Mayịka 7
7
Izirẹlị Ḅẹ Apụ Si Amịẹaị
1Yei, ḅẹrẹ ị̀ la tẹẹ! À kịkarị ḅo anie, ḅuru-pọkọtarị ḅọ tẹ fịye-soku sakị ḅụ ịn sịnmgbọlụ kaịn fama tẹ gberie-sọ ẹrị-a ḅọ. Girepu-asịnmgbọlụ mamgba na, Figi-asịnmgbọlụ mamgba na gberie-sọ ḅarị ofori.
2Tamụnọ nimi tomḅọ ḅe tomikiri mẹ ḅụ fịị fa tẹ,
tẹ tomina-ogbo ḅio ḅụ karakara mịẹarị gbọrụḅọ-sọ ḅarị ofori;
inimgba ọmbie ọsụma ḅẹ sime koruarị,
tẹ ḅụọ-ḅụọ ịgbọ sụa amịna iyimbere pịrịarị.
3Siye mịẹ ḅẹ ye ḅụ mie ịna aḅara simearị ye, ini iḅiọkụ anị mịẹ sunma ḅẹ ḅara;
amadaḅọ owiḅọtụḅọ ḅe na ḅẹrẹkọnḅọ ḅe na,
ọḅụ-fị ḅẹ tẹ anị ḅiiarị,
tẹ opu tomḅọ ḅe nwẹnị ọ̀ ḅala ḅiiarị siye mẹ ḍukoarị;
mị-ḅara ḅụ ịn gbolomatẹ anị ḍorim.
4Ịna aḅụụ iḅitẹịn ḅọ ịga nangị piri sime-ḅara simem,
ịna aḅụụ karakara tẹịn ḅọ nangị ḅịḅị sime-ḅara simem.
Ene mẹ ḅo tẹ, Tamụnọ tomi ma fomu ḅẹ sakị mẹ,
ọ̀ wẹrịtẹ ịkịankoroapụ ma ḅụ ịna aḅeri nụnụ ḅara;
mịọkụ ịn ḅarị ḅịḅị-kẹ-ogbosọ nyana-a.
5Ḅarị ḅioḅẹngbọ kẹ mịnaḅọ ọgọnọ gbana ma,
ḅarị ikiaḅọ ḅụụ ḅiokpọ nyana ma;
árịma tẹ í ekpe ọgọnọ simearị ḅọ ma sọ,
ị́ ẹkwẹn kọn á pịrị ḅẹ ḅara nimii.
6 #
Mat 10.35,36; Luk 12.53 Mịna asakị ma ḅụ,
owiapụ-awọmẹ ịna aḍapụ kẹ oḅori atomi sịn-arị
eremịna-awọmẹ ịna iyingiapụ na tụḅụrụarị
Owiapụ sime-ereme ịna adiapụ iyingiapụ
na kamụ-sọ ma ḅọrọarị;
tomḅọ soku-ḅẹ warị ḅio ḅụ mie mḅọ na
fịya-a apụ emi ye.
7Kụma yẹrị kịngẹ ọkụma,
à tọrụ saakị KỊNỊNYANAḄỌ ḅe ḍiki ḅa,
arị ị̀ ḅọrọma mẹ ọkị-ḅo ḅarị Tamụnọ ḅe koru ḅa;
ị̀ Tamụnọ ḅe ori ị̀ naa ḅa.
KỊNỊNYANAḄỌ Ḅe Ori Atomi Ḅọrọma Ḅa
8Yei wamịnị na fịya-a apụ,
ọ́ wamịna-aḅụụ ḅioḅẹlẹ ma.
Wa ḅịkị sakị, wa pịkị saakị ḅa;
wa kanakana ḅio lẹgị sakị,
KỊNỊNYANAḄỌ ḅe bele sọ wa pịrị ḅa.
9Wa KỊNỊNYANAḄỌ ḅe ịganị mẹ inema nwenii,
ọ̀ wamịna ḅẹrẹ ịgbanị ḅa,
gbala wa ọ̀ ḅụụ ḅụ si mịẹm ẹrẹsị,
ọ̀ ḅẹrẹkọn wa da-paka tẹ.
Ọ̀ wa ọkị-ḅo bele mẹ ḅio suu ḅa;
wa tọrụngbọ kẹ ọ̀ ḍụa-ḅọrọma ẹrị ḅa.
10Anị sakị mie wamịnị na fịya-a apụ ma ẹrị ḅarịye,
tẹ ḅụụ-jịrị nwẹnị inima tẹ ḅẹẹm,
“Ndẹẹ KỊNỊNYANAḄỌ ọmịna Tamụnọ ḅe?” ḅẹẹ apụ ma gbaịn ḅa.
Wamịna atọrụngbọ ini ẹrị-ẹrị ḅioḅẹlẹ ḅa;
mịọkụ wa nwẹnị mẹnjị-ḅọrọ etela ma ḅẹ lịka nanga ḅara kẹ
ịn nanga-nanga kiri gbin ḅa.
11Jeruselemu ḅẹ apụ,
gbọrụ ene sime ọmịna onu ma nama pịrịm!
Anị ene mẹ ḅụ ọmịna ye-yọ mẹ ịn nwẹn
mịẹ finjima lama ḅa.
12Ọmịna atomi sime anga-sime anga ịn pịkịma ọ́ ḍọkụma-ḅo ḅa,
Asiriya ịrụa-saakịarị-anga mẹ ḅụ
ọkị mu Ijiputi suku-jụ ḅẹ ama ma la,
Yuferetisi ye-yọ mẹ ḅụ ọkị mu Opu Tọrụ mẹ la,
gbọrụ tọrụ ḅụ ọkị mu jen tọrụ la,
gbọrụ tụndụ ḅụ ọkị mu jen tụndụ la.
13Kụma tomikiri mẹ ḅo ịkpa sọ ḅa,
tomikiri mẹ ḅụ simearị apụ gotẹ,
gbala inima tẹ anị ḅụ angarị apụ ma,
sụa si-sịḅịḅio ẹrẹsị.
Izirẹlị Ḅẹ Apụ kọn Tẹkẹ
14KỊNỊNYANAḄỌ, ị́ mkpara kẹ anana-ḍikiḍikiḅọ sọ ị́ atomi pịrịị,
ị́ sẹlẹ ọkị tẹ atomi ma.
Wa mu ịkpa mẹ ḅio ḅele tẹ angam ḅẹsọ,
ḍụọ ḍiḅi iḅi kiri wa ikelema-korom;
yee elemu sakị ḅụ wa Basani na Giliyadi na ḅụ
ye kọn fị-fị ḅara kẹ ye kọn fị.
15KỊNỊNYANAḄỌ, ị́ ḅụụ-gbiripuma kọrịnama kọrị wa pịrịị.
Ijiputi ḅụ ị́ wa pakama-ḅo ene ma ḅụ
ị́ kọrị wa pịrị ḅara.
16Opu asịẹ ma nyana ịnyọ mẹmgba ḅụ,
ini ẹrị tẹ ḅụụ-jịrị ḅa;
ini ịna aḅara kẹ ịna aḅịḅị gbaịn ḅa,
tẹ ịna aḅeri iningi ḅa.
17In oronwi mẹnjị ḅara kẹ fọọn ḅio ikiri ḅa;
ḅalafa na ḅụụ-sẹkị na ḅụ,
ini ịna kụrọtẹ ḅụụ-kikima anga ḅụụ paka-ḅo ḅa.
Opu ḅalafa ḅụ ịn vuunma pịkị KỊNỊNYANAḄỌ,
wamịna Tamụnọ ḅe ḍọkụma-ḅo ḅa,
tẹ ẹrẹsị ịn siye ịn la ḅẹ kuroma nyana ḅa.
Izirẹlị Ḅẹ Apụ Ḅọrọma Mẹ na Tamụnọ Tokini Ḅịḅị Na
18Yei KỊNỊNYANAḄỌ, ị́ kịka jen tamụnọ ofori;
ị́ atomi ma ḅụ fịị-a tẹ ḍumo apụ ma,
í si-wẹrịso ịn pịrị famam.
Ị́ ịganị ḅụ sime gbamaso-a;
kụma í jike-a ḅẹlẹma kẹ wa ḍie mẹ,
ị́ ḅụụ-ḅẹlẹ ye sọm.
19Ị́ ọkụrụkụrụ mẹ pịkị siin gbọrụ sakị kẹ sime wa pịrị ḅa.
Ị́ wamịna asi nanga ḅa ị́ ḅụọ-suku ḅụ,
tẹ arịmgba kẹ tọrụ mẹ ḅẹ owolo ḅio wakị nguma ḅa!
20Ị́ wẹrịtẹ kẹ iḅere-iḅerea kụra-ḅio wamịna atẹngịapụ karịma ḅara,
ị́ í minini na, jike-a ḅẹlẹma na nyana ị́ atomi,
Ebira-amụ ḅụụ paka-ḅo apụ ma na, Jekọbụ ḅụụ paka-ḅo
apụ ma na pịrị ḅa.
(C) The Bible Society of Nigeria