera 15
15
1KE Iehova ame ha kö Mose, ka habe, 2Ha thö ka lakon Isaraela, me ha ködra ka habe, Öbun ka o ka hnyi hnyei öbun e he ka labā wale oge ham köbun, 3ke öbun ka he ka bi hut a an ge meic kö Iehova, ame ne hudiny leû, ame ne hudiny thamuö khöbi, ame ne hudiny ibetengiö, ame ne hnyi anyibun je bijeû adre thu, me me bo so kö Iehova, ame ne kau, ame ne mamoe: 4awe, hamen at a hom hut kö Iehova he ka hom hudiny han a khaca omer salawa adre ûhaniken me wakaco a ke keihen hin a vakiny: 5me tap waina hnân hudiny ic a ke keihen a vakiny hin u me he ka tha penapena me hudiny leû, ame ne ke hut bi, me wale hobi kâu je ve lakon mamoe. 6Ame ne mamoe baga, me u me he ka penapena hnân hudiny han lo li omer salawa adre ûhaniken me wakaco wale ke keihen a kuniny hin: 7ke u me he ka hudo tap waina wale ke keihen a kuniny hin hnân hudiny ic ae bo so kö Iehova. 8Ke u ka he ka penapena bolok hnân hudiny leû, ame ne hudiny thamuö khöbi, ame ne hudiny ole kö Iehova: 9me e ame he ka tha hom me bolok hudiny han a kun ta omer salawa adre ûhaniken me wakaco a hafiny hin. 10Ke u me he ka hom tap waina a hafiny hin, hnân hudiny ic, a hut a an ge meic ae bo so kö Iehova.
11Adre me he ka ânyâ helâe hobi kâu je ve bolok, ame ne je ve mamoe baga, ame ne nokon mamoe baga, ame ne nokon got. 12Öbun e he ka penapena hoton ûseiny je hut, ke helâe öbun e he ka ve ânyâ hoton ûseiny. 13Ame he je aten hnyei hia ka ânyâ helâe, ödra ka he ka hudo hut a an ge meic ae bo so kö Iehova. 14Ke ame ne laba unyibun atkanyua, ame ne ke at bi unyibun hnyi anyibun je dö, ke e ka he ka hudo hut a an ge meic ae bo so kö Iehova; me e ame he ka ânyâ helâ me hnöbun hna ânyâ. 15Khaca thibi hnanyibu köbun, a wale ûkhacaköu me atkanyua ame laba unyibun, wale hnanyibu nyiele balua hnyi anyibun ta je dö: haba öbun me tha ûcû me atkanyua hnyi hnyimakö Iehova. 16Khaca hnanyibu, ke khaca tulut hobi köbun me hobi kâu atkanyua ame laba unyibun.
17Ke Iehova ame ha kö Mose, ka habe, 18Ha thö ka lakon Isaraela, me ha ködra, ka habe, Öbun ka o ka hnyi hnyei oge me hum öbun ka hnyin, 19ke öbun ka he ka han jeûiny hnyei, me öbun e he ka hudo hudiny kap goranyai kö Iehova. 20Öbun e he ka hudo ke ong areto ûnyi hnyi anyibun salawa a bân hnân hudiny kap goranyai: öbun e he ka kap e goranyai helâ me hnobun hna kap goranyai hut ûnyi hnyi hna uja hwit. 21Öbun e he ka ham kö Iehova hudiny kap goranyai ûnyi hnyi anyibun; salawa a bân hnyi anyibun ta je dö.
22Ke öbun e ne haû, me ca ânyâ bi je hnanyibu hia eang wale a ha Iehova kö Mose, 23a ta je ûnyi hia waleji ame hûna hnö Iehova köbun a deny Mose, hwân hnyi bong Iehova ame hûna hnyin ke ne o but nyiele hnyi anyibun ta je dö: 24haba hnyi ûen e, adre me ne ânyâ haûâ, ke ca khana bi hnen ûkhacaköu, me hamen ûkhacaköu hia he ka hudo ke nak bolok hnân hudiny leû ae bo so kö Iehova, tha e me hudiny han, me hudiny ic, hoton tulut, me nokon minya got a khaca hnân hudiny hulö. 25Ke hamen at bihut he ka bi hwaban möt anyin ûkhacaköu hia anyin lakon Isaraela, kʼ adre me he ka hnʼ ödra; anyin adre haû, kʼ adre hia but hom anyidra hut, wale hut a an ge meic kö Iehova, me hudiny anyidra hulö hnyi hnyimakö Iehova, can hnödra hna haû; 26kʼ adre me he ka hna ûkhacaköu hia anyin lakon Isaraela, me atkanyua ame laba unyidra; anyin adre ânyâ haûâ hnyi hnyimakan tavat hia. 27Ke ame ne ânyâ hulö ke at a khaca ke ca khana, me e ame he ka hom got momo a khaca hunainy hnân hudiny hulö. 28Ke ame he at bihut ka bi hwaban möt anyin at a ânyâ ke ca khana, kʼ ame ânyâ haûâ hulö, hnyi hnyimakö Iehova, me me bi hwaban anyin möt: ke adre me he ka hna e. 29Ame he ka hu gabun hnanyibu a khaca hobi kâu at ame haû ame ne aten hnyei unyin lakon Isaraela, ame ne atkanyua ame tha laba unyidra. 30Ke haba at ame ânyâ sheshamökâ ke ûnyi, ame ne aten hnyei ame ne atkanyua, me wale at ame bi gan kö Iehova; ke adre me he ka subâ degecâ at eling ûnyi hnyi iny hnyei. 31Anyin a e ame höciâ hofuc ho Iehova, me hanyâûâ anyin hnanyibu; kʼ adre me he ka ti subâ degecâ at eling, kʼ ame he ka takoû e ge anyin hulö.
32Ke hnyi ûen lakon Isaraela adre me he hnyi hnyebuba, me adre me lelö ke at ame hlu uto hnyi bong sabath. 33Ke haba hnyat ödrin e wâ at ame tiga hlu uto hnyi bong sabath, me ödrin e lelö e kö Mose me Arona me ûkhacaköu hia. 34Ke adre me hna e ka tavat tue, anyin ae tiga ca manen ûnyi adre me he ka ânyâ kâu. 35Ke haba Iehova ame ha kö Mose, ka habe, Adre me he ka hlingâ at: ke hamen ûkhacaköu hia ka lûâ e ge veto hnyi hoton hna hunuma. 36Me haba ûkhacaköu hia adre me hom e ka hnyi hoton je hnyaba, me lûâ ge veto, me ame mokcu; helâ me Iehova ame hûna kö Mose.
37Ke Iehova ame ha kö Mose, ka habe, 38Ha thö ka lakon Isaraela, me ha ködra, ka habe, Adre me he ka bi bâbuen baten je khaûdra hnyi anyidra je dö, ke adre me he ka ip telenu ae udrudrâ hon baten bâbuen: 39ke wale bâbuen köbun, mʼ öbun e he ka wâ e me ûnykûme ta je hnanyibu anyi Iehova hia, me vheno; mʼ öbun e ca he monu hoton je hnyekubun me je li emaköbun, waleji öbun e labö bi ûnyi monu hoton: 40mʼ öbun e he ka ûnykûme me ânyâ hoton anyik je hnanyibu hia, mʼ öbun e at ae kap ka Khongubun. 41Inya Iehova Khongubun, waleji at ame hum öbun ûnyi hnyi hnyei Aigupito, me me Khongubun: Inya Iehova Khongubun.
maintained by the British and Foreign Bible Society