Isaia 6
6
1HABA hnyi hunainy mok a Uzia than, me oge me wâ Than ame tabâ theron ae gorany ke beönua, ke unöngötö uma ge obiny anyin ûkhaû. 2Kʼ ame tot ethö hon e je serafi; ke ve hu labenyidra a siks; kʼ adre me tube je hnyimakodra ge li labenyidra, kʼ adre tube li cadra ge ke lo, kʼ adre me gâ ge ke lo hmetu. 3Ke adre me ûkukoköu me ha, ka habe, E kap, e kap, e kap, Iehova tuhan sabaoth: e unöngötö hmeledrany hia ge anyin hmanenang. 4Ke ame bwebwelâ je taben je hwanuma ge ifucin at ame hongot, kʼ ame unöngötö uma ge hai. 5Me oge me ha, ka habe, Ekölö gak! anyin oge ngâ but; anyin a inya at ae kong esongodiny, ke inya oge me laba unyin tavat ae kong je esongodidra: anyin a li emakök ame wâ Than, a Iehova tuhan sabaoth. 6Haba ke serafi ame gâ könya, ke e bi hnyi hnyamen walep ae möt, wale e ame hom ûnyi hnyi taben hut ge akofi: 7me e ame kâlâ hnyimök kâu, me ha, ka habe, Wâ bi, ame kâlâ li esongodâm ge ûnyi e; ke adre ohia but ânyâm monu, kʼ adre me hneû degecâ ânyâm hulo. 8Ke oge me long ifuci Iehova ame ha, ka habe, Oge me he ka kunö ia, ke ie at ame he ka he hobi kötin? Me oge me ha, ka habe, Inya ang; kunö nya thö. 9Me e ame ha, ka habe, He thö, me ha ka tavat ang, ka habe, Öbun e labö long, ke ca wâhmakhmeto bi; ke öbun e labö wâ, ke ca wâ ûnykûme bi. 10Opipikhenya ju hnyekon tavat eang, ke owejijö but ta je hnyikönyödra, ke omûko but ta je emakö-dra; wâ adre nye wâ ge ta je emaködra, me long ge ta je hnyikönyödra, me khana ge je hnyekudra, me hwio hmetu bi, me metu but. 11Me oge me ha, ka habe, Than lö, ke ne o but kehö î Ke haingen, ka habe, Ke ne o but ame ba but wan je taun, ke ba at ame labā, ke ba but at hnyi je uma; ke ba but wan hnyei, 12ke Iehova ame hom but sâkâû ai tavat, ke e gau hmâ hna hna degecâ hnyei. 13Ke ame ne tiga hu ke keihen a libenyitainy biju hnyin e, adre me he ka han metoâ e: helâ me man ela me iwajo, wale ame tiga e bi onyen, ödra ka hia but öûo; helâe ame he ka wan ae kap onyen.
maintained by the British and Foreign Bible Society