At Khet 7
7
1E ÛNYI hnathu ien ae lung so hon wakaco ae so; ke ûnyi hnathu bong mok, hon bong ate o hnyin. 2E so he ka he ka hnyi uma ödra ka tenge hnyin, hon he ka he ka hnyi uma ödra ka bijeû hnyin: anyin a wale obiny tavat hia; ke ame he at ae möt ka ûnykûme e eû hnyi hnyekon. 3E so hloûhloû hon hluma: anyin ae so but hnyok hnen hnyimak ae menyöng. 4E bi hnyekon at ae metâ hnyi uma adre me tenge hnyin, ke e bi hnyekon tavat ae monu hnyi uma adre me senyin hnyin. 5E so he ka long ûthaö hnen at ae metâ, hon he ka long khumöng anyin tavat ae monu. 6Anyin ame fifica je wahleûhleû hmelen öt, ke helâe ûhlumainy at ae monu: ke thatûnyi e. 7Haba behom gânâ ame omonoâ at ae metâ; ke haba bwihlany ame okongoâ wâ ûnykûme. 8E so obiny ke ûnyi hon hwân: ke so hokhnyok hon hnyok bi gan. 9Ca logot hnyekom he ka hmonyin, anyin a haba hnyekon at ae monu, me wale hnyaban hmonyin. 10Ca ha bi, ka habe, A hawa ae so je bong a bân hon je bong ang? anyin ae ca meta bi hnam hna hnö e. 11E so metâ, ae ûcû e me hwajekhoû: eke, e ti beönua e ka tavat adre me wâ seûno. 12Anyin a haba metâ me hnân söng, helâ me mone bi me hnân söng: ke haba nuainy wâhmakhmeto a gʼ ame he metâ ka tuö möt anyin at ae tren e. 13Ûnykûme ju huliwa anyin Khong: anyin a ie at ae khana he ka owisa hnen hna ohwalö? 14Senyin dö hnyi bong sot, ke ûnykûme ju hnyi bonginy vec: Khong ame ânyâ khaca me me ûcon khaca, me me ca he bi at ka wâ ta je ûnyi ame he ka o hwaban e.
15Wale hia wânök hnyi je bong bongon anyik hnyok baû: e hu at ae wisa ame mokcu hnyi hwakecin ae wisa, ke hu bi at ae kong ame möt beû hmâ hnyi hwakecin ae kong. 16Ca he ka hwakecâm ae ti wisa; ke ca ogânâ hmönyinâ ânyâm metâ: anyin a ieû u me he ka hamâm hlingö u bi? 17U ma ca he ka ti kong, ke ca he bi ka monu: anyin a ieû u me he ka mok ke tiga ca ûâm bi? 18E so u ma kât ûnyi ang; eke, ca hom hmetu hnyamâm ûnyi hnyin: anyin a haba at ame outen Khong, me ame he ka o ûnyi hnyi je ûnyi e hia.
19E man hmonyin metâ ka at ae metâ hon tavat musi a ten hnyi taun. 20Anyin ae ba at ae wisa eang hmeledrany, a at ame ânyâ so kʼ ame ca ânyâ hulo. 21Ke haba khaca ca he ka hnyok bi ta je hofuc hia adre me ha; wâ u nye long athnyabaem me hangö u but: 22anyin e khanö u hnyi hnyekom minya a u je osehia hangâ keihen.
23Oge hia but ohnathoâ ta je ûnyi hia e hnen metâ: haingök, Oge me he ka metâ; ke e ame ûsâûkâûöâ mönya. 24Haba ûnyi ae sâkâû but, me dit hmonyin; ie at ae khana he ka wâ e? 25Oge me hwihwiö, me ûnykûme eû hnyi hnyekuk he ka khana, me elâm, me wâ metâ, me bongon ta je ûnyi, me khanö nya hnyikongon monu, me hwen monuiny monu: 26ke oge me wâ ke ûnyi ae hiny hon mok, wale momo a haba hnyekon bi me je hnewe me je ert, ke je ûnyi hnân ûce at li hnyamen: haba at ae so hnyi hnyimakan Khong, me ame he ka kec gan; ke ame he ka hnok at ae kong gan. 27Haingen at Khet, ka habe, Wâ bi, walang hnok hna wâ, iny ka tuluto ke ûnyi me ke ûnyi, me inye wâ bongon: 28wale oge me tiga elâm bi, ke oge me ca wâ bi: oge wâ but baga a khaca ûnyi hnyi thauzan; ke oge me ca wâ bi momo unyidra hia. 29Wâ bi, waleû ûnyi a khaca oge me wâ, a Khong ame op at he ka wisa; ke adre me elâm bi je biûnyi ae se hia.
maintained by the British and Foreign Bible Society