Isaia 36
36
1KE haba hnyi huna a fotini Hezekia than, me ame o but Saneribi than Asuria ka vat me je taun adre up veten hnyi Juda, me hûgûnâ. 2Ke haba than Asuria ame kunö Rabesake ûheny Lahisa Jerusalema ai kö Hezekia than me utbavat ae gan hmâ. Ke e ame tot hnyi deny köiö ethö, hnyi gethen ame he ka hnyi utkânâ anyin at ame hnû khaû. 3Me ame o but kâu Eliakima nöku Hilekia, at ame muso hnyaba, me Sebena at sihnalimen, me Joa nöku Asafa at ame oûnykûmeâ. 4Ke Rabesake ame ha kodra, ka habe, Ha thö walang ang kö Hezekia, ka habe, Walang hna ha hnen than ae gan, a than Asuria, ka habe, Ie ûnyi e u me labageju kâu? 5Haingök a haba ânyâm metâ me tang hwegiâm hobi kâu vat, me wale je hofuc baû thibi: ke u me labageju kö ia waleling mʼ u me bi gan könya? 6Wâ bi, u me labageju ka uci hlowe ae mita eû, wale Aigupito; ke e ka hlec hnyiban e ge at, me ame he ka dâoâ hnyamen: ke helâe Farao than Aigupito kodra hia adre me labageju kâu. 7Ke u je ne ha könya, ka habe, Öhmun e labageju kö Iehova Khonguhmun; hawa, ca anyin je dok ae gorany me anyin je taben hut waleji a ohia hnö Hezekia, me ha ka at Juda me Jerusalema, ka habe, Öbun e he ka hic hnyi hnyimakan taben hut ang? 8Ke walang ang, u na he ju ka uhihinyköu me tuhok thaniny Asuria, ke oge me he bi nya ka ham köu lo li thauzan je hors a ne khanö u he ka ve bi at he ka tabʼ ödrin. 9Ke u me he ka kâmâu ka ohmeto ke taben vat ae ûhnyûkong hmonyin unyin lathnyabainy tuhok, me labageju kö Aigupito hobi kâu je kariota me tavat tabö hors? 10Ke hawa, oge me o but ka hnyei ang ka ohia e, ke a ca musi bi Iehova? Haba Iehova ame ha könya, ka habe, He thö ka hnyei eang me ohia e. 11Me haingö Eliakima, me Sebena, me Joa, kö Rabesake, ka habe, Ö u fuc ka lathnyabaem hnyi hwen Suria; anyin ae khanʼ öhmun e: ke ca fuc köhmun hnyi hwen Juda wâ e nye long dö tavat hon hna up haginy. 12Me Rabesake ame thu, ka habe, Hawa, a kunö nya tuhok ka tuhâm möu minya he ka ha hofuc e? hawa, a ca kunö nya ka tavat adre me laba hon hna up haginy, mʼ adre me an tidra tatet me ijem hnödra hna hwen hingat tha ödra möbun? 13Ke haba Rabesake ame tot me hongot hwege goranyai hnyi hwen Juda me ha, ka habe, Long ju hofuc hwan than ae gan a than Asuria. 14Walang hna ha hnen than, ka habe, Ca hna but kö Hezekia he ka iyâwʼ öbun; anyin ae ca khana he ka omeli öbun: 15ke haba khaca e so ame ca he Hezekia ka kunʼ öbun he ka labageju kö Iehova, ame ha, ka habe, Ame he Iehova ka omeli öta; ke ame ca he ka hna taun ang ka hnyi hnyamen than Asuria. 16Ca he öbun ka ling Hezekia: anyin a walang hna ha hnen than Asuria, ka habe, Ûsoköu thö mönya, me he könya; ke öbun e he ka ve an wan anyibun vine me halebun je elaio, me ve ijem je an öbun e koû: 17ke ne o but oge me o me hum öbun ka hnyi hnyei helâ me ibun hnyei, hnyei ae hu hwit me waina, hnyei ae hu areto me je hnyei vine. 18Wâ wia wâ e nye he Hezekia ka iyâûʼ öbun, me ha, ka habe, Ame he Iehova ka omeli öbun. Hawa, e hu hna omelo tavat hnen je khongon je hnyei ûnyi hnyi hnyamen than Asuria? 19Ewa je khongon Hamath me Arefada? ewa je khongon Sefaravaima! hawa, ödrin e hia but omeli Samaria unyi hnyi hnyamok? 20Ewa je khongon je hnyei a hnyat adre hia but omelo idra je hnyei ûnyi hnyi hnyamok, me me he Iehova ka omeli Jerusalema ûnyi hnyi hnyamok? 21Ke adre me laba hnyibû, me ca thu kâu ge ke hofuc, anyin a hûna than, ka habe, Ca he ka thu kâu. 22Me haba Eliakima nöku Hilekia at ame muso hnyaba, me Sebena at sihnalimen, me Joa nöku Asafa at oûnykûmeâ, me ödrin e he kö Hezekia me je ûkhaû adre kia, me thumeto e ge je hofuc ho Rabesake.
maintained by the British and Foreign Bible Society